“Lusobula beno veka . . . nani lutidi sadila”

1. Mbi tufueti tula muingi tuba mu mayangi makiedika, ayi bila mbi? (Yesaya 48:17, 18)

SIETO di mazulu weta kutuzola buwombo ayi tidi ti tuyangalala mu luzingu tona thangu yayi tii mu bilumbu binkuiza. (Mpo. 3:12, 13) Wutuvanga na maluaku mangitukulu, vayi kasi kutuvana ko maluaku makukiyadila beto veka voti matomba kukidiatisa beto veka mu tomba zaba diambu dimboti ayi diambu dimbimbi. (Mpo. 8:9; Yel. 10:23) Zebi ti muingi tuba mu mayangi makiedika, tufueti kunsadila ayi zingila mu landakana zitsikudukusu ziandi.​—Tanga Yesaya 48:17, 18.

2. Diambu mbi Satana katidi tuwilukila, ayi bue Yehova katididi tutadila diambu beni diodi di luvunu?

² Satana tidi tuwilukila ti tulenda ba mu mayangi mu kondo Yehova, ti batu balenda kukiyadila bawu veka. (1 Mo. 3:4, 5) Yehova veni mvutu mu diambu beni diodi di luvunu mu bikila batu nzila bakiyadila bawu veka mu mua ndambu thangu. Yilembo monika bumboti mboti ti batu bakadi kuawu koka kukiyadila bila bame suwa. Vayi Bibila kilembo tubila babakala ayi baketo bobo baba mu mayangi bila basadila Yehova. Mu bawu boso, Yesu niandi wuluta ba mu mayangi. Tutala theti bibila biobi bintuma kasobula sadila Yehova. Ayi matu tadila bila kioki tufueti sambidila Sieto di mazulu. Ayi kutsuka matu bue tadila bibila biobi bieta kututuma tusadila Yehova.

BILA MBI YESU KASOBUDILA SADILA YEHOVA

3. Mbi Satana kedi kavana Yesu, ayi nzengolo mbi kabaka?

³ Mu thangu kaba va mbata ntoto, Yesu wubaka nzengolo mu zaba nani kafueti sadila. Kumanima mabaka mbotama, Satana wutomba kumvana bipfumu bioso bi nza yayi niandi kunsambidila buba mu khumbu kuandi yimosi. Yesu wumvutudila: “Botuka, Satana! Bila disonama ti: ‘Yehova Nzambi’aku niandi fueti buongimina ayi niandi kaka fueti sadila.’” (Mat. 4:8-10) Bila mbi Yesu kabakila nzengolo yoyi? Tutadila ndambu bibila.

4-5. Bibila mbi bituma Yesu kasobula sadila Yehova?

⁴ Bila kingudi kioki kituma Yesu kasobula sadila Yehova kidi luzolo, bila luzolo luandi kuidi Siandi lukala luphinda ayi lumananga ko. (Yow. 14:31) Mu buela, Yesu weta sadila Yehova bila didi diambu dimboti mu kubutudila. (Yow. 8:28, 29; Tso. 4:11) Zebi ti Yehova niandi tho yi luzingu, fueni tudulu ntima ayi widi nkabi. (Nku. 33:4; 36:9; Zaki 1:17) Mambu moso momo Yehova keba kambanga Yesu maba kaka makiedika ayi kasi kunyimina ko kadi kiasa. (Yow. 1:14) Vayi Satana, niandi ntukisi wu lufua. Nkua mayuya bila katondanga ko ayi weta tomba kaka mamboti mandi veka. (Yow. 8:44) Bo kan’zabila mu phila beni yoyi, Yesu kadi khumbu kasi meka ko sokudila Satana mu tombukila Yehova.​—Flp. 2:5-8.

⁵ Bila kinkaka kioki Yesu kasobudila sadila Yehova kidi ti weba vingila mu phuila yoso mambu momo kisalu kiandi kikuikama kiela lungisa. (Ebe. 12:2) Wuzaba ti niandi tatamana ba wukuikama, wela santisa dizina di Siandi ayi Niandi wela kumvana maluaku ma manisina ziphasi ziozi zitotula Diabulu.

BILA MBI YEHOVA KAFUANINI BAKILA TSAMBUDULU’ETO

6-7. Bila mbi batu bawombo lumbu kiaki basadilanga ko Yehova, vayi bila mbi Yehova kafuanini bakila tsambudulu’eto?

