Sadisa nlonguki’aku wu Bibila kabaka nzengolo yi sadila Yehova

1-2. a) Bila mbi minlonguki mi Bibila minkaka mikadila ziduti mu baka nzengolo yi sadila Yehova? b) Mbi tueka ntadila mu disolo diadi?

ZIDUTI wuba mu ba Mbangi Yehova? Bulendakana tsisi weba monanga ti batu bobo beta sala yaku, bakundi baku voti batu ba dikanda diaku bafuemina. Voti bulendakana wukimona ti kadi khumbu wela nunga zingila mu landakana zitsikudukusu zi Nzambi. Enati buawu buididi, wulenda kukitula va buangu ki minlonguki mi Bibila miomi mieta mona banga balendi ko nunga baka nzengolo yi sadila Yehova.

² Yesu wuzaba ti tsisi yiphila yoyi yilenda fika kakidila mutu kabika yonzuka mu kipheve. (Mat. 13:20-22) Vayi kasi sundula ko batu bobo baba ziduti mu kunlandakana. Kutu wusadisa minlonguki miandi 1) bazaba bakula mambu momo malenda kakidila khulama yawu, 2) bayonzula luzolo luawu mu diambu di Yehova, 3) baluta zaba mambu momo malutidi mfunu, ayi 4) banunga mambu maphasi. Bue tulenda sadila mambu momo Yesu kakamba balonguki bandi mu thangu tulembo sadila buku Zinga mu mayangi mvu ka mvu! muingi tusadisa minlonguki mieto mi Bibila misobula sadila Yehova?

SADISA NLONGUKI’AKU KABAKULA MAMBU MOMO MALEMBO NKAKIDILA KASOBULA SADILA YEHOVA

3. Nginu mambu mbi makakidila Nikodemi kaba nlonguki wu Yesu?

³ Nikodemi nioni wuba pfumu yinneni kuidi Bayuda wudengana mambu momo mankakidila muingi kaba nlonguki wu Yesu. Kumanima ma zingondi zisambanu kuandi tekila katona kisalu kiandi ki tsamununu, Nikodemi wuyiza bakula ti Yesu niandi mmonisi wu Nzambi. (Yow. 3:1, 2) Vayi Nikodemi wusobula dengana ayi Yesu mu kitsueki mu diambu di “boma bu Bayuda.” (Yow. 7:13; 12:42) Bulendakana weba mona tsisi mu zimbisa kipfumu kiandi niandi ba nlonguki Yesu.a

4. Bue Yesu kasadisila Nikodemi kazaba mambu momo Nzambi katomba kuidi niandi?

⁴ Nikodemi wuzaba minsiku, vayi wuba na phuila yi lusadusu muingi kazaba mambu momo Yehova keba tomba kuidi niandi. Bue Yesu kansadisila? Yesu wuba wukubama mu yakula Nikodemi buba ti va builu kaye kum’bata. Ayi wusudikisa bumboti mboti Nikodemi mambu momo kalenda tula muingi kaba nlonguki, banga balula mavanga mu masumu mandi, baka mbotama mu nlangu, ayi monisa minu mu muana Nzambi.​—Yow. 3:5, 14-21.

5. Bue wulenda sadisila nlonguki’aku wu Bibila kazaba mambu momo malembo nkakidila mu sadila Yehova?

⁵ Buba ti nlonguki zebi bumboti Bibila, bulendakana tulenda kunsadisa mu zaba mambu momo malembo nkakidila mu sadila Yehova. Kisalu ki kinsuni voti dikanda diandi di kinsuni, bilenda kumvuvula mu zikhanu ziandi zi kipheve. Banga Yesu, bakanga thangu yi sadisila nlonguki’aku. Wulenda kuntedisa ludia yandi mua kima voti wulenda kunlomba luevukusa. Mu thangu beni yina luididi ayi niandi va kimosi, bulendakana wulenda kunsadisa katubila mambu maphasi momo malembo nkakidila. Kindisa nlonguki’aku kabalula mambu momo makuntombana bika sia ti mu diambu di kayangidika vayi mu diambu di kamonisa ti weta zola Yehova.

