Phila yoyi Yehova keta kutusadisila tumonisa mvibudulu mu mambu maphasi

1. Bila mbi yilembo tombinina ti tumonisa mvibudulu, ayi kuidi nani tulenda bakila lusadusu? (1 Piela 5:10)

BETO bisadi bi Yehova, yilembo tombana ti tumonisa mvibudulu mu bilumbu biabi bitsuka. Bila mbi? Bila bankaka mu beto badi na bimbevo biobi ka bibelukanga ko. Bankaka bafuilulu batu bobo beta zola buwombo. Bankaka balembo dengana kimbeni, buba mu khati dikanda diawu voti kuidi bapfumu zi leta. (Mat. 10:18, 36, 37) Buba ti ntindu mbi wu mambu maphasi wulembo dengana, ba sikididi ti Yehova kalenda kusadisa wumamonisina mvibudulu.​—Tanga 1 Piela 5:10.

2. Bo tuidi Bakristu, nani weta kutusadisa tumonisa mvibudulu?

² Mvibudulu wawu weta kutusadisa tuba basiama ayi tutatamana monisa vuvu mu thangu tun’dengana mambu maphasi, zinzomono, zithatukusu voti ziphukumunu. Tumonisanga ko mvibudulu mu zingolo zieto veka vayi Yehova niandi weta kutusadisa tubutudila bila weta kutuvana “lulendo lolo lulutidi.” (2 Ko. 4:7) Mu disolo diadi, tueka nlonguka zikhubukulu ziya ziozi Yehova katudidi mu diambu di katusadisa tumonisa mvibudulu. Tueka mmona phe phila yoyi tulenda luta bakila mamboti mu zikhubukulu beni.

LUSAMBULU

3. Bila mbi tulenda tubila ti lusambulu luidi mangitukulu masoludila ayi Nzambi?

³ Yehova wutula khubukulu mosi yi mangitukulu yoyi yilenda kutusadisa tumonisa mvibudulu. Wubutudila mu kutuvana diluaku disolulanga ayi niandi ka diambu ko tuidi bankua masumu. (Ebe. 4:16) Yindula buna: Tulenda sambila Yehova yoso kuandi thangu ayi mu dioso kuandi diambu. Weta kutusudika buba yoso kuandi mbembo tukunkambila ayi weta kutuwa buba voso kuandi tuidi, banga mu buloko voti va beto veka. (Yona 2:1, 2; Mav. 16:25, 26) Buba ti tulembo kitatikisa buwombo mu mayindu ayi tukadi koka tubila phila yoyi tulembo kimuena, Yehova weta kutusudika kaka ayi weta zaba mbi tun’zola tuba. (Loma 8:26, 27) Bukiedika, lusambulu luidi mangitukulu masoludila ayi Nzambi!

4. Bila mbi tulenda tubila ti sambila Yehova katusadisa tumonisa mvibudulu nguizani kuidi ayi luzolo luandi?

⁴ Mu Mbembo’andi, Yehova wutuveni sikididi ti “buba dioso kuandi diambu tunlomba diodi didi mu nguizani ayi luzolo luandi niandi maka tuwa.” (1 Yow. 5:14) Bue wummuena, tulenda lomba Yehova katusadisa tumonisa mvibudulu? Ninga! Lusambulu beni nguizani yidi ayi luzolo luandi. Bila mbi tulenda kubutubila? Bila mu thangu tulembo monisa mvibudulu mu zinzomono, buawu tueta bikila Yehova nzila kavana mvutu kuidi mbeni’andi Satana Diabulu. (Zin. 27:11) Mu buela, Bibila kitukembi ti Yehova widi na phuila yingolo “yimonisa zingolo ziandi mu diambu di mamboti ma batu bobo bakiveni kuidi niandi mu ntim’awu woso.” (2 Lus. 16:9) Diawu, tulenda ba sikididi ti Yehova widi na ngolo ayi phuila yi kutusadisa tumonisa mvibudulu.​—Yes. 30:18; 41:10; Luka 11:13.

