Nkanda wowo wulenda kutusadisa tumonisa mvibudulu mu bukuikama tii kutsuka

1-2. a) Mambu bue mabela ku Yuda mu thangu thumu Polo kasonikina basi Ebelewo nkanda? b) Bila mbi nkanda beni wubela mfunu wombo kuidi bawu mu thangu beni yina?

BAKRISTU ba Ebelewo bo beba zingilanga ku Yelusalemi ayi ku Yuda badengana mambu maphasi kumanima ma mimvu miomi milandakana lufua lu Yesu. Mu thangu beni yina, kimvuka ki Bukristu kiyiza totuka, ayi Bakristu badengana zithatukusu zingolo. (Mav. 8:1) Ayi kumanima ma 20 ki mimvu, minlonguki mi Kristu bayiza dengana zithatukusu zingolo mu mambu matedi zimbongo, bulendakana zithatukusu beni zitotuka mu bila ki nzala yoyi yibe monisanga batu phasi mu thangu beni yina. (Mav. 11:27-30) Vayi, mu mvu 61 T.E., Bakristu bayiza ba mu thangu yindembama mu tadila zinzomono ziozi zieba kubavingila. Mu thangu beni yina, babaka nkanda wu thumu Polo wo wusonimina mu lutuadusu lu pheve santu ayi babakila nkanda beni mu thangu yifuana.

² Basi Ebelewo babakila nkanda beni mu thangu yifuana bila ndembama yoyi Bakristu baba mu thangu beni yina, yisi zingila ko. Polo wuvana zindongi zifuana zio zisadisa Bakristu baba bafuana mu monisa mvibudulu mu ziphasi ziozi bayiza dengana kuntuala. Mbebusulu yi mambu ma Bayuda, yoyi Yesu kabikula, yiyiza fikama. (Luka 21:20) Kadiambu ko, Polo ayi Bakristu ba Bayuda basi zaba ko bukiedika thangu mbi mbebusulu beni yela saliminina. Kadiambu ko buawu, Bakristu beni baba bafuana mu sadila thangu yoyi yibasiala muingi bakikubika mu yonzula bikadulu banga minu ayi mvibudulu.​—Ebe. 10:25; 12:1, 2.

3. Bila mbi nkanda kuidi basi Ebelewo wulutidi tadila Bakristu mu lumbu kiaki?

³ Fioti fisiedi tueka nduka dengana ziphasi zinneni ziozi zilutidi viokila ziozi zidengana Bakristu ba Ebelewo. (Mat. 24:21; Tso. 16:14, 16) Tutadila mua ndambu zindongi zifuana ziozi Yehova kavana kuidi Bakristu beni ayi ziozi zilenda kutusadisa mu lumbu kiaki.

“YONZUKA MU KIPHEVE”

4. Mambu mbi maphasi Bakristu ba Bayuda badengana? (Tala phe foto.)

⁴ Bakristu bo baba mu dikanda di Yuda badengana mambu manneni maphasi. Mu thangu mosi plina, Bayuda baba dikanda diodi disobulu kuidi Yehova. Yelusalemi kiba buangu ki ntoto ki Kipfumu ki Nzambi, ayi kinlongo kiba buangu ki tsambudulu yivedila. Bayuda boso bakuikama beba landakananga nsiku wu Mose bobuawu bobo beba kuwusudikisilanga kuidi bapfumu zi mabundu. Malongi beni mana meba vanganga diambu mu phil’awu yi ndiwulu, mu phila yoyi beba tadilanga zengu nitu, ayi mu phila yoyi beba tadilanga batu bobo basi ba ko bayuda. Vayi, Yehova keba bue kikininanga ko minkayilu miomi bayuda beba vananga kumanima ma lufua lu Yesu. Diyiza ba diambu diphasi kuidi bayuda bo bayiza ba Bakristu, bo baba kifu kitumukinanga nsiku. (Ebe. 10:1, 4, 10) Buba phe Bakristu bo bayonzuka mu kipheve, banga thumu Piela, bamona phasi mu yuku mu mambu momo mayiza baluka. (Mav. 10:9-14; Nga. 2:11-14) Mu bila ki mambu mamona momo bayiza tona wilukila, Bakristu beni bayiza tona kubamonisa phasi kuidi bapfumu zi mabundu.

