Gudiʼnu lugar gabi Stiidxaʼ Dios laanu modo naquiiñeʼ sanu
«Stiidxaluʼ zeeda gaca ti biaaniʼ para ñeeʼ, ne ti biaaniʼ para neza rizayaʼ.» (SALMO 119:105.)
1, 2. Xiñee qué liica ganda guidxela stale binni modo guibani nayecheʼ ne gapa guendariuudxi.
ÑEE rietenaláʼdxiluʼ dxi gunabadiidxaluʼ tuuxa ximodo chindaluʼ paxaraa la? Zándaca nuuluʼ gaxha de raqué, peru qué ganna chaahuiluʼ pa raqué ni. O zándaca maʼ binítiluʼ ne caquiiñepeʼ cheluʼ sti ladu para guyúbiluʼ ni. Cadi dxandíʼ jma jneza nga gúniluʼ ni gabi tuuxa ni runibiáʼ lugar ca lii la? Jneza pue, purtiʼ laabe runibiaʼbe lugar ca ne zanda gacanebe lii para chindaluʼ ra canayúbiluʼ ca.
2 Maʼ raca stálepeʼ iza de canayubi binni ximodo guibani jma galán ne cadi cudiicaʼ lugar gabi Dios laacaʼ ximodo gúnicaʼ ni. Peru, pa qué naʼ ca binni ni gulené donda riʼ guluíʼ Dios laacaʼ paneza checaʼ la? qué zanda diʼ guidxélacaʼ ximodo guibánicaʼ nayecheʼ ne gápacaʼ guendariuudxi. Xiñee yaʼ. Maʼ raca jma de chupa mil gaayuʼ gayuaa iza guníʼ Jeremías ni riguixhená que sicaríʼ: «Cadi lu naʼ diʼ binni nuu guni mandar ra guzuhuaa ñee» (Jeremías 10:23). Guiráʼ binni ni gacalaʼdxiʼ quixhe ximodo guibani ne qué gudii lugar gabi tuuxa ni zanda gacané laa xi naquiiñeʼ guni la? qué zanda diʼ cueendú ni galán. Nga rusihuinni caquiiñeʼ binni chuʼ tu gabi laa xi naquiiñeʼ guni.
3. Xiñee Jiobá si jma nanna ne jma nuu xpiaaniʼ para guiníʼ xi naquiiñeʼ guni binni, ne xi maʼ guniʼbe zúnibe para laanu.
3 Lu guidubi naca guibáʼ ne Guidxilayú la? Jiobá nga Dios ni jma nanna ne ni jma zanda gusiene laanu ximodo naquiiñeʼ guibáninu. Xiñee yaʼ. Purtiʼ laasibe nga jma runibiáʼ chaahuibe laanu que tutiica binni. Laabe nánnabe ximodo bireechú binni lu neza stibe ne laaca nánnabe xi naquiiñeʼ gúnicaʼ para guibiguétacaʼ ra naquiiñeʼ saacaʼ. Ne Jiobá nga Dios ni bizáʼ laanu, nga runi laasibe nga jma nánnabe xipeʼ ndiʼ naquiiñeʼ gúninu para cueendunu ni galán (Isaías 48:17). Cumu zacá ni la? zanda guni crenu de guidubi ladxidoʼno ni guniʼbe lu Salmo 32:8 riʼ: «Zusieneʼ lii, ne zusiideʼ lii saluʼ lu neza ni naquiiñeʼ cheluʼ. Dxandipeʼ zudiéʼ conseju lii ne qué zaxhaluáʼ luguialuʼ». Biáʼsipeʼ nga ni na ca diidxaʼ ca: Jiobá si nga ni jma zanda gusiidiʼ laanu para guibáninu galán. Yanna, ximodo rusiidiʼ Jiobá laanu yaʼ.
4, 5. Ximodo racané guiráʼ ni riníʼ Dios laanu.