6. Bue wulenda sadisila nlonguki’aku wu Bibila kaba kibakala kisobula sadila Yehova? (1 Kolinto 16:13)

⁶ Mu thangu nlonguki’aku wu Bibila kakikinini ti Yehova maka nsadisa kazingila mu landakana zitsikudukusu zi Bibila, yawu mayi tula ti kaba kibakala mu sadila mambu momo kalembo longuka. (Tanga 1 Kolinto 16:13.) Kisalu kiaku kilenda dedakana banga kioki ki n’yisi. Yindula buna mu thangu wuba mu nzo nkanda, ntindu mbi wu n’yisi weba luta yangalalanga? Bulendakana wuba n’yisi nioni weba kusadisanga mu mvibudulu woso muingi wuba sikididi mu maluaku maku. Bobuawu phe, nlongi wumboti wu Bibila kasukilanga ko kaka mu longa mambu momo Nzambi katidi tuvanga vayi weta sadisa phe nlonguki’andi kaba sikididi ti mu lusadusu lu Yehova, kalenda balula mambu momo makuntombana mu luzingu luandi. Bue wulenda kubutudila?

SADISA NLONGUKI’AKU KALUTA BUELA LUZOLO LUANDI MU DIAMBU DI YEHOVA

7. Bue Yesu kasadisila batu bobo beba kun’wanga bayonzula luzolo luawu kuidi Yehova?

⁷ Yesu wuzaba ti balonguki bandi bawu zola Nzambi, yawu yela kubatuma batula mu tsadulu mambu momo banlonguka. Khumbu ziwombo Yesu keba longilanga balonguki bandi mambu momo meba kubasadisanga bayonzula luzolo luawu mu diambu di Dise diawu di mazulu. Mu kifuani, wudedikisa Yehova ayi dise diodi dieta vana bima bimboti kuidi bana bandi. (Mat. 7:9-11) Bulendakana balonguki bankaka basi baka ko badise baphila yoyi. Yindula theti phila yoyi Yesu kakimuena mu thangu kavana kifuani ki dise di ntima kiadi nioni wuyamba muan’andi wuvutuka nioni wuba wuzimbala mu vanga mambu mawombo mambimbi. Mu nzila yi kifuani beni kioki, balonguki ba Yesu baba bafuana mu mona ntima kiadi wowo Yehova kakala kuidi bana bandi va mbata ntoto.​—Luka 15:20-24.

8. Bue wulenda sadisila nlonguki wu Bibila kayonzula luzolo luandi mu diambu di Yehova?

⁸ Ngeyo phe wulenda sadisa nlonguki’aku wu Bibila kayonzula luzolo luandi kuidi Yehova, mu luta tubilanga bikadulu bi Nzambi mu ndongokolo’eno. Mu kadika khumbu yoyi lunlonguka, wunsadisa katula nguizani yi mambu momo kanlonguka ayi luzolo lu Yehova mu diambu di beto. Mu thangu lulembo tubila khudulu, luta tubila phila yoyi yintadidi. (Loma 5:8; 1 Yow. 4:10) Bulendakana mu thangu nlonguki wu Bibila kasudikidi ti Yehova weta kun’zola buwombo, yawu yilenda kuntuma kaluta zola buwombo Yehova.​—Nga. 2:20.

9. Mbi bisadisa Michael kabalula nzingulu’andi?

⁹ Tubonga kifuani ki Michael nioni wukala ku Indonésie. Wuzaba kiedika mu thangu keba yonzuka vayi kasi baka ko mbotama. Mu thangu kadukisa 18 ki mimvu, wuyenda kubuala bu kinzenza mu sala kisalu ki sofele ki ditoma dinneni. Kumanima wuyiza kuela, vayi wuyiza bika dikanda diandi muingi ketatamana sadila kubuala bu kinzenza. Nketo’andi ayi muan’andi wunketo bayiza tona longuka Bibila ayi bamonisa khulama. Kumanima ma lufua lu nguandi, Michael wubaka nzengolo yivutuka ku buala buawu mu diambu di sadisa siandi ayi wukikinina longuka Bibila. Mu thangu batadila tini “Tuvisa mboti mboti” mu dilongi 27 di buku Zinga mu mayangi mvu ka mvu! tini beni kisimba buwombo ntim’andi. Mu thangu kayindula phila yoyi Yehova kakimuena mu thangu keba mona muan’andi wulembo moni ziphasi, Michael wubimisa matsuela. Wuyonzula phutudulu matondo mawombo mu diambu di khudulu ayi yawu yintuma kabalula nzingulu’andi ayi kabaka mbotama.

