Mu Ǹkangu’itu wu lulama mwisi ko mfumu wuǹtambulanga ḿfutu. Kulandakana ǹtungulu wu baklisto batheti, miǹsadisi mi phisuka baǹtambulanga kiyeku ki ‘kusunga kimvuka ki Nzambi.ʼ (Mavanga 20:28) Bakhulutu abobo badi batu ba ndwenga na kinzambi kimboti mu kutwadisa kimvuka ayi mu ‘sunga mamemi, mu khambu kuba tundila, mu khambu kuba kwika, mu khambu tomba ḿfutu,’ vayi mu zola kuba sadisa. (1 Petelo 5:1-3) Mbi baḿvanganga tuḿbakilanga ndandu?

Ba tusadisanga ayi ba tukyebanga. Bakhulutu ba kimvuka, baǹtwadisanga, baǹsadisanga ayi baǹkyebanga kimvuka mu kiphevi. Kuzaba ti Nzambi wu bavana kiyeku beni ki ḿfunu, bawu basi ko zimfumu zi kimvuka vayi baǹsalanga mwingi nzingulu’itu yi ba yimboti ayi mayangi. (2 Kolinto 1:24) Bakhulutu ba kimvuka baǹtombanga zaba kadi mutu widi mu kimvuka buka ǹsungi wu mamemi.—Zingana 27:23.

Ba tulongisanga bu kuvangila luzolo lu Nzambi. Mu kadika lumingu bankulutu ba kimvuka baǹtwadisanga zikhutukunu ziǹkindisanga kiminu kitu. (Mavanga 15:32) Bawu ḿvawu baḿmonisanga ǹtungulu wumboti mu kutwadisa kisalu ki kusamuna, ba tulandakananga mu kisalu beni ayi ba tulongisanga ziphila ziǹkaka zi kusamunina.

Ba tukindisanga. Mwingi tu baka bu kukyebila kinzambi kitu, bakhulutu ba kimvuka ba tubilanga mu zinzo ove ku Nzo yi Kiǹtinu, baǹsadilanga Kibibila mwingi ku tuvana mbombolo.—Yakobi 5:14, 15.

Kubika kwandi lusadusu baḿvananga mu kimvuka, bakhulutu baǹkaka badi na bisalu baǹzingisilanga makanda mawu. Diawu tufweti bakinzikanga.—1 Tesalonika 5:12, 13.

• Kiyeku mbi bakhulutu ba kimvuka badi?

• Bwidi bakhulutu ba kimvuka baḿmonisinanga ǹkinza mu kadika mutu?

Kibibila kintubila mwa mangumba mwadi madi kiyeku mu kimvuka: Bankulutu ba kimvuka ayi minsadisi mi kimvuka. (Filipi 1:1) Mu bimvuka byoso, mwidi bakhulutu ayi minsadisi miwombu. Vayi, bwidi minsadisi beni ba tusadisilanga?

Bawu bansadisanga mwa dingumba di bakhulutu. Minsadisi mi kimvuka, ba ba ti batende voti bakhulutu, badi batu ba kinzambi kimboti, ba lufyatu ayi nzaki mu kusala. Bawu banludikanga ayi baḿvanganga bisalu mu nzo yi Kiǹtinu biǹtombilanga mangolo mu dyambu kusadisa kimvuka. Lusalusu alolo luḿvanganga bakhulutu ba kimvuka ba tala mboti kiyeku kyawu mu matedi kulongisa ayi kusunga mamemi.

Bawu baḿvanganga bisalu biǹkinza. Miǹsadisi miǹkaka miǹsolwanga buka miǹludiki mwingi kuyamba batu baǹkwiza mu zikhutukunu. Baǹkaka baǹkyembanga bisengo bi miǹkunga, baǹkabula bilongulu, kulunda zimbongo zi kimvuka ayi baǹkaka baǹkabulanga bitini bi zunga kwidi miǹsamuni mi kimvuka. Bawu ḿvawu baǹsadisanga mu kubongisa Nzo yi Kiǹtinu. Bakhulutu ba kimvuka balenda kuba dinda mwingi ba sadisa biboba. Kyosokwa kiyeku baǹtambula, baǹsalanga kyawu mu ǹtima woso, diawu tu ba kinzikilanga beni.—1 Timoteo 3:13.

