Mayo

Neca nahuiiniruʼ Jesús, gulí guzuubaʼ stiidxaʼ bixhoze ne jñaa. Qué ñuu dxi nucaalube José ne María ne qué niníʼ íquebe jma listu laabe que laacaʼ. Nanna dxíchinu gúcabe responsable purtiʼ laabe nga xiiñicabe ni jma huaniisi, ne bíʼnibe stipa guiziidibe dxiiñaʼ ni gupa José para gacanebe familia stibe gápacaʼ ni caquiiñecaʼ. Zándaca byuiʼné José ne María laabe biʼniʼ Dios ti milagru para gúlebe ne ni guníʼ ca ángel de laabe (Luc. 2:8-19, 25-38). Neca galán ni gúdxicabe laabe, bíʼnibe xcaadxi cosa, tobi de laani nga biʼniʼ estudiarbe Biblia stúbibe. ¿Ximodo nánnanu guizáʼ biʼniʼ estudiarbe Stiidxaʼ Dios yaʼ? Purtiʼ neca nahuiinirube, nabé bidxagayaa ca maestru de Jerusalén «pabiáʼ riénebe ne modo ricábibe» laacaʼ (Luc. 2:46, 47). Neca 12 iza napa Jesús, guyuu seguru Jehová nga Bixhoze (Luc. 2:42, 43, 49). w20.10 29, 30 párr. 13, 14

Guni crenu biasa Jesús de lade gueʼtuʼ zeeda gácani ti pilar ni naaze dxiichiʼ esperanza stinu. Bizeeteʼ Pablo chonna cosa ora bizulú guníʼ de tema riʼ, guniʼbe «guti Cristu pur ca pecadu stinu», «bicaachicabe laabe» ne «bibánibe ra guionna gubidxa casi cá lu Stiidxaʼ Dios» (1 Cor. 15:3, 4). ¿Xi raca significar para laanu guendaguti stiʼ Jesús, dxi bigaachiʼ ne dxi biasa de lade gueʼtuʼ yaʼ? Profeta Isaías guníʼ zuuticabe Mesías de «lu guidxilayú ra nabani binni» ne zudiicabe laa «ti baʼ cueʼ binni malu». Ne laaca guniʼbe zuáʼ Mesías pecadu stiʼ stale binni. Guca cumplir ca diidxaʼ riʼ luguiáʼ Jesús dxi bidii xquendanabani pur binni (Is. 53:8, 9, 12; Mat. 20:28; Rom. 5:8). Nga runi, guendaguti stiʼ Jesús, dxi bigaachiʼ ne dxi biasa de lade gueʼtuʼ racaneni laanu guni crenu zaxéguenu de lu náʼ pecadu ne guendaguti, ne zadúʼyanu ca familia stinu ni maʼ guti sti biaje. w20.12 2, 3 párr. 4-6; 5 párr. 11

Nabé biʼniʼ predicar apóstol Pablo ndaaniʼ ca sinagoga stiʼ ca judíu. Guzéʼtenu ti ejemplu, dxi nuube ndaaniʼ ti sinagoga ni nuu Tesalónica, guníʼnebe caadxi judíu ne «chonna sábadu gucanebe laacaʼ guiénecaʼ Stiidxaʼ Dios» (Hech. 17:1, 2). Ne nanna dxíchinu riuuláʼdxibe guni predicarbe ndaaniʼ ca sinagoga, purtiʼ judíu laabe (Hech. 26:4, 5). Biénebe ca judíu, ngue runi qué ñaca nagana para laabe guni predicarbe laacaʼ (Filip. 3:5). Dxi guladxi ca enemigu stiʼ Pablo laa de Tesalónica ne de Berea la? guyebe Atenas. Dxi maʼ nuube Atenas, laaca «guyebe ndaaniʼ sinagoga, gucanebe ca judíu ne xcaadxi binni ni runi adorar Dios guiénecaʼ Stiidxaʼ Dios» (Hech. 17:17). Peru dxi biʼniʼ predicarbe ra plaza stiʼ luguiaa, bidxaagabe sti clase binni. Ládecabe nuu filósofo ne caadxi binni ni cadi judíu ne para laacaʼ nacubi ca ni cusiidiʼ Pablo, nga runi guniʼcaʼ: «Caniʼluʼ caadxi cosa ni qué huayuu dxi gunadiágadu» (Hech. 17:18-20). w20.04 9 párr. 5, 6

Cadi naquiiñeʼ guiníʼ íquenu maʼ qué zanda guchaʼnu. Cadi guiaandaʼ laanu guiranu rucheʼnu, peru riuulaʼdxiʼ Jehová ni rúninu purtiʼ nachaʼhuiʼ ne pur nga bidii Xiiñiʼ para gatiʼ pur laanu (Efes. 1:7; 1 Juan 4:10). Ora caquiiñenu tu cuʼ gana laanu, zanda guidxíñanu ca hermanu stinu, ni zeeda gaca familia stinu. Siempre zaguixhedxícabe ladxidoʼno ne zucaadiágacabe laanu ora caquiiñenu ni (Prov. 12:25; 1 Tes. 5:14). Ti hermana de Nigeria ni láʼ Joy, ni runi stipa para cadi guiree gana guníʼ: «¿Xi nizaaca de naa pa qué ñuu ca hermanu stinneʼ? Cumu qué rusaanacabe naa la? nga rusihuinni rucaadiaga Jehová ca oración stinneʼ. Ne maʼ bisiidicabe naa uguaaʼ gana ca hermanu ni nuu triste». Cadi guiráʼ ora zudii ca hermanu cuenta caquiiñenu tu cuʼ gana laanu. Nga runi, zándaca caquiiñeʼ gábinu tuuxa hermanu o hermana gacané laanu. w20.12 23, 24 párr. 7, 8

