¿Jeʼel wa a wóotik a kan u maasil tiʼ le Biibliaoʼ?

¿Baʼaxten kʼaʼabéet u xoʼokol le Biibliaoʼ?

TEʼ BIIBLIAOʼ tiaʼan u táaj maʼalob leeyoʼob Dioosiʼ, lelaʼ le beetik u jelaʼantal tiʼ u chuukan liibroʼob (1 Tesalonicenses 2:13). Wa ka kuxtal jeʼex u kaʼansikoʼ, yaʼab utsil ken a jóoʼse. Yaan u maas yaʼabtal a yaabilaj yoʼolal Dioos yéetel yaan a maas natsʼikaba tiʼ letiʼ, le Máax tsʼáaik “tuláakal maʼalob [baʼal] yéetel utsil chúukaʼan siibal[oʼ]” (Santiago 1:17). Yaan a kanik bix kʼaʼabéet a payalchiʼ tiʼ Dioos, yéetel ken máankech tiʼ talamiloʼobeʼ, yaan a wilik u yáantaj. Ku tsʼoʼokoleʼ, wa ka kuxtal jeʼex u yaʼalik le Biibliaoʼ, Diooseʼ yaan u síiktech kuxtal minaʼan u xuul (Romanos 6:23).

Le Biibliaoʼ ku taasik jaajiloʼob ku sáasilkúunsajoʼob. Máaxoʼob ku kʼaj óoltikoʼob baʼax ku yaʼalik le Biibliaoʼ ku jáalkʼabtikubaʼob tiʼ kaʼansajoʼob maʼ jaajtak palitsiltik u kuxtal  miyoonesi máakoʼobiʼ. Jeʼex k-ojéeltik u jaajil tiʼ baʼax ku yúuchul tiʼ wíinik ken kíimikeʼ, ku beetik u xuʼulul k-chʼaʼik  saajkil u beetaʼaltoʼon loob tumen kimenoʼob, yéetel ku jáawal k-tuklik táan u mukʼyaj k-láakʼtsiloʼob wa k-éet bisbailoʼob tsʼoʼok u kíimloʼob (Ezequiel 18:4). Le kaʼapúut kuxtal (resurrección) ku kaʼansik le Biibliaoʼ ku líiʼsik yóol le máaxoʼob yaan u láakʼtsililoʼob wa yéet bisbailoʼob tsʼoʼok u kíimloʼoboʼ (Juan 11:25). K-ojéeltik xan u jaajil tiʼ le kʼasaʼan anjeloʼoboʼ ku kʼaʼajsiktoʼon baʼax kʼaasil jeʼel u taasiktoʼon ka k-oksba yéetel j-meenoʼobeʼ yéetel ku yáantkoʼon k-naʼat baʼaxten yaan yaʼab talamiloʼob way yóokʼol kaabeʼ.

U nuʼuktajiloʼob Dioos yaan teʼ Biibliaoʼ ku kaʼansiktoʼon bix jeʼel k-kuxtal utiaʼal yutsil k-wíinklileʼ. Jeʼex u “tsʼáaik u pʼiis tiʼ baʼaxoʼob ku beetik” máakeʼ ku yáantaj utiaʼal u toj óolal le wíinkliloʼ. (1 Timoteo 3:2, Traducción del Nuevo Mundo de las Santas Escrituras). Wa “k-pʼoʼikba tiʼ jeʼel baʼalak ku páajtal [u éekʼkunsik] k-wíinklil yéetel [k-espiiritueʼ]”, yaan k-kanáantik k-toj óolal (2 Corintios 7:1). U beetaʼal baʼax ku yaʼalik le Biibliaoʼ, ku taasik xan kiʼimak óolal tiʼ máaxoʼob tsʼokaʼan u beeloʼob yéetel ku beetik u yaabiltkuba máak (1 Corintios 6:18).

Wa ka kuxtal jeʼex u yaʼalik u Tʼaan Diooseʼ, yaan u maas kiʼimaktal a wóol. U kʼaj óoltaʼal baʼax ku yaʼalik le Biibliaoʼ ku taasik jetsʼ óolal, kiʼimak óolal yéetel alab óolal. Ku kaʼansik máak u chʼaʼa óotsilil, u yeʼes yaabilaj, kiʼimak óolal, jetsʼ óolal, utsil, oksaj óolal yéetel uláakʼ jatsʼuts moodos ku yáantajoʼob utiaʼal ka k-beetbaʼex maas maʼalob íichamtsil, atantsil, taatatsil, maamatsil yéetel paalil (Gálatas 5:22, 23; Efesios 4:24, 32).

¿Mix juntéen wa kʼáat ichil tiʼ teech baʼax ku taal u kʼiin? U próofesiyailoʼob le Biibliaoʼ ku yeʼesiktoʼon baʼax kʼiiniloʼob kuxaʼanoʼon. Maʼ chéen ku tsolik bix yóokʼol kaab bejlaʼeʼ, ku yeʼesik xan maʼ tun xáantaleʼ Diooseʼ yaan u sutik le Luʼum jumpʼéel páaraisooʼ (Apocalipsis [Revelación] 21:3, 4).

