Kuxlakoʼon bey máaxoʼob yaan u naʼatoʼobeʼ
1 Le ka tu yaʼalaj Jesús tiʼ kantúul j-chuk kayoʼob ka u tsaypachtoʼobeʼ, letiʼobeʼ maʼ tu jach tukloʼobiʼ, baʼaxeʼ «tu séeblakil [...] binoʼob tu paach» (Mat. 4:18-22). Saulo tiʼ u kaajil Tarso xaneʼ, le ka tu beetuba u disipulo Cristo yéetel le ka páajchaj u paakat tu kaʼateneʼ, tu séebaʼanil «joʼopʼ u tseʼek teʼ j-sinagogaʼoboʼ, táan u yaʼalikeʼ Jesuseʼ letiʼ u Paal [...] Jajal Dios» (Hch. 9:20). Le tiempooʼ maʼ tu páaʼtik mix máak, yéetel maʼ tu suut paachil. Le oʼolal jach unaj k-eʼesik naʼatil ichil k-kuxtal yéetel maʼ unaj k-chʼíikil k-beet baʼaloʼob maʼ jach kʼaʼanantakoʼobiʼ (Efe. 5:15, 16).
2 Baʼaxoʼob maʼ táan u páaʼtaʼaloʼobiʼ. Bejlaʼeʼ jeʼel u páajtal k-meyajtik Jéeobaeʼ, sáamaleʼ maʼ k-ojliʼ (Sant. 4:14). ¿Baʼaxten? Yáaxeʼ tumen «u súutuk u jáan úuchul wa baʼax» tiʼ máak (Ecl. 9:11). U kaʼapʼéeleʼ tumen tuláakal máak ku chʼíijil. Tsʼoʼoleʼ ken chʼíijik máakeʼ ku kʼuchul le «kʼiinoʼob talamoʼob» tuʼux maʼ tu páajtal u meyajtik Dios jeʼex tu táankelmileʼ (Ecl. 12:1). Le oʼolaleʼ maʼ unaj k-chaʼik u máan yaʼab tiempo utiaʼal k-kʼubik kuxtal tiʼ Jéeobaiʼ, mix unaj k-páaʼtik ka maʼalobchajak tuláakal baʼal ichil k-kuxtal utiaʼal k-maas meyajtik (Luc. 9:59-62). Abrahameʼ, tu yeʼesaj naʼatil tumen jach tu kʼububa u meyajt Jéeoba, le oʼolal tak tu tsʼook u kʼiiniloʼob u kuxtaleʼ anchaj jeetsʼelil tiʼ (Gén. 25:8).
3 Jach upʼíit kʼiin pʼaataltoʼon. Uláakʼ baʼax oʼolal kʼaʼabéet k-eʼesik naʼatil ichil k-kuxtaleʼ tumen «chéen jumpʼíit kʼiin pʼaataltoʼon» (1 Cor. 7:29-31). Jach maʼ yaʼab u bin utiaʼal u xuʼulsaʼal tiʼ le kʼasaʼan yóokʼol kaabaʼ yéetel utiaʼal u xuʼulul le joochoʼ, lelaʼ u kʼáat yaʼaleʼ yaan u xuʼulul u kʼaʼaytaʼal le maʼalob péektsiloʼ (Apo. 14:15). Le beetikeʼ maʼ unaj k-chaʼik tiʼ le chiʼichnakiloʼob, mix tiʼ uláakʼ baʼaloʼob u luʼskoʼobtoʼon tiempo utiaʼal k-kʼaʼaytik le maʼalob péektsiloʼ (Luc. 21:34, 35). Ken kʼuchuk le kʼiin jeʼeloʼ jach yaan u kiʼimaktal k-óol ken kʼaʼajs bukaʼaj t-beetaj teʼ meeyjil kʼaʼaytajoʼ.
4 Bejlaʼeʼ u kʼiinil utiaʼal k-beetik le meyajoʼob ku tsʼaʼabaltoʼon ichil u kaajal Diosoʼ. Le oʼolaleʼ, koʼoneʼex beetik tuláakal le ku páajtal utiaʼal k-meyajtik Jéeoba «kaʼalikil maʼ máanak u kʼiinil bejelaʼeʼ» (Heb. 3:13). Wa k-beetik beyoʼ yaan k-eʼesik táan k-kuxtal bey máaxoʼob yaan u naʼatoʼobeʼ, tumen «le máax ku beetik baʼax u kʼáat Jajal Dioseʼ ku pʼáatal utiaʼal kʼiinoʼob minaʼan u xuul» (1 Juan 2:17).