5. Bue lusambulu lulenda kutuvanina ndembama yi mayindu? (Yesaya 26:3)

⁵ Bibila kitubidi ti mu thangu tulembo sambila mu kipfuzi mu diambu di mambu momo malembo tutatisa, ‘ndembama yi Nzambi yoyi yiviokidi diela dioso yela keba mintima mieto ayi mayindu meto.’ (Flp. 4:7) Tutadila tsundu yi diambu beni. Batu bobo ka basadilanga ko Yehova beta dengana mambu maphasi ayi beta tomba sadila madiela mambimbi mu diambu di babaka ndembama yi mayindu. Mu kifuani, bankaka beta sadila ziphila ziwombo zikambu fuana mu diambu di bazimbakana mambu moso momo malembo batatikisa. Kubutudila kidi vonza kinneni mu kipheve. (Dedikisa Matayi 12:43-45.) Buba ti balembo sadila ziphila beni zikambu fuana mu diambu di babaka ndembama, babakanga ko ndembama yikiedika, bila ndembama yoyi Yehova keta kutuvana mu nzila lusambulu, yawu yilutidi. Mu thangu tulembo sambila Yehova, buawu tueta monisina ti niandi kaka tulembo luti tudila ntima ayi weta kutuvuna “ndembamba yoyi yeta zingila.” (Tanga Yesaya 26:3.) Yimosi yi ziphila yoyi Yehova keta kubutudila yidi yi kutusadisa tubambuka moyo malongi makiedika ma Bibila momo tulonguka momo meta kutusikimisa. Malongi beni makiedika meta kutuvana ndembama mu mayindu ayi mu ntima, bila tuzebi ti Yehova weta kututudila thalu ayi tidi ti tununga.​—Nku. 62:1, 2.

6. Bue wulenda luta bakila mamboti mu khubukulu yi lusambulu yoyi Yehova katula? (Tala phe foto.)

⁶ Mambu momo wulenda vanga. Mu thangu wulembo dengana mambu maphasi, “yekula bizitu biaku kuidi Yehova” ayi wunlombi kavana ndembama. (Nku. 55:22) Lombanga phe nduenga kuidi Yehova yoyi yilenda kusadisa wununga mambu maphasi momo wulembo dengana. (Zin. 2:10, 11) Sambilanga Yehova kasadisa wumonisa mvibudulu ayi mu thangu wukubutudila, kadi zimbakananga phe kumvutudila matondo. (Flp. 4:6) Tomba zabanga mambu momo malembo monisa ti Yehova wulembo sadisa wumonisa mvibudulu mu mambu maphasi momo wulembo dengana ayi wumvutudilanga matondo mu lusadusu lolo keta kuvana. Kadi bikilanga mambu maphasi nzila mazimbikisa mamboti momo Yehova keta kuvangila.​—Nku. 16:5, 6.

BIBILA

7. Bue Bibila kilenda tusadisila tumonisa mvibudulu mu mambu maphasi?

⁷ Yehova wutuvana Mbembo’andi mu diambu di katusadisa tumonisa mvibudulu mu mambu maphasi momo tulenda dengana. Mu Bibila muidi na ziverse ziwombo ziozi zieta kutuvana sikididi ti Yehova weta kutusadisa. Tutadila kifuani kimosi. Matayi 6:8 yitubidi ti: “Dise dieno zebi mambu momo luidi phuila tuamina lunlomba.” Yesu wutuba ziphova beni ziozi bila niandi lutidi zaba Yehova viokila mutu woso. Diawu, tubanga sikididi ti mu thangu tulembo dengana ziphasi, Yehova zebi mambu momo tuidi phuila ayi maka tusadisa. Bibila kidi na ziverse ziwombo ziphila yoyi ziozi zilenda kindisa nzengolo’eto yimonisa mvibundulu mu mambu maphasi.​—Nku. 94:19.

