呢本出版物系非卖品，发行呢本出版物系全球圣经教育工作嘅一部分，呢项工作靠自愿捐款提供经费。

如果你想捐款，请上www.pr418.com。

除非另外注明，所有嘅经文都引自《圣经新世界译本》。

2017年2月印刷

Chinese Cantonese (Simplified) (ll-CNS)

© 2016，2017 WATCH TOWER BIBLE AND TRACT SOCIETY OF PENNSYLVANIA

上帝系仁爱嘅爸爸。 彼得前书5:6,7

我哋系上帝创造嘅，佢好关心我哋。上帝就好似一位有见识又仁爱嘅爸爸，乐意教导儿女，佢指引世界各地嘅人过最幸福嘅生活。

上帝将宝贵嘅真理话俾我哋知，令我哋生活得开心又有希望。

如果你听上帝嘅话，佢就会指引你，保护你，帮助你应付难题。

唔单止噉，佢仲会赐永生俾你！

上帝话：“嚟我呢度。你哋要留心听，就能够保全性命。” 以赛亚书55:3

上帝通过圣经对我哋讲话。 提摩太后书3:16

上帝启示人将佢嘅谂法写喺一本神圣嘅书入面。呢本书就系圣经。圣经入面有好重要嘅信息，系上帝希望你知道嘅。

一切实用嘅智慧都系由上帝嗰度嚟嘅，佢知道乜嘢对我哋最好。你听上帝嘅话，就会有智慧。（箴言1:5）

上帝希望每个人都读到圣经。所以，今日圣经被翻译成好多种语言。

你如果想听上帝嘅话，就一定要睇圣经，同埋明白圣经。

世界各地有好多人听上帝嘅话。 马太福音28:19

耶和华见证人好乐意帮助你明白圣经。

佢哋喺世界各地教人关于上帝嘅知识。

你可以同佢哋学习圣经，仲可以去佢哋聚会嘅地方认识上帝。呢啲安排都系免费嘅。

上帝嘅名叫“耶和华”。（诗篇83:18）佢喺天上面，系我哋睇唔到嘅。佢好爱我哋，亦都希望我哋爱佢。佢仲希望我哋去爱其他人。（马太福音22:35-40）上帝嘅地位系最高嘅，因为万物都系佢创造嘅。

