Tulonguka kuidi Nlongi’eto wunneni mu luzingu lueto loso

KIFUANI KI BAMBUTA ZIAMA

Kutsuka 1950, bambuta ziama babotuka ku Italie ayi bayenda ku Kindersley, mu zunga ki Saskatchewan, ku Canada. Mua ndambu bilumbu kuandi kumanima, balonguka kiedika ayi bayiza kitula va buangu kitheti mu luzingu luawu. Ndikhidi bue bambuka moyo ti mu thangu ndiba muana lezi, ndieba viokisanga zithangu ziwombo mu lumbu mu kisalu ki tsamununu ayi dikanda diama, thangu zinkaka, mu thubulu yi lueya, ndieta tuba ti ndiba “n’zibudi nzila wunsadisi” mu thangu ndiba nana di mimvu!

Bambuta ziama baba biphumbulu, ka diambu ko bavana kifuani kimboti mu kukiyimina mu diambu di Yehova. Mu kifuani, mu 1963, batekisa bima biwombo mu diambu di babaka zimbongo ziozi bayendila mu lukutukunu lunneni lolo lueta bundisa zitsi ziwombo ku Pasadena, mu zunga ki Californie, ku États-Unis. Mu 1972, tuye zingila ku mbanza yi Trail yoyi yiba na kielo ki 1 000 ki zikilometre mu zunga ki Colombie-Britannique, ku Canada mu diambu di tuebuedi mioko mu kisalu ki tsamununu mu mbembo yi ki Italien. Siama kisalu keba salanga kikue sunganga zinzo ayi ki kombula zinzo. Wumanga bisalu biobi bilenda kumvana zimbongo ziwombo muingi kaluta kivana buwombo mu kisalu ki Yehova.

Ndidi na phutudulu matondo mawombo mu kifuani kioki bambuta ziama bambikila, minu ayi bakhomba ziama batatu. Kisalu kiawu kivanga diambu dinneni mu diambu di formasio yoyi ndibaka mu mambu ma teokrasi yoyi yiphana dilongi diadi mu luzingu luama loso ti: Minu teka tula Kipfumu ki Yehova va buangu kitheti, Niandi wela kuthanina.​—Mat. 6:33.

THONONO YI KISALU KI THANGU KA THANGU

Mu 1980, ndikuela Debbie, khomba mosi wunketo wu kitoko nioni wuba na zikhanu zimboti zi kipheve. Tuba na phuila yitona kisalu ki thangu ka thangu, diawu Debbie kayiza tonina kisalu ki n’zibudi nzila kumanima ma ngondi zitatu mu thangu tukuelana. Mvu mosi kumanima ma makuela meto, tuyenda mu mua kimvuka kioki kiba phuila yi minsamuni, ayi minu phe ndisangana ayi niandi mu kisalu ki n’zibudi nzila.

Kuntuala tuyiza vonga nitu ayi tubaka nzengolo yikue vuandi kuma kunkaka. Vayi tuteka solula theti ayi nkengi wuzunga. Wutukambila mambu mu luzolo vayi mu bukiedika boso: “Wutukamba ti beno veka lulembo luti tudi ti mambu meno maba phasi. Lulembo luti tudi mayindu meno mu mambu mambimbi mu mambu momo malutadidi. Vayi beno tomba mambu mamboti, malu mamona.” Bukiedika ziba zindongi ziozi tuba phuila mu wa. (Nku. 141:5) Tufika thumbu sadila ndongi beni, ayi tumona phe mambu mamboti. Batu bawombo mu kimvuka batomba sala buwombo kisalu ki Yehova, buba mintueni ayi batu bobo banuni bawu voti baketo bawu basi ba ko Bambangi zi Yehova. Diba dilongi dinneni kuidi beto. Tutatamana tomba mambu mamboti ayi vingila ti Yehova kaludika mambu momo beto tulenda mona banga phasi madi. (Mika 7:7) Tubue baka zikhini zieto ayi mambu mayiza lulama.

