DILONGI 11

Monisa Mayangi bo Wunkoluka mu Kibakala

Loma 12:11

DILONGI: Nyikuna mabanza ma batu ba kukuwa ayi wuba sadisa kusadila mambu banlonguka mu kukolukila mu kibakala.

Kotisa mambu wunlonga mu ntim’aku. Bo wunkubika dilongi dyaku, yindula mu bukyedika nkinza widi mambu wunlonga. Visa buboti mambu wunlonga mwingi wutubila mawu mu ntim’aku woso.
Yindula batu ba kukuwa. Yindula bwidi mambu wunkwiza tanga voti kulonga mankwiza sadisila bankaka. Yindula mu ziphila wulenda longila mambu beni mwingi batu ba kukuwa bavwa mawu nkinza.
Yolukila mu kibakala. Yolukila mu kifuza. Sadila binama bi nyitu ayi bika kizizi kyaku kimonisa mabanza maku mantima.

Keba mwingi wubika vuvisa batu ba kukuwa mu kuvutuka sadila beni binama bi nyitu. Phila wunyikunina binama bi nyitu yifweti ba tsundu. Monisa mayangi ayi kibakala bo wunlonga mambu mankinza ayi wunsadisa batu ba kukuwa kusadila mambu banlonguka. Bika vongisa batu ba kukuwa mu kusabisa mu phila wummonisa mayangi.