最初，上帝创造咗一个天使，呢个天使后来叫做“耶稣基督”。上帝仲创造咗好多其他嘅天使。

耶和华创造咗天上嘅一切……同埋地上嘅一切。 启示录4:11

耶和华上帝创造咗星星、地球同埋地上嘅一切。（创世记1:1）

佢用地上嘅泥土造咗第一个男人亚当。（创世记2:7）

耶和华赐俾亚当同夏娃好多福分。 创世记1:28

耶和华造咗第一个女人夏娃，将佢赐俾亚当做太太。（创世记2:21,22）

耶和华赐俾佢哋嘅头脑同身体都系十全十美，毫无缺陷嘅。

亚当同夏娃住喺伊甸园里面。伊甸园系一个好靓嘅乐园，嗰度有河，有各种各样嘅果树同动物。

佢哋仲可以同耶和华倾计，受耶和华教导。如果佢哋听上帝嘅话，就可以喺地上嘅乐园里面永远生活落去。

上帝话有一棵树嘅果唔可以食。 创世记2:16,17

耶和华话俾亚当夏娃知，伊甸园入面有棵特别嘅树，又吩咐佢哋唔好食上面嘅果，如果食咗就一定会死。

一个天使背叛上帝，呢个变坏嘅天使称为魔鬼撒但。

撒但唔想亚当同夏娃听上帝嘅话，就用一条蛇同夏娃讲，如果佢食咗呢棵树嘅果，唔单止唔会死，仲可以好似上帝噉。佢当然系讲大话啦。（创世记3:1-5）

亚当同夏娃唔听上帝嘅话，所以会衰老死亡。 创世记3:6,23

夏娃听蛇嘅话，食咗嗰棵树嘅果。之后，佢仲俾亚当食，亚当亦都食咗。

佢哋唔听上帝嘅话，做咗呢件错事，圣经话，噉就系罪。上帝将佢哋赶出伊甸园。

佢哋同啲仔女喺乐园外面生活得好艰难。亚当同夏娃慢慢衰老，最后死亡。佢哋死亡之后，唔系去咗其他地方，而系唔再存在。

死咗嘅人好似泥土一样，完全冇生命。 创世记3:19

我哋都系亚当同夏娃嘅后代，所以我哋人人都会死。死咗嘅人咩都听唔到，咩都睇唔到，咩都做唔到。（传道书9:5,10）

人会死，根本唔系耶和华嘅原意。好快，耶和华就会复活死去嘅人。如果佢哋听上帝嘅话，就可以永远生活落去。

喺挪亚嘅时代，大多数人都做坏事。 创世记6:5

亚当同夏娃生儿育女，地上嘅人就越来越多。后来，有啲天使跟随撒但背叛上帝。

佢哋嚟到地上，改变形态成为男人，同人间嘅女人结婚。佢哋生嘅仔都系巨人，力大无穷，凶恶残暴。

嗰阵时，地上到处都有坏人坏事。圣经话：“耶和华见人喺地上作恶多端，心入面成日谂嘅，都系恶事。”喺挪亚嘅时代，大多数人都做坏事。

挪亚听上帝嘅话，造咗只方舟。 创世记6:13,14,18,19,22

挪亚系个好人。耶和华话俾挪亚知，佢好快就会用大洪水消灭坏人。

上帝要挪亚造一只大船，叫做“方舟”，仲吩咐挪亚带埋屋企人同各种各样嘅动物入方舟。

挪亚警告人，大洪水好快就要嚟喇。但啲人唔听，有啲人仲取笑佢，甚至好憎佢添。

造好方舟之后，挪亚就将动物带入去。

上帝消灭坏人，拯救咗挪亚一家。 创世记7:11,12,23

暴雨落咗四十日四十夜，大洪水淹没大地，坏人全部死晒。

背叛上帝嘅坏天使放弃咗人嘅形态，返去天上。

方舟入面嘅人渡过咗洪水，喺地上继续生活。虽然挪亚同佢嘅屋企人最终都死咗，但系将来上帝会复活佢哋，使佢哋有希望享永生。

上帝会再次消灭坏人，拯救好人。 马太福音24:37-39

撒但同啲坏天使继续呃人。

挪亚嘅时代一样，今日好多人做坏事，唔肯听耶和华嘅话。耶和华好快就会消灭晒啲坏人。（彼得后书2:5,6）

有啲人就好似挪亚噉，愿意听上帝嘅话，按照佢嘅吩咐去做。呢啲人就系耶和华见证人。

耶和华派耶稣嚟地上。 约翰一书4:9

未有天下万物之前，耶和华就已经喺天上创造咗一个大能嘅天使，佢系耶和华心爱嘅儿子。我哋如果想耶和华开心，亦都要听佢儿子嘅话。

后来，耶和华差派佢降世为人，喺伯利恒出世。佢由处女马利亚所生，起名叫“耶稣”。（约翰福音6:38）

耶稣喺地上嘅所言所行，完全反映出上帝嘅美好特质。佢仁慈亲切，平易近人，放胆教导人关于耶和华嘅真理。

耶稣系个好人，但系受人憎恨。 彼得前书2:21-24

耶稣亦都医好有病嘅人，复活死去嘅人。

宗教领袖好憎耶稣，因为耶稣揭发佢哋行为邪恶同埋教导人错误嘅道理。

宗教领袖陷害耶稣，煽动罗马人去鞭打耶稣，将佢处死。

耶稣牺牲生命，使我哋可以有永生嘅希望。 约翰福音3:16

耶稣死咗三日之后，有啲妇女去佢坟墓嗰度，发觉坟墓系空嘅，因为耶和华已经将佢复活。

耶稣复活之后去见佢啲使徒。

冇错，耶和华已经将耶稣复活成一个能力高强嘅天使，仲永远都唔会死。耶稣嘅门徒睇住佢升返上天。

上帝复活咗耶稣，委任佢做上帝王国嘅君王。 但以理书7:13,14

耶稣为咗救赎所有人嘅罪，甘愿牺牲自己嘅生命。（马太福音20:28）上帝通过赎价呢个安排，令我哋有机会得到永生。

耶和华委任耶稣做君王，统治全世界。仲会有14万4000个忠心嘅人同佢一齐统治，佢哋都系由地上复活到天上去嘅。耶稣同呢14万4000人会喺天上组成一个正义嘅政府，叫做上帝嘅王国。（启示录14:1-3）