Para ganda gaca xhamigu chupa binni la? caquiiñeʼ guidxaagacaʼ ne güicaʼ diidxaʼ de ni riníʼ íquecaʼ, ni runi sentircaʼ ne ni rizaacacaʼ. Peru ora guiníʼ íquenu gaca xhamígunu Jesús, zándaca guidúʼyanu ni nagana. ¿Xiñee yaʼ? Primé razón nga purtiʼ qué ridúʼyanu Jesús. Nga peʼ nga ni bizaaca caadxi xpinni Cristu ni bibani lu primé siglu. Nga runi, gudxi apóstol Pedro laacabe: «Neca qué ñuu dxi ñuuyatu laabe, peru nadxiitu laabe. Neca qué ruuyatu laabe yanna, peru nápatu fe laabe» (1 Ped. 1:8). Ndiʼ rusihuinni cadi caquiiñeʼ peʼ guidúʼyanu Jesús para gaca xhamígunu laa. Guiropa razón nga purtiʼ qué randa rinínenu Jesús. Ora runi orarnu, rinínenu Jehová. Dxandíʼ nga runi orarnu lu lá Jesús, peru qué rinínenu laabe. Ne qué racalaʼdxiʼ Jesús guni orarnu laa, purtiʼ ora runi orarnu cayuni adorarnu Jehová, ne Jehová si nga naquiiñeʼ gaca adorar (Mat. 4:10). Neca zacá, zanda gusihuínninu nadxiinu Jesús. w20.04 20 párr. 1-3

Ca binni ni bixooñeʼ lu carrera ndaaniʼ guidxi Grecia dxiqué laaca bidxágacaʼ ne gúpacaʼ yuubaʼ. Peru ni gucané laacabe guni huantárcabe nga entrenamientu ni gucuaacabe ne stipa stícabe. Casi ca binni riʼ, laanu laaca cacaanu ti entrenamientu para guxóʼñenu lu carrera ra ziguxooñeʼ ca xpinni Cristu. Ne Jehová rudii laanu stipa stiʼ ne qué rirá stipa stibe. Nga runi, pa chuʼnu gaxha de laabe, zuni entrenarbe laanu ne zacanebe laanu gácanu nadipaʼ. Biʼniʼ huantar apóstol Pablo stale guendanagana. Guluudí binni laabe ne guzanándacaʼ o biʼniʼ perseguircaʼ laabe, laaca guyuu biaje biʼniʼ sentirbe débil ne biʼniʼ huantarbe xiixa nabé naná ni beeda gaca casi «ti guichi lu beela» ládibe (2 Cor. 12:7). Peru qué nudiibe lugar nucueeza ca guendanagana que laabe, sínuque jma gúpabe confianza Jehová (2 Cor. 12:9, 10). Nga runi qué nusaana Jehová de ñacané laabe. w20.04 29 párr. 13, 14

Nápanu sti tesoro ni qué rihuinni: guninenu Jehová, Jesús ne ca ángel dxiiñaʼ (2 Cor. 6:1). Racanécabe laanu cada biaje guyúbinu binni gaca discípulo stiʼ Cristu. Biʼniʼ Pablo ne xcaadxi binni ni biʼniʼ predicar xhiiñaʼ Dios, nga runi guníʼ: «Rúninedu Dios dxiiñaʼ» (1 Cor. 3:9). Ora runi predicarnu, laaca cayuninenu Jesús dxiiñaʼ. ¿Xiñee yaʼ? Purtiʼ despué de gúdxibe ca discípulo stibe «lagacané binni de guiráʼ guidxi gaca discípulo stinneʼ», laaca gúdxibe laacaʼ: «Qué ziuu dxi guixeleʼ de laatu» (Mat. 28:19, 20). Yanna, ¿xi zanda guininu de ca ángel ca yaʼ? Rudiʼnu xquixe peʼ laacabe purtiʼ racanécabe laanu ora caninu de ca «noticia galán ni qué ziuu dxi guinitilú para ca binni ni nabeza lu guidxilayú» (Apoc. 14:6). ¿Xi cabeendunu pur cayacanécabe laanu yaʼ? Ora rudxíʼbanu ca bidxi ni zeeda gaca mensaje stiʼ Reinu, riaba caadxi de laacani ndaaniʼ ladxidóʼ binni ni napa gana guiziidiʼ ne rachendúcani (Mat. 13:18, 23). ¿Tu racané para gachendú ca bidxi riʼ ne gudii cani yaʼ? Jesús guníʼ tu rúnini lu textu stiʼ yannadxí. w20.05 30 párr. 14, 15

Tiempu riʼ, cayuni sufrir stale familia purtiʼ maʼ guca divorciarcaʼ, nabé ridinde ca padre ne runi sentir ca xiiñicaʼ guirutiʼ nadxii laacaʼ. Nuu familia nabézacaʼ juntu peru casi ñaca qué runibiaʼcaʼ. Ti binni ni rudii conseju ca familia guníʼ: «Qué ruiʼ ca padre ca diidxaʼ ne xiiñicaʼ, sínuque maʼ guíʼdicaʼ lu computadora, lu tablet, lu teléfono o maʼ caguítecaʼ videojuego. Neca nabézacaʼ juntu, qué runibiáʼsaacaʼ». Qué racaláʼdxinu guicá xpiaʼ binni guidxilayú laanu ne maʼ cadi gannaxhiinu. Nga runi, cadi gusaana de gannaxhiinu familia stinu ne ca hermanu de congregación (Rom. 12:10). ¿Xi riníʼ diidxaʼ «lagannaxhiisaa»? Lu diidxaʼ griegu, laani nga guendarannaxhii ni nápanu familia stinu purtiʼ ridúʼyanu laacaʼ casi xhamígunu. Ngaca nga ni naquiiñeʼ guni sentirnu pur ca hermanu de congregación, purtiʼ nácacaʼ familia espiritual stinu. Pa gannaxhiisaanu né stale cariñu, zacanésaanu para gúninu ni ná Jehová tobi si (Miq. 2:12). w21.01 20 párr. 1, 2

