Ku salvartaʼal chan Moisés

ILAWIL le chaambal ku yokʼol táan u machik u yaal u kʼab le x-chʼúupaloʼ. U kʼaabaʼeʼ Moisés. ¿A wojel wa máax le x-kiʼichpam chʼúupaloʼ? Utúul princesa egipcia, u taataeʼ Faraón.

Yoʼolal maʼ u kíimsaʼal le chaambal tumen le egipcioʼoboʼ, taʼakaʼab tumen u mama tak ka tu tsʼáaj óoxpʼéel mes tiʼ. Baʼaleʼ letiʼeʼ u yojel jeʼel u kaxtaʼal Moiseseʼ, le oʼolaleʼ, yaan baʼax tu beetaj utiaʼal u salvartik.

Tu beetaj upʼéel jach maʼalob xaak yoʼolal maʼ u yokol jaʼiʼ. Ka tsʼoʼokeʼ tu tsʼáaj Moisés ichileʼ, ka tu bisaj le xaak ichil le kaʼanal xíiw yaan tu jáal u áalkab jaʼi le Nilooʼ. Ka túun tiaʼalaj tiʼ María (Míriam), u kiik Moiseseʼ, ka pʼáatak naatsʼ ka u yil baʼax kun úuchul.

Maʼ sáam túuneʼ ka taal le princesa ichkíil tu áalkab jaʼi le Nilooʼ. Chéen ka tu yileʼ, yaan upʼéel xaak ichil le xíiwoʼoboʼ. Ka tiaʼalaj tiʼ utúul u x-palitsil: Taasten le xaakoʼ. Le ka jeʼekʼabtaʼab le xaak tumen le princesaoʼ, ¡tu yilaj utúul chaambal jach jatsʼuts! Moisés, le chaambaloʼ, táan kaʼach u yokʼol; le princesa túunoʼ tu chʼaʼaj óotsilil tiʼ. Le oʼolal maʼ tu chaʼaj u kíimsaʼaliʼ.

María túuneʼ taal yiknaloʼob, jeʼex a wilik teʼ dibujoaʼ, ka tiaʼalaj tiʼe princesaoʼ: ¿Xiʼiken wa in tʼan utúul x-israelita utiaʼal ka u tséenttech le chaambaloʼ?

Le princesa túunoʼ tiaʼalaj: Xeen, beet uts a tʼanik.

Bey túunoʼ, Maríaeʼ bin áalkabil u yaʼal tiʼ u mama. Le ka kʼuch u mama Moiseseʼ, le princesaoʼ tiaʼalajtiʼ: Bis le chaambal utiaʼal a tséentaʼ, jeʼel in boʼotkech tu yoʼolaleʼ.

Bey túunoʼ, Moiseseʼ kanáantaʼab tumen u mama. Ka chan nojochchaj Moiseseʼ, bisaʼab kʼuʼbil tumen u mama tiʼ le princesaoʼ, letiʼ túuneʼ tu chʼaʼaj u paalintej. Le oʼolaleʼ Moiseseʼ nojochchaj tu yotoch Faraón.