«Guiratu nabé ziuutu nayecheʼ»
«Zúnitu saa riʼ para gusisácatu Dios, Señor stitu [...], ne guiratu nabé ziuutu nayecheʼ.» (DEUTERONOMIO 16:15, Versión Popular.)
1. 1) Xi chupa cosa bicaa Binidxabaʼ guiníʼ ique binni. 2) Xi guníʼ Jiobá zaca bichee si Adán ne Eva.
DXI bicaa Binidxabaʼ Adán ne Eva gucheenecaʼ Dios la? bicaabe binni guiníʼ ique chupa cosa ni nabé risaca gánnanu. Primé la? pa dxandíʼ ni riníʼ Jiobá ne pa jneza modo runi mandar. Guiropa la? casi ora niniʼbe zuni binni ni na Dios peru cadi purtiʼ dxandíʼ nadxiicaʼ laabe, sínuque purtiʼ racaláʼdxicaʼ gudii Dios laacaʼ xiixa. Ni guninu últimu riʼ guniʼpeʼ Binidxabaʼ ni dxi bibani Job (Génesis 3:1-6; Job 1:9, 10; 2:4, 5). Laga nuuruʼ Adán ne Eva ndaaniʼ jardín ni guyuu Edén que nagueendaca guníʼ Jiobá tu chiguiquiiñeʼ para gusihuinni pa dxandíʼ nga ni bicaa Binidxabaʼ guiníʼ ique binni. Jiobá guníʼ ziuu tobi ni zá de ti gunaa, ne zuniná Binidxabaʼ xatiniñeebe, peru gaca si nga la? zutuñeebe ique Binidxabaʼ (Génesis 3:15).
2. Ximodo bisiene Jiobá chigaca ni na ca diidxaʼ ni guniʼbe lu Génesis 3:15.
2 Ra zidiʼdiʼ dxi jma zigusiene Jiobá ximodo chigaca ni guniʼbe que, ti gusihuínnibe dxandíʼ zaca cani. Jiobá gúdxibe Abrahán zale ni zá de gunaa que lade ca xiiñiʼ (Génesis 22:15-18). Jacob, xhiaga Abrahán gupa doce xiiñiʼ, ne beeda gácacaʼ doce tribu stiʼ guidxi Israel. Dxi beeda gaca ca tribu ca guidxi roʼ lu iza 1513 ante gueeda Jesús la? bidii Jiobá laacabe ley ni naquiiñeʼ chinándacabe, lu ca ley que zeeda caadxi saa ni riquiiñeʼ gúnicabe guiráʼ iza. Ne laacani nga na apóstol Pablu zeeda gácacani «casi bandá sti ni qué nihuinni chiqué» (Hebreos 10:1; Colosenses 2:16, 17). Caadxi de ca cosa ni guca lu ca saa que biluíʼcani ximodo chigaca ni gudixhe ique Dios guni ni zá de gunaa que, ne guizáʼ nayecheʼ guyuu guidxi que ora bíʼnicaʼ ca saa que. Guidúʼyanu xi pur guca ca saa que, ti gacańecani laanu jma gápanu fe zuni Jiobá guiráʼ ni maʼ bizabiruaa.
Bihuinni tuu ngue zá de gunaa que
3. Tuu nga ni zá de gunaa guníʼ Jiobá que, ne ximodo gucaná xatini ñeebe.
3 Gudiʼdiʼ si jma de tapa mil iza de guníʼ Jiobá nuu tobi ni zá de gunaa que la? bihuinni Jesús ngue nácani (Gálatas 3:16). Cumu qué ñalené Jesús donda la? qué liica nucheebe dede dxi gútibe, zaqué bisihuínnibe cadi dxandíʼ diʼ cani guníʼ Binidxabaʼ que. Guizáʼ risaca guendaguti stiʼ Jesús que, purtiʼ pur laani zaxá donda stiʼ cani zá de Adán ne Eva ti ganda guibánicaʼ sin qué chuʼ dxi gáticaʼ. Ora guti Jesús ne bicaacabe laabe lu yaga que nga casi ñaca gucaná xatiniñeebe (Hebreos 9:11-14).