Ti equipu deportivu ni cadi nuu tobi si, nagana zaca para laa guni ganar ti partidu. Peru ti equipu ni nuu tobi si la? jma galán zié ni laa. Nga runi, zaca ladxidoʼno casi últimu equipu riʼ pa chuʼ ca deseu, ca emoción ne ca ni riníʼ íquenu tobi si para gúninu ni ná Jehová. Cadi guiaandaʼ laanu ñuulaʼdxiʼ Binidxabaʼ ñaca dividir ladxidoʼno. Racaláʼdxibe cadi chuʼ ca deseu, ca emoción ne ca ni riníʼ íquenu de acuerdu né ca norma stiʼ Jehová. Pa racaláʼdxinu gúninu ni ná Jehová, caquiiñeʼ gúninu ni de guidubi ladxidoʼno (Mat. 22:36-38). Qué chuʼ dxi gudiʼnu lugar guni dividir Binidxabaʼ ladxidoʼno. Guinábanu Jehová ni gunabaʼ rey David laabe: «Biʼniʼ ladxiduáʼ riʼ tobi si ti guidxibeʼ laluʼ». Gúninu stipa pur gúninu ni ná ca diidxaʼ riʼ. Guiráʼ ca decisión ni guicaanu cada dxi, dede ni jma naroʼbaʼ hasta ni jma nahuiiniʼ, naquiiñeʼ gusihuínnicani nápanu stale respetu lá Dios purtiʼ santo ni. Pa gúninu ni la? biaʼsi peʼ nga guiree lanu testigu stiʼ Jehová (Prov. 27:11). Ne guiranu zanda guininu cásica guníʼ profeta Miqueas: «Zazanu lu lá Jehová, Dios stinu para siempre» (Miq. 4:5). w20.06 13 párr. 17, 18

Ora gucaalú rey del norte ne ca xcaadxi gobiernu xquidxi Dios zuchiichicabe Dios ni jma napa poder ne óraca nga guzulú Armagedón (Apoc. 16:14, 16). Óraca nga guinitilú rey del norte «ne guirutiʼ tu zacané» laa (Dan. 11:45). Laaca ngaca guizaaca xcaadxi guidxi ni naca parte de Gog de Magog. Lu versículo riʼ riete ximodo peʼ chiguinitilú rey del norte ne ca xpinni, ne ximodo chigulá Dios xquidxi (Dan. 12:1). ¿Xi riníʼ ca diidxaʼ ni zeeda lu versículo riʼ yaʼ? Raca ná Miguel nga sti modo runibiáʼcabe, Cristu Jesús, Rey stinu. Ne dede 1914, dxi bizulú cayuni mandar Reinu stiʼ Dios guibáʼ, cayápabe xquidxi Dios. Ne maʼ cadi candaa zunduuxebe ca enemigu stiʼ Dios lu guerra de Armagedón. Guníʼ Daniel «ziuu ti tiempu zapa binni yuubaʼ» peru guerra riʼ zunduuxeʼ ni (Apoc. 6:2; 7:14; nota). w20.05 15, 16 párr. 15-17

Qué ñanda ñuni José gastiʼ dxi nuu de esclavu, ne laaca qué ñanda ñuni gastiʼ dxi nuu ndaaniʼ cárcel. ¿Xi biʼniʼ José para cadi guiree gana yaʼ? Gucuá íquebe gúnibe ca dxiiñaʼ bidiicabe laabe raqué, lugar de nicá íquebe ca cosa ni qué zanda gúnibe. Neca nagana ni gudíʼdibe que, bíʼnibe ni ná Jehová primé lu xquendanabánibe, ne pur ngue guluu Jehová ndaayaʼ laabe (Gén. 39:21-23). Ni bizaaca José rusietenalaʼdxiʼ laanu ndaaniʼ Guidxilayú malu riʼ nuu stale binni ni runi laanu cosa ni cadi jneza. Dede zándaca guniná ti hermanu stinu laanu. Peru pa ridúʼyanu Jehová casi ti guié, ti lugar ra zanda guilanu, qué zareʼnu gana ne qué zusaana de gúninu ni nabe (Sal. 62:6, 7; 1 Ped. 5:10). Joven ruʼ José dxi biluíʼ Jehová laa ca bacaandaʼ que. Ndiʼ rusihuinni napa Jehová confianza ca joven. Tiempu riʼ, nuu stale joven ni napa fe Jehová cásica José, ne nuu de laacaʼ deguyoocaʼ purtiʼ qué nacaʼ gucheenecaʼ Jehová (Sal. 110:3). w20.12 16 párr. 3; 17 párr. 5, 7