Baḿvananga ǹtungulu wumboti wu babakala baklisto. Miǹsadisi mi kimvuka miǹsolwanga mu zikhadulu ziawu zimboti zi kiphevi bammonisanga. Bo baǹlonganga mu zikhutukunu, baǹkindisanga kiminu kitu. Ǹtungulu’awu mu kusamuna, wuḿbwelanga mangolo mitu mu kisalu ki kusamuna. phila ba kivenanga mu kusadisa baǹkaka, yiḿbwelanga mayangi ayi kinthwadi mu kimvuka. (Efeso 4:16) Kuǹtwala, Miǹsadisi mi kimvuka ba fwana, balenda ba bakhulutu ba kimvuka.

• Banani Miǹsadisi mi kimvuka?

• Banani Miǹsadisi mi kimvuka?

Mu Ngwizani Yimona yi Kibibila, dizina di Balanabasi ayi ḿvwala Polo ma tanguka beni. Bawu ba ba Miǹsungi mi Divula, baba bilanga bimvuka mu thangu’awu. Mu kibila mbi? Mu kyedika bawu, baǹtomba kukindisa kiphevi ki zikhomba ziawu. Diawu Polo ka tubila ti bika ‘tuavutuka ye tala zikhombaʼ bo badidi. Nandi wu ba wukubama mu kudyata kinanu mwingi kukindisa zikhomba. (Mavanga 15:36) Mawu makani Miǹsungi mi Divula badi mu thangu’itu.

Bawu ba tu kindisanga. Kadika ǹsungi wu divula widi kiyeku mu 20 ma bimvuka, ka fweti bela kinzenza kadika lumingu ayi mu khumbu wadi kafweti vutikila mu ḿvu. Tulenda baka khindusulu yiwombo kwidi zikhomba beni ayi bakazi bawu, enati wu kwela kadi. Bawu baḿvanganga mangolo ma kuzaba batende, bakhulutu mu kimvuka, ayi baǹzolanga ku tulandakana bo tuǹkwenda ka longisa baǹlongukanga yitu Kibibila. Baǹkwendanga na bakhulutu ba kimvuka, kusunga mamemi ma Yave ayi baḿvananga malongi maǹyinkunanga miǹtima mitu mu zikhutukunu zi kimvuka ayi zikhutukunu ziǹneni mwingi kutukindisa.—Mavanga 15:35.

Bawu baḿmonisanga ǹkinza mu baboso. Miǹsungi mi Divula baḿvwilanga beni ǹkinza mu kinzambi ki baboso mu kimvuka. Bawu baǹkutakananga na bakhulutu ba kimvuka ayi miǹsadisi miawu, mwingi kufyongunina ndyonzukulu yi kimvuka ayi kuba vana malongi, bo balenda kyebila buboti kiyeku kiawu. Baǹsadisanga miǹtwami ǹtwala mi kisalu mu kubwela phisuka mu kusamuna, ayi baǹtyanga kuzaba batu bamona mu kimvuka ayi ndyonzukul’awu yi kiphevi. Zinkomba beni badi banga bakundi ba kisalu ba kivananga mu kibila kitu. (2 Kolinto 8:23) Tufweti landakana kiminu kiawu ayi phila yi ba kivena mu sadila Nzambi.—Ebeleo 13:7.

• Kibila mbi Miǹsungi mi Divula baǹtadilanga bimvuka?

• Bwidi wulenda bakila ndandu mu kinzenza kiawu?

Ti kivuka ki monikini mu yendila nza, zimbangi zi Yave baǹkubikanga lusalusu mu dyambu kubomba zikhomba badi mu kyunda. Mangolo beni tuḿvanganga, mbonosonu yi luzolo lu kyedika lu twidi mu baǹkaka. (Yoane 13:34, 35; 1 Yoane 3:17, 18) Bwidi lusalusu beni luḿvewanga?

Tuḿvananga minkayilu. Bo nzala yi saba ku nsi Yuda, baklisto ku Antiokia ba fila lusalusu kwidi zikhomba ziawu. (Mavanga 11:27-30) Bo buawu, befo kuzaba ti zikhomba zitu, mu yendila nza ba monokono kivuka, tuḿfilanga minkayilu mu nzila yi kimvuka, mwingi kusadisa zitsatu ziawu zi ǹsuni ayi zi kiphevi.—2 Kolinto 8:13-15.

Tuḿvananga lusalusu. Bakhulutu baǹkalanga va zunga di monikini kivuka, baǹtombanga theti zaba ti babonso badi buboti. Dingumba di lusadusu diḿvananga bidya, ǹlangu, miḿvwatu, zinzo ayi baḿbukisanga ba lwedi. Zimbangi zi Yave ziwombo bazebi bisalu, bakivananga mu dyambu di kubwela myoko mu tunga zinzo zi batu, zinzo zi Kiǹtinu zi be tuluka mu kivuka. Kiǹtwadi kidi mu ǹkangu wu lulama ayi luzabu tuḿbakanga mu kusala va kimweka, ma tusadisanga kuba nzaki mu kisalu. Tu zebi ti tuǹkwendilanga mwingi kusadisa badi yitu ‘kiminu kimweka,’ vayi tuǹsadisanga baboso baḿmona ziphasi, na badi mu mabundu maǹkaka.—Ngalatia 6:10.

