Maʼ a wenel, preparartaba utiaʼal u kʼiinil Jéeoba

1. ¿Baʼax unaj k-beetik utiaʼal k-salvartikba tu kʼiinil Jéeoba?

LE Bibliaoʼ ku tʼaan tiʼ u kʼiinil Jéeoba, le kʼiin jeʼelaʼ letiʼe kéen u xuʼuls Jéeoba u enemigoʼob utiaʼal u salvartik u kaajaloʼ. Úuchjeakileʼ bey tu beetiloʼ tu xuʼulsaj jujunpʼéel kaajoʼob utiaʼal u salvartik le máaxoʼob adorarkoʼ (Isa. 13:1, 6; Eze. 13:5; Sof. 1:8). U kʼiinil Jéeobaeʼ yaan u káajal kéen xuʼulsaʼak le nojoch Babiloniaoʼ yéetel yaan u tsʼoʼokol tu kʼiinil Armagedón. Utiaʼal k-salvartikbaeʼ kʼaʼabéet k-preparartikba desde bejlaʼeʼ. Jesúseʼ tu yaʼaleʼ maʼ unaj k-wenel tu kʼiiniloʼob le nojoch muʼyajiloʼ (Luc. 12:40; Mat. 24:21).

2. ¿Baʼaxten maʼalob ka k-xakʼalt le baʼax ku yaʼalik Yáax tiʼ Tesalonicensesoʼ?

² Tu tsʼíibil Yáax tiʼ Tesalonicenseseʼ apóstol Pabloeʼ tu yaʼalaj jujunpʼéel baʼaloʼob eʼesik kʼaʼabéet u prepararkuba le sukuʼunoʼob utiaʼal u kʼiinil Jéeobaoʼ. Le ka tu yaʼalaj leloʼ Pabloeʼ u yojleʼ yaʼab u bin utiaʼal u kʼuchul u kʼiinil Jéeoba (2 Tes. 2:1-3). Kex beyoʼ tu yaʼalaj tiʼ le sukuʼunoʼob ka u preparartubaʼob bey jach taʼaytak u kʼuchul le kʼiin jeʼeloʼ. Toʼon xaneʼ jeʼel u páajtal k-beetik le baʼax tu yaʼaloʼ. Koʼox ilik baʼaxoʼob tu yaʼalaj yoʼolal bix kun taal u kʼiinil Jéeoba, máaxoʼob kun xuʼulsbiloʼob yéetel bix jeʼel k-preparartikba utiaʼal le kʼiin jeʼeloʼ.

¿BIX KUN TAAL U KʼIINIL JÉEOBA?

3. ¿Baʼaxten k-aʼalikeʼ u kʼiinil Jéeobaeʼ yaan u taal bey juntúul j-ookoleʼ? (Ilawil xan le dibujooʼ).

³ «Yaan u taal jach jeʼex u taal juntúul j-ookol de áakʼabeʼ» (1 Tes. 5:2). Lelaʼ letiʼe yáax bix tu ketil apóstol Pablo bix kun taal u kʼiinil Jéeobaoʼ. Le j-ookoloʼoboʼ maʼatech u avisaroʼob, séebaʼan u jáajan ookoloʼob yéetel maases de áakʼab ku beetkoʼob. Bey xan kun úuchul yéetel u kʼiinil Jéeobaoʼ, séeb kun kʼuchul yéetel teʼ kʼiin mix máak páaʼtikoʼ. Maʼ xaaneʼ tak le máaxoʼob meyajtik Jéeoba kun jaʼakʼal u yóoloʼob ken u yiloʼob tuláakal le baʼaxoʼob kun úuchloʼ. Pero kʼaʼajaktoʼoneʼ chéen letiʼe kʼasaʼan máakoʼob kun xuʼulsbiloʼoboʼ.

4. ¿Baʼaxten u kʼiinil Jéeobaeʼ yaan u taal bey jeʼex kéen téek káajak u dolor juntúul koʼolel nukaʼaj síijil u chaambaloʼ?

