Números
23 Óraque gudxi Balaam Balac: «Biʼniʼ gadxe altar raríʼ ne guluu listu gadxe toro ne gadxe dendxuʼ barracu para naa». 2 Oraqueca biʼniʼ Balac casi peʼ modo gudxi Balaam laa guni. Ne lu cada altar bidii Balac ne Balaam ti toro ne ti dendxuʼ barracu casi ofrenda. 3 Despué gudxi Balaam Balac: «Biaana raríʼ cueʼ ofrenda ni riaʼquiʼ stiluʼ ne naa maʼ chaaʼ. Zándaca guiniʼné Jehová naa. Intiica si cosa gábibe naa, naa zabeʼ ni lii». Ne bireebe zebe lu ti loma ni gastiʼ nuu lú.
4 Óraque guniʼné Dios Balaam, ne gudxi Balaam laabe: «Maʼ bizuhuaaʼ gadxe altar pur fila ne maʼ bidieeʼ ti toro ne ti dendxuʼ barracu casi ofrenda lu cada altar ca». 5 Ne guluu Jehová diidxaʼ ndaaniʼ ruaa Balaam* ne gúdxibe laa: «Biguetaʼ ra nuu Balac, ne ndiʼ nga ni naquiiñeʼ guiniʼluʼ». 6 Ngue runi bibiguétabe ne biiyabe zuhuaa Balac ne guiráʼ ca príncipe stiʼ Moab cueʼ ofrenda ni riaʼquiʼ sticaʼ. 7 Óraque guniʼbe proverbio* riʼ:
«Balac, rey stiʼ Moab, bisendacaa naa dede Aram,
dede ra nuu ca dani ni riaana neza rindani gubidxa:
“Gudáʼ ne biʼniʼ maldecir Jacob pur naa.
Ya, gudáʼ ne guníʼ xiixa para guiaba castigu luguiáʼ Israel”.
8 ¿Ximodo guneʼ maldecir ca ni caʼruʼ guni maldecir Dios?
¿Ne ximodo guinieeʼ guiaba castigu luguiáʼ ca ni caʼruʼ gusaba Jehová castigu luguiáʼ?
9 Dede ra dxibaʼ lu ca guié ca ruuyaʼ laacabe,
ne dede ra dxibaʼ lu ca loma ca ruuyaʼ laacabe.
Nácacabe ti guidxi ni nabeza racá, stubisícabe,
ne cadi nuucabe lade ca nación ca.
10 ¿Tu laa zanda ugabaʼ ca yudé stiʼ Jacob?
¿Tu laa zanda ugabaʼ neca ti cuarta parte stiʼ Israel?
Bidii lugar gateʼ* casi rati ca ni runi ni jneza,
ne guiluxeʼ casi rilúxecabe».
11 Óraque gudxi Balac Balaam: «¿Xii ndiʼ maʼ bíʼniluʼ naa pue? Bedaniáʼ lii para guni maldecirluʼ ca enemigu stinneʼ, peru lugar de nga maʼ guluuluʼ ndaayaʼ laacabe». 12 Ne bicabi Balaam: «¿Cadi ca diidxaʼ si ni gabi Jehová naa nga zanda guinieeʼ la?».
13 Para gudxi Balac laabe: «Canabaʼ lii, chuunu sti lugar ra zanda gúʼyaluʼ laacabe. Ti parte si de laacabe zuuyaluʼ, qué zuuyaluʼ guirácabe. Biʼniʼ maldecir laacabe pur naa dede racá». 14 Ngue runi yenebe laa lu layú stiʼ Zofim, ra nasoo stiʼ lugar ni láʼ Pisgá, ne bíʼnibe gadxe altar ne bidiibe ti toro ne ti dendxuʼ barracu casi ofrenda lu cada altar. 15 Ne gudxi Balaam Balac: «Biaana raríʼ cueʼ ofrenda ni riaʼquiʼ stiluʼ laga chaaʼ chiguinieniáʼ laabe raricaʼ». 16 Guniʼné Jehová Balaam ne guluube diidxaʼ ndaaniʼ ruaa,* ne gúdxibe laa: «Biguetaʼ ra nuu Balac ne ndiʼ nga ni naquiiñeʼ guiniʼluʼ». 17 Ngue runi guyebe ra nuu Balac ne biiyabe laa cabeza cueʼ ofrenda ni riaʼquiʼ stiʼ ne nuu ca príncipe stiʼ Moab ra nuube. Para gunabadiidxaʼ Balac laabe: «¿Xi guníʼ Jehová?». 18 Óraque guníʼ Balaam proverbio riʼ:
«Biasa, Balac, ne bicaadiaga.
Bicaadiaga naa, lii, xiiñiʼ Zipor.
19 Cadi naca Dios casi ti hombre ni rusiguii
nin ca ti xiiñiʼ hombre ni ruchaa ni naguixhe ique guni.
Ora guiniʼbe xiixa, ¿ñee qué rúnibe ni la?
Ora gudii stiidxabe zúnibe xiixa, ¿ñee qué rúnibe ni la?
20 ¡Biaa! Bedanécabe naa para uguaaʼ ndaayaʼ;
laabe maʼ guluube ndaayaʼ ne naa qué zanda diʼ guchaaʼ ni.
21 Qué zudiibe lugar guniná nin ti poder stiʼ magia Jacob
ne qué zudiibe lugar guiaba xiixa yuubaʼ luguiáʼ Israel.
Nuu Jehová Dios stícabe né laacabe,
ne rucaacabe ridxi laa casi rey stícabe.
22 Cabee Dios laacabe de Egipto.
Zeeda gácabe para laacaʼ casi ca cachu stiʼ ti toro guiʼxhiʼ.
23 Pur gana si gacaláʼdxicabe gúnicabe dañu Jacob
ninca iquiiñecabe adivinación luguiáʼ Israel.
Yanna maʼ zanda guiníʼ binni de Jacob ne Israel:
“¡Laguuyaʼ xi maʼ biʼniʼ Dios!”.
24 Ndiʼ nga ti guidxi ni ziasa casi ti lión,
ne zuzuhuaa casi ti lión.
Qué záʼtame dede ora maʼ gudome ni gunaazeme
ne maʼ güeʼme rini stiʼ ca ni maʼ biitime».
25 Óraque gudxi Balac Balaam: «Pa qué zanda guni maldecirluʼ laacabe, laaca cadi uguuluʼ ndaayaʼ laacabe». 26 Para bicabi Balaam Balac: «¿Cadi gudxeʼ caʼ lii zuneʼ guiráʼ ni gabi Jehová naa la?».
27 Ne gudxi Balac Balaam: «Canabaʼ lii, gudiiluʼ lugar chiniáʼ lii sti lugar. Zándaca jneza guʼyaʼ Dios ni dxandíʼ guni maldecirluʼ laacabe pur naa dede racá». 28 Ngue runi yené Balac Balaam ra nasoo stiʼ lugar ni láʼ Peor, ni nudxiilú neza Jesimón.* 29 Óraque gudxi Balaam Balac: «Biʼniʼ gadxe altar raríʼ ne guluu listu gadxe toro ne gadxe dendxuʼ barracu para naa». 30 Para biʼniʼ Balac casi peʼ modo gudxi Balaam laa guni, ne bidiibe ti toro ne ti dendxuʼ barracu lu cada altar.