4. Xi biʼniʼ ca israelita que dxiqué ni bisihuinni modo gati Jesús.
4 Jesús guti 14 stiʼ nisán lu iza 33 que.a Lu ca dxi capeʼ nga riuu ca israelita que nayecheʼ purtiʼ rúnicaʼ Pascua, ti saa ni raca guiráʼ iza. Dxi ca ruuti guiráʼ ca familia que ti dendxuʼ ni jma sicarú nápacaʼ para gocaʼ, ngue rusietenalaʼdxiʼ laacabe rini stiʼ dendxuʼ ni bilá ca baʼduʼ lugola stícabe dxi biiti ángel que ca baʼduʼ lugola stiʼ ca egipciu que lu 14 stiʼ nisán iza 1513 ante gueeda Jesús (Éxodo 12:1-14). Jesús ngue beeda gaca casi dendxuʼ ni biiticabe lu Pascua que. Ngue runi guníʼ apóstol Pablu «guti Cristu [...] casi biiti ca xpinni Dios dendxu huiini» dxiqué (1 Corintios 5:7). Cásica bilá rini stiʼ dendxuʼ que ca baʼduʼ lugola que la? zacaca zulá rini stiʼ Jesús binni (Juan 3:16, 36).
Cani biasa primé lade ca gueʼtuʼ
5, 6. 1) Padxí biasa Jesús lade gueʼtuʼ, ne xi saa biʼniʼ ca israelita que ni bisihuinni ziásabe. 2) Ximodo zaca ni na Génesis 3:15 pur biasa Jesús lade gueʼtuʼ.
5 Lu chonna gubidxa de guti Jesús biasa lade gueʼtuʼ para guluíʼ Bixhoze pabiáʼ risaca rini ni bixhii pur laanu (Hebreos 9:24). Ca israelita que laaca bíʼnicaʼ sti saa ni bisihuinni ziasa Jesús lade gueʼtuʼ, rábicabe ni Saa ra riquiiñecabe Pan ni qué gapa Levadura. Saa que gúcani 15 stiʼ nisán ne lu 16 que riné ca israelita ti manojo cebada de cani rudii layú sticaʼ primé para guniibicani nezalú Jiobá (Levítico 23:6-14). Jnézapeʼ nga ni biʼniʼ Jiobá ora gundisaʼ Jesús lu 16 stiʼ nisán iza 33 que, purtiʼ zaqué nga bicuezabe ni gucalaʼdxiʼ Binidxabaʼ ñuni para ñuti testigu «ni qué rusiguii [ne riníʼ ni] jneza» que. Lu 16 stiʼ nisán stiʼ iza 33 que la? gundisaʼ Jiobá Jesús casi ti espíritu ni qué liica zanda gati (Apocalipsis 3:14; 1 Pedro 3:18).
6 Primé ca Jesús «biasa [...] lade irá xixé cani ma guti» (1 Corintios 15:20). Ca gueʼtuʼ ni biasa ante guiasa Jesús que la? gúticaʼ sti biaje peru laabe maʼ qué ñátidibe biásasibe lade gueʼtuʼ, sínuque bibiguétabe guibáʼ ne guribe ladu derechu stiʼ Jiobá, ne gulézabe dede ora biʼniʼ Jiobá laabe Rey lu Reinu stiʼ guibáʼ (Salmo 110:1; Hechos 2:32, 33; Hebreos 10:12, 13). Dede dxi guribe lu trono stibe que nga maʼ gucuaabe derechu para gutuñeebe ique Binidxabaʼ, o guutibe laa, ne ca xpinni (Apocalipsis 11:15, 18; 20:1-3, 10).