上帝嘅王国会使地球成为乐园。到时，唔会再有战争、罪行、贫穷同埋饥荒。人人都会得到真正嘅幸福快乐。（诗篇145:16）

地上嘅种种灾祸证明，上帝嘅王国好快就会采取行动。 路加福音21:10,11；提摩太后书3:1-5

而家社会发生嘅好多事，圣经早就预告咗。圣经话人会变得贪爱钱财，忤逆父母，凶恶残暴，只顾吃喝玩乐。

圣经仲话会有大地震、战争、粮食短缺，到处都有瘟疫。呢啲事已经发生紧。

不过，耶稣亦都话，上帝王国嘅好消息会传到世界各地。（马太福音24:14）

上帝嘅王国会消灭所有恶人恶事。 彼得后书3:13

耶和华好快就会消灭所有恶人恶事。

撒但同啲坏天使都会受到惩罚。

而听上帝话嘅人，就会得救，喺一个正义嘅新世界入面生活。到时，人人都唔再担惊受怕，可以互相信任，相亲相爱。

你会见翻好多复活过嚟嘅人。 使徒行传24:15

试谂吓，如果你听上帝嘅话，将来会有几大嘅福分呢！到时，你会身心完美，唔会再有病。世上亦都唔会再有坏人，你可以完全信任所有人。

到时，人唔会再有痛苦，唔会再伤心流泪，唔会有人衰老同死亡。

你嘅亲朋戚友喺乐园入面生活，系几咁开心呢。

我哋人人都会有真正嘅幸福快乐，唔使再担惊受怕。

上帝嘅王国会除去一切痛苦。 启示录21:3,4

上帝会听我哋嘅祷告。 彼得前书3:12

耶和华系“听祷告嘅主”。（诗篇65:2）佢希望我哋发自内心噉同佢讲话。

我哋应该只向耶和华祷告，唔应该向其他对象祷告。

我哋可以为好多事向上帝祈求。 约翰一书5:14

我哋可以求上帝嘅旨意喺天上同埋地上实现。

求耶和华俾力量我哋做啱嘅事。亦都可以为住嘅、食嘅、着嘅、工作同埋健康祷告。

要通过耶稣嘅名祷告，表明我哋重视佢为我哋所做嘅一切。

有爱先有家。 以弗所书5:33

婚姻喺上帝眼中应该系一夫一妻嘅结合。

一个好丈夫会了解佢嘅太太，对佢温柔体贴。

太太要好好配合丈夫。

小朋友要听爸爸妈妈嘅话。

要仁慈相待，唔好恶言相向；要用情专一，唔好对家人不忠。 歌罗西书3:5,8-10

圣经话，做丈夫嘅要爱太太，就好似爱自己嘅身体一样。太太亦都要深深尊重丈夫。

婚姻以外嘅性行为都系错嘅，应该要对配偶专一。

家庭幸福有赖于耶和华嘅教导。

唔好做坏事。 哥林多前书6:9,10

如果我哋爱耶和华，就唔会做佢憎恨嘅事。

耶和华唔钟意我哋偷嘢、醉酒、吸毒。

上帝憎恨杀人、堕胎、同性恋。佢唔钟意我哋贪心，亦都唔钟意我哋同人打交。

我哋唔可以拜偶像，同埋接触通灵术，例如占卜、算命之类嘅迷信活动。

做坏事嘅人唔可以喺将来地上嘅乐园入面生活。

要做啱嘅事。 马太福音7:12

我哋努力学习上帝噉样对待人，就可以令上帝开心。

对人慷慨仁慈，就系爱心嘅表现。

要诚实可靠。

要慈悲，乐于宽恕人。

要帮助人认识耶和华同佢嘅做事方式。（以赛亚书43:10）

要企喺上帝嗰边。 彼得前书5:6-9

只要系违反圣经原则嘅习俗，都唔应该做。噉样系需要勇气嘅。

同政治有关嘅活动，都唔应该参与。呢啲活动系同耶和华以及佢嘅王国对立嘅。

做正确嘅选择——听上帝嘅话。 马太福音7:24,25

要同耶和华见证人来往，佢哋会好乐意帮助你亲近上帝。

要继续认识上帝，努力服从佢嘅吩咐。

你嘅信心加强之后，就应该献身俾上帝，而且接受浸礼。（马太福音28:19）

要听上帝嘅话。要研读圣经，请耶和华见证人帮助你明白，然后将学到嘅用出嚟。你努力噉样做，就可以得到永生。（诗篇37:29）