Tuḿvananga lusalusu lu kiphevi ayi tuǹkindisanga mayindu ma batu. Ba monokono kivuka baǹtombanga mbombolo. Mu thangu beni, bawu balenda kindusu kwidi Yave, ‘Nzambi yimbombolo yoso.ʼ (2 Kolinto 1:3, 4) Mu nyenzi tuǹlongisanga zikhanu zi Kibibila kwidi batu badi mu kyunda, tu bamosinanga ti Kiǹtinu ki Nzambi kyala manisa bivuka byoso biǹtwadisanga ziphasi.—Nzaikusu 21:4.

• Bwidi Zimbangi zi Yave ba fika sadisilanga batu bo kivuka ki be monika?

• Mbombolo mbi yi kiphevi tulenda vana kwidi baḿvuka?

Bosi kafwa, Yesu wu yoluka na minlandikini myandi va nkonzo: Petelo, Yakobi, Yoane ayi Andele. Bo ka bavana bidimbu bitedi thononu yi luyalu lwandi ayi bilumbu bitsuka, nandi wuvana kyuvu ki ḿfunu. ‘Nani Ǹnanga wukwikama wu dyela, mfumu’andi ka byeka mu sunga bisadi biǹkaka mwingi kaba vananga bidya mu thangu yi fwana?’ (Matai 24:3, 45; Malako 13:3, 4) Yesu bo kadi “mfumu” minlongisi myandi, wu kanikisa kubyeka ‘Ǹnanga’ mwingi kavananga minlandikini myandi bidya bi kimpevi mu bilumbu bitsuka. Nani Ǹnanga beni?

Mwa dingumba disolwa di minladikini mi Yesu. ‘Ǹnanga’ beni, wuzabikini buka Mwa Dingumba Diǹtwadisi di Zimbangi zi Yave. Wuḿvananga bidya bi kiphevi mu bisadi biǹkaka bi Yave. Befo tu kuǹtediminanga, ‘mwingi ka tuvana bidya mu thangu yi fwana.ʼ—Luka 12:42.

Nandi wuǹkyebanga dikanda di Nzambi. (1 Timoteo 3:15) Yesu wuvana kiyeku kwidi Ǹnanga wukwikama ki kutwadisa kisalu ayi ǹkangu wululama wu Yave va ǹtoto: Mu kukyeba kyuka kyandi, kukengidila kisalu ki kusamuna ayi kutulongila mu nzila yi bimvuka bitu. Mwingi ka tuvana bi tuǹtomba mu thangu yi fwana, “Ǹnanga wukwikama wudyela” wuǹkabulanga bidya bi kiphevi mu bilongulu bi tuǹnatanga mu kisalu kikusamuna ayi ndyatusulu yi zikhutukunu zi divula tuḿbakanga.

Nandi widi wukwikama mu kyedika ki Kibibila ayi mu kukyeba kisalu ki kusamuna tsangu zimona; widi dyela mu phila kaǹkyebilanga kisalu ki Klisto va ǹtoto. (Mavanga 10:42) Yave widi mu kusakumuna kisalu beni mu ndyonzukulu ayi phila ziǹkaka zi zabikisila kyedika.—Yesaya 60:22; 65:13.

• Nani Yesu ka bikila kiyeku ki kudikila miǹlandikini myandi mu kiphevi?

• Bwidi Ǹnanga kadidi wukwikama ayi wudyela?

Mu thangu yi baklisto batheti, mwa dingumba diǹtwadisi di ‘bapostolo ayi bakhulutu ba Yelusalemi’ baba salanga buka mwa dingumba diǹtwadisi, mwingi ba bakanga makani ma ǹkinza mu dizina di kimvuka kyoso ki baklisto ba solwa. (Mavanga 15:2) Mwingi kubaka makani, bawu baba bikanga Masonukwa ayi phevi yi Nzambi yi ba twadisa. (Mavanga 15:25) Wawu ǹtungulu baǹlandakananga thangu’itu.