Batu bobo batuvana formasio mu nzo nkand’eto yitheti yi n’zibudi nzila, baba batu bobo basadila mu tsi yi kinzenza. Mu thangu batumonisa zifoto, ayi mu thangu batukamba mambu maphasi momo badengana ayi lusakumunu lolo babaka, batuvana phuila yisala banga bamisionere. Tuyiza kitudila lukanu luba bamisionere.

Muingi tudukisa lukanu beni, mu 1984 tubotuka ku Colombie-Britannique ayi tuyenda mu zunga kioki beta tuba mbembo yi kifalisi ku Québec koko kuidi na kielo ki 4 000 ki zikilometre. Yawu yimonisa ti tufueti kue bati kuna mambu mamona ayi mbembo yi mona. Diambu dinkaka diphasi, tube kondungu buwombo zimbongo. Lumbu kimosi tuzingila mu zimbala ziozi zisiadidila ziozi tuye tota mu tsola yi mutu mosi plina. Debbie mu ziphila ziwombo keba lambilanga zimbala beni ayi lueki zieba banga mu kuzidia! Kadiambu ko mambu beni momo maphasi, tutatamana simbidila zikhini zieto. Mu buela tumona ti Yehova weba kututaninanga.​—Nku. 64:10.

Tuyituka lumbu kimosi batutedidi mu telefoni. Mu apeli beni, batutedisa tuesadila ku Beteli yi Canada. Ka diambu ko tuba mu zikhini mu thangu batutela, tuvonga phe nitu bila tukiwesila phe formilere mu diambu di tuenda ku nzo nkanda yi Gileade. Vayi tukikinina kuenda ku Beteli. Mu thangu tutula kuna, tuye yuvula khomba Kenneth Little, nioni wuba wumosi mu bakhomba ba Komite yi Filiali ti: “Bue busundukila ziformilere zieto zi Gileade?” Wuvutula ti: “Tuela tadila diambu beni diodi bawu kulutedisa.”

Sabala kuandi yimosi yivioka, minu ayi Debbie bayiza kututedisa mu nzo nkanda yi Gileade. Buabu yiyiza tombana ti tusobula. Khomba Little wutukamba ti: “Bubu yoso kuandi tsobodolo yoyi luntula, bulendakana lumbu kidi luela nionga mu bila kioki ka luisi sobudila ko yoyi yinkaka. Kuisi ko tsobodolo yilutidi yoyi yinkaka, bila Yehova kalenda kuandi sakumuna yoso kuandi tsobodolo.” Tusobula kikinina imvitasio yi Gileade, mu mimvu miomi milandakana, tuyiza mona ti zindongi ziozi Khomba Little katuvana zidi zikiedika. Khumbu ziwombo tueta vutukila ziphova ziandi kuidi bakhomba bobo yeta kuiza tombana ti batula tsobodolo mu phila yoyi bakuiza sadila mu kisalu ki Yehova.

LUZINGU LU KI MISIONERE

Tuyangalala ba mu 24 ki bana ba nzo nkanda bobo basobulu ba mu nzo nkanda yi 83 yi Gileade yoyi yiba ku Brooklyn, ku New York, mu Avril 1987. Khomba Ulysses Glass ayi Jack Redford bawu baba bayisi bobo beba luta kutulongisanga buwombo. Zingondi zitanu zivioka, tuyiza tambula maplomi mu lumbu ki 6 Septembre 1987. Batutinda ku Haiti, va kimosi ayi John na Marie Goode.

