Bizáʼ Dios guibáʼ ne Guidxilayú

Jiobá Dios nga Creador stinu. Bizaʼbe guiráʼ cosa: cásica ni ridúʼyanu zaqueca ni qué ridúʼyanu. Ante guzaʼbe guiráʼ ni ridúʼyanu, bizaʼbe stale ángel. ¿Nánnaluʼ tuu nga ca ángel ca la? Laasicabe nga bizáʼ Jiobá casi laa. Qué zanda guidúʼyanu Jiobá ne qué zanda guidúʼyanu ca ángel. Primé ángel ni bizáʼ Jiobá que nga tobi ni gucané laabe. Gucané ángel riʼ Jiobá para guyáʼ ca estrella, ca planeta ne guiráʼ ca cosa ni nuu. Guidxilayú sicarú ra nabézanu riʼ nga tobi de ca planeta ca.

Despué, biʼniʼ preparar Jiobá Guidxilayú riʼ para ganda guibani binni ne ca maniʼ ca luni. Bizaʼbe Gubidxa para guzaaniʼ lu Guidxilayú. Laaca bizaʼbe ca dani, nisadóʼ ne ca guiiguʼ.

¿Xi guca despué yaʼ? Sicaríʼ guníʼ Jiobá: «Chiguneʼ guixi gáʼ ne guiráʼ clase yaga». Ngue runi bizulú gundani guiráʼ clase yaga cuananaxhi, verdura ne guieʼ lu Guidxilayú. Laaca bizáʼ Jiobá guiráʼ clase maniʼ: cani rizá, cani ripapa ne cani nuu ndaaniʼ nisadóʼ. Bizaʼbe manihuiiniʼ, casi coneju, ne maniʼ naroʼbaʼ, casi elefante. ¿Tu manihuiiniʼ nga jma riuuláʼdxiluʼ yaʼ?

Óraque gudxi Jiobá primé ángel que: «Gúninu binni». Maʼ gadxepeʼ zaca binni de ca maniʼ. Purtiʼ binni zanda guiníʼ, guxidxi, guni orar ne guzáʼ stale cosa. Laacaʼ zápacaʼ Guidxilayú ne ca maniʼ nuu ndaaniʼ ni. ¿Nánnaluʼ tuu nga primé hombre bizáʼ Dios la? Guidúʼyanu ni lu sti capítulo ca.