⁴ «Jeʼex le kʼiʼinam ku muʼyajtik juntúul koʼolel le táan u síijil u chaambaloʼ» (1 Tes. 5:3). Juntúul koʼolel embarazadaeʼ maʼ u yojel jach baʼax hora ken síijik u chaambaliʼ, chéen baʼax u yojleʼ ken téek káajak u doloreʼ es ke nukaʼaj síijil le chaambaloʼ. Bey tun xanoʼ kex maʼ k-ojel baʼax kʼiin yéetel baʼax hora ken taalak u kʼiinil Jéeobaeʼ k-ojel yaan u taal yéetel ken téek kʼuchkeʼ yaan u xuʼulsik le kʼasaʼan máakoʼoboʼ.

5. ¿Baʼaxten k-aʼalikeʼ le nojoch muʼyajiloʼ yaan u taal jeʼex le kéen sáaschajak tiʼ juntúul j-ookoleʼ?

⁵ Jeʼex le kéen téek sáaschajak tiʼ juntúul j-ookoleʼ. Pabloeʼ ku kaʼa tʼaan tiʼ le j-ookoloboʼ, pero teʼ vezaʼ ku yaʼalikeʼ u kʼiinil Jéeobaeʼ yaan u taal jeʼex le kéen sáaschajak tiʼ juntúul j-ookoleʼ (1 Tes. 5:4; U Suttʼaanil Túumben Luʼum). Yaan horaeʼ le j-ookoloboʼ jach ku búuyloʼob tiʼ le baʼax ku beetkoʼoboʼ, le oʼolal maʼ tu tsʼáaikoʼob cuenta wa táan u sáastal yéetel jeʼel u chuʼukloʼobeʼ. Tu kʼiiniloʼob le nojoch muʼyajiloʼ láayliʼ bey kun úuchloʼ. Jeʼex kéen chuʼukuk juntúul j-ookoleʼ bey kun chíikpajal xan tuláakal le baʼaloʼob kʼaastak ku beetik le máakoʼob maʼ tu yuʼubikoʼob u tʼaan Diosoʼ. Pero toʼoneʼ k-beetik le baʼax ku yaʼalik le tekstoaʼ: «Juntúul máak ku kuxtal ich sáasileʼ ku yeʼesik u yutsil tiʼ tuláakal baʼal, ku beetik baʼax toj yéetel ku kuxtal jeʼex u yaʼalik u jaajiloʼ» (Efe. 5:8-12). Kéen k-beet lelaʼ k-eʼesik preparadoʼon utiaʼal u kʼiinil Jéeoba. Beoraaʼ koʼox ilik uláakʼ baʼax tu yaʼalaj apóstol Pablo utiaʼal u yeʼesik máaxoʼob kun xuʼulsbil tu kʼiinil Jéeobaoʼ.

¿MÁAXOʼOB KUN XUʼULSBILOʼOB TU KʼIINIL JÉEOBA?

6. ¿Baʼaxten k-aʼalikeʼ le máakoʼoboʼ bey jach tʼuubul u weenloʼobeʼ? (1 Tesalonicenses 5:6, 7).