Para apóstol Pedro ne Juan ti privilegiu nga sanándacabe laacaʼ pur nácacaʼ discípulo stiʼ Jesús ne pur rusiidicaʼ xcaadxi binni de ni caziidicaʼ (Hech. 4:18-21; 5:27-29, 41, 42). Ca xpinni Cristu de primé siglu que la? qué gápacaʼ razón para guituí lucaʼ. Neca qué ñuni respetar binni laacabe la? jma peʼ ca gucanécabe binni, ti cosa ni qué ñuni ca enemigu stícabe. Ti ejemplu nápanu nga ca libru ni bicaacabe pur espíritu santu, ni cayacané ne ni cudii esperanza millón de binni. Ne Reinu ni biʼniʼ predicárcabe que, maʼ cayuni mandar ni tiempu riʼ ne maʼ cadi candaa zuni mandar ni lu guidubi Guidxilayú (Mat. 24:14). Peru gobiernu ni guzananda laacabe que, maʼ xadxí bisaana de guni mandar. Ne ca discípulo ni bizuubaʼ diidxaʼ que, maʼ nácacaʼ rey guibáʼ. Peru ca enemigu stícabe maʼ gúticaʼ; ne, pa gueeda guiásacaʼ de lade gueʼtuʼ la? zuni mandar Reinu ni biʼniʼ predicar ca xpinni Cristu que laacaʼ (Apoc. 5:10). w20.07 15 párr. 4

Gupa Abrahán stale fe ca promesa stiʼ Dios, ngue runi casi ñaca biiyaʼ Ungidu o Mesías ni zaca Rey lu Reinu stiʼ Dios. Nga runi gudxi Jesús ca judíu ca diidxaʼ riʼ: «Nabé biecheʼ Abrahán, bixhózetu, purtiʼ cabeza guʼyaʼ dxi stinneʼ, biiyabe ni ne biéchebe» (Juan 8:56). Rihuinni dxíchica gunna Abrahán ziuu caadxi de ca ni za de laa lu Reinu ni gudixhe Jehová ne guyuu dispuestu cueza dede ora guni cumplir Dios promesa stiʼ. ¿Ximodo bisihuinni Abrahán cabeza «guidxi» —o Reinu— ni gudixhe Dios yaʼ? Primé, qué ninándabe nin ti reinu ni nuu ndaaniʼ Guidxilayú riʼ. Qué niguixhe íquebe nindézabe ndaaniʼ ti guidxi ne ñuni apoyarbe ti rey. Ne laaca qué niníʼ íquebe ñápabe ti reinu stibe. Lugar de ñúnibe nga la? qué nusaana de nuzuubabe stiidxaʼ Jehová ne gulézabe guni cumplir promesa stiʼ. Zacá bisihuínnibe nabé naguidxi fe nápabe Dios. w20.08 3 párr. 4, 5

Jehová guníʼ ora guzulú guni mandar Jesús guirutiʼ tu cueza racá zaníʼ: «Huaraʼyaʼ» (Is. 33:24). Nga runi ora guzáʼ Jehová binni ni maʼ guti sti biaje, zudiibe laacaʼ ti cuerpu nazaaca. Peru cadi casi guiásacaʼ zácacaʼ perfectu. ¿Xiñee yaʼ? Purtiʼ pa ñaca zacá ni la? zándaca qué zunibiáʼ familia sticaʼ laacaʼ. Ruluíʼ chaahuiʼ chaahuiʼ zaca binni perfectu lu ti mil iza guni mandar Cristu. Guiluxe si ti mil iza, zudxiguetaʼ Jesús Reinu Bixhozeʼ. Para tiempu ca, maʼ biʼniʼ Reinu ca guiráʼ ni ná Jehová ne maʼ gucané ni binni gaca perfectu (1 Cor. 15:24-28; Apoc. 20:1-3). Guxuíʼlunu ximodo zaca ora guidxaagalunu ca familia stinu ora guiásacaʼ de lade gueʼtuʼ. ¿Ñee zuxídxinu la? ¿Ñee zadúʼnanu tantu cayéchenu la? ¿Ñee zadúʼndanu para Jehová purtiʼ cayéchenu la? Ni nánnanu nga zannaxhiinu Bixhózenu Jehová ne Jesús purtiʼ zusibánicabe ca ni maʼ guti. w20.08 16, 17 párr. 9, 10

Guluu apóstol Pablo gana ca xpinni Cristu guiníʼ íquecaʼ pa zanda guni servircaʼ Jehová sin guichaganacaʼ (1 Cor. 7:8, 9). Qué ñuu dxi ñuni Pablo menu ca solteru. Ne gulibe Timoteo, ti joven ni caʼruʼ guichaganáʼ para guni tender caadxi responsabilidad risaca (Filip. 2:19-22). Nga runi, cadi jneza guiníʼ íquenu jma nanna ti hermanu o qué ganna gastiʼ purtiʼ solteru laa o purtiʼ maʼ bichaganáʼ (1 Cor. 7:32-35, 38). Qué nusiidiʼ Jesús ne Pablo caquiiñeʼ peʼ guichaganáʼ binni o guiaana solteru. Yanna, ¿xi zanda guininu de ca binni ni maʼ bichaganáʼ ne ca ni nuu solteru yaʼ? Sicaríʼ bizeeteʼ revista La Atalaya 1 de octubre de 2012: «Pa bichaganáʼ tuuxa o pa solteru laa, ti regalu stiʼ Dios ni. [...] Para Jehová la? cadi naquiiñeʼ chuʼ ca solteru triste o guituí lucaʼ purtiʼ caʼruʼ guichaganacaʼ». Nga runi, caquiiñeʼ guni respetarnu ca hermana ne ca hermanu solteru purtiʼ risácacaʼ ndaaniʼ congregación. w20.08 28 párr. 8, 9