5. Mu diambu mbi Bakristu bafuanina bela bunzumbi?

⁵ Bakristu ba bayuda badengana kimbeni ki mintindu miodi mi batu. Kitheti theti, kuba na bapfumu zi mabundu ba bayuda bobo beba kubatadilanga banga bambeni zi mambu ma Nzambi. Mu buela, batu bankaka bo bamonika banga Bakristu, beba kuikanga mu kingolo balonguki ba Kristu batatamana tumukina minsiku mi phila mu phila mi Mose, bulendakana mu diambu di babika dengana zinzomono. (Nga. 6:12) Mbi bisadisa Bakristu bakuikama baba basiama mu kiedika?

6. Diambu mbi Polo kakindisila bakhomba ziandi mu minu bavanga? (Ebelewo 5:14–6:1)

⁶ Mu nkanda wowo kasonikina basi Ebelewo, Polo wukindisa bakhomba ziandi Bakristu baluta longuka ayi yindudila mu buphinda Mbembo Nzambi. (Tanga Ebelewo 5:14–6:1.) Polo wutubila masonoko ma Kiebelewo, ayi wusudikisa bila mbi phila yoyi Bakristu babe sambilanga Yehova yilutila phila yoyi Bayuda beba kunsambidilanga.a Polo wukindisa Bakristu bazaba ayi basudika bumboti mboti kiedika ki masonoko muingi babakula malongi ma luvunu ayi bamaloza mu diambu di bedi vunuka.

7. Mambu mbi maphasi tulembo dengana lumbu kiaki?

⁷ Banga Bakristu ba Ebelewo, beto phe lumbu kiaki tueta dengana batu bobo beta tembikisa zitsangu ayi mayindu momo masi ko nguizani ayi minsiku misonga mi Yehova. Khumbu ziwombo bambeni zieto beta tuvueza mu phila yoyi tueta tumukinina minsiku mi Bibila mu diambu dimboti ayi mu diambu dimbimbi ayi beta tuba diaka ti mambu mangolo tukala ayi ntima mbimbi tukala. Mavanga ayi mayindu ma nza yayi malembo tatamana kambu ba nguizani ayi mbueno yi duka yi Nzambi mu phila yoyi keta tadila mambu. (Zin. 17:15) Diawu, tufueti yonzula maluaku meto mabakula ayi loza mayindu momo bambeni zieto beta sadila mu kutuvongisa voti mu diambu di bedi kutunata mu nzila yimbimbi.​—Ebe. 13:9.

8. Bue tulenda yonzukila mu kipheve?

⁸ Matu vanga diambu dimboti beto bongila mu mfunu wombo ndongi yoyi Polo kavana kuidi Bakristu ba Ebelewo yitatamana yonzuka mu kipheve. Yawu yikutuntombana ti tuba nzayilu yiwombo yikiedika ayi landakana phila yoyi Yehova keta tadila mambu. Tufueti tatamana vanga mambu beni buba kumanima ma kukivana ayi baka mbotama. Buba mioso kuandi mimvu tume tula mu kiedika, tufueti tanganga ayi longukanga mbembo Nzambi thangu ka thangu. (Nku. 1:2) Programi yimboti yi ndongokolo yi Bibila yi ngeyo veka mayi sadisa wuyonzula minu, kadulu kioki Polo kasudikisa mu nkand’andi kuidi Bakristu ba Ebelewo.​—Ebe. 11:1, 6.