⁶ «Le máaxoʼob ku weenloʼoboʼ» (xok 1 Tesalonicenses 5:6, 7). Apóstol Pabloeʼ tu yaʼaleʼ le máaxoʼob kun xuʼulsbiloʼob tu kʼiinil Jéeobaoʼ beyoʼob jeʼex le máaxoʼob ku weenloʼoboʼ. Juntúul máax tu weenleʼ maʼ tu tsʼáaik cuenta u máan le tiempooʼ yéetel maʼ tu tsʼáaik cuenta baʼax ku yúuchul tu baʼpach. Bejlaʼeʼ u máakiloʼob le yóokʼol kaabaʼ bey jach tʼuubul u weenloʼobeʼ (Rom. 11:8). ¿Baʼaxten? Tumen maʼ tu tsʼáaikoʼob cuenta wa tuláakal le baʼaxoʼob ku yúuchloʼ ku yeʼesik kuxaʼanoʼon tu tsʼook kʼiinoʼob yéetel taʼaytak u káajal le nojoch muʼyajiloʼ. Kéen úuchuk junpʼéel nojoch baʼal way yóokʼol kaabeʼ yaan máakoʼobeʼ ku káajal u yuʼubikoʼob le jatsʼuts baʼaloʼob ken u beet u Reino Diosoʼ. Pero chéen junpʼéel tiempo ku kʼamkoʼob, kéen tsʼoʼokkeʼ bey ku kaʼa weenloʼobeʼ. Yaan xan máakoʼobeʼ u yojloʼob yaan u kʼuchul u kʼiinil u juzgartaʼaloʼob tumen Dios, chéen baʼaleʼ ku tuklikoʼobeʼ jach náach yanil le kʼiin jeʼeloʼ (2 Ped. 3:3, 4). Pero toʼon k-meyajtik Jéeobaeʼ jach kʼaʼanaʼan k-ilik maʼ k-wenel tumen jach taʼaytak u xuʼulsaʼal tiʼ le kʼasaʼan yóokʼol kaabaʼ.

7. ¿Baʼaxten k-aʼalikeʼ le máaxoʼob kun xuʼulsbiloʼoboʼ beyoʼob kalaʼanoʼobeʼ?

⁷ «Le máaxoʼob ku káaltaloʼoboʼ». Apóstol Pabloeʼ tu yaʼaleʼ le máaxoʼob kun xuʼulsbiloʼoboʼ beyoʼob kalaʼanoʼobeʼ. Juntúul máax kalaʼaneʼ ku saʼatal yéetel maʼ maʼalob le baʼax ku chʼaʼtuklik u beetkoʼ. Bey túun xanoʼ le máaxoʼob kʼasaʼanoʼoboʼ bey máaxoʼob saatloʼobeʼ tumen tu lugar u beetkoʼob baʼax ku yaʼalik Dioseʼ ku biskoʼob junpʼéel kʼaakʼas kuxtal jeʼel u beetik tak u xuʼulsaʼaltiʼobeʼ. Pero apóstol Pabloeʼ tu yaʼaleʼ le máaxoʼob meyajtik Jéeobaoʼ maʼ unaj u saʼatal u yóoloʼob jeʼex le kalaʼanoʼoboʼ (1 Tes. 5:6). Juntúul máax xokik u tʼaaniloʼob le Bibliaoʼ ku yaʼalikeʼ juntúul máak maʼ saatal u yóoleʼ antes u chʼaʼtuklik u beetik wa baʼaxeʼ ku kutal u tukult tubeel le baʼax ken u beetoʼ. Pero ¿baʼaxten jach kʼaʼabéet k-beetik lelaʼ? Tumen wa maʼ t-kanáantikbaeʼ jeʼel u káajal k-oksikba tiʼ política bey xan tiʼ uláakʼ baʼaxoʼob ku beetaʼal teʼ yóokʼol kaabaʼ. Tsʼoʼoleʼ kʼaʼajaktoʼoneʼ jeʼex u bin u náatsʼal u kʼiinil Jéeobaeʼ le máakoʼoboʼ yaan u maas túulchʼintkoʼon utiaʼal ka táakpajkoʼon tiʼ le baʼaloʼobaʼ. Pero maʼ unaj k-chʼaʼik saajkiliʼ tumen teʼ súutukiloʼob beyaʼ u espíritu santo Dioseʼ yaan u tsʼáaiktoʼon jeetsʼelil yéetel yaan u yáantkoʼon utiaʼal k-beetik baʼax maʼalob (Luc. 12:11, 12).

¿BIX JEʼEL K-PREPARARTIKBA UTIAʼAL U KʼIINIL JÉEOBAEʼ?