⁶ Lumbu kiaki batu bawombo basadilanga ko Yehova bila bazebi ko bikadulu biandi bi kitoko ayi basi zaba ko mambu momo kavanga mu diambu di bawu. Buawu bubela batu bobo Polo kasamunina ku Ateni.​—Mav. 17:19, 20, 30, 34.

⁷ Polo wusudikisa basi Ateni ti Nzambi yikiedika ‘weti vana batu boso luzingu, mvumunu ayi bima bioso.’ Wubue tuba ti: “Mu diambu diandi tulembo zingila, tun’diatila ayi tuididi.” Nzambi niandi Mvangi nioni “mu mutu wumosi kavangila batu boso,” diawu, fueni baka tsambudulu’eto.​—Mav. 17:25, 26, 28.

8. Diambu mbi Yehova kela sie vanga ko kadi fifioti? Sudikisa.

⁸ Bo kadi mvangi ayi Pfumu yi luyalanganu loso, nginu kalenda kuandi kuika batu mu kingolo bansadila. Vayi Yehova kadi khumbu kela kubutudila. Va buangu ki kubutudila, weta kutumonisa bidimbu biobi bimmonisa ti widi, ayi weta zola buwombo wumosi mosi mu beto. Katidi ti bulendakana batu boso baba bakundi bandi mvimba mvimba. (1 Tim. 2:3, 4) Mu diawu, Yehova wutuvana formasio tulonga batu bankaka lukanu luandi ayi tubakamba mambu mamboti momo kela vanga mu diambu di batu. (Mat. 10:11-13; 28:19, 20) Wutukubika mu bimvuka ayi wubaka zikhubukulu mu kutuvana minkengi mi luzolo miomi mieta kututanina.​—Mav. 20:28.

9. Bue luzolo lu Yehova lueta monikina?

⁹ Luzolo lu Yehova lueta monika mu phila yoyi keta vangila mambu kuidi batu bobo ka bakikininanga ko ti widi. Tutadila mambu mama: Mu zimili zi mimvu miomi mime vioka, zimiliare zi batu basobula zingila mu landakana mayindu mawu veka mu diambu dimboti ayi mu diambu dimbimbi. Ka diambu ko buawu, mu zanti yoso Yehova wubavana bima biobi badi phuila muingi batatamana zinga ayi yangalala mu luzingu luawu. (Mat. 5:44, 45; Mav. 14:16, 17) Wubavana maluaku mabaka bakundi ayi dikanda diodi dieta kubazola, balenda buta bana, balenda sala bisalu ayi yangalala mu mamboti ma luzingu. (Nku. 127:3; Mpo. 2:24) Mambu moso momo mawu malembo monisa ti Sieto di mazulu weta zola batu boso. (2 Mo. 34:6) Buabu tutubila ndambu bibila biobi tueta sobudila sadila Yehova ayi phila yoyi keta sakumunina batu bobo beta sobula kunsadila.

BILA MBI TUETA SOBUDILA SADILA YEHOVA

10. a) Bila mbi kitheti theti tueta sobudila sadila Yehova? (Matayi 22:37) b) Bue tueta bakila mamboti mu mvibudulu wu Yehova? (Minkunga 103:13, 14)

¹⁰ Banga Yesu, bila kitheti theti kioki tueta sadila Yehova, kidi ti tueta kun’zola buwombo. (Tanga Matayi 22:37.) Tueta ba pfika pfika kuidi Yehova mu thangu tueta longuka bikadulu biandi. Mu kifuani, tutadila mvibudulu wowo Yehova kadi kuidi beto. Mu thangu bana ba Iseli basi kuntumukina ko, wubalebidila mu ziphova ziazi: “Ndikululebidila, lembueno mavanga meno mambimbi.” (Yel. 18:11) Yehova zebi ti tuidi batu bakondo lunga ayi tuidi mbungi mbungi yi ntoto. (Tanga Minkunga 103:13, 14.) Mu thangu wulembo yindudila mu buphinda mvibudulu wu Yehova ayi bikadulu biandi bimboti, bilendi ko kutuma wunsadila mvimba mvimba?

11. Bibila mbi binkaka bieta kututuma tusobula sadila Yehova?

¹¹ Tueta luta ba phuila yisadila Yehova bila didi diambu dimboti mu kubutudila. (Mat. 4:10) Mu buela, tuzebi ti beto tatamana ba bakuikama kuidi Yehova, tuela baka mamboti mawombo. Kuikama kueto kuidi Yehova kueta tutuma tusantisa dizina diandi, tueta monisa ti Diabulu nkua luvunu, ayi tueta yangidika ntima wu Sieto di mazulu. Ayi enati tusobudi sadila Yehova lumbu kiaki, yawu mayi tula ti tuba na vuvu ki kunsadila mvimba mvimba!​—Yow. 17:3.