“TUBA MINU MUINGI TUVUKISA LUZINGU LUETO”

9. Bila mbi minu kingolo kibela mfunu wombo kuidi Bakristu ba Ebelewo?

⁹ Yitombana ti Bakristu ba Ebelewo baba minu kingolo muingi bavuka mu ziphasi ziozi zieba vingila Mbanza yi Yuda. (Ebe. 10:37-39) Yesu wulubula balonguki bandi ti mu thangu bela mona Yelusalemi bayizungididi kuidi bamasodi, mu na batina mu miongo. Ndongi’andi yitadila Bakristu boso bobo beba zingilanga mu mbanza beni, ayi bobo beba zingilanga mu mala. (Luka 21:20-24) Mu thangu beni yina batu bobo beba nuanusungu kuidi bamasodi beba tombanga lutanunu mu mbanza yoyi yitanunu bumboti banga Yelusalemi. Tinina mu miongo va buangu kitatamana ba mu mbanza yi Yelusalemi dimonika banga diyindu dimbimbi ayi diawu ditomba minu kiwombo muingi Bakristu beni batumukina Yesu.

10. Nginu mbi minu kingolo kituma Bakristu bavanga? (Ebelewo 13:17)

¹⁰ Yitombana kuidi Bakristu ba Ebelewo batudila ntima batu bo Yesu kasadila mu diambu di tuadisa kimvuka. Mu kondo finda phaka, batu bobo beba tuadisanga kimvuka bavana zithumunu zifuana mu diambu di sadisa batu boso ba kimvuka batumukina lutuadusu lu Yesu mu thangu yifuana ayi mu phila yimboti. (Tanga Ebelewo 13:17.) Kuma Kingeleki kio basadidi mu Ebelewo 13:17 mu diambu di “ba tumamana” kitadidi mutu nioni kikinini tumamana bila wulembo tudila ntima mutu nioni wulembo ntuadisa. Kasi ntumukina ko kaka mutu beni mu bila kioki kadidi luve lutuadisila. Yitombana ti kuidi Bakristu ba Ebelewo batudila ntima batu bobo beba kubatuadisanga tuamina ziphasi ziza. Enati mu thangu ndembama Bakristu beba tumukinanga mu phila yifuana zithumunu zi batu bobo beba kubatuadisanga, nginu yawu yiluta tula ti babika mona phasi mu kubutudila mu thangu yi ziphasi.

11. Bila mbi ba na minu kingolo kuididi mfunu lumbu kiaki mu diambu di Bakristu?

¹¹ Lumbu kiaki phuila yi minu tuidi banga phila butudila batu bobo baba batheti mu tambula nkanda wu Polo. Tulembo zingila mu thangu yoyi nduka nduka batu boso beta manga ayi vuezila ndubu yi Bibila mu diambu ditedi tsuka yi mambu ma thangu yayi. (2 Pi. 3:3, 4) Mu buela, kadiambu ko Bibila kitubidi mambu mawombo mu phila yoyi ziphasi zinneni ziela tonina, kuidi na mambu mawombo mo ka tuisi zaba ko. Tufueti ba na minu kingolo ti tsuka yi mambu ma thangu yayi yela salama mu thangu yoyi yifueni ayi Yehova wela kututanina.​—Hab. 2:3.

12. Mbi biela kutusadisa tuvuka mu ziphasi zinneni?

¹² Tufueti kindisa phe minu kieto mu nzila yoyi Yehova kalembo sadila mu kututuadisa: “Nnanga wukuikama ayi wunduenga.” (Mat. 24:45) Mu thangu ziphasi zinneni ziela tona, bulendakana tuela baka zithumunu zifuana mu diambu di vukisa luzingu, banga phila Bakristu ba Ebelewo bazibakila mu thangu masodi ma Loma bayiza zungidila Yelusalemi. Yayi, yawu thangu tufueti luta yonzula sikididi kieto ayi tudila ntima batu bobo Yehova kalembo sadila mu kutuvana lutuadusu mu khubukulu’andi. Enati tutudilanga ko lutuadusu luawu ntima ayi tutumukinanga ko momo bakutukamba lumbu kiaki, tuela mona phasi mu tumukina lutuadusu lo bela kutuvana mu ziphasi zinneni.

