Ni guníʼ ca ni biʼniʼ predicar de Reinu stiʼ Dios
Maʼ nabaneʼ jma nayecheʼ
JESÚS guníʼ runibiáʼ ca dendxuʼ stiʼ (Juan 10:14). Ti binni nayá ladxidóʼ ni riuuladxiʼ gaca jneza ne chuʼ paz, zuyubi gaca xpinni Jesús ne zabani nayecheʼ, ne nga peʼ nga ni bizaaca ti gunaa de Bélgica. Guidúʼyanu ni bizaacabe:
«Ti dxi guizáʼ nuaaʼ deprimida ne caníʼ iqueʼ guteʼ laca naa, málasi bixhidxináʼ ca testigu stiʼ Jehová ra puertaʼ lidxeʼ, guyuuladxeʼ ora bisiidicabe naa zanda gaca chaahuiʼ ca guendanagana ni nápanu. Peru ni qué ñuuladxeʼ nga ora guníʼcabe Dios si zanda guni chaahuiʼ ca ni. Raca xhono iza bisaana de chaaʼ yuʼduʼ, purtiʼ biiyaʼ qué runi ca binni que ni ná Dios, peru bidieeʼ cuenta dxandíʼ ngue ni bisiidiʼ ca Testigu naa ne bieneʼ nagana nga guibani binni sin Dios».
«Yeganna ca Testigu que naa chupa chonna biaje, peru despué biniteʼ contactu né laacabe. Ne pur ngue maʼ qué nidxelaʼ xi ñuneʼ. Guiráʼ dxi guduubaʼ chupa caja gueza ne gucaʼ drogar. Laaca guyuuladxeʼ espiritismu purtiʼ gucalaʼdxeʼ ninieniáʼ bixhozebiidaʼ ni maʼ guti. ¡Peru guizáʼ feu ca ni guleenduáʼ! Stale beeu bichibi ca demonio naa huaxhinni ora maʼ nuaaʼ stubeʼ ne pur ngue bidxibeʼ chuaaʼ stubeʼ ora maʼ zixhinni».
«Ti dxi málasi gudideʼ ti lugar ra cabí ti yoo naroʼbaʼ, guizáʼ bidxagayaaʼ ora biiyaʼ stale binni cayuni dxiiñaʼ raqué. Ora bidxiñaʼ biiyaʼ ca testigu stiʼ Jehová ngue cucuicaʼ ti Yoo stiʼ Reinu. Ora que bietenaladxeʼ ca biaje yegánnacabe naa ra lidxeʼ ne guníʼ iqueʼ guizáʼ galán pa guiráʼ binni nibani casi laacabe».
«Cumu racalaʼdxeʼ guibiguetaʼ chigánnacabe naa sti biaje la? ngue runi gunieniaʼ caadxi de ca ni cayuni dxiiñaʼ ra Yoo stiʼ Reinu que. Bineʼ orar Dios ne chii gubidxa despué málasi bixhidxináʼ hermanu ni guniʼné naa primé biaje que ra puertaʼ lidxeʼ. Gúdxibe naa pa zuni estudiardu sti biaje, gudxe laabe zanda. Ne ora biʼniʼ invitarbe naa ca reunión ni raca ra Yoo stiʼ Reinu la? guyaaʼ. ¡Guizáʼ guyuuladxeʼ ni biiyaʼ raqué! Purtiʼ maʼ xadxí riuuladxeʼ guyaaʼ chuʼ binni nayecheʼ ne gannaxhiisaa ne yanna huaxa maʼ bidxelaʼ binni ni nabani zacá».
«De dxi que, maʼ qué riaadxaʼ reunión ne chonna semana despué bisaanaʼ de cubaʼ gueza, bisaabe ca libru de astrología ni gupaʼ ne ca discu de música ni cuzeeteʼ de Binidxabaʼ, ne zaqué bisaana de guchiiñaʼ ca demonio que naa. Gudixhe iqueʼ guneʼ ni rusiidiʼ Biblia lu xquendanabaneʼ ne chonna beeu despué bizuluáʼ bineʼ predicar ne ra gudiʼdiʼ xhoopaʼ beeu guyuaanisaʼ ne gucaʼ precursora auxiliar».
«Rudieeʼ xquixe peʼ Jehová pur guiráʼ ni maʼ biʼniʼ pur naa. Yanna huaxa maʼ nabaneʼ nayecheʼ. Dxandíʼ nga zeeda gaca lá Jehová ti torre nadipaʼ ne ra nuube bixooñeʼ para guilaʼyaʼ (Proverbios 18:10). Runeʼ stinneʼ ca diidxaʼ bicaa salmista riʼ: «Jma galán chuaaʼ ti dxi lu ca patiu stiluʼ que chuaaʼ ti mil dxi sti lugar. Maʼ gulieeʼ guzuhuaaʼ ra puertaʼ lidxi Dios stinneʼ que cuezaʼ ndaaniʼ carpa ra raca cosa malu» (Salmo 84:10).
Nayá ladxidóʼ gunaa riʼ ne bidxélabe modo guibánibe nayecheʼ. Ne guiráʼ binni nachaʼhuiʼ ni guyubi Jehová, laaca zanda guibani nayecheʼ.