DILONGI 6

Monisa bumboti mboti phila yi sadila mayindu ma verse

Yowani 10:33-36

MU BUKHUFI: Kadi sukila kaka mu tanga verse, ayi kumanima wuvioka mu dibanza dinkaka. Tula ngolo batu bamona nguizani yidi mu verse yo metanga ayi mambu mo wulembo longi.

PHILA YI KUBUTUDILA:

Totula ziphova zimfunu. Ngeyo mana tanga verse yimosi, totula ziphova zio zidedikini ayi mambu mo wulembo tubila. Muingi wubutudila, wulenda vutukila ziphova beni voti yuvula batu kiuvu kio maki basadisa bamona ziphova beni.

Enati sadidi ziphova zinkaka mu diambu di totula diyindu di verse, wukiyuvula keni disi ntula ko mvualangani mu mintu mi batu, keni disi kuiza ba ko phasi bamona phila ziphova beni zidedikini ayi diyindu dio wulembo tubila.
Totula diyindu dimfunu. Enati tuamina wutanga verse, monisini mfunu wo weka yitangila, sudikisa phila yo ziphova beni zidedikini ayi mfunu beni.

Thangu wulembo sudikisa verse yo metanga, bika Bibila kiba kizibuka. Diawu madi sadisa batu bamona ti ziphova ziaku zidedikini ayi mambu mo metanga.
Kadi vuadikisa mambu bo weka m’bimisa dilongi. Kadi tubila mambu mankaka madi mu verse mo makembolo kuandi nguizani ayi diambu dio wulembo tubila. Ngeyo mana tadila mambu mo batu bazebi mu ntu diambu beni, sobula mayindu mbi ma verse mawu tubila mu diambu dilongi dibima bumboti ayi batu basimba mfunu wu diawu.