13. Bila mbi ndongi yoyi yidi mu Ebelewo 13:5 yididi mfunu?

¹³ Mu thangu beba vingila bidimbu muingi batina, yitombana ti kuidi Bakristu ba Ebelewo batula luzingu luawu luba yaki yaki ayi bamanga kifu “kizola zimbongo.” (Tanga Ebelewo 13:5.) Bawombo mu bawu nzala yiyiza ba yiwombo kuidi bawu ayi kambu ku zimbongo. (Ebe. 10:32-34) Buba ti thangu zinkaka baba bakubama mu monisa mvibudulu mu zithatukusu mu diambu di luzolo lu nsamu mboti, bankaka bulendakana batona banzila ti bafueti baka kaka kimvuama muingi babaka lutanunu. Zimbongo zisi ba ko luve lukubavukisa. (Zaki 5:3) Diawu, batu bobo beba zolanga bima bi nza yayi bamona phasi mu tina ayi mu bika zinzo ziawu ayi bima biawu bithalu.

14. Bue minu kingolo kilenda vangila diambu mu zinzengolo zieto zio tum’baka thangu yayi mu diambu ditedi bima bi nza yayi?

¹⁴ Enati tueta wilukila mu minu kioso ti Yehova weka nduka bunga nza yayi yimbimbi, tulendi ko bue kukivana mu tomba ba zimbongo ziwombo ayi bima bi nza yayi. Diawu, batu bela ‘loza zimbongo ziawu mu zibalabala’ bila bela kuiza sudika ti ‘buba zimbongo ziawu voti nolo’awu bilendi ko kubavukisa mu lumbu ki nganzi zi Yehova.’ (Yeh. 7:19) Va buangu kitomba baka zimbongo ziwombo, tufueti baka nzengolo yi zingila mu luzingu lu yaki yaki ayi lu bukatikati. Tufueti nuanisa kifu kikota zipholo ziphamba voti tubika bikila bima bi nza yayi nzila bitukanga ayi bitudia thangu. Tufueti manga kifu kiluta kangama ngolo mu bima biobi tukibakila. (Mat. 6:19, 24) Minu kieto kilenda ba mu nzomono mu diambu ditedi bima bi nza yayi ayi mu mambu mankaka mu thangu yoyi tulembo vingidila tsuka yi mambu ma nza yayi.

“TUFUETI BA MVIBUDULU”

15. Bila mbi yiluta ntombinina kuidi Bakristu ba Ebelewo bamonisa mvibudulu?

¹⁵ Yitombana ti Bakristu ba Ebelewo bamonisa mvibudulu mu mambu mo meba tulanga minu kiawu mu nzomono bobuawu bo mambu ma luzingu meba luta bebila ku Yuda. (Ebe. 10:36) Kadiambu ko Bakristu bankaka ba Ebelewo badengana zinzomono zingolo, bawombo bakikinina landakana malongi ma Bukristu mu thangu mosi yindembama. Polo wutuba ti kadiambu ko bamonisa mvibudulu mu mambu mo matula minu kiawu mu nzomono, basi keta mona ko ziphasi zio zimona Yesu, tii ku lufua. (Ebe. 12:4) Bayuda bawombo bo baba bambeni bayiza ba nganzi ayi kikhesi bila batu bawombo bayiza tona ba Bakristu. Mua ndambu mimvu kuntuala, mu thangu Polo kamonika ku Yelusalemi, dingumba di batu bawombo ditona kuntuta khuba mu thangu keba samuna. Viokila 40 ki Bayuda ‘bayendila Polo manenga, mu tuba ti bedi dia ko ayi bedi nua ko tii bakumvonda.’ (Mav. 22:22; 23:12-14) Buba ti ba balenda ayi ba bazoma, yitombana ti Bakristu batatamana kutakana mu diambu di sambila, samuna nsamu wumboti, ayi tatamana simbidila minu kingolo.