8. a) Vana kifuani ki tsikudukusu mosi yi Bibila yoyi yilenda kutusadisa tumonisa mvibudulu. b) Mbi bilenda kutusadisa tubambukila zitsikudukusu zi Bibila moyo mu thangu tuidi phuila yi kuzisadila?

⁸ Zitsikudukusu zi Bibila zilenda kutusadisa tumonisa mvibudulu mu zinzomono. Zidi na nduenga yoyi yilenda kutusadisa tubaka zinzengolo zimboti. (Zin. 2:6, 7) Mu kifuani, Bibila kieta kutulonga tubika kukitatikisa mu diambu di bilumbu binkuiza, vayi kieta kutulonga tuluta tudilanga Yehova ntima kadika lumbu. (Mat. 6:34) Enati tuidi na kifu ki tanganga ayi ki yindudilanga mu buphinda mambu momo madi mu Bibila, mu kondo finda phaka yedi ba ko phasi mu bambukila moyo zitsikudukusu zi Bibila ziozi zilenda kutusadisa mu thangu tuela ba phuila yibaka zinzengolo zimboti voti yimonisa mvibudulu mu mambu maphasi.

9. Bue masolo ma Bibila meta kindisila sikididi kieto mu lusadusu lu Yehova?

⁹ Bibila kieta yolukila masolo makiedika ma batu bobo batudila Yehova ntima ayi babaka lusadusu luandi. (Ebe. 11:32-34; Zaki 5:17) Mu thangu tulembo tangi masolo ma batu beni, matu kindisa sikididi kieto ti “niandi suamunu kieto ayi zingolo zieto; niandi nsadisi wu zithangu zioso mu ziphasi.” (Nku. 46:1) Longuka kuikama kuawu, kuawu maku tusadisa tusokudila minu kiawu ayi mvibudulu’awu.​—Zaki 5:10, 11.

10. Bue wulenda luta bakila mamboti mu khubukulu yi Bibila yoyi Yehova katula?

¹⁰ Mambu momo wulenda vanga. Tanganga Bibila kadika lumbu ayi sonikanga ziverse ziozi wummona ti zilenda luta kusadisa. Bawombo phe babaka lusadusu mu tanganga Kapu ki lumbu ka lumbu ayi bamona ti didi diambu dimboti mu toninanga lumbu mu diyindu di lukindusu di Bibila. Khomba mosi wunketo mu dizina di Marie,a wukikinina diyindu beni mu thangu bayiza bakula bambuta ziandi kimbevo ki kanser. Mbi binsadisa katatamana monisa mvibudulu bo keba kubasadisa muna beka nduka fua? Tubidi ti: “Kadika lumbu ndieba tanganga Kapu ki lumbu ka lumbu ayi yindudila mu kiawu. Mu thangu ndieba dengana mambu beni maphasi, kifu beni kitsadisa ndiluta wesa mayindu mama mu mabanza ma Bibila ayi ndiluta tula thalu’ama mu lukindusu lu Yehova.”​—Nku. 61:2.

BAKHOMBA ZIETO BA BAKRISTU

11. Bila mbi dididi diambu dilukindusu mu zaba ti tuisi ko beto veka tulembo dengana mambu maphasi?

¹¹ Yehova wutuveni bakhomba zieto ba Bakristu muingi batusadisa tutatamana monisa mvibudulu. Zaba ti ‘bakhomba zieto badi va nza bawu phe balembo dengana ziphasi,’ kueta tusadisa tuba sikididi ti tuisi ko beto veka. (1 Pi. 5:9) Diawu, tulenda ba sikididi ti dioso kuandi diambu tulenda dengana, kuidi phe na bakhomba bobo badidengana ayi badimonisina mvibudulu. Diawu dimmonisa ti beto phe tulenda kueto monisa mvibudulu!​—Mav. 14:22.

