DISOLO DI NDONGOKOLO 30
NKUNGA 97 Luzingu lusingimini mu Phova yi Nzambi
Tatamana baka malongi mamona mu malongi mangudi ma Bibila
“Diawu ndiela kulutebulanga mu zithangu zioso moyo mu mambu mama; ka diambu ko luzebi mawu ayi luidi bakinda mu kiedika ki thangu yayi.”—2 PI. 1:12.
MU BUKHUFI
Tueka mmona phila yoyi tulenda sadila malongi mamfunu mu malongi mangudi ma Bibila, buba ti vame vioka mimvu miwombo tona tumalonguka mu khumbu yitheti.
1. Bue malongi ma Bibila mavangila diambu kuidi ngeyo mu thangu wulonguka kiedika mu khumbu yitheti?
MALONGI mangudi ma Bibila mabalula luzingu lueto. Mu kifuani, mu thangu tulonguka ti dizina di Nzambi Yehova, tuvanga diambu ditheti mu diambu di tuba bakundi bandi. (Yes. 42:8) Mu thangu tulonguka kiedika kitadidi bafua, tusie bue kiyuvula ko biuvu mu diambu ditedi bakhomba zieto ba luzolo bobo tuzimbisa mu lufua keni balembo tatamana mona ziphasi. (Mpo. 9:10) Ayi mu thangu tulonguka tsila yi Nzambi yi kitula ntoto paladiso, tusie bue kitatikisa ko mu diambu di bilumbu binkuiza. Tuyiza ba sikididi ti luzingu lueto luela tatamana ba bika sia ti mu mua thangu fifioti banga 70 voti 80 ki mimvu vayi mvu ka mvu.—Nku. 37:29; 90:10.
2. Bue 2 Piela 1:12, 13 yilembo monisina ti buba Bakristu bobo bayonzuka mu kipheve beta tatamana kaka baka mamboti mu malongi mangudi ma Bibila?
2 Tulendi ko zimbakana kadi fifioti phila yoyi malongi mangudi ma Bibila madidi mfunu. Mu nkand’andi wummuadi, thumu Piela wusonikina Bakristu bobo baba “bakinda mu kiedika.” (Tanga 2 Piela 1:12, 13.) Vayi baba mu nzomono yinuanisa bivonza bi kipheve biobi biba mu khati kimvuka, buba phe malongi ma luvunu ayi batu bambimbi bobo baba mu kimvuka beni, bobo beba tombanga vukumuna bakhomba. (2 Pi. 2:1-3) Piela wutomba kindisa bakhomba ziandi ba babakala ayi ba baketo mu diambu di banunga nzomono beni. Muingi kabutudila, wubabambula moyo malongi mankaka momo balonguka deja. Malongi beni mabasadisa batatamana simbidila kuikama kuawu tii kutsuka.
3. Vana kifuani kioki kilelmbo monisa bila kioki Bakristu boso bafueti tatiminina yindudila mu buphinda mu malongi mangudi ma Bibila.
3 Bobuawu bobo tulembo yonzukila mu kipheve, buawu tulenda bela bafuana mu baka malongi mamona mu malongi mangudi ma Bibila. Tubonga kifuani: Mutu nioni zebi lamba bumboti mboti bidia ayi nioni metona bosi kisalu beni, bawu buadi balenda sadila ziepisi zimosi mu thangu balembo lambi bidia. Bobuawu bobo bumviokila bilumbu, buawu mutu beni nioni zebi lamba bidia bumboti keta kuiza longukila phila yimboti yisadila ziepisi ayi kuzisadila mu phila yimona mu diambu di bidia biluta ba lueki. Bobuawu phe bisadi bi Yehova biobi bime tula mimvu miwombo mu kisalu kiandi ayi balonguki bamona ba Bibila, balenda tadila mu phila yiviakana malongi mangudi ma Bibila. Mambu ma luzingu lueto voti kisalu kieto kioki tueta sadila Yehova bulendakana mabaluka tona tubaka mbotama. Mu thangu tulembo yundudila mu buphinda malongi momo tulonguka tona thama lumbu kiaki, tulenda bakula malongi mamona ayi momo malenda kutusadisa. Tutala malongi matatu ma Bibila mangudi momo Bakristu bobo bayonzuka mu kipheve balenda longuka.