Mu bawu Nzambi kaǹsadilanga mwingi kuvanga luzolo lwandi. Zinkomba zi solwa badi bisadi mu mwa dingumba diǹtwadisi, luzolo luwombo badi mu dyambu di Nzambi, luzabu mu mambu ma lumbu ka lumbu ayi ma kiphevi. Bawu baǹkutakananga kadika lumingu mo kuyindula zitsatu zi bakhomba mu nza yimvimba. Buka baklisto ba theti, bawu baḿfilanga malongi mabongulu mu Kibibila mu miǹkanda ove mu nzila yi Miǹsungi mi divula ayi batu baǹkaka. Mawu maḿvanganga dikabu di Nzambi di ba kinthwadi mu phila yi yindudila ayi kuma sadila. (Mavanga 16:4, 5) Mwa dingumba diǹtwadisi baǹkubikanga bidya bi kiphevi, baḿvananga mangolo kisalu Kiǹtinu ki kusamuna ayi kuvana biyeku kwidi zikhomba mu kimvuka.

Baǹlandakananga thwadusulu yi phevi yi Nzambi. Mwa dingumba diǹtwadisi baǹlandakananga thwadusulu yi Yave ayi Yesu klisto, ǹtu wu kimvuka. (1 Kolinto 11:3; Efeso 5:23) Badi mu dikabu beni, ba yimonisanga ko buḿfumu mu kimvuka ki Nzambi. Bawu na baklisto boso basolwa, baǹlandakananga ‘mwan’ameme [Yesu] koso kukankwenda.’ (Nzaikusu 14:4) Mwa dingumba diǹtwadisi baǹtondanga beni miǹsambu mitu tu ba dindilanga kwidi Yave.

• Mu baklisto ba theti, banani baba mu mwa dingumba diǹtwadisi?

• Bwidi mwa dingumba diǹtwadisi mu thangu’itu baḿbakilanga thwadusulu yi Yave?

Beteli dizina diǹsundula mu mbembo yi Hebelewu ‘Nzo yi Nzambi.ʼ (Ngenesi 28:17, 19) Dizina beni difwana mu kuzabikisa zinzo zi Zimbangi zi Yave mu nza yimvimba baǹludikilanga ayi baǹtwadisilanga kisalu ki kusamuna. Mwa dingumba diǹtwadisi didi ku Beteli yiǹneni ku divula di Nova York, nsi yi EUA, kuawu baǹkengidilanga zibeteli zidi mu zinsi ziǹkaka. Baǹsadilanga momo, badi buka dikanda. Baǹkalanga ayi baǹsalanga, baǹdilanga ayi baǹlongukanga Kibibila va kimweka. Diawu ba zabikini “dikanda di Beteli.”—Minkunga 133:1.

Kuma ku mboti ku batu ba kivananga. Babakala ayi bankyeto baǹzingilanga mu Zibeteli zyoso, badi batu ba kivana mu vanga luzolo lu Nzambi ayi kubwela myoko kisalu ki Kiǹtinu mu thangu ka thangu. (Matai 6:33) Ba tambulanga ko ḿfutu, vayi badi na bivinga bi kulala, bidya, ayi baḿbakanga mwa lusalusu mwingi kusumbila kyosokwa kima ba tidi. Kadi mutu widi na kisalu kyandi: Baǹsonikanga miǹkanda, baǹlambanga, baǹludikanga bivinga, baǹsekulanga bilongulu, baǹtulanga zifoto mu bilongulu, baḿbasisanga bilongulu, baḿbongisanga bisengu, baǹsukulanga miǹledi ayi tu tanga tu lembu.

Kibwangu ki kisalu kiwombo kiḿbwelanga mangolo kisalu ki kusamuna kiǹtinu. Kibila ki lutidi ǹkinza baǹtungilanga Zibeteli mu zitsi, mu dyambu di kuzabikisa kyedika mu bantu bonso. Mwa buku ayiyi mbonosono kivisa ki mambu. Yawu yi sonimina mu thwadusulu yi mwa dingumba diǹtwadisi, yi filwa kwidi mwa mangumba ma miǹsekudi mu nza yimvimba, bosi baḿbasisanga ayi baǹkabulanga mu kuvyoka 110 di bivevi di bimvuka mu nza yimvimba. Kubika kwandi kisalu ki miǹsekudi mi bilongulu, bawu baḿvananga lusalusu mu kisalu ki lutidi ḿfunu: Ki kusamuna zi tsangu zi mona.—Malako 13:10.

• Nani wuǹsadilanga ku beteli ayi lusalusu mbi baḿbakanga?

• Kisalu mbi kiǹswalu baḿbwelanga myoko ku beteli?