Tona mu mvu 1962, kuisi teka ba ko khomba nioni batinda ku Haiti, bila mvu beni wina wawu wuba mvu wutsuka wowo bayiza kukila bamisionere bobo baba kuna. Sabala zitatu zivioka kumanima ma kutuvana maplomi, tutona sadila ku Haiti, va khati tsika miongo mu mua kimvuka kioki kiba na 35 ki minsamuni. Tuba mintueni ayi tuisi zaba ko mambu mawombo, beto veka tueba vuandanga mu nzo yi bamisionere. Kuma koko tueba vuandanga, batu bobo baba kuna baba bapovre ayi bawombo mu bawu basi zaba ko tanga. Mu bilumbu bieto bitheti bi ki misionere, tudengana mimvita mi bana ba buala, barebeli baziona kipfumu ki leta, bikuku bi zimbazu mu nzila nzila ayi miphepi mingolo.

Tuba phe na diluaku di longuka mambu mawombo kuidi bakhomba ba babakala ayi ba baketo bobo beba monisanga kibakala ayi baba mu zikhini ku Haiti. Bawombo baba mu luzingu lu ziphasi, vayi beba zolanga Yehova ayi kisalu ki tsamununu. Kuba na khomba mosi wunketo wuyonzuka nioni kasi zaba ko tanga, vayi wuzaba 150 ki ziverse ziozi kalunda mu ntim’andi. Mambu momo tueba dengananga kadika lumbu, makindisa sikididi kieto kitatamana samuna tsangu yi Kipfumu, ti kiawu kaka kilenda ludika mambu mu luzingu lu batu. Dituyangidika buwombo mu ntima mu mona phila yoyi balonguki beto bankaka batheti bayiza bela min’zibudi nzila mi thangu ka thangu, min’zibudi nzila minneni ayi phila yoyi bayiza bela bakulutu.

Mu thangu tuba ku Haiti, ndidengana Trevor nioni wuba misionere mu dibundu dimosi diodi beta tedila Mormon, ayi ndibaka diluaku ditubila ayi niandi mambu ma Bibila mu mua zikhumbu ziwombo. Mu mimvu miomi milandakana kuntuala, mu kinzimbukila nditambula nkanda wowo wuba kuidi niandi. Mu nkanda beni wusonika ti: “Mandi baka mbotama mu lukutukunu (assemblée) lolo lunlandakana! Thidi vutuka ku Haiti mu diambu di ndiekusadila banga n’zibudi nzila wunneni mu zunga kioki ndibela misionere mu dibundu di Mormon.” Buawu phe katudila mu mimvu miwombo ayi nketo’andi.

KU PHUTU​—AYI KU AFRIKA

Batutinda tuesadila mu tini kimosi ki phutu koko kisalu ki Kipfumu kibela va thonono. Mu 1992, tutula ku Ljubljana, ku tsi yi Slovénie, pfika pfika yi buala bobo bambuta ziama bayonzukila tuamina benda ku Italie. Mvita weba tatamananga kaka vonda batu ayi bebisa bibuangu mu zunga ki ex-Yougoslavie. Filiali yi Vienne ku Autriche, buba phe bibilu ku Zagreb ku Croitie ayi ku Belgrade ku Serbie biawu bieba tuadisanga kisalu ki tsamununu mu zunga beni. Buabu kadika tsi yiyika ayi Beteli yandi veka.

Yawu yitombana ti tulonguka mbembo yimona ayi phila yimona yi zingila. Batu ba tsi beni beba tubanga ti, “Jezik je težek,” yoyi yinsundula “Mbembo phasi yidi.” Buawu phe bubela! Tuyangala kuikama ku bakhomba ba babakala ayi ba baketo bobo bakikinina mu luzolo luawu loso tumukina mambu momo mabaluka mu khubukulu ayi tumona phila yoyi Yehova keba kubasakumuninanga. Tubuemona diaka phila yoyi Yehova keta ludikila mambu mu luzolo ayi mu thangu yifuana. Mambu mawombo tulonguka mu thangu tuba ku Slovénie, ayi malongi mawombo momo tubaka phe mu luzingu lueto matusadisa tununga mambu maphasi momo tudengana kuna.

