18 Ndaa
Guca xhamigu Dios ne qué ziuu dxi gátiluʼ
Naquiiñepeʼ nga stale stipa para gápaluʼ ti xhamíguluʼ ne cadi gunítiluʼ laa. Stipa guʼnuʼ pur gácaluʼ xhamigu Dios ne cadi guibiá ni la? zudii ni lii stale ndaayaʼ. Jesús gúdxibe cani runi cré laabe: «Ne zanna tu ni dxandíʼ, ne zaladi tu ra cá tu yaga» (Juan 8:32). Xi gucaláʼdxibe niniʼbe ne ca diidxaʼ riʼ yaʼ.
Zanda chuʼluʼ libre yanna. Zanda guilaluʼ de cani rusiidicabe ni cadi dxandíʼ ne de ca guendarusiguii ni maʼ bicheeche Satanás. Laaca zanda guilaluʼ de stale guendanagana ni napa miyón de binni qué runibiáʼ Jiobá (Romanos 8:22). Ca xhamigu Dios qué lica ridxíbicabe guendaguti (Hebreos 2:14, 15).
Zanda chuʼluʼ libre lu Guidxilayú ni Dios chiguni nacubi. ¡Guizáʼ sicarú nga mayaca chuʼluʼ libre! Ora Guidxilayú riʼ gaca ni ti paraisu la? maʼ qué ziuu diʼ guendaridinde stiʼ guidxi, guendahuará, nin guendarucheené ley. Maʼ qué ziuu diʼ guendapobre, nin guendarindaana. Ziuʼnu libre de guendayooxhoʼ ne guendaguti, zaqueca de guendaridxibi, guendaruquichinaʼ ne de ni cadi jneza. Biblia na sicaríʼ de Dios: «Cuxhálenaluʼ ne cudiiluʼ ni racalaʼdxiʼ cani nabani» (Salmo 145:16, NM).
Ca xhamigu Dios qué ziuu dxi gáticaʼ. Guendanabani ni qué ziuu dxi guiluxe ca la? nga nga tobi de cani jma sicarú ni cusigaʼdeʼ Dios cani ruyubi gaca xhamigu laabe (Romanos 6:23). Guníʼ ique si ni zaca para lii guibániluʼ sin qué guiuu dxi gátiluʼ.
Zápaluʼ tiempu para guʼnuʼ intiica chúʼladxuʼ. Zándaca gacalaʼdxuʼ guiziiduʼ guxhidxuʼ xixa, o pacaa gutieeluʼ o guʼnuʼ dxiiñaʼ de carpinteru. Laaca zándaca gacaláʼdxiluʼ guiziiduʼ gúʼndaluʼ de ca maniʼ ca o de ca yaga ca. O pacaa chulaʼdxuʼ chigunibiaʼluʼ sti guidxi ne ca binni nabeza raqué. Cumu zápaluʼ guendanabani ni qué zaluxe la? guirani zanda guʼnuʼ.
Zápaluʼ tiempu para guʼnuʼ stale amigu. Cumu maʼ qué ziuu dxi gátiluʼ la? zanda gunibiaʼluʼ stale de ca xhamigu Dios. Zannuʼ xi nánnacabe ne ximodo laacabe ne laaca zaca xhamíguluʼ laacabe. Zannaxhiiluʼ laacabe ne laacabe zannaxhiicabe lii (1 Corintios 13:8). Cumu maʼ qué ziuu dxi gátiluʼ la? zanda gaca xhamíguluʼ guiráʼ binni guibani lu Guidxilayú. Ne ni jma galán la? amistá stiluʼ ne Jiobá zaca ni jma naguidxi ra tiidiʼ ca gayuaa iza ca. ¡Guca xhamigu Dios ne qué ziuu dxi gátiluʼ!