YEHOVA NIANDI MVANGI
4. Diambu mbi dieta salama mu luzingu lueto bo tuzebi ti Yehova niandi Mvangi?
4 “Nzambi niandi wutunga bima bioso.” (Ebe. 3:4) Tuzebi ti planeti’eto ayi luzingu lolo lueta zingila muna, vangu luvangu kuidi Mvangi nioni lutidi nduenga ayi ngolo. Niandi wutuvanga ayi wutuzebi bumboti. Mu buela, weta kututudila thalu. Zebi mambu momo malutidi mboti mu diambu di beto. Diawu, zaba kiedika beni kioki kikondolo phasi mu sudika, ti Yehova niandi Mvangi, kubalula luzingu lueto mu ziphila ziwombo zimboti ayi luzingu lueto lueta kuiza ba mfunu.
5. Kiedika mbi kilenda kutusadisa tukuna kadulu ki kukikulula? (Yesaya 45:9-12)
5 Zaba kiedika ti Yehova niandi Mvangi kulenda kutulonga kadulu ki kukikulula. Mu thangu Yobi kayiza luta tula mayindu mandi mu niandi veka ayi kuidi batu bankaka, Yehova wum’bambula moyo ti niandi Mvangi nioni lutidi ngolo. (Yobi 38:1-4) Yawu yitula ti Yobi kabambuka moyo ti nzila zi Yehova zilutidi zinzila zi batu. Mu nguizani ayi diambu beni, kuntuala m’bikudi Yesaya wuyiza sonika ti: “Ntoto wutuma muna wutubidi kuidi m’bumbi’andi ti: ‘Mbi wulembo thudi?’”—Tanga Yesaya 45:9-12.
6. Thangu mbi tulenda yindudila zangama ku Yehova bo kadi Mvangi’eto? (Tala phe zifoto.)
6 Mutu niandi mana sadila Yehova mu mimvu miwombo, kalenda tona tudila mayindu mandi veka ntima va buangu kitudila Yehova ntima ayi landakana lutuadusu lu Mbembo’andi. (Yobi 37:23, 24) Vayi diambu mbi dilenda salama niandi yindula mu buphinda nduenga ayi bunneni bu Mvangi’andi bobo bulutidi tola? (Yes. 40:22; 55:8, 9) Niandi kikinina ti diyindu di Yehova diawu dilutidi, yawu mayi nsadisa kaba kukikulula ayi kaludika mayindu mandi.
Mbi bilenda kutusadisa tutatamana ba mbueno yimboti mu mayindu meto veka? (Tala paragrafi 6)d
7. Rahela mbi katula muingi kakikinina diambu dimosi diodi diyiza baluka mu khubukulu yi Yehova?
7 Rahela, nioni weta vuanda ku Slovénie, wuyiza mona ti yindula Mvangi’andi kunsadisa kakikinina diambu dimosi diodi diyiza baluka mu khubukulu yi Yehova. Tubidi ti: “Thangu zinkaka phasi yeba banga kuidi minu mu kikinina zinzengolo ziozi zilembo baki batu bobo balembo tutuadisa. Mu kifuani, kumanima matala Lapolo yi kimvuka kintuadisi No. 8 2023 dithula phasi mu ntima mu thangu ndimona mu khumbu yitheti khomba wubakala wulembo tudi diskur na mayedo. Ndisambila Yehova katsadisa ndiyuku mu diambu beni diodi diyiza baluka.” Rahela wukikinina ti Yehova bo kadi Mvangi wu diyilu ayi ntoto, mu lunga kuandi koso widi wufuana mu tuadisa khubukulu’andi mu nzila yimboti. Enati phasi weta mona mu yuku mu tsudukusulu yimosi yimona voti mu lutuadusu lumosi lumona mu khubukulu yi Yehova, bila mbi ka wulendi yindudila ko mu buphinda ayi mu kukikulula koso nduenga yinneni ayi ngolo zinneni zi Mvangi’eto?—Loma 11:33-36.
BILA MBI YEHOVA KETA BIKILA ZIPHASI NZILA
8. Mamboti mbi tueta baka mu zaba bila kioki Yehova kabikila ziphasi nzila?
8 Bila mbi Nzambi keta bikila ziphasi nzila? Batu bankaka bobo basi zaba ko mvutu mu kiuvu beni kioki bafuemina Nzambi ayi bayiza kikinina ti Nzambi kakala ko! (Zin. 19:3) Mu luviakunu ayi bawu, ngeyo wulonguka ti bambuta zieto batheti bawu batubikila disumu ayi kondu kulunga, diawu tuyika muena ziphasi vayi Yehova niandi ko weta tutotudila ziawu. Wulonguka diaka ti mvibudulu wu Yehova kuidi batu, wawu wutula ti zimilio zi batu ban’zaba ayi bamona mu bawu veka phila yoyi Yehova kela manisina ziphasi mvimba mvimba. (2 Pi. 3:9, 15) Malongi beni momo makiedika mavana sikididi ayi mafikika kuidi niandi.