Xcaadxi binni ni zá de Abrahán
7. Xi guiráʼ bíʼnicabe lu Saa stiʼ ca Semana que.
7 Jesús nga ni zá de gunaa guníʼ Jiobá ndaaniʼ Edén que, ne laabe nga ni chiguiquiiñeʼ Dios para «uchiá xhiiña binidxabaʼ» (1 Juan 3:8). Peru pur ni gudxi Jiobá Abrahán que biluiʼbe nuu xcaadxi binni ni zá de gunaa que, purtiʼ gúdxibe laa zadale ca xiiñiʼ «casi ca beleguí ni nuu guibáʼ ne casi ca yuxi ni nuu guriá nisadóʼ» (Génesis 22:17). Saa stiʼ ca Semana ni bíʼnicabe bisihuinni ziuu xcaadxi binni ni zá de gunaa que. Tiidiʼ si cincuenta dxi de guca saa stiʼ Pascua lu 16 stiʼ nisán que la? runi ca israelita que Saa stiʼ ca Semana que modo na Ley riʼ: «Dede sti dxi tiidiʼ si gadxe sábadu que naquiiñeʼ ugábatu, cincuenta dxi, ne nápatu xidé gudiitu ca primé biidxiʼ stitu Jiobá casi ofrenda. Ne chinetu chupa pan de ni rúnitu ra lídxitu para guniibitu nezalú Jiobá, ne laguiquiiñeʼ biaʼ tapa litru arondaʼ de harina para gúnitu cani. Naquiiñeʼ chinécani levadura, laacani nga zeeda gácacani casi ca primé biidxiʼ ni gudii layú stitu» (Levítico 23:16, 17, 20).b
8. Xi guca lu Pentecostés stiʼ iza 33 que.
8 Saa stiʼ ca Semana ca laaca gúdxicabe ni Pentecostés ca dxi guyuu Jesús lu Guidxilayú riʼ (lu diidxaʼ griegu la? Pentecostés ca nga «ra rizaa cincuenta»). Lu Pentecostés stiʼ iza 33 que la? Jesucristu, Xaíque stiʼ cani ruzaaquiʼ guʼxhuʼ que bidii espíritu santu 120 discípulo stiʼ, cani bidagulisaacaʼ Jerusalén. Dios gulí grupuhuiiniʼ riʼ ne beeda gácacaʼ xiiñibe ne biʼchiʼ ne bizaʼnaʼ Jesucristu (Romanos 8:15-17). Laacabe beeda gácacabe ti guidxi roʼ ni nacubi ne biree lácabe Israel stiʼ Dios (Gálatas 6:16). Ni guca ti grupuhuiiniʼ primé que la? beeda gaca 144,000 binni ni gulí Jiobá (Apocalipsis 7:1-4).
9, 10. Xi bidiicabe lu Saa Pentecostés que ni beeda gaca ca xpinni Cristu ni bibí pur espíritu santu.
9 Guiropaʼ pan ni biniibicabe nezalú Jiobá lu Pentecostés que beeda gácacani ca xpinni Cristu ni bibí ne espíritu santu para cheʼ guibáʼ. Ra bíʼnicabe ca pan que ne levadura la? bisihuínnini záparuʼ ca xpinni Cristu riʼ pecadu gulenecaʼ; peru neca naparúcabe ni la? zanda guidxíñacabe Jiobá purtiʼ guti Jesús pur laacabe (Romanos 5:1, 2). Yanna, xiñee chupa pan yaʼ. Zándaca purtiʼ cani bibí ca bireecaʼ lade chupa grupu: ca judíu ne cani cadi judíu (Gálatas 3:26-29; Efesios 2:13-18).
10 Dxi biʼniʼ ca israelita que guiropaʼ pan que la? biquiiñecaʼ harina stiʼ ca primé trigu ni bidii lu layú sticaʼ. Yanna, ca xpinni Cristu ni bibí ne espíritu santu la? zeeda gácacaʼ casi ca primé trigu que purtiʼ primé ca laacaʼ gulí Dios (Santiago 1:18). Ne laacabe nga ca primé binni bitiidilaʼdxiʼ Dios stóndacaʼ pur rini stiʼ Jesús, ne pur nga zabánicabe guibáʼ ne ti cuerpu ni qué ziuu dxi gati ne zuni mandarnécabe Jesús lu Reinu stiʼ (1 Corintios 15:53; Filipenses 3:20, 21; Apocalipsis 20:6). Chúʼsicabe guibáʼ la? qué zandaa «zuni mandar cabe [guiráʼ guidxi] ne ti bara de guiibaʼ» ne zuuyacabe Binidxabaʼ xañeecabe ora maʼ bituñee Jesús laa (Apocalipsis 2:26, 27; Romanos 16:20). Apóstol Juan na laacabe nga cani «canananda ca Dendxu huiini que ladu tiica cheʼ. Bilá cabe lade irá binni, casi ñaca nirudóʼ laacabe guʼde cabe Dios ne Dendxu huiini que» (Apocalipsis 14:4).