4 Tobi de ca hombre ni bicaa ca salmo ca guníʼ ca diidxaʼ riʼ ora guníʼnebe Jiobá, nabe: «Stiidxaluʼ zeeda gaca ti biaaniʼ para ñeeʼ, ne ti biaaniʼ para neza rizayaʼ» (Salmo 119:105). Guiráʼ ni maʼ guníʼ Dios ne guiráʼ ni rusietenaláʼdxibe laanu zeedacani lu Biblia, ne racanécani laanu para ganda guni chaahuinu intiica si guendanagana ni guidxaagalunu. Ora guidúʼndanu Biblia ne gudiʼnu lugar gábini laanu xi naquiiñeʼ gúninu la? ridúʼyanu biáʼsipeʼ ni na ca diidxaʼ cá lu Isaías 30:21 riʼ: «Dxandipeʼ zunadiágaluʼ caníʼcabe ca diidxaʼ riʼ neza décheluʼ: “Ndiʼ nga neza ca. Lasá luni”».
5 Peru naquiiñeʼ gánnanu chupa cosa nga na Salmo 119:105 ni zeeda gaca Stiidxaʼ Dios. Primé la? laani zeeda gácani ti biaaniʼ para ñeenu. Pa gudiʼnu lugar gacané ca conseju stiʼ Biblia laanu ora guidxaagalunu ca guendanagana ni rápanu guiráʼ dxi la? zánnanu xi naquiiñeʼ gúninu, qué ziábanu lu ca trampa ni nuu lu guidxilayú malu riʼ ne zaxélenu de cani zúniná laanu. Guiropa la? cani rusietenalaʼdxiʼ Jiobá laanu rusiaanicani neza canazanu, purtiʼ racanécani laanu gánnanu cuinu gúninu cani gusihuinni dxandíʼ racaláʼdxinu guibáninu ndaaniʼ Paraísu ni maʼ guníʼ Dios guni. Pa nayaʼni dxindxi neza canazanu la? zánnanu pa zabeendunu ni jneza o ni cadi jneza lu cani chigúninu (Romanos 14:21; 1 Timoteo 6:9; Apocalipsis 22:12). Guidúʼyarunu ximodo zeeda gaca guiráʼ ni maʼ guníʼ Jiobá, ni cá lu Biblia, ti biaaniʼ para ñeenu ne ti biaaniʼ para neza stinu.
«Ti biaaniʼ para ñeeʼ»
6. Pora nga zeeda gaca guiráʼ ni maʼ guníʼ Dios casi ti biaaniʼ para ñeenu.
6 Guiráʼ dxi nápanu xidé quíxhenu xi chigúninu. Caadxi de laacani nuu tiru qué risácapeʼ, peru nuu biaje ridxaagalunu caadxi cosa ni rucaa laanu gusihuínninu qué riuuláʼdxinu guendarapa jnadxii, qué rusiguiinu ne qué riuʼnu pur tuuxa o pur xiixa. Para ganda cueendunu ni galán ora gudxíʼlunu cani la? naquiiñeʼ gánnanu «uná nga jneza ne uná nga ni cadi jneza» (Hebreos 5:14). Ra guiziidiʼ chaahuinu jma de Stiidxaʼ Dios ne guiénenu ca conseju stini la? zazíʼdinu quixhe íquenu gúninu ni jneza casi modo riuulaʼdxiʼ Jiobá (Proverbios 3:21).
7. Bizeeteʼ ti ejemplu stiʼ ti xpinni Cristu ni ruluíʼ rapa gana chizané caadxi binni runiné dxiiñaʼ ni qué runibiaʼcaʼ Stiidxaʼ Dios.
7 Chitíxhenu ti ejemplu. Ñee lii nga tobi de ca binni ni dxandíʼ riuulaʼdxiʼ gusiecheʼ ladxidóʼ Jiobá la? (Proverbios 27:11.) Nabé galán nga. Peru guníʼ ique málasi ñuu caadxi binni ni runineluʼ dxiiñaʼ nudiicaʼ lii ti boletu para chiguuyatu ra chichite caadxi binni. Cani runineluʼ dxiiñaʼ ca riuuláʼdxicaʼ guidxaagacaʼ lii ne rápacaʼ gana chuʼtu nayecheʼ ti ratu ora maʼ cadi cayúnitu dxiiñaʼ. Zándaca guiníʼ íqueluʼ nacháʼhuicabe, o para lii ruluíʼ jneza modo nabánicabe. Xi gúniluʼ yaʼ. Ñee jneza nga chineluʼ laacabe la? Ximodo zanda gacané Stiidxa Dios lii para quixhe íqueluʼ gúniluʼ ni jneza yaʼ.
