Ni rusiidiʼ Biblia

¿Ñee jneza gúninu xiixa deporte ni riguu xquendanabáninu ra naxoo la?

“ZEʼ DXI JMA STALE BINNI RIUULAʼDXIʼ CHUʼBÍ DE TI AVIÓN, GUILIIBICAʼ TI DOO NE GUIÉTECAʼ NAGUEENDA CUEʼ TI DANI, CHEʼ NDAANIʼ CANUÁ RA NUU CORRIENTE NADIPAʼ NE GUNI BUCEAR NÉ TIBURÓN. JMA MA’ STALE BINNI RIUULA’DXI’ GUNI CA NI YANNA QUE GUYADXÍSICAʼ». (BIREE NI LU PERIÓDICO THE WILLOW GLEN RESIDENT).

NI BIZEETEʼ periódicu riʼ rusihuinni ni cada dxi jma maʼ stale binni riuulaʼdxiʼ clase deporte riʼ. Tiempu riʼ jma maʼ stale binni riuuláʼdxicaʼ guicacaʼ cueʼ ti dani ni napa hielu, riuubícabe dede lu ti elicopteru né paracaída ne laaca riuubícabe né parapente dede riguíʼbacabe ca lugar ra jma nasoo ca para chuʼbícabe né paracaída.a Ndiʼ rusihuinni riuulaʼdxiʼ binni cuʼ xquendanabani ra naxoo. Laaca nuu deportista riquiiñecaʼ tabla para guxooñecaʼ lu nieve, bicicleta de montaña, patineta ne patín, cada viaje riuuláʼdxicabe gúnicabe jma de biaʼ maca rúnicabe, riuuláʼdxicabe quíʼbacabe ca dani jma nasoo ne ni napa stale guié ne chuʼbícabe de ca lugar ra jma nasoo. Casi ná revista Time, ca dxi riʼ jma zidale ca deporte de riesgu, ndiʼ rusihuinni millón de binni riuuláʼdxicaʼ cuʼcaʼ xquendanabánicaʼ lu peligru ne gúʼyacaʼ dede padé zanda chindacaʼ, «nuucabe fin de semana si rúnicabe ni ne nuucabe nácacabe deportista profesional, riuuláʼdxicabe iquiiñecabe habilidad stícabe ne guni sentírcabe dxiibi ne zacá guiníʼ íquecabe cadíʼdicabe lu ca límite stícabe».

Jma maʼ stale binni runi practicar deporte riʼ, peru laaca maʼ zidale ca problema ni redané ni luguiácabe. Cada dxi jma racaná binni lu ca deporte riʼ, nécaxa riníʼ íquecabe seguru ni. Lu iza 1997, ndaaniʼ ca sala de urgencia de Estados Unidos bihuinni gudxiʼbaʼ 33% de ca binni ni gucaná pur gudxíʼbacaʼ lu ti patín, 31% de laacabe gucaná pur ruxooñenécabe tabla lu nieve ne 20% de laacaʼ gucanacaʼ ra zicacaʼ ti dani. Ne nuu de laacani jma maʼ huayuniná ca ni binni ne pur nga stale de laacabe maʼ guti pur ca deporte de riesgu riʼ. Peru nánnacabe peligroso ca deporte riʼ. Sicaríʼ guníʼ ti gunaa ni runi practicar esquí de alto riesgo: «Nannaʼ dxicheʼ zanda gueeda gateʼ pur laani». Ti profesional ni ruxooñené tabla lu nieve guníʼ: «Pa qué gacanaluʼ la? cadi cayúniluʼ stipa biaʼ caquiiñeʼ gúniluʼ».

Pur ca ni maʼ bizéʼtenu riʼ, ¿ximodo naquiiñeʼ guʼyaʼ ca xpinni Cristu ca deporte riʼ yaʼ? ¿Xi conseju zeeda lu Biblia ni zanda gacané laanu guidúʼyanu pa zanda guni practicarnu ca deporte de riesgu riʼ yaʼ? Para guicábinu ca pregunta riʼ la? guidúʼyanu pabiáʼ risaca guendanabani para Dios.

Ximodo ruuyaʼ Dios guendanabani

Biblia rusiidiʼ laanu ra nuu Jehová nga «cadá guendanabani» (Salmo 36:9). Cadi bizáʼsibe binni, sínuque bidiibe laacaʼ guiráʼ ni caquiiñecaʼ para guibánicaʼ nayecheʼ (Salmo 139:14; Hechos 14:16, 17; 17:24-28). Nga runi, ribézabe gápanu regalu ni maʼ bidiibe laanu. Ca ley ne ca principiu ni maʼ bidii Jehová guidxi Israel racané ca ni laanu guiénenu ni caninu riʼ.