12. Bue bakhomba zieto ba Bakristu balenda kutusadisila ayi bue beto phe tulenda kubasadisila? (2 Kolinto 1:3, 4)

¹² Mu thangu tulembo monisa mvibudulu mu mambu maphasi, bakhomba zieto ba Bakristu balenda kutukindisa. Mvuala Polo wukikinina diambu beni. Mu thangu kaba wukangama mu nzo yoyi beba kunsungila kuidi disodi di Loma, weba monisanga thangu zioso phutudulu matondo kuidi bakhomba bobo bansadisa, mu kubatedila mu mazina mawu. Bakhomba beni bam’bomba, bankindisa ayi bamvana lusadusu. (Flp. 2:25, 29, 30; Kol. 4:10, 11) Lumbu kiaki phe, tulenda dengana diambu diphila yoyi. Mu thangu tutidi ti batusadisa tumonisa mvibudulu mu mambu maphasi, bakhomba zieto ba Bakristu baba tusadisa; ayi mu thangu bawu batutombidi lusadusu, beto phe matu basadisa.​—Tanga 2 Kolinto 1:3, 4.

13. Mbi bisadisa khomba mosi wunketo mu dizina di Maya katatamana monisa mvibudulu mu mambu maphasi?

¹³ Khomba mosi wunketo mu dizina di Maya ku Russie, wubaka lukindusu lunneni mu luzolo lu kikhomba. Mu mvu 2020, masodi maye fuiya nzo’andi ayi bansambisa mu bila keba samuninanga nsamu wumboti. Maya tubidi ti: “Mu thangu beni yina ndiba wulebakana mu mayindu, bakhomba ba babakala ayi ba baketo bathela mu telefoni ayi batsonikina minkanda mu kumbonisa ti beta kunzola. Ndizaba kuama ti dikanda dinneni ndidi di luzolo. Vayi ndiluta sudika diambu beni mu mvu 2020.”

14. Bue wulenda bakila lusadusu lu bakhomba ba Bakristu mu thangu wulembo monisa mvibudulu mu mambu maphasi? (Tala phe foto.)

¹⁴ Mambu momo wulenda vanga. Mu thangu wulembo monisa mvibudulu mu mambu maphasi, banga pfika pfika ayi bakhomba ba Bakristu. Kadi phe mematanga tomba lusadusu kuidi bakulutu. Bila balenda ba banga “suamunu mu thangu bivuka ayi mu thangu mvula wowo widi muphepi wungolo.” (Yes. 32:2, nkp.) Kadi zimbakananga ti bakhomba ziaku ba Bakristu phe balembo dengana mambu maphasi. Sadisa batu bobo balembo tombi lusadusu, maku sadisa wutatamana ba mbueno yimboti mu thangu ngeyo phe wulembo monisa mvibudulu mu mambu maphasi.​—Mav. 20:35.

VUVU KIETO

15. Tula vuvu mu bilumbu binkuiza bue kusadisila Yesu, ayi bue beto phe kueta kutusadisila? (Ebelewo 12:2)

¹⁵ Yehova wutuvana vuvu kikinda mu diambu di kitusadisa tutatamana monisa mvibudulu mu mambu maphasi. (Loma 15:13) Yindula phila yoyi vuvu kisadisila Yesu mu lumbu kioki kaluta mona ziphasi va ntoto. (Tanga Ebelewo 12:2.) Yesu wuzaba ti kuikama kuandi maku nungisa dizina di Yehova. Weba vingila mu phuila yoso thangu yoyi kafueti vutukila kuidi siandi ayi thangu yoyi kela sadila kithuadi ayi bakhomba ziandi bobo batulu mafuta mu kipheve. Bobuawu phe, vuvu kieto ki zinga mvu ka mvu mu nza yimona, kieta kutusadisa tumonisa mvibudulu mu zioso kuandi ziphasi ziozi nza yi Satana yi kututotudila.