9. Mu mambu mbi tulenda bambukila moyo bibila biobi Yehova kabikidi ziphasi nzila?
9 Tusudikidi mfunu wuba mvibudulu mu thangu tumvingila Yehova kamanisa ziphasi. Vayi mu thangu tudengini zithatukusu, mambu makondolo busonga voti mu thangu tuzimbisidi mutu mu lufua, tulenda kiyuvula bila mbi Yehova kasi fika vangila ko diambu. (Hab. 1:2, 3) Beto dengana mambu maphila yoyi, madi ba diambu dinduenga mu yindula bibila biobi Yehova kabikidi batu basonga bamonisa mvibudulu mu zinzomono.a (Nku. 34:19) Tulenda diaka yindudila lukanu luandi lu manisa ziphasi mu khumbu mosi.
10. Mbi bisadisa Anne kabaka mbombolo kumanima ma lufua lu nguandi?
10 Kiedika kitadidi ziphasi kilenda tusadisa tutatamana. Anne, nioni weta vuanda ku sanga ki Mayotte, kioki kidi ku océan Indien tubidi ti: “Mu thangu ndifuilu nguama mu mua mimvu miomi mime vioka, ndiyiza ba mu kiadi kingolo. Vayi ndieta bambuka thangu zioso moyo ti Yehova kasi ko tho yi ziphasi. Phuila yingolo kadi yi manisa ziphasi zioso ayi yi fulukisa bakhomba zieto boso ba luzolo bobo tufuilu. Yindudila mu buphinda mu malongi beni momo makiedika, kueta kundatina ndembama mu mayindu yoyi yeta kunditukisa mu khumbu ziwombo.”
11. Mu phila mbi bibila biobi Yehova kabikidi ziphasi bilenda kutusadisila tutatamana samuna?
11 Zaba kiedika ki bila kioki Nzambi kabikidi ziphasi, kulenda kututuma tutatamana samuna. Kumanima ma sudikisa ti mvibudulu wu Yehova wudedikini ayi phulusu mu diambu di batu bobo beta balula mavanga, Piela wusonika ti: “Luyindula ntindu mbi wu batu lufueti ba, lufueti ba batu ba khadulu yinlongo ayi mavanga momo meta monisa kadulu ki kangama mu Nzambi.” (2 Pi. 3:11) Mu “mavanga momo meta monisa kadulu ki kangama mu Nzambi” muidi na kisalu kieto ki tsamununu. Banga Dise dieto Yehova, tueta zola batu. Tutidi ti batu beni beba zinga mu nza yimona yi busonga yi Nzambi. Mu mvibudulu woso, Yehova wulembo vani diluaku kuidi batu ba terituare yaku di kunsambila. Didi diluaku dinneni mu ba nkundi wu kisalu wu Nzambi ayi bulendakana mu sadisa batu bawombo ban’zaba tuamina tsuka yiza!—1 Ko. 3:9.
TULEMBO ZINGILA MU “BILUMBU BITSUKA”
12. Zaba ti mu “bilumbu bitsuka” tuidi, mamboti mbi kueta kutunatina?
12 Bibila kitubidi bumboti mboti phila yoyi batu bela bela mu “bilumbu bitsuka.” (2 Tim. 3:1-5) Tulembo moni mu bibuangu biobi tuvuendi phila yoyi mbikudulu beni yilembo lunginina. Mu thangu tulembo moni mavanga ma batu bambimbi malembo luti bivi, tulembo luti ba sikididi ti Mbembo Nzambi yifueni tudulu ntima.—2 Tim. 3:13-15.