Ti dxi ni biquiiñeʼ para guixá donda
11, 12. 1) Xi guiráʼ biʼniʼ ca israelita que dxi rixá stóndacaʼ. 2) Xi ndaayaʼ gucuaa guidxi Israel pur biiticabe yuze ne ca dendxuʼ que.
11 Lu chii gubidxa stiʼ etanim (ni beeda gaca tisri que)c la? guca ti saa ndaaniʼ guidxi Israel ni bisihuinni ximodo chiguixá donda stiʼ binni pur guendaguti stiʼ Jesús. Guidubi naca guidxi que bidagulisaacaʼ dxiqué para gúnicaʼ Saa stiʼ Dxi para Guixá Donda, dxi ca nga ruuticabe maniʼ para guixá donda stícabe (Levítico 16:29, 30).
12 Dxi rixá stóndacabe que la? xaíque stiʼ cani ruzaaquiʼ guʼxhuʼ que ruutibe ti yuze ni nahuiinigaruʼ ne riuube ti lugar ra jma nandxóʼ, o ti lugar ra jma risaca para guruubabe caadxi rini stiʼ maniʼ que gadxe biaje nezalú Arca nuu raqué. Ora rúnibe ni nezalú Arca que la? casi ñaca ñúnibe ni nezalú Jiobá. Ofrenda riʼ rúnibe ni para guixá stóndabe, stiʼ binni «lídxibe», nga nga cani ruzaaquiʼ guʼxhuʼ que ne stiʼ ca levita. De racá la? ricaabe chupa dendxuʼ ne ruutibe tobi de laacaʼ para iquiiñeʼ casi ofrenda ti guixá donda stiʼ guidxi que ne laaca ruruubabe caadxi rini stime nezalú Arca que. Ne últimu la? riguíxhebe guiropachú nabe ique sti dendxuʼ que ne riniʼbe guiráʼ ca donda stiʼ ca xiiñiʼ Israel ante guseendabe laame lu desiertu. Ora ruseendabe laame que la? casi ñaca nineme ca donda stiʼ guidxi que (Levítico 16:3-16, 21, 22).
13. Ximodo beeda gaca guiráʼ ni biʼniʼ xaíque stiʼ cani ruzaaquiʼ guʼxhuʼ que dxi rixá donda sticaʼ ne ni biʼniʼ Jesús.
13 Guiráʼ ni biʼniʼ xaíque stiʼ cani ruzaaquiʼ guʼxhuʼ que la? beeda gácani ni biʼniʼ Jesús, xaíque stiʼ cani ruzaaquiʼ guʼxhuʼ purtiʼ riquiiñebe rini stibe para guixá donda stiʼ binni. Primé la? biquiiñebe rini stibe para guixá donda stiʼ 144,000 xpínnibe ni bibí ne espíritu santu ni zeeda gácacaʼ casi ti yuʼduʼ stiʼ Dios. Nga runi ruuyaʼ Jiobá laacabe casi binni ni runi ni jneza ne ni nuu nayá nezalube (1 Pedro 2:5; 1 Corintios 6:11). Zacá zudii Dios lugar chúʼcabe guibáʼ. Cani guninu ca nga ni zeeda gaca yuze ni biiticabe ndaaniʼ guidxi Israel que. Guiropa la? Jesús laaca riquiiñeʼ rini stiʼ para guixá donda stiʼ millón de binni ni gapa fe laabe, nga nga ni zeeda gaca dendxuʼ ni biiticabe que. Ca binni riʼ zabánicaʼ ndaaniʼ Guidxilayú riʼ sin qué chuʼ dxi gáticaʼ, nga nga ni biniti Adán ne Eva (Salmo 37:10, 11). Pur rini ni bixhii Jesús ca la? rixá donda stiʼ binni casi ñaca ninebe cani, ne nga zeeda gaca dendxuʼ ni yené ca donda stiʼ guidxi Israel lu desiertu que (Isaías 53:4, 5).