Ndaaniʼ caadxi guidxi rucaadiaga binni ca noticia galán stiʼ Reinu. Laapeʼ ni nga ni caquiiñecaʼ. Peru ndaaniʼ xcaadxi guidxi qué riuulaʼdxiʼ binni guiníʼ de Dios o de Biblia. Modo tiica si naca binni neza ra runi predicarnu, racalaʼdxiʼ Jehová guni predicarnu dede ora guiluxe dxiiñaʼ riʼ. Ora guedandá dxi ni maʼ gudixhe Jehová, maʼ qué zaca predicar ne «oraqueruʼ nga gueeda fin» (Mat. 24:14). Maca guníʼ Jesús xi zazaaca lu ca últimu dxi ne ximodo zaca binni. Laaca guniʼbe zanda gucaa ca cosa riʼ ca discípulo stibe maʼ cadi guni predicarcaʼ. Nga runi, gúdxibe laacaʼ: «Lagataná» (Mat. 24:42). Tiempu bibani Noé guyuu stale cosa ni bicaa binni cadi gulabi ni ná Dios, ne tiempu riʼ laaca zanda guizaacanu ni bizaaca ca binni que (Mat. 24:37-39; 2 Ped. 2:5). Nga runi caquiiñeʼ guicá íquenu dxiiñaʼ ni maʼ bidii Jehová laanu. w20.09 8 párr. 1, 2, 4

Cumu «guizáʼ cadxiichi» Binidxabaʼ, cadi naquiiñeʼ guiníʼ íquenu qué zucaalube laanu (Apoc. 12:12). Maʼ cadi candaa, zadiʼdiʼ fe stiʼ ca xpinni Cristu prueba. Mayaca tídinu lu «gran tribulación». Ne Biblia ná «dede dxi bizulú guidxilayú hasta nagasi, qué huayuu dxi chuʼ yuubaʼ casi laani» (Mat. 24:21, nota). Tiempu ca, zándaca gucaalú ca familia stinu laanu ne gucueeza gobiernu dxiiñaʼ stinu (Mat. 10:35, 36). Guiníʼ íquenu ndiʼ: «¿Ñee zinandaʼ ejemplu stiʼ rey Asá ne zapaʼ confianza zacané ne zapa Jehová naa la?» (2 Crón. 14:11). Racalaʼdxiʼ Jehová chuʼnu listu para ni chiguizaaca, ne pur nga cayacanebe laanu para gaca fe stinu jma naguidxi. Caquiiñebe «mozo ni nuu xpiaaniʼ ne ni runi jneza» para gudii laanu guendaró espiritual ora peʼ caquiiñenu ni ti guzuhuaʼnu dxiichiʼ (Mat. 24:45). Nga runi, ni caquiiñeʼ gúninu yanna nga guquídxinu fe stinu dede biaʼ gándatiʼ (Heb. 10:38, 39). w20.09 18 párr. 16-18

Para guni Jehová ni racalaʼdxiʼ, zanda iquiiñeʼ espíritu santu stiʼ para gucaa ti binni ni napa ti puestu risaca guni ni nabe. Cásica zanda guni binni ti canal para cueechú nisa stiʼ ti guiiguʼ ti cheni ladu gacaláʼdxicaʼ. Zacaca zanda iquiiñeʼ Jehová espíritu santu stiʼ para guchaa modo riníʼ ique ca gobernante ca ne gúnicaʼ ni racaláʼdxibe. Nga runi ricaa ca gobernante riʼ decisión ni gacané xquidxi Dios (bichaaga ni né Esdras 7:21, 25, 26). ¿Xi zanda gúninu yaʼ? Zanda guni orarnu «pur ca rey ne pur guiráʼ ca ni napa ti puestu risaca» ora chiguicaacaʼ decisión ni zanda gacané o guniná xquidxi Dios (1 Tim. 2:1, 2, nota; Neh. 1:11). Cásica biʼniʼ ca xpinni Cristu ni bibani lu primé siglu, laanu laaca runi orarnu de guidubi ladxidoʼno pur ca hermanu stinu ni deguyoo (Hech. 12:5; Heb. 13:3). w20.11 15 párr. 13, 14

Pa guyuunisa ti binni ni bidiʼnu estudiu guizáʼ riéchenu (1 Tes. 2:19, 20). Ca discípulo ni deruʼ guyuunisa zeeda gácacaʼ «casi ti carta» ni riníʼ bien de maestru stiʼ ne de congregación (2 Cor. 3:1-3). Riéchenu purtiʼ raca tapa iza de cayaca informar 10,000,000 estudiu cada beeu lu guidubi Guidxilayú. Ne biaʼ tiempu riʼ, riuunisa jma de 280,000 binni cada iza. Nuuruʼ xcaadxi millón de binni ni cacaa estudiu ni zanda gacanenu. ¿Ximodo zanda gacanenu laacabe chuʼnísacabe yaʼ? Napa Jehová paciencia binni ne cudiirube lugar gácacaʼ discípulo stiʼ Cristu. Maʼ huaxiéʼ tiempu nuu, nga runi racaláʼdxinu gúninu biaʼ gándatiʼ para gacanenu laacabe guni progresárcabe jma nagueenda ne chuʼnísacabe (1 Cor. 7:29a; 1 Ped. 4:7). w20.10 6 párr. 1, 2

