15 Ndaa

Ca xhamigu Dios rúnicaʼ ni jneza

Ora napuʼ ti xhamíguluʼ ni ridxagayaaluʼ ne napuʼ respetu laa la? rúniluʼ pur gácaluʼ casi laa. «Jiobá nachaʼhuiʼ ne runi jneza», na Biblia (Salmo 25:8, NM). Para gaca xhamígunu Dios la? naquiiñeʼ gácanu binni nachaʼhuiʼ ne ni runi jneza. Biblia na: «Ma xiiñi Dios laatu ne nadxii laatu. Yanna laucaalaʼdxi gaca tu casi laa. Intiica guni tu lausihuinni nadxii saa tu» (Efesios 5:1, 2). Ca ndiʼ nga caadxi de cani zanda chinándanu para gúninu casi runi Jiobá:

Gácanenu binni. «Ora tiica ganda acané nu binni la? guni nu ni.» (Gálatas 6:10.)

Gácanu binni runi dxiiñaʼ. «Ni uca gubaana la? ma cadi cuanaʼ, sínuque ma iquiiñe ná para guni dxiiña jneza.» (Efesios 4:28.)

Laanu ne xpiaʼnu gaca nayá. «Usiá nu laanu de irá ni runi dxaba xcuerpu nu ne espíritu stinu, ti sa nu modo pe naquiiñe sa ca xpinni be, cani ridxibi laabe.» (2 Corintios 7:1.)

Ganaxhiinu ne gápanu respetu ca binnilídxinu. «Peru laca rusiidi ni naquiiñe ganaxhii hombre xheela casi nadxii laca laa, ne irá gunaa guni ni na xheelaʼ. Baʼdu caʼ, lauzuuba stiidxa bixhoze tu ne jñaa tu.» (Efesios 5:33–6:1.)

Ganaxhiinu binni. «Naquiiñe ganaxhii saa nu purti nadxii Dios irá nu.» (1 Juan 4:7.)

Gúninu ni na ca ley stiʼ guidxi. «Naquiiñe uzuuba irá binni stiidxa cani runi mandar ndaani xquidxi [...]. Laquixe de irá ni nuzaabi tu. [...] Ne ra nuzaabi tu impuestu, laquixe.» (Romanos 13:1, 7.)