12-13. Malongi mbi tubeki mu kifuani ki Jane ayi Pam?

¹² Buba ti wukhidi ntueni, wulenda yonzula luzolo luphinda kuidi Yehova, luzolo lolo luela tatamana monika tii kubununu. Tubonga kifuani ki Jane ayi Pama bobo badi bakhomba mu kinsuni. Baba wunkaka 11 ki mimvu ayi wunkaka 10 ki mimvu mu thangu batona longuka Bibila. Kadiambu ko bambuta ziawu basi yangalala ko longuka Bibila, babikila Jane ayi Pam nzila basolulanga ayi Bambangi zi Yehova enati batatimini kuendanga mu dibundu di bambuta ziawu kadika tsuka sabala. Jane tubidi ti: “Mambu momo ndilonguka kuidi Bambangi zi Yehova, matsadisa nditatamana ba wusiama mu kondo vukumuka kuidi bakundi bama bobo beba kuthumanga ndinua zitsunga zingolo ayi nditula kitsuza.”

¹³ Kumanima ma mua ndambu mimvu, bawu buadi bayiza ba minsamuni. Kuntuala, bayiza ba min’zibudi nzila ayi beba kipanga phe bambuta ziawu bobo beba yonzuka. Bawu bue yindula mambu ma luzingu luawu, Jane tubidi ti: “Ndilonguka ti mu bukuikama boso Yehova weta kibanza banza mu diambu di bakundi bandi ayi banga phila buididi mu 2 Timote 2:19 yoyi yitubidi ti: ‘Yehova zebi batu bandi.’” Dimonikini bumboti mboti ti Yehova weta kibanza banza thangu zioso mu diambu di batu bobo beta sobula kun’zola ayi kunsadila!

14. Bue tulenda nungisina dizina di Yehova mu ziphova zieto ayi mu mavanga meto? (Tala phe zifoto.)

¹⁴ Tutidi sadisa batu bazaba ti mambu mambimbi momo beta wa mu diambu di Nzambi masi ko makiedika. Tutadila diambu diadi: Widi na nkundi wu luzolo nioni widi zanti, weta kaba, ayi weta lemvukila. Lumbu kimosi, wilu mutu mosi wulembo fundi nkundi’aku beni ti makhemi kadi ayi katubanga ko kiedika. Bue mawu tadila diambu beni? Mu kondo finda phaka, mawu nungisa nkundi’aku. Bobuawu, mu thangu Satana ayi batu bobo keta vukumuna beta tomba bebisa lukumu lu Yehova mu tuba mayuya mu diambu di niandi, beto tueta tuba kiedika mu diambu di Yehova ayi tueta nungisa mu kibakala kioso dizina diandi. (Nku. 34:1; Yes. 43:10) Tueta monisa ti tutidi sadila Yehova mu muel’eto woso, mu ziphova zieto ayi mu mavanga meto.

15. Mamboti mbi mvuala Polo kabaka mu balula zikhanu ziandi? (Filipi 3:7, 8)

¹⁵ Tueta balula zikhanu zieto zi luzingu mu diambu di tusadila Yehova mu phila yoyi kankikinina voti mu diambu di tuluta kunsadila buwombo. Mu kifuani, mvuala Polo wusobula yekula lukumu lolo kaba ku buala buandi mu diambu di kalandakana Kristu ayi kasadila Yehova. (Nga. 1:14) Yawu yitula ti kaba mu nzingulu yimboti ayi wubaka diluaku diyala ayi Kristu ku diyilu. Kadi khumbu kaniongina nzengolo yoyi kabaka yi sadila Yehova, buba beto phe kadi khumbu tuela nionga.​—Tanga Filipi 3:7, 8.