8. Jeʼex u yaʼalik Yáax tiʼ Tesalonicenses 5:8, ¿baʼax unaj k-beetik utiaʼal k-preparartikba utiaʼal u kʼiinil Jéeoba? (Ilawil xan le dibujooʼ).

⁸ Unaj k-búukintik le corazaoʼ yéetel k-tsʼáaik le cascooʼ. Pabloeʼ tu yaʼaleʼ toʼoneʼ beyoʼon soldadoʼon k-búukintmaj u nuʼukuliloʼob baʼateleʼ (xok 1 Tesalonicenses 5:8). Kéen yanak guerraeʼ juntúul soldadoeʼ mantatsʼ u líiʼsmuba utiaʼal le baʼateloʼ. Toʼon xaneʼ k-eʼesik preparadoʼon utiaʼal u kʼiinil Jéeoba wa k-búukintik le fe yéetel le yaabilaj jeʼex u tsʼaʼabal junpʼéel corazaeʼ. Tsʼoʼoleʼ le esperanza yaantoʼonoʼ unaj k-tsʼáaik jeʼex junpʼéel cascoeʼ. Le jatsʼuts modosaʼ jach jeʼel u yáantkoʼon teʼ kʼiinoʼobaʼ.

9. ¿Bix u kanáantkoʼon le fejoʼ?

⁹ Le fe yéetel le yaabilajoʼ ku kanáantik k-puksiʼikʼal jeʼex le coraza ku kanáantik u puksiʼikʼal kaʼach juntúul soldadooʼ. Le jatsʼuts modosaʼ ku yáantkoʼon utiaʼal maʼ u xuʼulul k-meyajtik Dios yéetel utiaʼal k-seguertik u ejemplo Jesús. Le fejoʼ ku yáantkoʼon utiaʼal k-creert de ke Dioseʼ jach tu jaajil ku tsʼáaik baʼaloʼob maʼalobtak tiʼ le máaxoʼob meyajtikoʼ (Heb. 11:6). Tsʼoʼoleʼ ku yáantkoʼon xan utiaʼal maʼ u xuʼulul k-beetik baʼax ku yaʼalik Jesús kex ka k-aktáant problemas. Utiaʼal u muʼukʼaʼantal k-fejeʼ maʼalob ka k-il bix u chúukpajal u yóol le sukuʼunoʼob ku chʼaʼpachtaʼaloʼob wa ku pʼáatal minaʼan taakʼin tiʼoboʼ. Tsʼoʼoleʼ utiaʼal maʼ k-tsʼíiboltik ayikʼaliloʼobeʼ maʼalob xan ka k-seguert u ejemplo le sukuʼunoʼob ku tsʼáaikoʼob táanil u Reino Diosoʼ.b

10. ¿Baʼax ken k-beet wa k-yaabiltmaj Jéeoba bey xan le máakoʼoboʼ?

¹⁰ Uláakʼ baʼax jeʼel u yáantkoʼon utiaʼal maʼ u náayal k-óoleʼ letiʼe yaabilajoʼ (Mat. 22:37-39). Por ejemploeʼ wa k-yaabiltmaj Dioseʼ yaan u seguer k-kʼaʼaytaj kex yaan hora maʼ chéen chʼaʼabil k-beetkiʼ (2 Tim. 1:7, 8). Tsʼoʼoleʼ como k-yaabiltmaj le máakoʼoboʼ k-tsikbaltiktiʼob baʼax ken u beet u Reino Dios, k-beetik tak tiʼ teléfono bey xan tiʼ carta. Maʼ t-tuklik wa tsʼoʼoktiʼob beyoʼ, baʼaxeʼ k-kʼáat ka u kʼex u kuxtaloʼob yéetel ka u beetoʼob baʼax maʼalob (Eze. 18:27, 28).