16. Bue nkanda wowo Polo kasonikina basi Ebelewo wulenda kutusadisila tuba mbueno yimboti mu diambu ditedi zinzomono? (Ebelewo 12:7)

¹⁶ Mbi bisadisa Bakristu ba Ebelewo baba mvibudulu mu zinzomono ziozi badengana? Polo wuzaba ti yitombana baba mbueno yimboti mu diambu di zinzomono ziawu. Diawu kabasudikisila ti Nzambi kalenda bika zinzomono zitota minu mu diambu di baka formasio yi Bukristu. (Tanga Ebelewo 12:7.) Formasio beni yoyi yilenda kutusadisa tuyonzula ayi tuliomisa bikadulu bi Bukristu bio bin’yangidikanga Yehova. Enati batula mayindu mawu mu mimbutu miomi zinzomono beni zieba totulanga, nginu yisi ba ko phasi kuidi Bakristu ba Ebelewo mu monisa mvibudulu.​—Ebe. 12:11.

17. Polo dilongi mbi kabaka mu diambu ditedi nzomono?

¹⁷ Polo wukindisa buwombo Bakristu ba Ebelewo bamonisa mvibudulu mu zinzomono mu kambu vonga. Wuba wufuana mu kubasonikina mu diambu beni. Bo keba zomanga Bakristu mu thama, wuzaba mambu mo beba dengananga. Wuzaba phe phila yimonisina mvibudulu mu nzomono. Niandi veka wudengana zinzomono ziphila mu phila kumanima ma ba Mukristu. (2 Ko. 11:23-25) Diawu, Polo wuba wufuana mu tuba mambu momo mantombana mu diambu di monisa mvibudulu. Wubambula moyo Bakristu ba Ebelewo ti bafueti tudila Yehova ntima bika sia zingolo ziawu. Diawu Polo katubila mu kibakala kioso ti: “Yehova niandi wukutsadisanga; ndilendi mona tsisi ko.”​—Ebe. 13:6.

18. Beto zaba mambu momo mela salama mu bilumbu binkuiza, malenda kutusadisa tumonisa mvibudulu?

¹⁸ Mu bilumbu biabi bakhomba zieto bawombo balembo monisa mvibudulu mu zinzomono. Tulenda kubavana lusadusu lukuikama mu nzila yi lusambulu ayi thangu zinkaka kubavana bima biobi badi phuila. (Ebe. 10:33) Bibila kitubidi bumboti mboti ti “batu boso bobo batidi zinga luzingu luvedila va meso ma Nzambi mu lusadusu lu Yesu Kristu bela zomo.” (2 Tim. 3:12) Mu bila beni kioki, beto boso tufueti ba bakubama mu zinzomono ziozi tueka nduka kuiza dengana. Tutatamana luta tudila Yehova ntima, mu ba sikididi ti wela kutusadisa tumonisa mvibudulu mu zinzomono zioso ziozi tuela dengana. Mu thangu yifuana, wela vana mbombolo kuidi bisadi biandi bioso bikuikama.​—2 Tes. 1:7, 8.

19. Zikhubukulu mbi zifuana zilenda kutusadisa tuba bakubama mu ziphasi zinneni? (Tala phe foto.)

¹⁹ Mu kondo finda phaka, nkanda wu Polo kuidi basi Ebelewo wusadisa Bakristu batandu kitheti bakubama mu ziphasi ziozi zieba kubavingila. Polo wukindisa buwombo bakhomba ziandi Bakristu babaka nzayilu ayi baluta sudika masonoko. Kubutudila, kuawu kubasadisa babakula ayi baloza malongi momo meba tombanga bebisa minu kiawu. Wubakindisa baluta yonzula minu kiawu muingi balandakana bumboti mboti lutuadusu lu Yesu ayi lolo lu batu bobo beba tuadisanga kimvuka. Ayi wukindisa Bakristu bayonzula mvibudulu’awu mu ba mbueno yimboti mu zinzomono ayi mu kuzitadila banga diluaku di baka formasio kuidi Disa diawu di luzolo. Beto phe tulenda sadila zindongi beni ziozi zisonimina mu lutuadusu lu pheve santu. Ayi yawu mayi tula ti tuba bafuana mu tatamana monisa mvibudulu mu bukuikama boso tii kutsuka.​—Ebe. 3:14.