¿Xi racalaʼdxiʼ Dios para laanu?
NABÉ runadiáganu lu periódicu, televisión, radiu ne Internet, careecabe lú binni, nuu guerra ne terrorismo. Zándaca yanna riʼ, cayuniná ti guendahuará lii o nuuluʼ triste purtiʼ guti ti binni ni nadxiiluʼ.
Guníʼ ique:
¿Ñee ndiʼ nga ni racalaʼdxiʼ Dios para naa ne familia stinneʼ la?
¿Paraa zanda guidxelaʼ ni gacané naa para gudxieeluáʼ ca guendanagana stinneʼ?
¿Ziuu dxi chuʼ paz ndaaniʼ Guidxilayú la?
Biblia ricabi ca pregunta riʼ ne zanda gápanu confianza respuesta rudiini.
BIBLIA RUSIIDIʼ ZUNI DIOS COSA SICARÚ PUR BINNI
Qué zapa binni yuubaʼ, qué zioʼxhoʼ ne qué zati (Apocalipsis 21:4).
«Zachesa ca binni nachiitaʼ ñee casi richesa ti bidxiña» (Isaías 35:6).
«Zuuyaʼ ca ni nacheepaʼ lú» (Isaías 35:5).
Zabani ca ni maʼ guti (Juan 5:28, 29).
Guirutiʼ zaca huará (Isaías 33:24).
Ziuu guendaró para guiráʼ (Salmo 72:16).
ZANDA GACANÉ BIBLIA LII
Zándaca guiníʼ íqueluʼ ti bacaandaʼ si nga guiráʼ ni biiyaluʼ lu ca primé yaza stiʼ libru riʼ. Peru Dios maʼ biʼniʼ prometer maʼ cadi candaa zuni ca cosa ni maʼ bizéʼtenu ca lu Guidxilayú, ne Biblia rusiene ximodo chigúnibe ca ni.
Laaca rabi Biblia laanu xi caquiiñeʼ gúninu para guibáninu nayecheʼ yanna. Guníʼ ique guiráʼ cosa ni naguu xizaa lii. Zándaca nápaluʼ guendanagana ndaaniʼ familia stiluʼ, qué gápaluʼ bueltu o huaraluʼ. Ne laaca zándaca nuuluʼ triste purtiʼ guti ti binni ni nadxiiluʼ. Zanda gacané Biblia lii gudxiiluluʼ ca guendanagana ni nápaluʼ. Ne zanda quixhedxini ladxidoʼloʼ, purtiʼ ricábini ca pregunta riʼ:
¿Xiñee runi sufrirnu?
¿Ximodo zanda gudxíʼlunu ca guendanagana stinu?
¿Xi zanda gúninu para guibaninenu familia stinu nayecheʼ?
¿Xi rizaacanu ora rátinu?
¿Ziuu dxi zadúʼyanu ca binni nadxiinu ni maʼ guti la?
¿Xiñee zanda chuʼnu seguru zuni cumplir Dios ca promesa stiʼ?
Cumu cayuundaluʼ libru riʼ la? cusihuínniluʼ racaláʼdxiluʼ gánnaluʼ ni rusiidiʼ Biblia. Ne zacané libru riʼ lii gánnaluʼ ni. Cada párrafo napa pregunta ni zacané lii guiene chaahuiluʼ Biblia. Millón de binni riuulaʼdxiʼ guiniʼné ca testigu stiʼ Jehová laacaʼ de lu Biblia. Ribézadu laaca chuuláʼdxiluʼ ni. ¡Dios cuʼ ndaayaʼ lii pur stipa ni cayúniluʼ para gánnaluʼ xi rusiidiʼ Biblia!