Tatamana Kutuadisa Kithuadi Ayi Ndembama
MVUALA Polo wukamba kuidi baklistu ku Efeso muingi mu ‘luzolo, bamonisanga mvibudulu mu bankaka ayi bavanga mangolo muingi kutuadisa kithuadi ayi ndembama.’—Efe. 4:2, 3.
Kithuadi bantumbila mu lutangu alulu luidi “kithuadi ki phevi.” Mawu mansundula, kithuadi kinkuizilanga kuidi Nzambi mu nzila phevi yinlongo. Vayi dedi bo mvuala Polo katubila, tufueti tatamana kuvanga mangolo muingi kutuadisa kithuadi. Nani kafueti vanga mawu? Kadika mutu mu befu kafueti vanga mangolo muingi kithuadi kinkuizilanga mu phevi yinlongo kitatamana mu khat’itu.
Yindula boti bama kuvana dikalu dimona. Ngie veka wufueti kieba buboti dikalu beni. Diawu, wulendi vana ko bankaka foto boti dikalu beni di bevavuka kibila ngie wusa kieba ko diawu buboti.
Bobuawu mvandi, kheti kithuadi kitu kidi nkhailu Yave ka tuvana, kadika mutu mu befu widi kiyeku ki kukieba kiawu muingi kitatamana. Boti tuidi kimbeni na khomba mueka mu kimvuka, tufueti kuyikuvusa: ‘Bukiedika ti yidi mu kuvanga khonzu’ama muingi kudedikisa mambu ayi kutuadisa kithuadi?’
VANTOMBULU MANGOLO MUINGI KUTUADISA KITHUADI
Dedi bo mvuala Polo katubila, khumbu zinkaka vala tombulu tuvanga mangolo mawombo muingi kutuadisa kithuadi. Bulutidi boti khomba mueka be tulueka ntima. Vasintombulu ko kubue tubila matedi mambu tube bakasana na khomba mueka muingi kutuadisa kithuadi. Tulenda kuyikuvusa: “ Bukiedika ti minu kubue tuba mambu mamonikina mankuiza tuadisa kithuadi voti mankuiza buedisa mambu beni?” Thangu zinkaka, vantombulu to kulemvukila ayi kuzimbakana mambu beni.—Zinga. 19:11; Mala. 11:25.
Wukiyuvusa: ‘Kubue tubila mambu mamonikina mankuiza tuadisa kithuadi, voti mankuiza buedisa mambu beni?’
Mvuala Polo wu tukamba tumonisanga mvibudulu mu luzolo. (Efe. 4:2) Referência yimueka yituba ti bikuma abiobio bilenda sundula “kuvitika mutu”. Mawu mansundula ti befu tufueti vitika ti zikhomba zitu badi batu ba basumu dedi befu. Tumvanganga mangolo muingi kuvuata “kimutu kimona.” (Efe. 4:23, 24) Vayi tulendi vanga ko mawu mu phila yivedila. (Lom. 3:23) Befu kukikinina mu mambu amomo, disinkuiza ba ko diambu diphasi kuvibidila mu bankaka, kuba lemvukila ayi kutuadisa kithuadi.
Befu kudedikisa mambu na bankaka kheti mu ntima, tuala tatamana mu ndembama. Kikuma ki kingeleku basekudila “kithuadi” mu Efeso 4:3 kilenda sundula “kunama” mu Kolosai 2:19. Dedi bo madikulu mantuadisanga kithuadi mu mimvesi, ndembama ayi luzolo kuidi zikhomba, lu tusadisanga kuba fikama ayi kuba mu kithuadi kheti tuidi disuasana befu na befu.
Diawu, boti khomba mueka be tulueka ntima, bika kufika mfundisa, ayi vanga mangolo muingi kunlemvukila. (Kolo. 3:12) Mu kuba batu ba masumu, befu mvitu tumana lueka ntima wu mutu wunkaka. Kuyindula mu mawu kunkuiza tusadisa kuvanga khonzu’itu muingi kutuadisa kithuadi kinkuizilanga mu phevi yinlongo.