Lu Ley bidii Jehová Moisés que cá xi naquiiñeʼ guni binni para gapa xquendanabani prójimo stiʼ. Ne pa qué chinándacabe Ley que ne gueeda gatiʼ tuuxa la? laacabe nápacabe donda pur ni bizaaca que. Guzéʼtenu ti ejemplu, pa tuuxa chigucuí ti yoo la? naquiiñeʼ cuʼbe pretil guidubi vuelta ique yoo que, peru pa qué gúnibe ni ne gueeda guiaba tuuxa de ique lídxibe ne gueeda gati la? laabe nápabe donda (Deuteronomio 22:8). Ne pa málasi uguu ique ti toro tuuxa binni la? qué gapa diʼ dueñu que donda, peru pa nánnacabe naduxhuʼ maniʼ riʼ ne maʼ gúdxicabe laabe peru qué ñápabe laame la? gueeda guniname ne guutime tuuxa la? napa dueñu ca donda ne zándaca gueeda guuticabe laa (Éxodo 21:28, 29). Cumu nabé sicarú nga guendanabani para Jehová la? nga runi lu Ley ni bidiibe que bihuinni pabiáʼ risaca nga guiaapaʼ ni.

Ca xpinni Dios que biénecaʼ racané ca principiu riʼ laacaʼ para cadi cuʼcaʼ xquendanabánicaʼ ra naxoo. Lu Biblia riete relatu stiʼ David, ti biaje gucalaʼdxiʼ ñeʼ «nisa ni daʼ ndaaniʼ cisterna stiʼ Belén», para tiempu que la? nuu guidxi riʼ lu náʼ ca filisteu. Ora gunna chonna de ca soldadu stiʼ David xii ngue racaláʼdxibe la? guluucaʼ xquendanabánicaʼ ra naxoo ne guyecaʼ yecaacaʼ nisa que ra cisterna stiʼ Belén ne yené ca ni ra nuu David. ¿Xi bíʼnibe óraque yaʼ? Qué ninabe ñeʼbe ni, bixhiibe ni layú ne guniʼbe: «Qué ziuu dxi guneʼ ndiʼ, zeeʼ xa rini stiʼ ca hombre ni guluucaʼ xquendanabánicaʼ ra naxoo riʼ. Guluucabe xquendanabánicabe ra naxoo para beedanécabe ni» (1 Crónicas 11:17-19). Qué lica nidiʼdiʼ ndaaniʼ ique David niguu xquendanabani tuuxa ra naxoo para si chuʼ galán.

Zacaca nga biʼniʼ Jesús, zándaca lu ti visión gudxi Binidxabaʼ laabe chúʼbibe dede ra jma nasoo ique templu que para gúʼyabe pa zacané ca ángel stiʼ Dios laabe ti cadi gacanabe. Peru Jesús bicabi laabe: «Cadi gutiidiluʼ prueba Jehová Dios stiluʼ» (Mateo 4:5-7). Racá ridúʼyanu, David ne Jesús biénecaʼ cadi jneza ruuyaʼ Dios cuʼ tuuxa xquendanabani ra naxoo pur xiixa ni qué risaca.

Pur ca ejemplu ni maʼ bizéʼtenu riʼ, zándaca guinabadiidxanu: «¿Pora runi practicar tuuxa ti deporte? ¿Pora nga maʼ riguube xquendanabánibe ra naxoo? Dede ca juegu ni ruluíʼ cadi peligroso zanda cuʼ binni xquendanabani ra naxoo pur laacani. Yanna, ¿dede padé si nga zanda chindanu yaʼ?».

¿Ñee caquiiñeʼ peʼ cuʼnu xquendanabáninu ra naxoo la?

Para guicábinu pregunta ca la? caquiiñeʼ guiduʼyaʼ chaahuinu deporte ni racaláʼdxinu guni practicarnu. Zanda guinabadiidxanu: «¿Panda binni maʼ gucaná pur deporte riʼ? ¿Ñee nannaʼ quiteʼ deporte riʼ o napaʼ equipu ni caquiiñeʼ para cadi gacanaʼyaʼ la? ¿Xi zazaaca pa gueeda guiabaʼ o guchee calculo stinneʼ ra chuaabieʼ o guni fallar equipu de seguridad stinneʼ? Ra guizaaca ca ndiʼ, ¿ñee zacanaʼyaʼ piaʼ o dede zanda gueeda gateʼ la?

Pa ti xpinni Cristu runi practicar ti deporte ni riguu xquendanabani ra naxoo para si gaca divertir la? zuniti amistad sicarú ni napané Jehová ne maʼ qué zanda gápabe privilegiu especial ndaaniʼ congregación (1 Timoteo 3:2, 8-10; 4:12; Tito 2:6-8). Racá ridúʼyanu, ora ti xpinni Cristu chiguni practicar xiixa deporte la? naquiiñeʼ guiníʼ ique chaahuiʼ pabiáʼ risaca guendanabani ca para Dios ni bizáʼ laanu.

[Nota]