Isaías

39 Teʼ kʼiinoʼob jeʼeloʼ Merodak-baladán u reyil Babiloniaeʼ tu túuxtaj cartaʼob yéetel junpʼéel regalo tiʼ Ezequías,+ tumen tu yuʼubaj kʼojaʼanchaji yéetel tsʼoʼok u yutstal. Merodak-baladán kaʼacheʼ u hijo Baladán.+ 2 Ezequíaseʼ tu kʼamaj yéetel kiʼimak óolal le máaxoʼob túuxtaʼaboʼob tumen le reyoʼ ka tu yeʼesajtiʼob le baʼaloʼob koʼojtak yaan tu yotochoʼ,+ tu yeʼesajtiʼob le plataoʼ, le orooʼ, le kiʼibok aceiteoʼ yéetel le uláakʼ maʼalob aceiteoʼ bey xan tuláakal le armaʼob yaantiʼoʼ. Tu yeʼesajtiʼob tuláakal le baʼaloʼob yaan teʼ tesoreríaʼoboʼ. Tu láaj eʼesajtiʼob baʼax yaan ichil u yotoch* bey xan le baʼaloʼob yaan teʼ tuʼuxoʼob ku gobernaroʼ.

3 Le ka tsʼoʼok u binoʼobeʼ, le profeta Isaíasoʼ ook teʼ tuʼux yaan le rey Ezequíasoʼ ka tu kʼáatajtiʼ: «¿Baʼax tu yaʼaloʼobtech le máakoʼob binoʼoboʼ? ¿Tuʼux u taaloʼob?». Ezequías túuneʼ tu núukajtiʼ: «Náach tuʼux u taaloʼob, desde tu luʼumil Babilonia».+ 4 Isaíaseʼ tu kʼáatajtiʼ: «¿Baʼax túun tu yiloʼob ichil a wotoch?».* Ezequíaseʼ tu yaʼalaj: «Tu yiloʼob tuláakal baʼax yaan ichil in wotoch.* Tin weʼesajtiʼob tuláakal baʼax yaan tin tesoreríaʼob».

5 Isaías túuneʼ tu yaʼalaj tiʼ Ezequías: «Uʼuy a wuʼuy baʼax ku yaʼalik Jéeoba, le máax gobernartik le ángeloʼoboʼ: 6 ‹¡Ilawile! Yaan u taal u kʼiinil u bisaʼal tu luʼumil Babilonia tuláakal le baʼax yaan ta wotochaʼ* bey xan tuláakal baʼax tsʼoʼok u líiʼsaʼal tumen a úuchben láakʼtsiloʼob tak bejlaʼoʼ, mix baʼal kun pʼáatal›,+ le jeʼelaʼ Jéeoba aʼalik.+ 7 ‹Jujuntúul xan tiʼ a paalaloʼob kun antaloʼ yaan u bisaʼaloʼob Babilonia yéetel yaan u tsʼaʼabaltiʼob autoridad utiaʼal u meyajoʼob tu palacio le reyoʼ›».+

8 Le ka tu yuʼubaj leloʼ Ezequíaseʼ tu yaʼalaj tiʼ Isaías: «Le baʼax tu túuxtech Jéeoba a waʼaltenoʼ jach maʼalob in wuʼuyik». Tsʼoʼoleʼ ka tu yaʼalaj xan: «Tumen tu kʼiiniloʼob in kuxtaleʼ yaan u yantal jeetsʼelil yéetel mix baʼal kun beetik u sajaktal máak».+