SADISA NLONGUKI’AKU KALUTA ZABA MAMBU MOMO MALUTIDI MFUNU

10. Bue Yesu kasadisila balonguki bandi batheti batula mambu momo malutidi mfunu va buangu kitheti? (Luka 5:5-11) (Tala phe foto.)

¹⁰ Balonguki batheti bafika wilukila ti Yesu niandi Mesiya nioni wuvanunu tsila, vayi phuila yi lusadusu baba muingi baluta tula kisalu ki tsamununu va buangu kitheti mu luzingu luawu. Piela ayi Andela, mu mua thangu mosi plina bakibela minlonguki mu thangu Yesu kabalomba banlandakana thangu ka thangu. (Mat. 4:18, 19) Baba mu kompani yi loba zimbizi yoyi yiba na khulama yimboti, yimonika banga mu kithuadi baba na Zaki ayi Yowani. (Mlk. 1:16-20) Mu thangu Piela ayi Andela “basundula makondi mawu,” bulendakana babaka zikhubukulu mu dukisa ziphuila zi makanda mawu mu thangu babaka nzengolo yi landakana Yesu. Mbi bibasadisa bazaba mambu momo bafueti tula va buangu kitheti mu luzingu luawu? Nkanda wu Luka wutumonisini phila yoyi Yesu katudila mangitukulu mu kindisa sikididi kiawu kingolo kuidi Yehova ti wela dukisa ziphuila ziawu.​—Tanga Luka 5:5-11.

11. Bue tulenda sadila mambu momo tudengana mu kindisa minu ki nlonguki’eto?

¹¹ Tulendi ko tula mangitukulu banga Yesu, vayi tulenda tubila masolo mu phila yoyi Yehova kasadisila batu bobo bantula va buangu kitheti mu luzingu luawu. Mu kifuani, wukhidi bambukila moyo phila yoyi Yehova kasadisila mu thangu wutona kutakana mu zikhutukunu? Bulendakana wusolula ayi pfumu’aku yi kisalu ayi wunsudikisa bila kioki ka wukuiza bue sadilanga ko kumanima ma thangu yi kisalu enati kubutudila kulenda kukakidila mu kuenda mu zikhutukunu. Mu thangu wulembo budi masolo maphila yoyi kuidi nlonguki’aku, wunsudikisanga phila yoyi minu kiaku kikindila mu mona phila yoyi Yehova kasadisila wutula tsambudulu’andi va buangu kitheti mu luzingu luaku.

12. a) Bila mbi tufueti tedisilanga minsamuni minkanka mu thangu tulembo longuka ayi nlonguki’eto? b) Bue tulenda sadila zivideo mu diambu di tutula ndongokolo yi Bibila ayi nlonguki’eto mu phila yifuana? Vana kifuani.

¹² Nlonguki’aku wela baka phe mamboti niandi wa phila yoyi Bakristu bankaka batudila mambu ma tsambudulu va buangu kitheti mu luzingu luawu. Wubalombanga basudikisa nlonguki’aku phila yoyi basobudila sadila Yehova ayi batubila mambu momo bavanga muingi batula kisalu ki Yehova va buangu kitheti mu luzingu luawu. Mu buela, bakanga thangu yitadilanga zivideo ziozi zikala va buangu “Tuvisa mboti mboti” voti va buangu “Tala mambu mankaka” mu buku Zinga mu mayangi mvu ka mvu! Mu kifuani mu thangu lulembo longuka dilongi 37, wulenda luta tubila zitsikudukusu ziozi zidi mu video Yehova akokokisa bamposa na biso.

SADISA NLONGUKI’AKU KANUNGA MAMBU MAPHASI

13. Bue Yesu kasadisila balonguki bandi baba bakubama bawu dengana zinzomono?

¹³ Yesu mu khumbu ziwombo kakambila balonguki bandi ti bela dengana kimbeni ki batu bankaka, buba phe kuidi batu ba dikanda diandi. (Mat. 5:11; 10:22, 36) Kutu mu thangu kisalu ki Yesu va ntoto kiyiza ba kutsuka, wulubula balonguki bandi ti balenda dengana phe nzomono yi lufua. (Mat. 24:9; Yow. 15:20; 16:2) Wubalebidila baba baluenga mu kisalu kiawu ki tsamununu. Wubavana ndongi yikambu tulanga ziphaka ayi bambeni ziawu ayi babika tomba kukimonikisanga muingi babaka butatimina sala kisalu ki tsamununu.

