16 Ndaa

Gusihuinninu nadxiinu Dios

Para cadi gusaana de gaca xhamíguluʼ tuuxa la? nápaluʼ xidé guiníʼneluʼ laa. Rucaadiágaluʼ laabe, ne laabe rucaadiágabe lii. Laaca riniʼluʼ galán de laabe nezalú xcaadxi binni. Zaqueca nga naquiiñeʼ guʼnuʼ pa racaláʼdxiluʼ gaca xhamíguluʼ Dios. Biaguʼyu xiná Biblia de laani.

Cadi gusaana de guiníʼneluʼ Jiobá. «Cadi usaana tu de iníʼ né tu Dios.» (Romanos 12:12.)

Biindaʼ Biblia, stiidxaʼ Dios. «Irá Xquiʼchi Dios, Espíritu Santu uníʼ xi icá, ne nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu.» (2 Timoteo 3:16.)

Bisiidiʼ xcaadxi binni de Dios. «Nga runi laché irá xixé guidxi, lachiusiidi irá xixé binni sa nanda naa, [...]. Lausiidi laaca guni ca irá ni ma gudxe laatu». (Mateo 28:19, 20.)

Bidxiña ca xhamigu Dios. «Tu canazané binni nuu xpiaaniʼ la? zaca binni nuu xpiaaniʼ.» (Proverbios 13:20, NM.)

Guyé ca guendaridagulisaa ra Yoo stiʼ Reinu. «Ne naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ, [...] cada tobi acané stobi para indisa ique.» (Hebreos 10:24, 25.)

Gucané sáʼ dxiiñaʼ stiʼ Reinu. «Cada tobi udii biaʼ ruluiʼlaʼdxiʼ, ne cadi acaná ladxidóʼ ti ma bidii ni, nin udii ni purti canaba cabe ni laa, purti nadxii Dios ni rudii ni laa de idubi ladxidóʼ.» (2 Corintios 9:7.)

[Dibuju/foto ni zeeda lu yaza 27]

YOO STIʼ REINU stiʼ ca Testigu stiʼ Jiobá