Chuʼnu nayecheʼ nezalú Jiobá
14, 15. Xi biʼniʼ ca israelita que lu saa ra bicuicaʼ ca ranchuhuiiniʼ que, ne xi bisietenalaʼdxiʼ ngue laacabe.
14 Tiidiʼ si ti dxi de guixá stonda ca israelita que la? rúnicaʼ sti saa ra rucuí cada familia ti ranchuhuiiniʼ, ndiʼ nga saa ni jma nayecheʼ bíʼnicabe dxiqué ni zeeda lu calendariu judíu (Levítico 23:34-43). Saa riʼ gúcani dede 15 hasta 21 stiʼ etanim ne rilúxeni 22 stiʼ beeu que ora raca ti guendaridagulisaa naroʼbaʼ. Saa ca bíʼnicabe ora maʼ biluxe bidopa ca cosecha stícabe ne ca dxi ca nga rudiicabe xquíxepeʼ Dios pur guiráʼ ca cosa galán bidii laacabe. Nga runi gudxi Jiobá ca binni ni runi saa que: «Dios, Señor stitu zaguu ndaayaʼ guiráʼ cosecha stitu ne guiráʼ dxiiñaʼ stitu, ne guiratu nabé ziuutu nayecheʼ» (Deuteronomio 16:15, Versión Popular). ¡Guizáʼ nayecheʼ guyuucabe ora bíʼnicabe saa ca!
15 Gadxe gubidxa biaana ca israelita que ndaaniʼ ca ranchuhuiiniʼ que ora guca saa riʼ, ngue bisietenalaʼdxiʼ laacabe tiempu gulézacabe ndaaniʼ cani dxi guzácabe lu desiertu que. Saa riʼ gucaneni laacabe guiníʼ íquecabe ximodo gupa Jiobá laacabe casi runi bixhoze binni ne xiiñiʼ (Deuteronomio 8:15, 16). Cumu binni pobre ne binni ricu nga biaana ndaaniʼ ca ranchuhuiiniʼ que la? ngue bisietenalaʼdxiʼ laacabe nácacabe tobi si nezalú Jiobá ora maʼ cayaca saa que (Nehemías 8:14-16).
16. Xii nga zeeda gaca saa ni biʼniʼ ca israelita ora bicuicaʼ ca ranchuhuiiniʼ que.
16 Saa ni guca ora rucuícabe ranchuhuiiniʼ que rúnicabe ni ora maʼ biluxe bitópacabe cosecha stícabe ne nayecheʼ riuucabe dxi ca. Guendanayecheʼ ni gupa ca israelita que pur bitópacaʼ cosecha sticaʼ zeeda gácani guendanayecheʼ ni napa ca binni napa fe Jesucristu purtiʼ maʼ cadópacaʼ. Bizulú cadopa ca binni riʼ lu Pentecostés stiʼ iza 33, dxi bibí 120 discípulo ne espíritu para gueeda gácacaʼ binni ni ruzaaquiʼ guʼxhuʼ stiʼ Dios. Cásica biaana ca israelita que ndaaniʼ ca ranchuhuiiniʼ que caadxi dxi si la? zaqueca nga nuu ca xpinni Cristu ni bibí ne espíritu santu ndaaniʼ guidxilayú qué iquiiñeʼ riʼ purtiʼ nuucabe «casi ni canazá xquidxi binni». Laacabe cabézacabe chécabe guibáʼ (1 Pedro 2:5, 11). Zaluxe guidopa guiráʼ ca xpinni Cristu ni bibí ne espíritu santu lu ca últimu dxi riʼ, ora guidagulisaa xcaadxi de ca 144,000 binni ni nabani ndaaniʼ Guidxilayú riʼ ne cani maʼ nuu guibáʼ (2 Timoteo 3:1).