14. Bue tulenda sadisila nlonguki wu Bibila kaba wukubama niandi dengana kimbeni? (2 Timote 3:12)

¹⁴ Banga Yesu, tulenda sudikisa nlonguki’eto mambu momo malenda tuba batu bobo beta sala yandi, bakundi bandi, bakhomba ziandi ba dikanda mu bila kioki kalembo longukila Bibila. (Tanga 2 Timote 3:12.) Batu bankaka bobo beta sala yandi balenda kunsoka bo kame tona zingila mu landakana malongi ma Bibila. Wunkaka phe balenda kumvueza kuidi bakhomba ziandi zi makanda bobo bafikimini yandi mu bila kioki kame tonina wilukila mambu momo madi mu Bibila. Beto fika sadisanga balonguki beto baba bakubama mu dengana kimbeni, buawu phe bela bela bafuana bawu kukidengana.

15. Mbi bilenda sadisa nlonguki wu Bibila kanunga kimbeni ki dikanda?

¹⁵ Enati nlonguki’aku wulembo dengana kimbeni mu dikanda mu bila kioki kalembo longukila Bibila ayi Bambangi zi Yehova, wunsadisa kayindula mbi bilembo batumi bafuema. Balenda banzila ti mu nzimbala bame kunkotisa voti bulendakana mayindu mambimbi kuandi badi mu diambu di Bambangi zi Yehova. Buba phe Yesu bankamba mambu mambimbi kuidi batu bobo keba zolanga. (Mlk. 3:21; Yow. 7:5) Longanga nlonguki’aku katatamana ba mvibudulu ayi kabanga diela dizingila ayi batu bankaka, buba phe bakhomba ziandi ba dikanda.

16. Bue tulenda sadisila balonguki ba Bibila bazaba tubila luwiluku luawu mu phila yidiela?

¹⁶ Buba ti bakhomba ziandi ba dikanda batidi zaba mambu momo kalembo longuka, nlonguki nioni widi nduenga, kedi mana kubasudikisa ko mambu moso mu khumbu mosi. Niandi kubutudila, bulendakana bakhomba ziandi ba dikanda balenda vonga nitu ayi yawu yilenda tula ti babika bue solula ayi niandi mu diambu ditedi luwiluku luandi. Diawu, kindisanga nlonguki’aku katubilanga luwiluku luandi mu phila yoyi yilenda tula ti keba baka butatiminina solula ayi batu bobo bakun’wa mu khumbu yinkuiza. (Kol. 4:6) Bulendakana kalenda lomba bakhomba ziandi ba dikanda bakota mu siti yi jw.org. Yawu yilenda kubasadisa baluta zaba mambu mawombo mu diambu di Bambangi zi Yehova mu thangu yoyi balenda kubutudila bawu veka, ayi bawu veka phe balenda sobula thangu yoyi balenda viokisa mu tanga mambu momo madi mu khati siti beni.

17. Bue wulenda vanina formasio kuidi nlonguki wu Bibila kazaba buvanina mvutu mu mayindu mambimbi momo batu bankaka balenda ba mu diambu di Bambangi zi Yehova? (Tala phe foto.)

¹⁷ Wulenda sadila mambu momo madi mu seri “Mituna oyo bato batunaka mingi” mu Jw.org mu diambu di sadisa nlonguki’aku kakibongisa mu vana mimvutu mikondolo phasi mu biuvu biobi batu ba dikanda diandi voti bakundi bandi balenda kun’yuvula. (2 Tim. 2:24, 25) Mu kadika disolo, tubilangeno tini kioki kitubidi ti: “Batu bankaka beta tuba ti” mu nkanda Zinga mu Mayangi mvu ka mvu! Kindisa nlonguki’aku kamekanga vana mimvutu mu ziphova ziandi veka. Kadi memata mu kunkamba mambu momo kalenda bongisa mu phil’andi yivaninanga mvutu. Mu thangu wulembo mekisa ayi niandi phila yoyi kalenda soludila ayi batu, wela luta ba wufuana mu sudikisa batu bankaka bila mbi keta kikinina voti nana diambu dimosi.

