Xookil 34

Ku yéeyik u apostoloʼob

TSʼOʼOK u máan óoliʼ junpʼéel jaʼab yéetel seis meses tsʼaʼabak ojéeltbil tumen Juan Bautista de ke Jesuseʼ u Taman Dios; letiʼe bukaʼaj tiempo xan káajak u kʼaʼaytaj Jesusoʼ. Teʼ kʼiinoʼob jeʼeloʼ u yáax disipuloʼobeʼ letiʼ leloʼobaʼ: Andrés, Simón Pedro, Juan, maʼ xaaneʼ tak Santiago (máax sukuʼuntsil yéetel Juan), bey xan Felipe yéetel Natanael (tiʼ máax xan ku yaʼalaʼal Bartolomé). Ka máan kʼiineʼ yaʼab uláakʼ máakoʼob xan tu tsaypachtoʼob Cristo.

Beoraaʼ Jesuseʼ nukaʼaj u yéey u apostoloʼob. Leloʼobaʼ yaan u máanoʼob mantatsʼ tu yéetel; yaan xan u tsʼáaiktiʼob junpʼéel jach nojoch kaʼansaj. Baʼaleʼ táanil tiʼ u yéeyikoʼobeʼ Jesuseʼ bin tiʼ junpʼéel wits, ka máan bul áakʼab táan u orar utiaʼal u kʼáatik naʼat bey xan u yáantaj Dios. Ka sáaschajeʼ tu tʼanaj u disipuloʼob, ichiloʼob túuneʼ tu yéeyaj 12 u túulaliʼ. Baʼaleʼ tumen láayliʼ táan u kaʼansaʼaloʼob tumen Jesuseʼ ku yaʼalaʼal xan tiʼob disipuloʼob.

Seis tiʼ le máaxoʼob tu yéeyaj Jesusoʼ, letiʼ le u yáax disipuloʼobeʼ. Tu yéeyaj xan Mateo, le máax tiaʼan kaʼach tu kúuchilil u boʼotaʼal impuesto le ka tu tʼanoʼ. Le uláakʼ cincooʼ letiʼ leloʼobaʼ: Judas (tiʼ máax xan ku yaʼalaʼal Tadeo), Judas Iscariote, Simón le cananitaoʼ, Tomás yéetel Santiago u paal Alfeo. Tiʼ le Santiagoaʼ ku yaʼalaʼal xan le Chichanoʼ, maʼ xaaneʼ tumen maas kabal u baakel wa tumen maas chichan u jaʼabil tiʼ uláakʼ juntúul apóstol Santiagooʼ.

Le 12 u túulalaʼ tsʼoʼok u chan máan kʼiin joʼopʼok u máanoʼob yéetel Jesús le oʼolal jach u kʼaj óoloʼob. Yaneʼ u láakʼtsiloʼob Jesús. Santiago yéetel Juaneʼ primotsiloʼob yéetel Jesús. Maʼ xaaneʼ Alfeoeʼ sukuʼuntsil yéetel José, u majan taata Jesús, le oʼolal Santiago, u paal Alfeoeʼ, primotsil xan yéetel Jesús.

U jaajileʼ Jesuseʼ maʼ talam kaʼach u kʼaʼajsik u kʼaabaʼ u apostoloʼobiʼ. Baʼaleʼ ¿kux túun teech, jeʼel wa u páajtal a kʼaʼajsikeʼ? Maʼ u tuʼubultecheʼ yaan kaʼatúul Simón, kaʼatúul Santiago, kaʼatúul Judas; Simoneʼ sukuʼuntsil yéetel Andrés, yéetel Santiagoeʼ sukuʼuntsil yéetel Juan. Lelaʼ jeʼel u yáantkech a kʼaʼajs u kʼaabaʼ ocho apostoloʼobeʼ. Le u tsʼookoʼoboʼ letiʼ leloʼobaʼ: Mateo, juntúul j-kʼam impuesto, Tomás le máax kaʼapʼéelchaj u tuukuleʼ, Natanael le máax tiaʼan kaʼach yáanal junkúul cheʼ le ka tʼaʼaneʼ yéetel Felipe u amigo Natanael.

Once tiʼ le apostoloʼoboʼ Galilea u taaloʼob, le luʼum tuʼux líikʼ Jesusoʼ. Natanaeleʼ Caná u taal; Felipe, Pedro yéetel Andreseʼ Betsaida u taaloʼob; ka máan kʼiineʼ Pedro yéetel Andreseʼ binoʼob kajtal Capernaum; maʼ xaaneʼ tiʼ kajaʼan xan Mateoiʼ. Santiago yéetel Juaneʼ kon kay ku beetkoʼob, yéetel maʼ xaaneʼ kajaʼanoʼob xan Capernaum wa tiʼ junpʼéel kaaj naatsʼ tiʼ lelaʼ. Judas Iscariote, le máax traicionart Jesusoʼ, maʼ xaaneʼ chéen letiʼ Judea u taal. (Marcos 3:13-19; Lucas 6:12-16.)

▪ Maʼ xaaneʼ, ¿máakalmáak tiʼ le apostoloʼob u láakʼtsiloʼob Jesusoʼ?

▪ ¿Bix u kʼaabaʼ u apostoloʼob Jesús, yéetel baʼax jeʼel u yáantkech a kʼaʼajs u kʼaabaʼobeʼ?

▪ ¿Tuʼux u taal le apostoloʼoboʼ?