Qué nuzuubaʼ rey Saúl stiidxaʼ Jehová. Ne ora guluu jneza profeta Samuel laabe pur ni bíʼnibe, qué niniʼbe bicheebe, lugar de nga dede guníʼ íquebe cadi tan malu ni bíʼnibe ra qué nuzuubabe stiidxaʼ Jehová ne bigaanibe donda ique stobi (1 Sam. 15:13-24). Ne cadi ngue nga primé biaje guni Saúl zaqué (1 Sam. 13:10-14). Triste guininu ni, peru dede guníʼ íquebe jma risácabe que xcaadxi. Cumu qué nuchaabe modo riníʼ íquebe la? guluu jneza ne bicaanáʼ Jehová laabe. Para cadi guizaacanu ni bizaaca rey Saúl, caquiiñeʼ guiníʼ íquenu ca pregunta riʼ: «¿Ñee ruyubeʼ pretextu para cadi guneʼ ni ná ca conseju ni zeeda lu Biblia la? ¿Ñee riníʼ iqueʼ qué zazaacaʼ gastiʼ pa qué guzuubaʼ diidxaʼ la? ¿Ñee rugaaneʼ donda ique stobi pur ni runeʼ la?». Pa rúninu neca tobi de ca ni bizéʼtenu riʼ, caquiiñeʼ guchaʼnu modo riníʼ íquenu ne modo laanu. Pa qué gúninu ni, zácanu orgulloso ne maʼ qué zaná Jehová gaca xhamígunu laa. w20.11 20 párr. 4, 5

Joven, gulí tu gúniluʼ ni ná. Naquiiñeʼ gánnaluʼ tuu nga Jehová, xi racaláʼdxibe gúniluʼ ne ximodo zanda gúniluʼ ni (Rom. 12:2). Zacatiʼ nga zanda guicaaluʼ decisión ni jma risaca lu xquendanabániluʼ ne laani nga gúniluʼ ni ná Jehová (Jos. 24:15). Pa gúʼndaluʼ ne guni estudiarluʼ Biblia guiráʼ dxi, jma zannaxhiiluʼ Jehová ne zaca fe stiluʼ jma naguidxi. Gudixhe ique gúniluʼ ni ná Jehová lu xquendanabániluʼ. Guidxilayú stiʼ Binidxabaʼ ná zabániluʼ nayecheʼ pa iquiiñeluʼ ca habilidad stiluʼ para gúniluʼ ni racaláʼdxiluʼ. Peru ni dxandíʼ la? ca binni ni riguixhe ique gapa stale cosa material nabé racanacaʼ (1 Tim. 6:9, 10). Peru pa gucaadiágaluʼ Jehová ne quixhe íqueluʼ gúniluʼ ni ná primé lu xquendanabániluʼ, zabániluʼ galán ne guiráʼ ni gúniluʼ, zúniluʼ ni «né guendabiaaniʼ» (Jos. 1:8). w20.10 30, 31 párr. 17, 18

Lu primé siglu, mensaje ni biʼniʼ predicar Jesús gucané ni guiráʼ binni gapa ti esperanza. Biʼniʼ mandarbe ca discípulo stibe gúnicaʼ dxiiñaʼ ni bizulube ne guiníʼnecaʼ binni de laani dede ca lugar ni nuu «jma zitu lu guidxilayú» (Hech. 1:8). Peru qué zanda gúnicaʼ dxiiñaʼ riʼ né stipa si sticaʼ. Nga runi gudxi Jesús laacabe zacané espíritu santu laacabe (Juan 14:26; Zac. 4:6). Gucuaa ca discípulo stiʼ Jesús espíritu santu lu Pentecostés stiʼ iza 33. Cumu gucané espíritu santu laacabe la? bizulú biʼniʼ predicárcabe, ne qué nindaa, stale mil binni bizulú biziidiʼ ca noticia galán stiʼ Dios (Hech. 2:41; 4:4). Ne dxi guzananda binni laacabe, qué nidxíbicabe, sínuque gunábacabe Dios gacané laabe ne sicaríʼ biʼniʼ orárcabe: «Gucané ca esclavu stiluʼ guni predicarcaʼ stiidxaluʼ né valor». Biluxe si biʼniʼ orárcabe «bidxácabe de espíritu santu ne caníʼcabe stiidxaʼ Dios né valor» (Hech. 4:18-20, 29, 31). w20.10 21 párr. 4, 5

¿Ximodo nánnanu gundisaʼ Jehová Jesús de lade gueʼtuʼ? Stale binni biiyaʼ Jesús dxi biasa de lade gueʼtuʼ (1 Cor. 15:5-7). Apóstol Pablo guníʼ primé binni biʼyaʼ laabe nga Cefas, o apóstol Pedro. Caadxi discípulo laaca guniʼcaʼ biiyaʼ Pedro Jesús despué de biasa de lade gueʼtuʼ (Luc. 24:33, 34). Laaca biiyaʼ «ca Doce» o ca apóstol laabe. Despué «bihuínnibe nezalú jma de 500 hermanu ti lugar si», zándaca gúcani Galilea ne riete ni lu Mateo 28:16-20. Laaca «bihuínnibe nezalú Santiago», mediu hermanu stibe, para tiempu que, caʼruʼ guni cré pa Jesús nga Mesías (Juan 7:5). Peru despué de biiyaʼ Santiago maʼ biasa Jesús de lade gueʼtuʼ, biʼniʼ cré. Para dxi bicaa Pablo carta riʼ —biaʼ lu iza 55—, nabániruʼ stale de ca binni ni biʼyaʼ Jesús despué de biasa de lade gueʼtuʼ. Ngue runi, ca binni ni cadi cayuni cré pa dxandíʼ biasa Jesús de lade gueʼtuʼ zanda guinabadiidxacaʼ ca hermanu riʼ. w20.12 3 párr. 5, 7, 8

