Carta stiʼ Grupu ni Zaniruʼ

Para guiráʼ ca binni nadxii Jiobá:

Jesús guníʼ: «Zanna tu ni dxandíʼ, ne zaladi tu ra cá tu yaga purti ma nanna tu ni» (Juan 8:32). ¡Nabé sicarú ca diidxaʼ ca! Guiranu zanda gánnanu ni dxandíʼ, neca nabáninu lu ca últimu dxi ra nabé rusiguii binni (2 Timoteo 3:1). Zándaca rietanaláʼdxinu pabiáʼ galán biʼniʼ sentirnu ora bizulú bizíʼdinu guiráʼ cani zeeda lu Stiidxaʼ Dios. ¡Nabé galán guiráʼ cani bizíʼdinu ca!

Peru cadi naquiiñeʼ si gánnanu guiráʼ cani cusiidiʼ Biblia ne guininu de laacani, sínuque laaca caquiiñeʼ gúninu ni na cani lu xquendanabáninu. Caquiiñeʼ gúninu stipa para cadi guixélenu de Dios ni nadxii laanu. Peru, ximodo zanda gúninu para cadi gaca nga yaʼ. Jesús bicabi guendarinabadiidxaʼ riʼ gueela ante gatiʼ. Gúdxibe ca apóstol ni bizuubaʼ stiidxabe: «Pa uzuuba tu stiidxaʼ, qué zusaana de ganaxhiee laatu, casi qué huasaana Bixhoze de ganaxhii naa purti ruzuuba stiidxaʼ» (Juan 15:10).

Ñee rudiʼnu cuenta xi biʼniʼ Jesús para qué nixeleʼ de Dios ni nadxii laa la? Bizuubabe stiidxaʼ Bixhózebe. Laanu laaca zacaca naquiiñeʼ gúninu. Para cadi guixélenu de Dios ni nadxii laanu la? naquiiñeʼ gudiʼnu lugar gacané cani cusiidiʼ Biblia laanu lu guiráʼ ni gúninu. Ne ngapeʼ nga guníʼ Jesús huaxhinni que: «Pa nanna tu ca nga ne guni tu cani la? dichoso de laatu» (Juan 13:17).

De guidubi ladxidoʼdoʼ ribézadu gacané libru riʼ laatu para gúnitu guiráʼ cani cusiidiʼ Biblia lu xquendanabánitu ne «cadi ixele tu de Dios ni nadxii laatu laga cabeza tu [...] enda nabani ni qué zaluxe» (Judas 21).