Cadi guixélenu de Dios ni nadxii laanu
1. Xi para nga biree libru Cadi guixélenu de Dios ni nadxii laanu.
1 Semana 23 stiʼ febrero zuzulú ziuundaʼ libru cubi ni láʼ Cadi guixélenu de Dios ni nadxii laanu lu Guendaridagulisaa ra Riuundaʼ Biblia. Cadi dxandíʼ maʼ racaláʼdxinu ganda dxi ca la? Carta ni bicaa Grupu ni Zaniruʼ para ca binni ni nadxii Jiobá la? cuzeeteni xi para nga biree libru ca, nani sicaríʼ: «Racaláʼdxidu gacané libru riʼ laanu gúninu guiráʼ ni cazíʼdinu ti zacá cadi guixélenu de Dios ni nadxii laanu laga cabézanu guendanabani ni qué zaluxe ca» (Judas 21).
2. Paraa zanda gacané libru cubi riʼ laanu.
2 Xi chigusiidini laanu. Ximodo zanda chinándanu ca conseju stiʼ Biblia lu ca cosa riʼ: ora guyúbinu tu gaca xhamígunu, paraa chizanu, xiñee naquiiñeʼ guni respetarnu cani runi mandar, gápanu laanu de cani maʼ biaʼnu gúninu, ni naquiiñeʼ gánnanu de guendaxheelaʼ, de modo guininu ne ca saa ni maʼ biaa binni guni. Ora guidúʼndanu libru riʼ zacaneni laanu guiníʼ íquenu casi modo na ca conseju ni zeeda lu Stiidxaʼ Dios (Sal. 19:7, 8). Zuzúʼbanu stiidxaʼ Dios lu guiráʼ ni gúninu purtiʼ racaláʼdxinu gusiéchenu laabe, zacá zusihuínninu maʼ biénenu modo riníʼ íquebe (Pro. 27:11; 1 Juan 5:3).
3. Xiñee caquiiñeʼ gúninu stipa pur guicábinu guiráʼ semana.
3 Quixhe íquenu guicábinu. Biindaʼ libru ca dede ante ne gudixhe ique gusisácaluʼ Dios lade ca binni ridagulisaa (Heb. 13:15). Guiráʼ ca binni ridagulisaa zuundacaʼ libru riʼ juntu. Cumu huaxiéʼ párrafo nga chigúʼndanu la? guiranu zanda guiduʼndaʼ chaahuinu dede ante ni chiguieeteʼ ne zacá qué zadxíbinu para guicábinu ni bizíʼdinu lu libru ca. Pa guicábinu jneza ne cadi guinípenu stale la? zucaani xcaadxi gannaxhiisaacaʼ ne gúnicaʼ ni jneza, ne zacaneni para gaca ca guendaridagulisaa ca jma sicarú ne guizíʼdinu lu cani (Heb. 10:24). Ne ora guininu de cani runi crenu la? ziuʼnu nayecheʼ.
4. Xiñee caquiiñepeʼ gúninu ni na ca mandamientu stiʼ Jiobá.
4 Gueelaʼ ante gati Jesús que, guníʼ caquiiñeʼ gúninu ni na ca mandamientu stiʼ Jiobá ti cadi guixélenu de Dios ni nadxii laanu (Juan 15:10). Libru cubi Dios ni nadxii laanu ca, zacaneni guiranu quixhe íquenu gúninu ni na ca conseju ni zeeda ndaaniʼ Biblia lu guiráʼ ni gúninu ne cadi guixélenu de Dios ni nadxii laanu (Jud. 21).