11. ¿Baʼax ken k-beet wa k-yaabiltmaj le sukuʼunoʼoboʼ? (1 Tesalonicenses 5:11).

¹¹ Toʼoneʼ k-yaabiltmaj xan le sukuʼunoʼoboʼ. Lelaʼ k-eʼesik kéen k-beet baʼax ku yaʼalik le tekstoaʼ: «Seguernak a paklan líiʼsik a wóoleʼex yéetel a paklan muʼukʼaʼankúuntik a wóoleʼex» (xok 1 Tesalonicenses 5:11). Le soldadoʼoboʼ ku paklan áantkubaʼob, chéen baʼaleʼ le tiaʼanoʼob teʼ guerraoʼ jeʼel u loobiltik juntúul tiʼ u yéet soldadoiloʼob kex maʼ u yóoliliʼ u beetkoʼobeʼ. Toʼon xaneʼ junpuliʼ maʼ unaj k-beetik u yaatal u yóol wa máax chéen tumen taaliʼtoʼon k-beetkiʼ. Tsʼoʼoleʼ mix juntéen unaj k-sutik u jeel le baʼax ku beetaʼaltoʼonoʼ (1 Tes. 5:13, 15). Uláakʼ bix k-eʼesik k-yaabiltmaj k-sukuʼunoʼobeʼ letiʼe kéen k-respetart le máaxoʼob nuʼuktik le múuchʼuliloʼ (1 Tes. 5:12). Tuukulnakoʼon tiʼ le múuchʼulil yaan kaʼach Tesalónicaoʼ. Le ka tu tsʼíibtaj Pablo le carta tiʼoboʼ mix junpʼéel año formarnak le múuchʼuliloʼ. Maʼ xaaneʼ le ancianoʼoboʼ yaan baʼaxoʼob maʼ tu beetoʼob tubeeliʼ tumen maʼ yaʼab baʼax u yojloʼobiʼ, kex beyoʼ kʼaʼabéet kaʼach u respetartaʼaloʼob. Teʼ kʼiinoʼob xanaʼ jeʼex u bin u náatsʼal le nojoch muʼyajiloʼ maʼ xaaneʼ yaan u kʼaʼabéettal k-maas kaxtik u yáantaj le ancianoʼoboʼ, tumen maʼ xaaneʼ le sukuʼunoʼob yanoʼob teʼ central mundial wa teʼ sucursaloʼ maʼ tun béeytal u nuʼuktikoʼonoʼob. Le oʼolaleʼ jach kʼaʼabéet k-yaabiltik yéetel k-respetartik le ancianoʼob teʼ múuchʼuliloʼ. Kex jeʼel baʼalak ka úuchkeʼ maʼ unaj u saʼatal k-óol ka tak joʼopʼok k-ilik le baʼaloʼob maʼ maʼalobtak ku beetkoʼoboʼ. Baʼaxeʼ kʼaʼabéet k-chʼaʼik en cuentaeʼ Cristo nuʼuktik le sukuʼunoʼob jach chúukaʼan u yóoloʼobaʼ.

12. ¿Bix u kanáantik k-tuukul le esperanza yaantoʼonoʼ?

¹² Jeʼex le casco ku kanáantik kaʼach u pool le soldadoʼoboʼ, le esperanza yaantoʼonoʼ ku kanáantik xan k-tuukul. Yoʼolal le jatsʼuts esperanzaaʼ k-tsʼáaik cuentaeʼ le baʼaxoʼob ku tsʼáaik le yóokʼol kaabaʼ mix baʼal u biilal (Fili. 3:8). Le esperanzaoʼ ku kanáantik k-tuukul tumen ku tsʼáaiktoʼon jeetsʼelil. Bey u yeʼesik le baʼax úuch tiʼ Wallace yéetel Laurinda, máaxoʼob ku meyajoʼob tu Betelil África. Chéen ichil tres semanaseʼ kíim u papá sukuʼun Wallace yéetel kíim xan u maama kiik Laurinda. Chéen baʼaleʼ yoʼolal le COVID-19, maʼ páajchaj u bin u líiʼsoʼob u yóol u láakʼtsiloʼobiʼ. Le sukuʼunoʼ ku yaʼalik: «Jach ku líiʼsik in wóol in wojéeltik yaan u kaʼa kuxkíintaʼaloʼob. Maʼatech in tuukul tiʼ le baʼaxoʼob tu muʼyajtoʼob antes u kíimloʼoboʼ, baʼaxeʼ kin tuklik bix kun kiʼimaktal u yóoloʼob ken kaʼa kuxkíintaʼakoʼob teʼ túumben luʼumoʼ. Le jatsʼuts esperanzaaʼ ku líiʼsik in wóol yéetel ku yáantken utiaʼal maʼ in jach tristetal».