17, 18. 1) Xi cusihuinni ziuuruʼ xcaadxi binni ni zacaa ndaayaʼ pur guendaguti stiʼ Cristu ne cadi ca xpínnisibe ni cheʼ guibáʼ. 2) Tuu nga xcaadxi binni ni cadopa yanna riʼ, ne padxí guilúxeni.
17 Laaca galán gánnanu ruuticabe 70 yuze ora maʼ cayaca saa que (Números 29:12-34).d Númeru 70 ca nga zeeda gaca 70 familia ni zá de Noé, ne de laacabe nga zá guiráʼ binni nabani yanna riʼ (Génesis 10:1-29). Cumu guiráʼ binni nga zá de Noé la? guendaguti stiʼ Jesús ca zaquiiñeʼ ni para guixá donda stiʼ guiráʼ ni guzuubaʼ diidxaʼ. Nga runi dede ca dxi stinu riʼ cadóparuʼ binni de guiráʼ guidxi ni gapa fe ne racalaʼdxiʼ guibani sin qué chuʼ dxi gati ndaaniʼ ti paraísu lu Guidxilayú riʼ.
18 Apóstol Juan biiyaʼ lu ti visión ximodo zadagulisaa ca binni ca yanna riʼ. Primeru la? binadiágabe ora guníʼ tuuxa naquiiñeʼ gaca sellar xcaadxi de ca 144,000 xpinni Cristu ni cayaadxaʼ. De raqué la? biiyabe «zuhuaa jma binni nezalú [Jiobá] ne nezalú [Jesús], dede iruti ñanda nugaba laacaʼ» ne naazecaʼ ziña. Laacabe nga cani «udiʼdi ra jma nagana» ne ziuucabe lu guidxilayú cubi ca. Ca binni riʼ laaca nabézasicaʼ ndaaniʼ guidxilayú qué iquiiñeʼ riʼ, ne cabézacabe dxi maʼ gaca ni na ca diidxaʼ riʼ: «Zapa Dendxu huiini [...] que laacabe casi riaapa dendxuʼ. Ziné laacabe ra candani nisa rudii enda nabani». Ora maʼ gaca nga la? zuchaa Dios nisa riete lu guiráʼ binni (Apocalipsis 7:1-10, 14-17). Ni zeeda gaca saa ni biʼniʼ ca israelita que ora bicuicaʼ ca ranchuhuiiniʼ que dxiqué la? zaluxe ni ora maʼ bizaa ti mil iza de cayuni mandar Cristu, dxi maʼ guicaa guiráʼ ca binni ni qué gática lu ca dxi jma nagana ca guendanabani ni qué zaluxe ne zaqueca ca binni ni guibani sti biaje ni guzuubaʼ diidxaʼ (Apocalipsis 20:5).
19. Xiñee galán guiénenu xi pur biʼniʼ ca israelita que saa dxiqué.
19 Laaca zanda chuʼnu nayecheʼ ora guiníʼ íquenu guiráʼ ni rusiidiʼ ca saa ni biʼniʼ ca israelita que laanu. Guizáʼ galán nga guiénenu guiráʼ ni biʼniʼ Jiobá para bisihuinni ximodo gaca ni na ca diidxaʼ ni guniʼbe ndaaniʼ jardín ni guyuu Edén que, ne riéchenu stale ora guidúʼyanu ximodo cayaca ni guniʼbe ca chaahuiʼ chaahuiʼ. Nánnanu tuu nga ni zá de gunaa que ne nánnanu bininá Binidxabaʼ xatiniñeebe, ne yanna maʼ nácabe ti Rey guibáʼ. Laaca nánnanu stale de ca 144,000 binni ca maʼ biluiʼcaʼ qué nucheecaʼ dede ora gúticaʼ. Xiruʼ cayaadxaʼ yanna yaʼ. Padxí guiluxe gaca ni guníʼ Jiobá ndaaniʼ jardín ni guyuu Edén que yaʼ. Ngapeʼ nga ni chigusiene sti tema ca.