Nagana nga guiníʼ ique binni cosa ni galán ora huará, jmaruʼ si pa maʼ xadxí huará. Peru guyúbinu gacané Jehová laanu. Zándaca qué zuni Jehová ti milagru para gusianda laanu, peru riguixhedxibe ladxidoʼno ne rudiibe stipa laanu para guni huantarnu (Sal. 94:19). ¿Ximodo rúnibe ni yaʼ? Zándaca iquiiñebe caadxi hermanu para gúnicaʼ xiixa dxiiñaʼ ra lídxinu. Laaca zanda iquiiñebe ca hermanu stinu para guni orarnecaʼ laanu. Ne zanda gucaabe laanu guietenaláʼdxinu parte de textu ni zeeda lu Biblia para gatadxí ladxidoʼno, tobi de laacani nga guietenaláʼdxinu zabáninu ndaaniʼ ti guidxilayú cubi ra guirutiʼ zaca huará ne zácanu perfectu (Rom. 15:4). Peru neca zacá, stale hermanu rúnicaʼ stipa para guni predicarcaʼ. Laurel, ti hermana de Estados Unidos, guyuu ndaaniʼ ti aparatu de guiibaʼ 37 iza para ganda guicaa bi. Laaca gúpabe cáncer ne biʼniʼ operárcabe laabe stale biaje, ne xadxí gúpabe xcaadxi guendahuará ládibe. Neca nagana ra gudíʼdibe, qué nusaana de ñuni predicarbe. Biʼniʼ predicarbe ca enfermeru ne ca binni ni rigacané laabe ra lídxibe. Gucanebe biaʼ 17 binni guiziidiʼ de Jehová. w20.12 24 párr. 9; 25 párr. 12

Biquiiñeʼ apóstol Pablo gacanécabe laa. Biaʼ lu iza 56, guxubiyú caadxi binni Pablo ne yenecaʼ laabe fuera de guidxi Jerusalén para guuticaʼ laabe. Sti dxi que yenécabe laabe fuera de Sanedrín ne bilá ñuuti ca enemigu stibe laabe (Hech. 21:30-32; 22:30; 23:6-10). Óraque, zándaca gunabadiidxaʼ Pablo: «¿Pabiáʼ ruʼ tiempu guneʼ huantar ni cadideʼ riʼ yaʼ?». ¿Tu gucané Pablo? Gueelaʼ gunaazecabe Pablo guyé Señor, Jesús, ra nuube ne gudxi laabe: «¡Gupa valor! Purtiʼ cásica maʼ bidiiluʼ testimonio completu de naa Jerusalén, zaqueca zudiiluʼ testimonio Roma» (Hech. 23:11). Ca diidxaʼ que nga ni caquiiñebe. Biʼniʼ felicitar Jesús Pablo pur testimonio ni bidii Jerusalén ne biʼniʼ prometer laabe ziebe Roma para gudiibe testimonio. Despué de gudxi Jesús laabe ca diidxaʼ que zándaca biʼniʼ sentirbe cásica runi sentir ti xcuidihuiiniʼ ni nuu ndaaniʼ náʼ bixhoze. w20.11 12 párr. 1; 13 párr. 3, 4

Esperanza ni nápanu Reinu stiʼ Dios naaze dxiichiʼ ni «xpídanu, cásica rinaaze dxiichiʼ ti ancla barcu», racané esperanza riʼ laanu neca nápanu problema ne nuunu xizaa. Cadi guiaandaʼ lii maʼ biʼniʼ prometer Jehová maʼ qué zaníʼ íquenu cosa ni riguu laanu xizaa lu ca dxi ni zeeda ca (Is. 65:17). Bixuiʼlú ndaaniʼ guidxilayú cubi maʼ qué ziuu cosa malu ne maʼ zapa binni paz (Miq. 4:4). Stiʼ cosa ni zacané laanu cadi gusiaandanu esperanza stinu nga guinínenu xcaadxi binni de laani. Nga runi biʼniʼ predicar biaʼ gándatiʼ ne gucané binni gaca discípulo. Pa gúniluʼ ni, zanda gápaluʼ confianza zaca ni cabézaluʼ «dede dxi gueeda fin» (Heb. 6:11). Ra jma mayaca guinitilú guidxilayú malu riʼ, jma zápanu problema ne ziuʼnu xizaa, ne laaca zándaca guidxíbinu o gápanu ansiedad. Peru cadi guiaandaʼ laanu naquiiñeʼ gápanu confianza Jehová para gudxíʼlunu ca problema stinu, cadi gaca lúgunu ne cadi gápanu confianza laca laanu. Gusihuínninu pur ca ni gúninu nápanu fe promesa stiʼ Jehová ni ná: «Zápatu stipa pa cadi gaca lúgutu ne gápatu confianza» (Is. 30:15). w21.01 7 párr. 17, 18

Lu Santiago 5:11 riete nadxii Jehová laanu, peru laaca riete sti cualidad ni nabé riuuláʼdxinu de laabe: misericordia stibe (Éx. 34:6). Rusihuinni Jehová cualidad riʼ ora runi perdonar ca pecadu stinu (Sal. 51:1). Peru ora caníʼ Biblia de misericordia, cadi caníʼ si ni guni perdonarnu. Misericordia ca riale ni ndaaniʼ ladxidóʼ binni ne rucaani laa gacané tuuxa ni cayacaná. Biblia ná deseu ni napa Jehová de gacané laanu jma nadipaʼ ni que ni runi sentir ti gunaa pur xiiñiʼ (Is. 49:15). Misericordia stiʼ Jehová nga rucaa laa gacané laanu ora cayacananu (Sal. 37:39; 1 Cor. 10:13). Laaca zanda guni cultivarnu cualidad riʼ ora guni perdonarnu ca hermanu stinu ne cadi guidxiichinenu laacaʼ ora gúnicaʼ xiixa ni qué riuuláʼdxinu (Efes. 4:32). Pa gacanenu laacabe ora cadíʼdicabe ra nagana, zusihuínninu rianu laacabe ne zacá zinándanu ejemplu stiʼ Jehová purtiʼ laa rannaxhii né stale cariñu (Efes. 5:1). w21.01 21 párr. 5