13. ¿Baʼax unaj k-beetik utiaʼal u tsʼáaiktoʼon Jéeoba u espíritu santo?

¹³ «Chaʼex u yáantkeʼex le espíritu santooʼ» (1 Tes. 5:19). Pabloeʼ tu yaʼaleʼ le espíritu santooʼ jach jeʼel u yáantkoʼoneʼ. Yoʼolal le espírituaʼ k-tsʼíiboltik k-beetik baʼax uts tu tʼaan Jéeoba yéetel k-tsʼáaik k-óol meyajte (Rom. 12:11). ¿Baʼax unaj k-beetik utiaʼal u tsʼáaiktoʼon Jéeoba u espíritu santo? Kʼaʼabéet k-kʼáatiktiʼ, k-xakʼalxoktik le Bibliaoʼ yéetel k-chaʼik k-nuʼuktaʼal tumen u kaajal. Wa k-beetkeʼ yaan u yantaltoʼon le jatsʼuts modos ku taal tiʼ le espíritu santooʼ (Gál. 5:22, 23).

14. Wa k-kʼáat ka u tsʼáatoʼon Jéeoba u espíritu santoeʼ, ¿baʼax maʼ unaj k-beetkiʼ? (Ilawil xan le fotoʼoboʼ).

¹⁴ Kʼaʼabéet k-kanáantik maʼ k-beetik mix baʼal jeʼel u beetik u xuʼulul u tsʼáaiktoʼon Jéeoba u espíritu santoeʼ. Kʼaʼajaktoʼoneʼ Jéeobaeʼ ku tsʼáaiktoʼon u espíritu santo, pero kʼaʼabéet k-bisik junpʼéel kuxtal limpio tu táan. Wa k-chaʼik u yokol t-tuukul baʼaloʼob maʼ maʼalobtakeʼ jeʼel k-beetik baʼaloʼob kʼaastakeʼ, leloʼ jeʼel u beetik maʼ u yantaltoʼon le espíritu santooʼ (1 Tes. 4:7, 8). ¿Baʼax uláakʼ kʼaʼabéet k-chʼaʼik en cuenta? Pabloeʼ tu yaʼalaj: «Maʼ a mixbaʼalkúuntikeʼex le profecíaʼoboʼ» (1 Tes. 5:20). Teʼ versículoaʼ le tʼaan «profecíaʼoboʼ» táan u tʼaan tiʼ le baʼaxoʼob ku tsʼáaik ojéeltbil Jéeoba yéetel u espíritu santooʼ. Por ejemploeʼ le baʼaxoʼob ku taal u kʼiinil u yúuchloʼ. Toʼoneʼ maʼ t-tuklik wa yaʼab u bin u kʼuchul u kʼiinil Jéeoba bey xan wa maʼ ten k-il Armagedóniʼ. Baʼaxeʼ k-ojel jach taʼaytak u kʼuchul, le oʼolal k-ilik k-bisik junpʼéel kuxtal limpio tu táan Dios yéetel k-tsʼáaik k-óol meyajte (2 Ped. 3:11, 12).