Ku Beteli batu badi bakabuka mu bisalu mu dyambu ku twadisa kisalu ki kusamuna mu zitsi. Kwidi mwa mangumba ma miǹsekudi mi bilongulu, miḿbasisi bilongulu mu bisengo, miǹludiki voti miǹkabudi mi bilongulu ayi baǹkaka baǹtulanga matangu ma bilongulu mu fono ayi mu bimona meso, tu tanga tu lembu.

Mwa Dingumba di Bakhulutu ba Filiali baǹtwadisanga bisalu. Mwa Dingumba Diǹtwadisi wuǹfyatilanga kisalu ki kukengidila kadi beteli ove filyali kwidi Mwa Dingumba di Bankulutu ba Filiali, mu lenda ba bankulutu batatu ba ndwenga. Bawu baǹsunzulanga kwidi mwa dingumba diǹtwadisi buǹkwendila kisalu ayi zi tsatu zitsi. Zitsatu beni baḿfilanga, ziǹsadisanga mwa dingumba diǹtwadisi ku nsikika malongi ma lusadusu mu bilongulu ayi mu zikhutukunu zi zineni ziǹkwiza. Mwa Dingumba Diǹtwadisi baḿfilanga thangu ka thangu muntu mu dyambu kuvana dyela mwa dingumba di bakhulutu di kadika Filyali bo bafweti kukebila kiyeku kiawu. (Zingana 11:14) Ntwadusulu ayi disolo di ḿfunu diḿvangama kwidi nzenza mwingi kukindisa ba kala mu tsi beni.

Baǹsadisanga bimvuka bi nsi. Bankulutu ba Filyali baǹkikinanga bimvuka bi mona. Vadi zikhomba ba kyebanga kisalu ki miǹtwadisi mi kisalu, bamisyoni ayi miǹsungi mi divula baǹsadilanga mu tsi beni. Bawu baǹsikikanga ndyatusulu yi zikhutukunu zi divula ayi zi mavula, baǹtwadisanga thungulu yi zinzo zi Kiǹtinu ayi baḿfidisanga bilongulu mu bimvuka. Mamonso maḿvagamanga ku filiali maǹludikanga kisalu ki kusamuna.—1 Kolinto 14:33, 40.

• Bwidi mwa dingumba di bakhulutu ba Filiali diǹsadisilanga mwa dingumba diǹtwadisi?

• Biyeku mbi biǹkyebwanga ku filiali?

Mo tubaka bu kusamunina mboti zitsangu zimona, mu zitsi ayi mu mimvila myoso, tuǹsekulanga bilongulu mu kuvyoka 750 di zimbembo. (Nzaikusu 14:6) Bwidi tuǹnunginanga mu kuvanga mawu? Mu lusadusu lu batu bansonikanga bilongulu ayi bankaka bansekulanga—baboso, zimbangi zi Yave

Bilongulu biǹsoniminanga mu Kingeleso. Mwa dingumba Diǹtwadisi diǹtwadisanga kisalu ki Dikabu di Miǹsoniki ku beteli yinene. Dikabu beni di miǹsoniki, diǹtwadisanga ayi diḿvananga biyeku kwidi miǹsoniki myoso, tona badi ku beteli yineni ayi zibeteli zi lwelu zidi mu zitsi ziǹkaka. Kubaka dikabu di miǹsoniki mu nza yimvimba, ma tusadisanga kuvana lusadusu mu matedi bikhulu byoso mu nza ayi batu baǹkwangalalanga mu kutanga mawu.

Bilongulu biḿfilwanga kwidi miǹsekudi. Ba kukikinina kilongulu ki ma mana kusonama, baḿfilanga kiawu mu mpila yi eletronika kwidi dikabu di miǹsekudi mu nza yimvimba; Bawu baǹsekulanga ayi baḿfyonguninanga kiawu. Mwingi basekula buboti bilongulu mu mbembo’awu, bawu baḿvanganga mangolo mu kusola bikuma bifwana bi manga vyakana na matanga mabongulu mu Kingeleso.—Mpovi 12:10.

Zi komputador ziḿbwelanga ǹswalu kisalu. Bukyedika ti komputador yilendi vinginina ko miǹsoniki ayi miǹsekudi. Vayi kisalu kilenda kwenda ǹswalu mu kibila ki zi dicionário ayi bisadulu biǹkaka bidi mu zi komputador. Zimbangi zi Yave bavanga kisadulu baǹtanguninanga (MEPS) kyawu kilenda dedikisa matanga mu zimbembo ziwombo. Mu nzila kisadulu beni, tuḿbakanga bu kuludikila matanga na zifoto ayi zi mfikula mwingi kubasisa ziawu mu miǹkanda.