Naquiiñeʼ gapa ca xaíque de familia cuidadu. Cadi naquiiñeʼ guni xhaatabe dxiiñaʼ dede gusaana de gacanebe familia stibe chuʼcaʼ gaxha de Jehová, guni sentircaʼ seguru ne gusiidibe laacaʼ. Rusiidiʼ ne riguu jneza Jehová laanu purtiʼ racalaʼdxiʼ guibáninu galán (Heb. 12:7-9). Cásica Jehová, Jesús laaca bisiidiʼ ne guluu jneza ca binni ni yenanda autoridad stiʼ (Juan 15:14, 15). Guluu jnézabe binni, peru laaca biʼniʼ tratarbe laacaʼ né stale cariñu (Mat. 20:24-28). Nánnabe imperfectu laanu ne stale biaje rucheʼnu (Mat. 26:41). Xaíqueʼ stiʼ ti familia ni rinanda ejemplu stiʼ Jehová ne Jesús siempre rietenalaʼdxiʼ cadi perfectu xheelaʼ ne ca xiiñiʼ, ne cadi naduxhunebe laacaʼ (Col. 3:19). Lugar de nga la? rúnibe ni ná Gálatas 6:1 ne riguu jnézabe laacaʼ «né diidxaʼ nadóʼ», ne qué riaandaʼ laabe laaca imperfectu laabe. Ne cásica Jesús, nánnabe naquiiñeʼ gácabe ti ejemplu para familia stibe. w21.02 6, 7 párr. 16-18

Ra bidii Jehová Xiiñiʼ gatiʼ pur laanu, casi ñaca guzíʼ xquendanabani ca ni nuu ndaaniʼ congregación ne ca binni ni gapa fe Jesús (Mar. 10:45; Hech. 20:28; 1 Cor. 15:21, 22). Cumu guti Cristu pur laanu la? jneza nga biʼniʼ Jehová laabe xaíque stiʼ congregación. Nga runi, Jesús si napa autoridad para quixhe xi guni cada binni, xi guni ca familia ne congregación, ne ruuyabe guni cumplir cani (Gál. 6:2). Peru qué riguixhe si Jesús xi naquiiñeʼ gúninu, rápabe ne rannaxhiibe cada tobi de laanu (Efes. 5:29). Rusihuinni ca hermana runi respetarcaʼ autoridad stiʼ Cristu ora ruzuubacaʼ stiidxaʼ ca hombre ni maʼ gulibe para gapa congregación. Ne ca hermanu rusisácacaʼ autoridad maʼ gudixhe Jehová ora runi respetarcaʼ ne rusisácacaʼ ca hermana. Ora runi respetar hombre, gunaa, xaíque stiʼ familia ne ca ancianu autoridad ni maʼ gudixhe Jehová, riuu congregación tobi si. Ne ni jma risaca la? rusisácanu Jehová, Bixhózenu ni nuu guibáʼ. w21.02 18, 19 párr. 14-17

Dxi canagucachilú David ne ca soldadu stiʼ de Saúl, bisaanacabe familia stícabe ne guyécabe lu ti guerra. Cumu qué guínnicabe la? guyé ca enemigu ne zinecaʼ familia stícabe. Ñándaca niníʼ ique David cumu naca ti soldadu ni nanna tinde la? ñanda nucaalube laacaʼ, peru qué ñúnidibe ni, sínuque biyúbibe gacané Jehová laabe, ngue runi gunabadiidxabe pa zaa chinándabe ca enemigu stibe, gudxi Jehová laabe chebe ne laaca gudxi laabe zuni ganarbe (1 Sam. 30:7-10). ¿Xi zanda guiziidiluʼ de ni bizaaca David yaʼ? Ante guicaaluʼ ti decisión, gunabaʼ gudiicabe lii conseju, guniʼné xcaadxi joven, bixhózeluʼ ne jñaaluʼ o ti ancianu ni napa experiencia. Zanda gudiicabe lii conseju galán. Maʼ gulí Jehová ca ancianu ne napa confianza laacabe, nga runi, lii laaca zanda gápaluʼ confianza laacabe. Naca ca ancianu ti regalu ndaaniʼ congregación (Efes. 4:8). Pa gaca fe stiluʼ casi fe stícabe ne gucaadiágaluʼ ca conseju gudiicabe lii la? zacaaluʼ decisión jneza. w21.03 4, 5 párr. 10, 11

Jesús guníʼ pa qué gúninu ni cazíʼdinu, zeeda gácanu casi ti hombre ni bicuí lidxi lu yuxi. Bíʼnibe stale dxiiñaʼ peru qué nisaca diʼ guirani. ¿Xiñee yaʼ? Purtiʼ ora biaba nisaguié ne bilaahua, biaba yoo que (Mat. 7:24-27). Ngaca nga laanu, pa qué gúninu ni cazíʼdinu la? pur gana si guiráʼ ni bíninu. Purtiʼ cadi naguidxi ziuu fe stinu ora gueeda xiixa prueba o sananda binni laanu. Peru pa guni estudiarnu ne gúninu ni cazíʼdinu, zacaanu decisión jneza, jma galán zabáninu ne naguidxi zaca fe stinu (Is. 48:17, 18). Para cadi guixélenu de Jehová, naquiiñeʼ guni orarnu de guidubi ladxidoʼno ne cadi gusaana de guni estudiarnu. Cadi guiaandaʼ laanu, tobi de ca cosa jma risaca para laanu nga gusisácanu Jehová. Zanda chuʼnu seguru qué ziuu dxi gusaanabe laanu ne gastiʼ qué zanda guxheleʼ laanu de guendarannaxhii stibe (Heb. 13:5, 6). w21.03 15 párr. 6; 18 párr. 20