[Cani cá ñee yaza]
a Beeu nisán ca riábani lu beeu marzo ne abril.
b Ofrenda ni riniibi ca la? ti ni ruzaaquiʼ guʼxhuʼ nga rúnini ni. Ndaaniʼ batanabe nga raʼtaʼ guiropaʼ pan ca, rindízanabe ne runiibibe cani cheríʼ chericaʼ. Ora rúnibe ndiʼ la? casi ñaca cudiibe caadxi ofrenda Jiobá (Biiyaʼ Perspicacia para comprender las Escrituras, vol. 2, yaza 525, stiʼ ca testigu stiʼ Jiobá).
c Etanim (tisri) yanna riʼ riábani lu beeu septiembre ne octubre.
d Setenta ca rudiini ora gaca multiplicar 7 pur 10. Lu Biblia númeru 7 ca riniʼni «guizáʼ» ora ruzeeteni de ca cosa ni nuu guibáʼ ne númeru 10 ca laaca riniʼni «guizáʼ» peru ora ruzeeteni de ca cosa ni nuu ndaaniʼ Guidxilayú.
Ñee zanda gusieʼnuʼ ca ndiʼ la?
• Tuu nga beeda gaca dendxuʼ ni biiticabe lu Pascua que.
• Xi bisihuinni saa stiʼ Pentecostés que chigaca.
• Xi guiráʼ biʼniʼ ca israelita que dxi rixá stóndacaʼ ni bisihuinni ximodo zaquiiñeʼ guendaguti stiʼ Jesús.
• Ximodo bisihuinni saa ra gurí ca ranchuhuiiniʼ que modo guidagulisaa ca xpinni Cristu.
[Ca dibuju/foto ni zeeda lu yaza 23]
Cásica bilá rini stiʼ dendxuʼ ni biiticabe lu Pascua que binni la? rini stiʼ Jesús laaca rulá stale binni
[Ca dibuju/foto ni zeeda lu yaza 24]
Primé cosecha stiʼ cebada ni bidiicabe Dios 16 stiʼ nisán que la? bisihuínnini ziasa Jesús lade gueʼtuʼ
[Ca dibuju/foto ni zeeda lu yaza 25]
Guiropaʼ pan ni bidiicabe lu saa stiʼ Pentecostés que la? zeeda gácani guiráʼ ca xpinni Cristu ni bibí ne espíritu santu
[Ca dibuju/foto ni zeeda lu yaza 26]
Saa ra bicuícabe ca ranchuhuiiniʼ que la? bisihuínnini guendanayecheʼ ni ziuu ora guidagulisaa ca xpinni Cristu ni bibí ne cani guibani ndaaniʼ Guidxilayú riʼ
[Cuadru ni zeeda lu yaza 24]
Ni guca Ni beeda gácani
Pascua 14 stiʼ nisán Biiticabe dendxuʼ Guti Jesús
para Pascua
Saa ra
riquiiñecabe 15 stiʼ nisán Sábadu
Pan ni qué Biasa Jesús
gapa Levadura 16 stiʼ nisán Ofrenda de cebada
50 gubidxa
Saa stiʼ ca 6 stiʼ siván Chupa pan Ca binni ni bibí ne
Semana para ofrenda espíritu santu beeda
(Pentecostés) gácacaʼ xiiñiʼ Dios ne
biʼchiʼ ne bizaʼnaʼ Jesús
Dxi bixá donda 10 stiʼ tisri Ti yuze ne chupa Jesús riquiiñeʼ rini
dendxuʼ de ofrenda stiʼ para guxhá donda
stiʼ guiráʼ binni
Saa ra ribí 15 dede 21 stiʼ tisri Guyuulaʼdxiʼ ca Cadopa ca xpinni Cristu
ranchuhuiiniʼ israelita que ni cheʼ guibáʼ ne cani
uézacaʼ ndaaniʼ chiguibani ndaaniʼ
ranchuhuiiniʼ ne Guidxilayú
biéchecaʼ pur cosecha
sticaʼ; guti 70 yuze