Baʼaxten púutsʼ Moisés

ILAWIL Moisés, táan u púutsʼul tiʼ u kaajil Egipto. ¿Táan wa wilik le máaxoʼob chʼaʼapachtkoʼ? ¿A wojel wa baʼaxten taak u kíimskoʼob Moisés? Koʼox ilik wa jeʼel u páajtal k-ojéeltkeʼ.

Moiseseʼ nojochchaj tu yotoch Faraón, u jalaʼachil Egipto. Tu beetubaj nojchil yéetel jach yanchaj u naʼat. Moiseseʼ u yojel kaʼach maʼ egipcioiʼ, yéetel u yojel u taataʼobeʼ israelitaʼob palitsiltaʼanoʼob.

Upʼéel u kʼiinil túuneʼ, ka tu tsʼáaj 40 jaʼab tiʼ Moiseseʼ tu chʼaʼatuklaj u bin u yil bix u bin tiʼ u kaajal. Ka tu yileʼ táan u beetaʼal loob tiʼob. Tu yileʼ utúul egipcioeʼ táan u jaʼajatsʼik utúul palitsil israelita. Moiseseʼ tu paktaj tu baʼpaach, ka tu yilaj mix máak ilkeʼ, ka tu kíimsaj le egipciooʼ. Moisés túuneʼ tu mukaj le kimen ich le arenaoʼ.

Ka sáaschaj tuláakʼ kʼiineʼ, Moiseseʼ bin tu kaʼatéen u yil u kaajal. Ku tuklik kaʼacheʼ jeʼel u páajtal u yáantik u kaajal ka xuʼuluk u palitsiltaʼaloʼobeʼ. Baʼaleʼ, tu yilaj kaʼatúul israelitaʼob táan u baʼateloʼob; Moisés túuneʼ tiaʼalaj tiʼe ku beetik kʼaasoʼ: ¿Baʼaxten ka jaʼajatsʼik a sukuʼunoʼ?

Le máak túunoʼ tiaʼalaj: ¿Máax beetech nojchil yéetel j-ilaj baʼatelil t-óokʼol? ¿Yaan wa xan a kíimsken jeʼex úuchik a kíimsik le egipcioeʼ?

Moisés túuneʼ jaʼakʼ u yóol, tumen tu yileʼ tsʼoʼok u yojéeltaʼal le baʼax tu beetaj tiʼe egipciooʼ. Faraón xaneʼ tu yojéeltaj, ka tu túuxtaj máakoʼob kíimsik Moisés. Le oʼolaleʼ, Moiseseʼ yanchaj u púutsʼul tiʼ u kaajil Egipto.

Le ka jóokʼ Moisés Egiptoeʼ, bin tu náanach luʼumil Madián. Teʼeloʼ tiʼ tu kʼaj óoltaj Jetro yéetel u láakʼtsililiʼ, ka tsʼoʼok u beel yéetel Séfora (Ziporá), utúul u paal Jetro. Moiseseʼ tu beetubaj j-kanan tamanil, tu kanáantaj u tamanoʼob Jetro. Cuarenta jaʼaboʼob kajlaj tu luʼumil Madián. Beooraaʼ, 80 jaʼaboʼob yaan kaʼach tiʼ. Upʼéel u kʼiinil túuneʼ, le táan u kanáantik Moisés u tamanoʼob Jetroeʼ, úuch upʼéel nojoch baʼal beet u kʼexik u kuxtal. Koʼox ilik uláakʼ tsikbaliloʼ, ka k-il baʼax le jakʼ óol baʼalaʼ.