18. Bue wulenda sadisila nlonguki wu Bibila katubila luwiluku luandi mu kisalu ki tsamununu? (Matayi 10:27)

¹⁸ Yesu wuvana lutumunu kuidi minlonguki miandi basamuna nsamu wumboti kuidi batu. (Tanga Matayi 10:27.) Enati nlonguki fikidi tona tubila luwiluku luandi kuidi batu bankaka, yawu yilenda kunsadisa kafika tudila Yehova ntima. Bue wulenda sadisila nlonguki wu Bibila kadukisa lukanu beni? Mu thangu kimvuka kiveni ndubu ti kampanye yimosi yeka nduka salama, kindisa nlonguki wu Bibila kayindula mambu momo kalenda bongisa muingi kaba nsamuni nioni fueni. Wunsudikisa bila mbi bakhomba bawombo bamona ti yisi ba ko phasi mu tona sala kisalu ki tsamununu mu thangu yi zikampanye. Kalenda diaka baka formasio yizaba tuba va ntuala batu mu zikhutukunu ziozi tueta tula va khati tsika sabala. Niandi tomba dukisa lukanu lolo, wela zaba tubila luwiluku luandi mu sikididi kioso.

TUDILA NLONGUKI’AKU WU BIBILA NTIMA

19. Bue Yesu katudila balonguki bandi ntima ayi beto phila mbi tulenda kunsokudila?

¹⁹ Tuamina Yesu kakuma ku diyilu, wukamba balonguki bandi ti wela bue ba yawu. Basi visa ko ti Yesu weba tubila khuendolo’awu ku diyilu. Kuikama kuawu, kuawu kaluta tudila thalu vayi bika ziduti ziawu. (Yow. 14:1-5, 8) Wuzaba ti thangu yeba tombana muingi basudika mambu mankaka banga khuendolo’awu ku diyilu. (Yow. 16:12) Banga Yesu, beto phe tulenda tudila minlonguki mieto ntima ti bela yangidika Yehova.

20. Bue khomba mosi wunketo ku Malawi katudila nlonguki’andi ntima?

²⁰ Tuidi na vuvu ti nlonguki’eto tidi vanga mambu mamboti. Tubonga kifuani ki Chifundo, khomba mosi wunketo nioni wukala ku Malawi. Mu nzila yi buku Zinga mu mayangi mvu ka mvu! wutona longuka Bibila ayi Alinafe, ntueni mosi wunketo nioni weba sambilanga mu dibundu di katoliko. Mu thangu bamanisa longuka dilongi 14, Chifundo wuyuvula nlonguki’andi keni bue keta muena tsambudulu yi bitumba. Alinafe wufuema ngolo ayi wumvutudila ti: “Yidi tsobodolo yi kadika mutu!” Chifundo wuyindula keni Alinafe maka tatamana kuandi longuka tii ku tsuka. Vayi wumonisa mvibudulu mu tatamana longuka ayi Alinafe, mu ba na vuvu ti bilumbu binkuiza kuntuala wela kuiza sudika kuandi. Mua zingondi zivioka, Chifundo wuyuvula kiuvu kioki kidi mu dilongi 34: “Mamboti mbi mebaka lumbu kiaki mu ndongokolo’aku yi Bibila ayi mu zaba Nzambi yikiedika Yehova?” Chifundo tubidi phila yoyi Alinafe kavutudila mvutu: “Wutubila mambu mawombo mamboti, mu mosi mu mawu, wutubila ti Bambangi zi Yehova bavanganga ko mambu momo Bibila kikandikidi.” Mua thangu fifioti fivioka, Alinafe wuyiza lembo bue sambilanga bitumba ayi wuyiza baka mbotama.

21. Bue tulenda sadisila nlonguki wu Bibila kabaka nzengolo yi sadila Yehova?

²¹ Buba ti Yehova niandi “weta menisa,” vayi beto phe kiyeko tuidi mu sadisa nlonguki wu Bibila kayonzuka. (1 Ko. 3:7) Tusukilanga ko kaka mu kunlonga mambu momo Nzambi katidi kavanga. Tueta sadisa nlonguki wu Bibila kayonzula luzolo luandi lungolo kuidi Yehova. Tueta kunkindisa phe kamonisa luzolo luandi mu zaba mambu momo kalenda tula va buangu kitheti mu luzingu luandi. Ayi tueta kunlonga phila yoyi kalenda tudila Yehova ntima mu thangu kadengini mambu maphasi. Mu thangu tulembo monisa nlonguki wu Bibila ti vuvu kidi yeto maka yangidika Yehova, matu m’buela zingolo ayi kunkindisa kasobula sadila Yehova.