Kibila mbi tuḿvangilanga mangolo amomo, ma kusekulanga bilongulu mu zimbembo ba manga kolukanga mu zi nsi ziwombo? Kibila Yave wuǹtomba ‘ti bantu baboso ba vuluswa ayi ba baka nzayilu yi kyedika.’—1 Timoteo 2:3, 4.

• Bwidi bilongulu bitu biǹsoniminanga?

• Kibila mbi tuǹsekudilanga byawu mu zimbembo ziwombo?

Ǹkangu’itu wu lulama wuḿbasisanga voti wuǹkabulanga mu kadi ḿvu, khama di mafunda di Bibibila ayi bilongulu biǹkaka. Tuǹtunganga, tuǹkyebanga Zinzo zi Kiǹtinu ayi zibeteli. Tuǹkyebanga zitsatu zi mafunda ma zibetelita, bamisyoni ayi tuǹsadisanga ba monokono kivuka. Ḿba wu yikuvusanga: kwidi kuḿbanga zimbongo beni?

Tu dindanga ko ḿfutu mu kisalu kitu, tu futisanga ko kitambuku ayi tu vangisanga ko nsinsanu. Tu zebi ti kisalu kitu ki kusamuna kiǹkwendilanga ḿboyo zimbongo, vayi tu dindanga ko ḿfutu. Dedi buḿmonisina levista A Sentinela yi ma dukisa khama di mi ḿvu, twidi lufyatu ti Yave wu tusakumunanga ayi “tulendi dinda ko lusalusu lu mutu katufutila kisalu ki kusamuna”—ayi tumavanganga ko!—Matai 10:8.

Bisalu bitu biḿvangiminanga mu minkayilu. Bawombo baǹkinzikanga kisalu kitu ki kulonga ayi baḿvananga minkayilu mwingi kubwela mangolo kisalu beni. Bafeka Zimbangi zi Yave mu nyenzi baḿvananga thangu, mangolo mawu ayi kyuka kiawu mu dyambu bwela vangisa luzolo lu Nzambi mu ǹtoto woso. (1 Lusansu 29:9) Mu Zinzo zitu zi Kiǹtinu ayi mu zikhutukunu zinneni, mwidi zikasu ba kubika mwingi kusadisa woso wutidi kuvana minkhayilu. Ove tulenda vanina minkhayilu beni mu nzila, jw.org. Miǹsukami buka nkyeto wu fwilu ǹnuni mu bilumbu bi Yesu baḿvananga minkayilu mu bilumbu bitu, miǹsadisanga kisalu kitu ki kusamuna. (Luka 21:1-4) Diawu wosokwa mutu wulenda ba kifu ki kuvana boso bu ka bakidi ayi ka yindudidi mu ǹtim’andi.—1 Kolinto 16:2; 2 Kolinto 9:7.

Tuzebi ti Yave wala bwela vana mangolo kwidi bo ba kuǹzitisa mu kyuka kiawu mu dyambu bwela mangolo kisalu ki Kiǹtinu, mwingi luzolo lwandi lu vangama.—Zingana 3:9.

• Bwidi ǹkangu’itu wu lulama wididi diswasana na binganga biǹkaka?

• Bwidi baǹsadilanga minkayilu miḿvanwanga?

Yi zabikini Nzo yi Kiǹtinu, kibila malongi moso baǹtwadisanga muawu madi ma Kiǹtinu ki Nzambi—ǹtu dyambu wu malongi ma Yesu.—Luka 8:1.

Bidi bibwangu bi mbwongimini yi Kyedika. Muawu baǹludikilanga kisalu ki kusamuna tsangu zimboti zi Kiǹtinu mu kimvuka. (Matai 24:14) Zinzo zi Kiǹtinu diswasana zidi mu ntungulu, ayi zifwana baǹsadilanga kwidi bimvuka biwombo. Mu miḿvu mi mavyoka, tuma tunga kumi di mafunda di Zinzo zi Kiǹtinu (maǹsundula ti tuǹtunganga zinzo 5 mu kilumbu) mu dyambu landakana mbwelumunu yi bimvuka. Buawu malenda bela?—Matai 19:26.

Ziǹtungulwanga mu minkayilu miḿvewanga mu ziawu. Minkayilu beni miḿfilwanga ku Beteli mu dyambu bimvuka ba baka zimbongo zi ludikila voti tungisila Zinzo ziǹkaka zi Kiǹtinu.