13. Mu nguizani ayi kifuani ki Yesu kioki kidi mu Luka 12:15-21, biuvu mbi tulenda kukiyuvula?
13 Zaba ti mu bilumbu bitsuka tulembo zingila, kueta kutusadisa phe tuluta tula mayindu meto mu mambu momo malutidi mfunu voti tuzaba mambu mbi tufueti tula va ntuala mu luzingu lueto ayi bulendakana tusadila thangu’eto mu phila yoyi yilutidi yimboti. Tulenda longuka bila mbi yididi mfunu mu kubutudila mu Luka 12:15-21. (Tanga.) Bila mbi mvuama beni katedolo “vungisi“? Kasi kuntedila ko vungisi mu bila kioki kabela na kimvuama vayi mu bila kioki ka kasi tudila ko va ntuala mambu momo malutidi mfunu. Wumana yidika “kimvuama mu diambu di niandi veka vayi kasi [ba ko] mvuama mu mambu ma Nzambi.” Sadila thangu mu phila yikondo nduenga yiba nzimbala yinneni kuidi mvuama beni bila kasi bue bandi ko bilumbu biwombo bi zingila. Nzambi wukamba mvuama beni ti: “Builu buabu kuandi maba lomba muel’aku.” Lumbu kiaki, bo tueka kutsuka yi bilumbu bitsuka, tulenda kukiyuvula: ‘Zikhanu ziama, zilembo monisa ti ndieta tula mambu momo malutidi mfunu va ntuala mu luzingu luama? Ntindu mbi wu zikhanu ndifueti sadisila bana bama bakitudila? Ndieta sadila ngolo ziama, thangu’ama ayi baka kuama nduka nduka mu diambu di ndiyidika busila buama veka voti mu diambu di ndiyidika busila ku diyilu?’
14. Banga phila bumonisini kifuani ki Miki, bila mbi dididi diambu dinduenga mu yindudila mu buphinda bidimbu biobi masonoko matubidi biobi tulembo moni mu bilumbu bitsuka?
14 Mbueno’eto yoso yi luzingu yilenda baluka mu thangu tulembo yindula bidimbu biobi bimmonisa ti mu bilumbu bitsuka tulembo zingila. Diawu diambu disalama kuidi khomba mosi widi mu dizina di Miki. Tubidi ti: “Mu thangu ndibaka diplomi diama, ndiba na phuila yibaka kisalu kioki kilenda kutsadisa mu diambu di nditatamana longa nzo nkanda yi mambu matedi bibulu. Ndiba phe na lukanu luba n’zibudi nzila wu thangu ka thangu ayi lusadila kuma koko kuidi phuila yiwombo yi minsamuni. Bakhomba bobo bayonzuka mu kipheve batsadisa ndiyindula bumboti mboti mu diambu di ndizaba keni fuana kuandi mu tomba dukisa lukanu lutomba kisalu ki kinsuni kioki kilenda kuphana zimbongo ziwombo ayi yo yawu thangu bue tomba bue dukisa zikhanu ziama zi kipheve. Bambambula moyo ti tsuka yi mambu ma thangu yayi yeka nduka salama. Mu thubulu yinkaka, ndiela zinga mvu ka mvu ku paladiso mu tatamana longuka mintindu miwombo mi bibulu biobi ndiela tia longuka. Diawu, ndibaka nzengolo yitula formasio yoyi yilenda kutsadisa ndiba na maluaku mafuana ayi momo malenda kutsadisa mu diambu di ndibaka buzingila va buangu kitomba longa zinzo nkanda zinila nila ziozi zilenda kundia thangu yiwombo. Yawu yitsadisa ndibaka kisalu kioki kitsadisa mu kisalu kiama ki n’zibudi nzila wu thangu ka thangu ayi kuntuala ndiyiza baka muayi wu kuendila ku Équateur koko kuidi phuila yiwombo yi minsamuni.” Miki ayi nnuni’andi lumbu kiaki balembo sadi mu kisalu ki nkengi wu zunga mu tsi beni.
