17 Ndaa

Para gápaluʼ xhamíguluʼ la? naquiiñeʼ gácaluʼ amigu

Amistá ca la? zúbani lu guendarannaxhii. Pa guiziiduʼ jma de Jiobá la? jma zannaxhiiluʼ laabe ne jma zacalaʼdxuʼ guʼnuʼ ni nabe. Laani zucaani lii gácaluʼ ni riziidiʼ stiʼ Jesucristu (Mateo 28:19). Lii zanda gápaluʼ amistá stiʼ Dios sin qué chuʼ dxi guibiani pa guidaaguluʼ ca testigu stiʼ Jiobá ni nabánicaʼ nayecheʼ. Xi naquiiñeʼ guʼnuʼ yaʼ.

Bisihuinni nadxiiluʼ Dios ra guʼnuʼ ni na ley stibe. «Sicarí nga ganaxhii nu Dios: guni nu ni na. Ne cadi nagana ni na be guni nu.» (1 Juan 5:3.)

Biʼniʼ ni caziiduʼ. Jesús guníʼ ti historia ni rusiidiʼ de laani. Ti hombre nuu xpiaaniʼ bicuí lidxi lu guie, ne ti hombre ni qué riene bicuí lidxi lu yuxi. Ora beeda ti nisaguie roʼ la? yoo ni gurí lu guie que qué nixá, peru yoo ni gurí lu yuxi que la? dede guxidxi ora biaba. Jesús guníʼ de que ca binni rucaadiaga cani rusiidibe zeeda gácacaʼ casi hombre nuu xpiaaniʼ bicuí lidxi lu guie que. Laaca guniʼbe de cani rucaadiaga ni rusiidibe peru qué runi ni la? zeeda gácacaʼ casi hombre qué riene ni bicuí lidxi lu yuxi que. Gunáʼ tobi de guiropaʼ hombre riʼ riulaʼdxuʼ gácaluʼ yaʼ (Mateo 7:24-27.)

Bidii lii Dios. Zanda guʼnuʼ ni ra guiníʼneluʼ Jiobá lu orasión de que racalaʼdxuʼ guʼnuʼ Ni nabe laga nabanuʼ. Pa guʼnuʼ modo na Dios, zusihuinniluʼ de que nácaluʼ ni riziidiʼ stiʼ Jesucristu (Mateo 11:29).

Guyuunisa. «Guyuunisa ne gudiibiʼ ca xtóndaluʼ ra guiniʼluʼ de labe.» (Hechos 22:16, NM.)

Biʼniʼ guiráʼ ni na Dios. «Irá ni guni tu la? laguni ni de idubi ladxidó to, casi ñaca xhiiña Señor [Jiobá, NM], cayuni tu, cadi xhiiña binni.» (Colosenses 3:23.)