16. Bue vuvu kisadisila khomba mosi wunketo, ayi dilongi mbi wulenda baka mu mambu momo katuba?

¹⁶ Tala phila yoyi vuvu mu diambu di bilumbu binkuiza kisadisila khomba mosi wunketo mu dizina di Alla ku Russie mu thangu bakanga nnuni’andi. Tubidi ti: “Sambila ayi yindudila mu vuvu kieto mu diambu di bilumbu binkuiza, kutsadisa ndibika lebikinina ngolo. Ndinsudika ti mambu masi ntatamana ko bela phila yoyi, bila nzebi ti Yehova niandi wela nunga, ayi beto phe.”

17. Bue tulenda monisina phutudulu matondo mu vuvu kioki Yehova katuvana? (Tala phe foto.)

¹⁷ Mambu momo wulenda vanga. Bakanga thangu yi yindudila mambu ma kitoko momo Yehova kalembo tukubikila. Wukimonanga mu nza yimona ayi yindulanga mamboti momo tuela baka. Ayi ngeyo kubutudilanga, mawu mona ti ziphasi ziozi tulembo dengana thangu yayi “zidi mu ndambu thangu kaka ayi vioka kuandi zimvioka.” (2 Ko. 4:17) Diawu, vanga mamoso momo wulenda vanga muingi wusamunanga nsamu wumboti wu Kipfumu ki Nzambi. Yindula mambu momo batu bobo ka basadilanga ko Yehova balembo dengana. Mambu mawombo malembo batatisa bila basi zaba ko mambu ma kitoko momo Yehova kalembo tukubikila bilumbu binkuiza. Ngeyo kubasadisa bazaba vuvu beni buba mu mua disolo dikhufi, balenda tomba zaba mambu mawombo mu diambu ditedi Kifpumu Nzambi.

18. Bila mbi tulenda tudila zitsila zi Yehova ntima?

¹⁸ Kumanima ma mana monisa mvibudulu mu mambu mawombo maphasi, Yobi wutuba ti: “Nzebi ti ngeyo lenda vanga mambu moso ayi kadi diambu diodi wuntia vanga dilenda fuba.” (Yobi 42:2) Banga butubila Yobi, kadi diambu dilenda kakidila lungana ku zitsila zi Yehova. Zaba diambu beni, kulenda tukindisa mu thangu tulembo monisa mvibudulu mu mambu maphasi. Muingi tumona ti buawu buididi, tubonga kifuani: Yindula buna, nketo mosi lembo bedi kimbevo kingolo ayi vongidi nitu mu thangu minganga miwombo minkembi ti kedi beluka ko. Thumbu zimbukila munganga mosi wudiela bakudi kimbevo kioki kilembo ntatisa ayi wunsudikisidi phila yoyi kakuiza kibukila, nketo beni beki diaka zingolo buba ti yilenda tomba mua thangu muingi kabeluka. Buabu kedi bue mona ko phasi mu tatamana monisa mvibudulu mu kimbevo kiandi bila mezaba ti maka beluka. Bobuawu phe, bo tuidi sikididi ti vuvu kieto ki zingila ku paladiso kiela lungana mu bilumbu binkuiza, tueta nunga monisa mvibudulu mu mambu maphasi.

19. Mbi tufueti tula muingi tutatamana monisa mvibudulu?

¹⁹ Banga phila tumuenini mu disolo diadi, Yehova weta tusadisa tumonisa mvibudulu mu mambu maphasi mu nzila lusambulu, Bibila, bakhomba zieto ba Bakristu ayi mu nzila vuvu kieto. Beto tula ngolo mu sadila mambu moso momo, Yehova maka tusadisa tumonisa mvibudulu mu mambu maphasi momo tulenda dengana tii nza yi Satana yela bungu.​—Flp. 4:13.