15. Bue batu balenda tadila nsamu wumboti? Vana kifuani. (Tala phe zifoto.)
15 Tuedi vonga ko nitu mu thangu batu bamengi wa nsamu wumboti mu khumbu yitheti yoyi tukubasamunina. Batu balenda kuawu baluka. Tutadila kifuani ki khomba Yesu, Zaki. Wumona Yesu mu thangu keba yonzuka, mu thangu kayiza ba Mesiya ayi mu phila yoyi keba longilanga viokila batu boso. Kadiambu ko buawu, mimvu miwombo mivioka, Zaki kasi landakana ko Yesu. Kumanima ma pfulukulu kuandi yi Yesu, Zaki kayiza bela nlonguki wu kipfuzi!b (Yow. 7:5; Nga. 2:9) Didi diambu dimfunu wubika zimbakananga bakhomba ziaku voti bakundi baku bobo ka bakikinini ko kiedika ayi kadi mematanga mu kue bue samunina batu bobo bamanga teka kuwa. Bambuka moyo ti mu bilumbu bitsuka tulembo zingila, diawu kisalu kieto ki tsamununu kifueti salimina mu nsualu nsualu. Mambu momo wukubakamba thangu yayi malenda vanga diambu kuidi bawu mu bilumbu binkuiza, bulendakana kumanima mathonono yi ziphasi zinneni.c
Mbi bilenda kutusadisa tubika zimbakananga bakhomba zieto voti bakundi beto bobo ka bawilukidi ko kiedika ki Bibila? (Tala paragrafi 15)e
TATAMANA MONISA PHUTUDULU MATONDO MU MAMBU MOMO YEHOVA KETA KUTUBAMBUDILA MOYO
16. Mamboti mbi wubaka mu mambu momo Yehova keta kutubambudila moyo? (Tala phe ankadre “Sadila kiedika ki Bibila mu diambu di sadisa batu bankaka.”)
16 Bidia binkaka bi kipheve biobi tueta baka bieta kubuku mu diambu di batu bobo batekidi ko wa malongi mangudi ma Bibila. Mu kifuani, kuidi na zidiskur zinkaka zi batu boso, masolo na zivideo zinkaka ziozi zikala mu jw.org ayi zizulunalo ziozi zitadidi batu boso, zieta kubuku mu diambu di batu bobo basi ko Bambangi zi Yehova. Kadiambu ko buawu, tueta zibakila kaka mamboti. Zieta kutusadisa tuyonzula luzolo lueto mu diambu di Yehova, zieta kindisa minu kieto mu Mbembo’andi ayi zieta kutusadisa tuba bafuana mu thangu tunlonga malongi mangudi makiedika ki Bibila kuidi batu bankaka.—Nku. 19:7.
17. Mu mambu mbi tulenda yindudila malongi mangudi ma Bibila?
17 Bo tuidi Bambangi zi Yehova, tueta ba mu mayangi mu thangu tulutidi bue sudika bumboti mboti kiedika kimosi ki Bibila. Vayi tukala phe na phutudulu matondo mawombo mu diambu di malongi mangudi ma Bibila momo matubenda mu kiedika mu khumbu yitheti. Enati lumbu kinkaka tumueni phasi mu landakana lutuadusu lu zindongi zi khubukulu yi Yehova ayi tutidi kaka kangama mu mayindu meto veka, mu kukikulula koso tulenda bambuka moyo mutu nioni wulembo tuadisa khubukulu beni: Mvangi nioni lutidi ngolo ayi ndueng’andi yisukanga ko. Mu thangu beto voti batu bobo tueta zola tulembo dengana nzomono, tulenda ba mvibudulu ayi yindudila bibila biobi Yehova kabikidi ziphasi nzila. Ayi mu thangu tubeki nzengolo yizaba phila yisadila thangu’eto ayi baka kueto, matu bambuka moyo ti kutsuka yi bilumbu bitsuka tueka ayi tusiedi ko thangu yiwombo tii tsuka yinkuiza. Bika mambu momo Yehova kalembo tubambudila moyo matatamana kutukindisa, kutuvana nduenga ayi kutusadisa tutatamana kunsadila mu bukuikama boso.
NKUNGA 95 Kiezila kilembo luti buelema
a Tala disolo “Ntina oyo etikali moke bampasi nyonso esila” mu Nzo yi Nkengidi wu 15 Mai 2007 pha. 21-25 mu dingala.
c Tala disolo “Diambu mbi tuzebi mu dio ditedi tsambusulu yi Yehova mu bilumbu binkuiza?” mu Nzo yi Nkengidi wu Mai 2024 pha. 8-13.
d TSUDUKUSULU YI FOTO MU: Diyindu di nkulutu mosi bakadi kudikikinina kuidi bakulutu bankaka. Kuntuala, mu thangu kalembo tadi dituti diodi diwedi zimbuetila, yitukidi ayi sudikidi ti mayindu ma Yehova mawu malutidi viokila mayindu momo mandi veka.
e TSUDUKUSULU YI FOTO: Mu ndongokolo yi Bibila yi niandi veka, khomba mosi wunketo wulembo tadila bibila biobi bimmonisa ti mu bilumbu bitsuka tulembo zingila. Yawu yintumini katela khomb’andi wunketo mu telefoni mu diambu di kansamunina.