Mambu Maswama Ngyewu Wuǹkwiza tya Kuzaba

Bamana kukamba dyosokwa dyambu diswama?—a Kibibila kiǹtubila mambu maswama maǹkiza baǹtedilanga “maswama manlongo.” Ba kumatedilanga mambu maswama kibila bantu basa mazaba ko. Madidi manlongo kibila ma fumina kwidi Nzambi. Ayi zimbasi batomba kuzaba mawu. Tidi kuzaba mambu mbi maswama?—

Va ntonono Nzambi wuvanga dibakala ayi nkyeto wunteti, mazina mawu maba Adami ayi Eva. Bawu baba zingilanga ku paladizu lumbu lumboti Nzambi kavanga, katedila Edeni. Bo ti Adami ayi Eva batumamana Nzambi, nkanu bawu ayi bana bawu ba balulu ǹtoto woso wuba Paladizu dedi bubela lumbu lu Eden. Ayi babina zinga mvu ka mvu ku Paladizu. Ngyewu, wuǹtebuka moyo mbi Adami ayi Eva bavanga?—

Adami ayi Eva basa tumamana ko Nzambi, diawu befu tu nkambu zingilanga ku Paladizu. Angi Nzambi wutukanikisa ti wala balula ǹtoto Paladizu mwingi bantu bazinga mvu ka mvu mu mayangi. Bwidi Nzambi kala vangila mawu? Tona mu ntama bantu basa zaba ko bwidi Yave kala vangila mawu, kibila maba mambu maswama.

Bo Yesu kaba va ǹtoto, nandi wutubila matedi mambu beni maswama. Nandi wutuba ti mambu beni matedi Kiǹtinu ki Nzambi. Diawu kalongisila bantu mu lusambulu ba dindanga Kiǹtinu ki Nzambi kiza. Kiǹtinu ki Nzambi kyala balula ǹtoto paladizu yimboti.

Ngyewu, be tya kuzaba mambu beni maswama?— Zaba kwaku ti bo baǹtumamananga Yave bawu to bala zingila ku Paladizu. Kibibila kidi binongo biwombo bi bantu ba tumamana Yave. Tidi kubwela zaba matedi mu bantu beni?— Twanlonguka mpila bantu mbi bawu baba ayi malongi mbi tulenda longuka mu bawu.