U tʼaaniloʼob u káajbal

LELAʼ upʼéel libro ku taasik tsikbaliloʼob jach uchaʼantak. Chʼaʼabaʼan tiʼ le libro maas kʼaj óolaʼan way yóokʼol kaabeʼ, letiʼe Bibliaoʼ. Le tsikbaliloʼobaʼ ku tsoliktech bix káajik u beetaʼal baʼaloʼob tumen Dios yéetel baʼaxoʼob ku yúuchul teʼ t-kʼiinoʼobaʼ. Ku tsolik xan tech baʼax ken u beet Dios maʼ kun xáantal.

Le libroaʼ ku yáantkech a wojéelt baʼax tsikbaliloʼob yaan teʼ Bibliaoʼ. Ku tʼaan xan tiʼ le máakoʼob kuxlajoʼob úuchiloʼ yéetel tiʼ baʼax tu beetoʼob. Ku tʼaan xan tiʼ le jatsʼuts kuxtal minaʼan u xuul kun yantal tiʼ le máakoʼob teʼ Luʼum sutaʼan paraísoi tumen Diosoʼ.

Ich le libroaʼ yaan 116 tsikbaliloʼobiʼ. Jóoʼsaʼan waxak jaatsoʼob tiʼ. Tu káajbal upʼéel jaatseʼ tiʼ ku tsolik baʼax tiʼ kun tʼaan le tsikbaliloʼoboʼ. Leloʼobaʼ tsolaʼantak jeʼex úuchik u bin u yúuchloʼoboʼ. Le tsikbaliloʼobaʼ yaan u yáantkech a kan baʼax kʼiin ka úuchlaʼajoʼob.

Le tsikbaliloʼobaʼ beetaʼan yéetel tʼaanoʼob maʼ talam u naʼataʼaliʼ. Yaʼab mejen paalal jeʼel u páajtal u xokikoʼob tu juunaloʼobeʼ. Yaan xan u yutstal tu yichoʼob ka xoʼokoktiʼob yaʼab u téenel tumen u taataʼob. Le libroaʼ yaʼabach baʼaloʼob jatsʼutstak ku kaʼansik tak tiʼ táankelem paalal bey xan tiʼ nukuch máakoʼob.

Tu tsʼoʼokbal cada tsikbalileʼ ku yeʼesik tuʼux chʼaʼabaʼan ich le Bibliaoʼ. Maʼalob ka kaxtoʼob utiaʼal ka xokoʼob. Ken tsʼoʼokok a xokik junpʼéel tsikbalileʼ, ilawil a núukik u kʼáatchiʼiloʼob. Le kʼáatchiʼobaʼ ku chíikpajloʼob ken tsʼoʼokok le tsikbal 116.