Biuvu Bi Mintangi

Bo Satana kakamba Eva ti kasinkuiza fua ko na kudia dikundi di nti wu nzayilu wu mambu mamboti ayi mambi, bukiedika ti nandi waba kamba Eva ti batu badi muela wukhambu fuanga, dedi bo banlongilanga bubu?

Ḿba ndamba. Satana kasa kamba ko Eva ti na kudia dikundi beni, wala monika buka ti wufua vayi nandi wala tatamana kuzinga mu kipheve. Nandi kasa tuba ko ti vadi kinama mu nyitu Eva (bantanguninanga bubu muela wukhambu fuanga) kiala tatamana kuzinga ku khonzu yinkaka. Mu kusadila nyoka, Satana wukamba Eva: ‘Muisinkuiza fua ko’. Mu phila ayoyi, nandi wuba tomba kukamba Eva ti na kudia dikundi di nti beni, nandi wala tatamana kuzinga ayi wala baka luzingu lulutidi—Lukhambu tuadusu kuidi Nzambi.—Ngenesi 2:17; 3:3-5.

Boti malongi amomo mantuba ti befu tuidi muela wukhambu fuanga, masa basikila ko ku Edeni, abu kuidi mafumina? Befu tuzabizi ti mbuongimini yi luvunu yi bungua mu khuka yi minlangu mu thangu Nowa. Ni mayindu mamueka ma luvunu masa tatamana ko. Kibila bisadi bi Yave bawu to bavuka: Nowa ayi dikanda diandi.

Diawu tulenda tuba ti, malongi amomo mantuba ti muela wufuanga ko mamonika bo khuka minlangu yivioka. Bukiedika bo Nzambi kavanga batu boso ku Babeli kutona kukoluka zimbembo ziviakana ayi bo batu beni batiamuka ‘mu nza yimvimba’, bawu ḿba banata diyindu adiodi dintuba ti batu badi muela wukhambu fuanga. (Ngenesi 11:8, 9) Kheti malongi amomo matona mu thangu yikhulu voti bubu, tuisi ko divuda ti ‘Tata wu luvunu’, Satana Nkadi’ampemba widi kumbusa luvunu alolo ayi wunkuangalala beni kumona luvunu alolo kutiamuka mu nza yimvimba. —Yoane 8:44.