Ziǹtungulwanga kwidi batu ba miḿvila myoso ba kivana ayi ba khembu ḿfutu. Mu zi nsi ziwombo, ba vanga Mangumba Maǹtunganga Zinzo zi Kiǹtinu. Miǹtungi ayi miǹsadisi myawu, baǹkwendanga mu kadi kimvuka mu zitsi ziawu mwingi kusadisa kutunga Zinzo zi Kiǹtinu. Mu zinsi ziǹkaka, baḿvananga kiyeku kwidi Zimbangi zi Yave ba phisuka mwingi kutwadisa kisalu ki kuludika voti kutunga zinzo ziǹkaka zi Kiǹtinu mu mavula. Muma moso baǹsadilanga, baǹlutanga kukivana mu kisalu, Zimbangi zi Yave baǹkalanga va divula beni. Phevi yi Yave ayi mangolo ma kyedika ma ǹkangu’andi, maǹsadisanga kisalu beni.—Minkunga 127:1; Kolosai 3:23.

• Kibila mbi bibwangu bitu tuḿbwongiminanga Nzambi bi zabikini Zinzo zi Kiǹtinu?

• Bwidi buǹtungulwanga Zinzo zi Kiǹtinu mu nza yimvimba?

Zinzo zyoso zi Kiǹtinu zi Zimbangi zi Yave, ziǹzitisanga dizina dilongo di Nzambi. Diawu, khini tuḿmonanga ku dyodisanga ayi kuludikanga ziawu bumboti. Baboso, balenda sala mwingi kudyodisa ziawu.

VVa tsuka zikhutukunu bwela myoko mu kudyodisa. Va tsuka zikhutukunu zyoso, zinkomba zi babakala ayi zi bankyeto baǹkombulanga Nzo yi Kiǹtinu mu ǹswalu. Nkumbu yimweka mu lumingu Tuǹdyodisanga nzo yoso. Ǹkulutu wu mweka wu Kimvuka ove Ǹsadisi, baǹtwadisanga kisalu beni. Mutu ka mutu wulenda sala boso bu ka tididi, kukombula, vyokisa kitendi mu bikundu, mu zinela, kuloza tsodo, kyeba biteka ayi ǹlumbu. Tufweti vanga mawu ǹtulu wu mweka mu ḿvu. Kumonikanga mu bisalu beni ku Nzo yi Kiǹtinu, kuǹsadisanga bana balezi ba kinzika yawu.—Mpovi 5:1.

Wukivana mu kisalu ki kubongisa. Mu ḿvu, baǹkengidilanga Nzo yi Kiǹtinu bo yididi mu khati ayi mu bibaka. Mfyongununu beni yiǹsadisanga Nzo yi Kiǹtinu yi ba yimboti. (2 Lusansu 24:13; 34:10) Nzo yi Kiǹtinu yi dyodila ayi yimboti, yawu yi fwana mu kubwongimina Nzamb’itu. Kumonikanga mu bisalu beni, mbonosonu yi luzolo lwitu mu Yave ayi va bwangu tu kuḿbwongiminanga. (Minkunga 122:1) Diawu, dilenda vanga batu baǹkaka ba zitisa Yave.—2 Kolinto 6:3.

• Kibila mbi tufweti dyodisilanga Nzo yi Kiǹtinu?

• Mbi biḿvangamanga mwingi kubika Nzo yi Kiǹtinu yi dyodila?

Tidi bwela luzabu lwaku mu matedi Kibibila? Tidi bwela visa maǹtuba lutangu lu Kibibila, mutu, bibwangu ove byuma biǹkaka bisonama mu Kibibila? Wumana yikuvusa ti dyambu di Nzambi dilenda kusadisa mu mambu ma kutatisanga? Diawu, sadila kiswekulu ki zibuku kidi ku Nzo yi Kiǹtinu.

Kwidi bilongulu bi mboti bi luzabu. Ḿba ngyewu wisi ko mu mbembo’aku bilongulu byoso bi Kibibila bisamuna Zimbangi zi Yave. Angi kiswekulu ki zibuku kidi ku Nzo Kiǹtinu, kwidi zibuku ziwombu zimona ngyewu khambulu. Kulenda ba zimbangudulu ziǹkaka zi Kibibila, zi dicionario zimboti ayi biǹkaka. Bwisa kwaku mabanza mu kusadila kiswekulu beni va thononu ove va tsuka zikhutukunu. Kulenda ba komputador mwidi Watchtower Library (kiswekulu ki zibuku Torre de Vigia). Kidi kisadulu mwidi bilongulu bitu, kiǹlengisanga kisalu ki kutomba dyambu wu tidi zaba, kikuma ove lutangu lu Kibibila.