Áantaj utiaʼal u naʼataʼal le Biibliaoʼ

Maʼ xaaneʼ tsʼoʼok a tsʼáaikaba a xok le Biibliaoʼ, baʼaleʼ ka wilik talam u naʼataʼal. Maʼ xaaneʼ, maʼ a wojel tuʼux teʼ Biiblia jeʼel a kaxtik u núukil a kʼáatchiʼobeʼ. Maʼ a chiʼichnaktal, maʼ chéen tiʼ teech ku yúuchliʼ. Tuláakloʼon kʼaʼabéettoʼon áantaj utiaʼal k-naʼatik u Tʼaan Dioos. U j-jaajkunajoʼob Jéeobaeʼ (testigos de Jehová) maʼatech u kobraarkoʼob u kaʼanskoʼob máak yéetel le Biibliaoʼ. Jeʼel u kaʼanskechoʼob jeʼex táan u beetkoʼob yéetel u miyoonesi máakoʼob kajaʼanoʼob tiʼ 235 luʼumiloʼoboʼ.

Maas maʼalob ka xok le Biiblia jujumpʼíitiloʼ; jeʼel u páajtal a káajal yéetel u noj kaʼansajiloʼobeʼ (Hebreos 6:1). Jeʼex u bin a kaambaleʼ, yaan u maas séebtal a jachʼik le “chichich janaloʼ”, wa letiʼe jaajiloʼob maas talam u naʼataloʼoboʼ (Hebreos 5:14). U liibroi kaʼansajeʼ letiʼe Biibliaoʼ, baʼaleʼ yaan uláakʼ juʼunoʼob jóoʼsanoʼob tiʼ letiʼ, jeʼex le foyeeto ¿Baʼax u kʼáat Dioos tiʼ toʼon?, yaan u yáantkechoʼob a naʼat baʼax kiaʼalik yoʼolal jejeláas kaʼansajiloʼob.

¿Jeʼel wa a jóoʼsik u súutukil utiaʼal a xokik le Biiblia kaada semaanaoʼ?

U suukileʼ, u xookil le Biibliaoʼ jeʼel u páajtal u tsʼaʼabal le baʼax oora yéetel le tuʼux maas maʼalob utiaʼal máakeʼ. Yaʼab máakoʼobeʼ ku xookoʼob tu yotochoʼob. Yanoʼobeʼ ku xookoʼob tak tiʼ teleefono. Le xookoʼ maʼ utiaʼal jumpʼéel nojoch múuchʼ máakoʼobiʼ yéetel ku tsʼaʼabal le baʼax oora maas maʼalob utiaʼal le j-xoknáaloʼ; ku tsʼaʼabal tiʼ máax maʼ xooknajaʼaniʼ bey xan tiʼ máax xooknajaʼan. Minaʼan eksaamenoʼob, yéetel maʼ kun beetbil a chʼaʼik subtal. Yaan u núukaʼal baʼax a kʼáat a wojéelt tiʼ le Biibliaoʼ yéetel yaan a kanik bix jeʼel a natsʼkaba tiʼ Diooseʼ.

Minaʼan a boʼotik a kaʼansaʼal tiʼ le Biibliaoʼ (Mateo 10:8). Jeʼel máaxak jeʼel u kaʼansaʼaleʼ, kex yaan u réelijion wa minaʼan, chéen baʼaleʼ kʼaʼabéet jach tu jaajil yóol u kʼáat yojéelt u maasil tiʼ u Tʼaan Dioos.

¿Máaxoʼob jeʼel u táakpajloʼob teʼ xookoʼ? Tuláakal a fáamilia bey xan jeʼel máaxak yéetel ka biskaba a kʼáat ka yanakeʼeʼ. Wa xan a kʼáateʼ, ta juunal.

Yaʼab máakoʼobeʼ ku jóoʼskoʼob jumpʼéel oora kaada semaana utiaʼal u kaʼansaloʼob tiʼ le Biibliaoʼ. Baʼaleʼ wa a kʼáat a jóoʼs maas yaʼab tiempoeʼ, bey xan wa chéen jumpʼíiteʼ, le J-jaajkunajoʼoboʼ (Testigos) yaan u beetkoʼob tuláakal le ku páajtal utiaʼal u yáantkechoʼob.

K-utsultʼantikech utiaʼal ka kaambalnakech

K-aʼaliktecheʼ jach maʼalob ka tʼaanakech yéetel u j-jaajkunajoʼob Jéeoba. Utiaʼal lelaʼ jeʼel u páajtal a tsʼíib tiʼ jeʼel máakalmáak tiʼ le kúuchiloʼob ku chíikpajal kabaloʼ. Letiʼob ken u túuxtoʼob máax kun tsʼáaiktech u xookil le Biiblia x-maʼ boʼolil ta wotochoʼ.

□ Túuxteʼexten le foyeeto ¿Baʼax u kʼáat Dioos tiʼ toʼon? Ich baʼax tʼaanil.

□ In kʼáat in wojéelt tiʼ u xookil le Biiblia ka tsʼáaikeʼex tiotoch máak minaʼan u boʼotaʼaloʼ.

Wa ma’ tu ya’ala’al yaanal ba’ale’ le teekstoso’ ch’a’aba’an ti’ Quili’ich Biblia (túumben ts’íib).