Vayi mambu ma luzingu lueto matatamana baluka. Mu mvu 2000 batutinda ku Côte d’Ivoire, ku Westi yi Afrika. Ayi mu Novembre 2002, mu bila ki mvita wu bana ba buala, batutinisa ku Sierra Leone. Mvita wu bana ba buala wowo wutula 11 ki mimvu wuyiza mana. Diba diambu diphasi mu thumbu botuka ku Côte d’Ivoire mu kinzimbukila. Vayi, malongi momo tulonguka matusadisa tutatamana simbidila zikhini zieto.

Tuluta tula thalu’eto kuidi batu bawombo bobo beba tombanga longuka kiedika ku tsi beni ayi kuidi bakhomba zieto ba luzolo ba babakala ayi ba baketo bo bamonisa mvibudulu mu mimvu beni mina mi mvita. Basi ba ko bima biwombo bi kinsuni, vayi beba tombanga kabanga bima biobi biba yawu. Khomba mosi wu nketo wukabila Debbie minledi. Mu thangu Debbie kaba ziduti mu kikinina bonga minledi beni, khomba beni wunketo wunkuika mu tuba ti: “Mu thangu yi mvita, bakhomba bawombo ba zitsi zinkaka batusadisa. Buabu yeka thangu’eto yikulusadisila.” Beto phe tubaka lukanu lusokudila kifuani kiawu.

Tsuka tsuka tuyiza vutuka ku Côte d’Ivoire, vayi mambu ma politiki mu tsi beni mayiza bue totula kikhesi. Mu Novembre 2004, batutinisina mu elikopitere ayi tuyenda wumosi mosi mu beto na sakosi yi 10 kuandi ki zikilo. Tuleka va ntoto mu builu beni buna mu kan ki masodi ma France ayi lumbu kioki kilandakana batunata ku Suisse. Mu thangu tuye tula ku Filiali va khati tsika builu, Komite yi Filiali ayi bayisi ba Nzo nkanda yi Kisalu ki Tsamununu (École de formation ministérielle), buba phe baketo bawu batuyamba mu zanti yoso mu kutubumba mu khumbu ziwombo ayi batuvana bidia bimbazu ayi zishokola ziwombo zi basi Suisse. Mintima mieto miyangalala buwombo mu phila yoyi batuyambila.

Bateka kututinda mu mua thangu fikhufi ku Ghana ayi babue tuvutula ku Côte d’Ivoire mu thangu mvualangani wu bana ba buala wuyiza lembama. Zanti yi bakhomba yitusadisa tumonisa mvibudulu ka diambu ko beba kue tutinisanga mu bibuangu biphila mu phila, buba phe kuenda mu zitsi ziozi beba kue tutindanga mu mua thangu fikhufi. Minu ayi Debbie tutuba ti buba ti luzolo lolo bakhomba batumonisina didi diambu diodi dieta salama mu khubukulu yi Yehova, tulendi ko ku lubongila mu lueya. Kutu, buba zithangu beni ziozi ziphasi tuviokisa, mfunu wombo ziba mu diambu di formasio yeto.

KU MOYEN ORIENT

Mu mvu 2006, batutindila nkanda wowo wuba ku bilu kinneni ayi tubaka nkanda wumona wowo batutindila ku Moyen Orient. Tubue dengana diaka mambu maphasi, banga mambu mamona, mbembo yimona, ayi nzingulu yimona. Kuba na mambu mawombo malonguka mu zunga beni bila mambu ma politiki ayi ma mabundu ngolo maba. Tumona ti tulenda ba mu bumosi enati tulandikini lutuadusu lu khubukulu yi Yehova. Tuyangalala bikadulu bi bakhomba ba babakala ayi babaketo bila bawombo mu bawu bamonisa kibakala mu zinzomono zi basi dikanda diawu, zi bakundi bawu ba nzo nkanda, zi batu bobo beba salanga yawu ayi zi batu bobo baba yawu pfika pfika.