Ǹkinza kidi kwidi miǹlonguki mi kikola Nzingulu ayi kisalu Kitu. Boti wusonama mu kikola beni, buna kiswekulu ki zibuku kidi ku Nzo Kiǹtinu kilenda kusadisa bo wuǹkubika kiyeku kyaku. Nkulutu wuntadilanga matedi kikola Nzingulu ayi kisalu Kitu, nandi wuǹkengidilanga matedi kiswekulu ki zibuku kidi ku Nzo Kiǹtinu. Nandi wuḿbwelanga muawu, bilongulu bimona ayi wuǹludikanga biawu buboti. Wulenda tomba lusadusu kwidi nandi ove ǹlongisi’aku bu kusadila kiswekulu beni. Twisi ko ǹswa mu nata bilongulu ku nzo. Fweti sadila buboti zi buku ayi bika sonika muawu.

Kibibila kiǹsudikisa ti, mo wubakula nzayilu yi Nzambi fweti vanga mangolo mu tomba yawu buka palata. (Zingana 2:1-5) Kiswekulu ki zibuku kidi ku Nzo Kiǹtinu kilenda kusadisa mu kutona tomba.

• Bilongulu mbi bikubakudila bi wuǹtomba bidi mu kiswekulu ki zibuku kidi ku Nzo yi Kiǹtinu?

• Nani wulenda kusadisa mu kusadila mboti kiswekulu ki zibuku kidi ku Nzo yi Kiǹtinu?

Yesu Klisto wukamba miǹlonguki myandi: ‘Bika kyenzulu kyeno va thadisi bantu, phasi bamona mavanga meno ma mboti ye kembila tat’eno diena mu mazulu.ʼ (Matai 5:16) Diawu tuǹsadilanga mboti tecnologia ayi khondi mayo ntangu’ayiyi. Nzil’itu mu khondi mayo, jw.org, tho zitsangu ziǹzabikisa matedi kiminu kitu mu klisto ayi kisalu ki Zimbangi zi Yave. Mbi wulenda bakula mu nzil’itu yi khondi mayo?

Mimvutu mi byuvu batu bawombo baǹkuvulanga. Wulenda bakula mimvutu mi byuvu biluti ǹkinza. Buka Bukyedika ti Ziphasi Zyala Mana? Bukyedika Kwandi ti Bafwa Balenda Bwe Zinga? Mimvutu mindi mvandi mu khond’itu mayo yeka kuvyoka 600 di zimbembo. Ngyewu ḿvaku wulenda tanga Tradução do Novo Mundo yi masekulu mu kuvyoka 130 di zimbembo ayi bilongulu biǹkaka bilenda kusadisa kuvisa mboti Kibibila, banga buku Mbi Kibibila Kilenda kutu Longa? ayi zilevista zi ngonda ka ngonda Kibanga ki Nsungi ayi Despertai! Bilongulu abyobyo biǹkaka wulenda kuwa biawu mu fono voti kulula biawu mu MP3, PDF, ayi EPUB. Wulenda kwaku basisa zi nsyelo zi matanga madi mu zimbembo ziǹkaka mwingi wu vana badi mawu ǹkinza. Bilongulu mu bimona meso, bima vyoka sekulu mu 20 ma zimbembo zi myoko. Wulenda kulula matanga ma Kibibila madi mu fono, madi mu bifwani, ayi miǹkunga mi mboti mi wulenda kuwa mu thangu yi wuḿvuvisila.

Zitsangu zi kyedika zitedi Zimbangi zi Yave. Tubwe tulanga zitsangu zimona ayi bimona meso biǹtubila kisalu kitu ki kusamuna mu nza yimvimba, ayi maǹkaka matedi Zimbangi zi Yave na mangolo ma tuḿvanganga mu kusadisa batu ba monokono kivuka. Wulenda zaba matedi zikhutukunu zi mavula ziǹkwiza ayi zaba zi tsangu zitedi zi beteli ziǹkaka.

Ziawu Ziphila zi kyenzudila kyedika mu nza yimvimba. Batu boso mu nza yimvimba badi mu kubaka lusalusu na badi ku Antártida. Twidi mu kusambila “phasi mambu ma [Yave menda] ntinu” mu nza yimvimba mwingi kukembisa Nzambi.—2 Tesalonika 3:1.

• Bwidi nzil’itu yi nkondi mayo jw.org yidi mu kusadisila batu mu longuka kyedika ki Kibibila?

• Mbi tidi kumona voti kukulula mu nzil’itu yi khondi mayo?