16. Dilongi mbi tubeki mu kifuani ki Julia? (Tala phe zifoto.)

¹⁶ Beto luta tula mayindu meto mu kisalu ki Yehova, tulenda ba mu nzingulu yimboti tona lumbu kiaki ayi mu bilumbu binkuiza. Tutadila kifuani ki khomba mosi wunketo widi mu dizina di Julia. Tuamina kalonguka kiedika, Julia weba yimbilanga mu korale ki dibundu diandi tona mu thangu kaba ntueni. Nyimbidi mosi wuzabakana, wumona maluaku ma Julia ayi wumvana formasio. Julia wuyiza fika zabakana ayi wuyiza tona yimbila mu bibuangu bizabakana. Mu thangu keba kuendanga mu nzo nkanda yi miziki yoyi yizabakana buwombo, nkundi’andi mosi wu nzo nkanda wutona kunkamba mambu ma Nzambi ayi wunsudikisa ti dizina di Nzambi, Yehova. Kumanima ma mua thangu, Julia wutona longuka Bibila mu khumbu ziwadi mu sabala. Tsuka tsuka, wuyiza baka nzengolo mu kukivana mu kisalu ki Yehova, va buangu kilandakana kisalu ki miziki. Phasi yiba mu baka nzengolo beni. Tubidi ti: “Batu bawombo bakhamba ti ndilembo sakinina dikaba diama, vayi nditomba sadila buwombo Yehova mu luzingu luama.” Bue keta kukimuena mu nzengolo yoyi kabaka vame vioka 30 ki mimvu? Tubidi diaka ti: “Ndidi na ndembama mu mayindu ayi ndidi na vuvu ti Yehova wela lungisa ziphuila zioso zi ntim’ama mu bilumbu binkuiza.”​—Nku. 145:16.

TATAMANA SADILA YEHOVA

17. Bue mu phila yoyi mambu malembo diatila nsualu mu bilumbu bieto biabi meta vangila diambu kuidi batu bobo beta sobula sadila Yehova ayi kuidi bobo ka babutudidi ko?

¹⁷ Tume fikama mu bilumbu bitsuka. Mvuala polo wusonika ti: “Bila fioti fisiedi, ‘fioti kuandi fisiedi’ buna ‘mutu wowo wufueti kuiza, wela kuiza, ayi kalendi zingila ko.’” (Ebe. 10:37) Diambu mbi yeta tula kuidi beto? Mu thubulu yinkaka, thangu yoyi yime siala mu diambu di batu basobula sadila Yehova yeka yifioti. (1 Ko. 7:29) Ayi enati tukibakila nzengolo yisobula sadila Nzambi, tuzebi ti buba ti tulembo monisa mvibudulu mu zinzomono, yidi kuandi mu diambu di ‘mua thangu yikhufi.’

18. Mambu mbi Yesu ayi Yehova batidi tuvanga?

¹⁸ Yesu wukindisa balonguki bandi ti babika sukila kaka mu tona kunlandakana vayi batatamana kunlandakana. (Mat. 16:24) Diawu, enati tueta sadila Yehova tona thama, tubaka nzengolo yikambu vonga. Tufueti tula ngolo mu diambu di tutatamana dukisa nzengolo’eto yi kunsadila. Dilenda ba diambu diphasi mu kubutudila, vayi tulenda baka mamboti ayi luzingu lu mayangi, buba mu thangu yayi!​—Nku. 35:27.

19. Dilongi mbi beki mu kifuani ki Gene?

¹⁹ Bankaka beta mona ti sadila Yehova kueta tomba kukiyimina mambu mawombo. Enati widi ntueni, wulembo kimoni banga ngeyo mezimbisa kima bo wulembo sadila Yehova? Khomba mosi wuntueni wubakala widi mu dizina di Gene, tubidi ti: “Ndieba kukimonanga ti ba Mbangi Yehova yidi banga minu ndidi wukangama. Yeba monikanga ti bana bawombo bobo ndiyonzuka ayi bawu beba zolanga minyengo, beba bakanga bamakangu, voti beba bulanga bipa bi zivideo bi makhemi, vayi minu dieba tombananga ti ndiviokisanga kaka thangu mu zikhutukunu ayi mu kisalu ki tsamununu.” Bue diyindu diphila yoyi divangila diambu kuidi Gene? Tubidi ti: “Nditona vanga mambu mambimbi mu kitsueki mu luzingu luama ayi mu mua ndambu thangu ndiyiza tona kukisepidisa. Vayi yisi kundatina ko makhini manila. Ndiyiza tona yindula kiedika ki Bibila kioki ndisobula lasakana ayi ndibaka nzengolo yisadila Yehova mu ntim’ama woso. Tona thangu beni yina, yeta monika ti Yehova weta kuphana mvutu mu minsambu miama mioso.”

20. Diambu mbi tufueti bakila nzengolo mu vanga?

²⁰ Nsoniki mosi wu minkunga wuyimbila kuidi Yehova ti: “Lusakumunu kuidi bobo wusobula ayi bobo wunata mu ba va widi.” (Nku. 65:4) Beto phe tubaka nzengolo yi Yosua yoyi yituba ti: “Vayi minu ayi basi nzo’ama, Yehova matu sadila.”​—Yos. 24:15.