Tukutakana mu lukutukunu lu sipesiali lu 2012 lolo luba ku Tel Aviv, ku Israel. Yiba khumbu yitheti dikanda di Yehova mu divula beni bakutakana bawombo mu phila beni yina tona mu pentekote 33 T.E. Didi diambu diodi katulendi ko zimbakana!

Mu mimvu beni mina, batutinda tuetadi tsi yimosi yoyi kisalu kieto kibela mu khandukulu. Tunata mua ndambu minkanda mieto, tusamuna yawu kithuadi ku tsi beni ayi tukutakana mu zikhutukunu zifioti. Masodi momo mavuata bumboti beba fuyanga batu muma moso vayi tuba mu lutanunu, tueba kue samunanga mu kitsueki ayi ndambu minsamuni minkaka.

TUVUTUKA KU AFRIKA

Mu mvu 2013, tuyiza baka nkanda wunkaka wukue sadila ku filiali yi Congo Kinshasa, tsi yoyi yidi yinneni yoyi yiwedi kimvuama ayi kitoko, vayi kuidi na povrete yingolo ayi mimvita miwombo bila kimbeni kidi kiwombo. Va theti theti tutuba ti: “Tuzebi ku Afrika; tuidi bakubama.” Vayi tuba diaka na mambu mawombo ma longuka, banga kuenda muma momo muisi ba ko zinzila zimboti ayi mu bibuangu biobi bisi ba ko bitungu bumboti. Tudengana mambu mawombo mamboti momo tutudila thalu, banga mvibudulu ayi zikhini ziozi bakhomba baba bulendakana zithatukusu zi kambu ku zimbongo, luzolo luawu mu kisalu ki tsamununu ayi zingolo ziawu mu kutakananga mu zikhutukunu zi kimvuka ayi mu zikhutukunu zinneni. Tumona mu meso meto phila mbi kisalu ki Kipfumu kitatiminina kuendila kuntuala mu lutuadusu ayi mu nzila yi lusakumunu lu Yehova. Mu mimvu miomi tutula mu kisalu ki thangu ka thangu ku Congo Kinshasa, tubaka malongi mawombo ayi tubaka bakundi bobo badi banga dikanda.

Mu tsuka mvu wu 2017, bayiza tutinda diaka ku terituare yinkaka ku Afrique du Sud. Yiba Beteli yoyi yiluta tola yoyi tuisi teka sadila ko ayi bisalu biobi batuvana ku Beteli beni biba bimona. Mu buela diaka, kuba na mambu mawombo ma longuka, vayi mambu momo tudengana mu thama matusadisa tuyuku. Tueta zola buwombo bakhomba ba babakala ayi babaketo bobo batatamana monisa mvibudulu mu mimvu miwombo. Ayi didi diambu dingitukulu mu mona phila yoyi dikanda di Beteli dieba sadilanga mu bumosi buba ti baba na minkanda minitu miviakana ayi makanda maviakana. Yimonikini bumboti mboti ti Yehova weta sakumuna vama vovo vadi ndembama mu thangu dikanda diandi dilembo vuati bumutu bumona ayi sadila zitsikudukusu zimona.

Mimvu miomi mime vioka, Debbie ayi minu tubaka biyeko biobi bieba kutuyangidikanga, yuku mu zinzingulu ziphila mu phila ayi tulonguka zimbembo ziwombo. Ndiyiza mona ti Yehova weta sadila khubukulu’andi ayi bakhomba mu diambu di katumonisa luzolo luandi lukuikama. (Nku. 144:2) Tueta kikinina ti formasio yoyi tubaka mu kisalu ki thangu ka thangu yitusadisa tuba bisadi bimboti bi Yehova.

Ndieta yangalala buwombo mu formasio yoyi ndibaka kuidi bambuta ziama, lusadusu lu nketo’ama wuluzolo Debbie ayi bifuani bimboti mu khati dikanda di kipheve di nza yimvimba. Bo minu ayi nketo’ama tulembo yonzuka, tuidi na nzengolo yitatamana longuka malongi momo nlongi’eto wunneni keta longa.