«XAKʼALTEʼEX TULÁAKAL BAʼAL»

15. ¿Baʼax unaj k-beetik utiaʼal maʼ k-tuʼusul? (1 Tesalonicenses 5:21).

¹⁵ Maʼ tun xáantaleʼ u enemigoʼob Dioseʼ yaan u yaʼalikoʼob lelaʼ: «¡Tuláakal jejetsʼkil yéetel maʼalob yanil!» (1 Tes. 5:3). Teʼ kʼiinoʼoboʼ yaan u tuʼusul óoliʼ tuláakal máak tumen tuláakal tuʼux yaan u káajal u yaʼalaʼal baʼaloʼob maʼ jaajtak «tiʼ demonioʼob u taaloʼob» (Apo. 16:13, 14). ¿Kux túun toʼon? ¿Baʼax unaj k-beetik utiaʼal maʼ k-tuʼusul? Unaj k-beetik le baʼax ku yaʼalik le Bibliaaʼ: «Xakʼalteʼex tuláakal baʼal utiaʼal ka a wileʼex wa maʼalob» (xok 1 Tesalonicenses 5:21). Ich griegoeʼ le tʼaan «xakʼalteʼexoʼ» ku meyaj utiaʼal u yúuchul tʼaan tiʼ le baʼax ku beetik le máakoʼob utiaʼal u jach ilkoʼob wa oro bey xan wa plata le baʼax ku manikoʼoboʼ. Toʼon xaneʼ kʼaʼabéet k-jach ilik wa jaaj le baʼaxoʼob k-uʼuyik u yaʼalaʼaloʼ wa le baʼaxoʼob k-xokikoʼ. Le sukuʼunoʼob yanoʼob Tesalónicaoʼ jach kʼaʼanaʼan kaʼach ka u beetoʼob lelaʼ, pero toʼoneʼ maas kʼaʼanaʼan ka k-beete tumen tsʼoʼok u maas náatsʼal u kʼiinil le nojoch muʼyajiloʼ. Utiaʼal xan maʼ k-tuʼusleʼ kʼaʼabéet k-ilik wa jach jaaj le baʼax ku yaʼalaʼaltoʼonoʼ, utiaʼal lelaʼ kʼaʼabéet k-ilik baʼax ku yaʼalik u kaajal Jéeoba bey xan k-xakʼaltik le Bibliaoʼ. Wa k-beetkeʼ maʼ ten k-tusbil tumen le baʼaloʼob maʼ jaajtak ku yaʼalik le demonioʼoboʼ (Pro. 14:15; 1 Tim. 4:1).

16. ¿Baʼax jatsʼuts esperanzail yaantoʼon, yéetel baʼax unaj k-beetik?

¹⁶ Toʼoneʼ k-ojel Jéeobaeʼ yaan u kanáantik u kaajal tu kʼiiniloʼob le nojoch muʼyajiloʼ, pero baʼax maʼ k-ojleʼ baʼax kun úuchul yéetel cada juntúul tiʼ toʼon tu kʼiinil sáamaliʼ (Sant. 4:14). Maʼ xaaneʼ jeʼel k-ilik le nojoch muʼyajiloʼ wa maʼ xaaneʼ jeʼel k-kíimil anteseʼ. Kex jeʼel baʼalak ka úuchkeʼ wa ku chúukpajal k-óoleʼ Jéeobaeʼ yaan u tsʼáaiktoʼon le kuxtal minaʼan u xuuloʼ. Le máaxoʼob yéeyaʼanoʼoboʼ yaan u reinaroʼob yéetel Cristo teʼ kaʼanoʼ, yéetel le uláakʼ tamanoʼoboʼ yaan u kuxtaloʼob tiʼ junpʼéel paraíso way Luʼumeʼ. Le oʼolal mantatsʼ unaj k-tuukul tiʼ le jatsʼuts esperanza yaantoʼonoʼ yéetel k-preparartikba utiaʼal u kʼiinil Jéeoba.