DILONGI 11
Mbi fueti tula mosi wubaka mamboti mawombo mu thangulu’aku yi Bibila?
Wume teka ba va ntuala lukanu lumosi lunneni ludukisa? Thangu zinkaka phila lukanu beni lubela lunneni luvongisa . . . Mosi wubika lumona phasi, bulendakana wuluvasa bitini tini muingi wuludedikisa. Buawu phe tufueti tudila thangu tutidi tanga Bibila. Thangu zinkaka wulenda kiyuvusa ve va tonina. Mu dilongi diadi, matumona phila yo yikondolo phasi yo mayisadisa mosi wuyangalala tanga Bibila.
1. Bila mbi yididi mfunu mu tanga Bibila kadika lumbu?
Mutu nioni weta tanga Bibila kadika lumbu, voti “nsiku Yehova,” wela ba mu mayangi ayi wela nunga mu zinzila ziandi. (Tanga Minkunga 1:1-3.) Muingi wutona, meka tanga Bibila mu mua ndambu thangu kadika lumbu. Buawu wela luta zabila Bibila ayi wela luta yangalala kukitanga.
2. Bue wulenda luta bakila mamboti mu thangulu’aku yi Bibila?
Muingi wuluta baka mamboti mu thangulu yi Bibila, fueti bakanga thangu yi yindudila mambu momo wulembu tangi, yinsundula kuma “fionguninanga.” (Yosua 1:8, noti) Bo wulembu tangi, wukiyuvusa: “mambu mama ndime tanga, mbi mandongidi mu diambu di Yehova? Bue ndilenda ku masadila mu luzingu luama? Bue ndilenda kumasadisila batu bankaka?”
3. Bue bubakila thangu yitangilanga Bibila?
Wukadi nunga baka thangu yitangilanga Bibila? Wisi ko ngeyo veka. Tula ngolo wusadilanga “mboti mboti thangu’aku.” (Efeso 5:16) Mu kifuani, lenda sobula thangu yitangila Bibila kadika lumbu. Bankaka beta kitanga nsuka nsuka, bankaka va midi, bankaka va masika tuamina baleka. A ngeyo thangu mbi mueni yifuana yitangilanga Bibila?
TUVISA MBOTI MBOTI
Tutala mbi wulenda tula muingi wuluta zola tanga Bibila. Tutala diaka, bue wulenda kubimina muingi wuluta baka mamboti mu ndongokolo’aku yi Bibila.
Bobuawu tulenda longukila zola dia bidia binkaka, buawu kuandi tulenda longukila zola tanga Bibila
4. Longuka zola tanga Bibila
Tanga Bibila, phasi kukala va thonono. Vayi lenda ‘‘kuaku longuka zola kukitanga’’, banga mutu lembu longuka zola dia bidia bimosi kakadidi ko. Tanga 1 Piela 2:2 ayi vana mvutu mu kiuvu kiaki:
Wum’banzila ti ngeyo tanganga Bibila kadika lumbu, wela luta kizola ayi wela vingilanga thangu yikukitangilanga mu phuila?
Tala VIDEO muingi wumona bue bantueni balongukila zola tanga Bibila. Ayi vana mimvutu mu biuvu biabi bilandikini.
Mambu mbi maphasi banunga mu diambu di bazola tanganga Bibila?
Mbi bibasadisa muingi badukisa lunkanu lo bakitudila?
Mbi bibasadisa muingi baluta zola tanga Bibila?
Mambu mo malenda kusadisa mosi wutona tanga Bibila:
Sobula mbangudulu yimboti ayi yi bilumbu biabi. Meka theti Traduction du monde nouveau ti yidi mu mbembo’aku.
Tonina mu tini kioki weta luta mona khini. Mawubaka mayindu va phapi “Mosi wuyangalala tanga Bibila.”
Sonika mambu mo metanga, sadila phapi “Lutangulu luama lu Bibila.”
Sadila JW Library®. Mu nzila aplikasio beni wulenda tanga voti wa zi odio zi Bibila, voso kuandi widi mu telefoni voti mu apareyi yinkaka.
Tala zi annekisi zi Traduction du monde nouveau. Zikarte, zitablo ayi zilekisike, biela kusadisa wuluta yangalala tanga Bibila.
5. Kubikanga ndongokolo’aku yi Bibila
Tanga Minkunga 119:34 ayi vana mimvutu mu biuvu biabi:
Bila mbi lusambulu luididi mfunu tuamina wutanga Bibila voti wukubika ndongokolo’aku yi Bibila?
Mbi wulenda tula muingi wuluta baka mamboti mu kadika ndongolo’aku yi Bibila? Mu thangu wulembu kubika dilongi dimosi di buku yayi, meka phila ya yilandikini va wanda vava:
Tanga ziparagrafi zidi va thonono yi dilongi.
Tanga ziverse zi Bibila, zidi mu paragrafi ayi tomba sudika nguizani yo zidi ayi diyindu dio batubidi mu paragrafi.
Tula dimbu mu mayindu mangudi mo malembu vani mvutu mu kadikadi kiuvu, diawu madi sadisa mu thangu luela soludila dilongi beni ayi nioni weta longuka yaku.
Wubedi buzabilanga?
Bambangi zi Yehova basadila zimbangudulu ziphila mu phila zi Bibila, vayi tueta zola, La Bible. Traduction du monde nouveau bila yidi yikiedika, yisi ko phasi mu kuyisudika ayi yi sadidi dizina di Nzambi.—Tala disolo “Batatoli ya Yehova bazalaka na Biblia na bango moko?” mu internet.
BATU BANKAKA BETA TUBA TI: “Bibila phasi kidi mu kukilonguka. Ayi kukilonguka yidi viokisa thangu phamba.”
A ngeyo bue wum’banzila?
MU BUKHUFI
Mosi wuluta baka mamboti mu thangulu’aku yi Bibila, sobula thangu yi kukitangilanga, tulanga lusambulu muingi wusudika mambu mo wuntanga ayi kubikanga ndongokolo’aku yi Bibila.
Phutukulu
Bue lenda lutabakila mamboti mu thangulu’aku yi Bibila?
Thangu mbi wulenda sobula mu diambu di tanga ayi longuka Bibila?
Mamboti mbi lenda baka ti wulembu bongisa ndongokolo’aku yi Bibila?
TALA MAMBU MANKAKA
Mabanza mo malenda kusadisa mosi wuluta baka mamboti mu thangulu’aku yi Bibila.
“Ndenge ya kozwa matomba na botángi ya Biblia” (Linɔ́ngi ya Mosɛnzɛli No. 12017)
Phila zitatu zitangila Bibila.
Mbi fueti tula mosi wuyangalala tanga Bibila?
Batu bobo beta tanga Bibila tona thama bamonisini mambu mo tufueti tula muingi tubaka mamboti mu thangulu’etu yi Bibila.