8. Xi conseju stiʼ Biblia zanda gacané laanu para guidúʼyanu tu naquiiñeʼ guidxaaganu.
8 Guidúʼyanu xi rusiidiʼ caadxi conseju stiʼ Biblia. Zándaca primeca guietenaláʼdxinu ni cá lu 1 Corintios 15:33 ra na: «Pa idxaagu ni nadxaba la? zacá ni lii». Ñee cayabi textu ca laanu cadi liica guidxaaganu guiráʼ binni ni qué runibiáʼ Dios la? Coʼ. Cadi nga diʼ na Biblia. Apóstol Pablu peʼ bisihuinni nadxii guiráʼ clase binni, dede ne cani qué runi cré Dios (1 Corintios 9:22). Cumu nácanu xpinni Cristu la? rucaa nga laanu gusihuínninu dxandíʼ rizaaláʼdxinu gacanenu binni, ne lade ca binni riʼ nuu cani qué runi cré cani runi crenu (Romanos 10:13-15). Biblia cudii conseju riʼ laanu: «Ora tiica ganda acané nu binni la? guni nu ni». Yanna, ximodo raʼbuʼ gúninu ni na conseju ca pa guixélenu de ca binni ni dxandíʼ caquiiñeʼ chuʼ tu gacané laacaʼ yaʼ (Gálatas 6:10).
9. Xi conseju cudii Biblia laanu para gánnanu xi naquiiñeʼ gúninu ne ca binni runinenu dxiiñaʼ.
9 Peru gadxé nga gácanu nachaʼhuiʼ ne tuuxa ni runinenu dxiiñaʼ ne gadxé nga gaca xhamígunu laabe. Raríʼ nga ra riquiiñenu sti conseju stiʼ Biblia para gacané laanu. Apóstol Pablu gudixhená caadxi xpinni Cristu sicaríʼ: «Cadi gaca né tu cani qué runi cre tobi si» (2 Corintios 6:14). Xi riníʼ ca diidxaʼ «cadi gaca né tu cani qué runi cre tobi si» yaʼ. Caadxi Biblia rucaacani sicaríʼ: «Cadi guidxaagatu laacabe», «cadi gacaláʼdxitu sánetu laacabe» o «cadi guidxaagatu laacabe para gúnitu xiixa ni cadi jneza». Yanna, pora nga maʼ cadi jneza guidxaaganu cani runinenu dxiiñaʼ yaʼ. Pora cadi gácanu tobi si ne laacabe yaʼ. Xi zanda gacané laanu para gánnanu xipeʼ naquiiñeʼ gúninu yaʼ. Biblia, Stiidxaʼ Dios, zanda gacané lii para gánnaluʼ xi naquiiñeʼ gúniluʼ lu xiixa casi ni bizéʼtenu ca.
10. 1) Tuu nga cani guca xhamigu Jesús. 2) Gunáʼ ca guendarinabadiidxaʼ ni zanda gacané laanu gánnanu tu zanda guidxaaganu.
10 Guiníʼ íquenu de ejemplu stiʼ Jesús, laabe nabé gunnaxhiibe binni dede dxi bizáʼ Dios laacaʼ (Proverbios 8:31). Dxi bibánibe ndaaniʼ Guidxilayú riʼ la? nabé guca xhamígube ca discípulo stibe (Juan 13:1). Dede gunnaxhiibe ti hombre ni qué runi adorar Dios jneza purtiʼ qué ganna (Marcos 10:17-22). Peru Jesús gudixhe xi naquiiñeʼ guni tuuxa para gaca xhamígube laa, purtiʼ qué ñaca xhamígudibe nin ti binni ni qué gapa gana guni ni na Bixhózebe. Ti biaje guniʼbe sicaríʼ: «Laatu nga xhamigua pa guni tu ni rabeʼ» (Juan 15:14). Zándaca nabé galán modo runineluʼ ca xcompañéruluʼ dxiiñaʼ, peru guníʼ ique ndiʼ: «Ñee riuulaʼdxiʼ binni riʼ guni ni na Jesús la? Ñee racaláʼdxibe gunibiaʼbe Jiobá, Dios ni biʼniʼ mandar Jesús guni adorarnu la? Ñee nabánibe casi na Dios riquiiñeʼ guibani ti xpinni Cristu casi naa la?» (Mateo 4:10). Zahuinni xi racaláʼdxicabe ora gatigá gábiluʼ laacabe jneza nga guibani binni casi rusiidiʼ Biblia ne gúʼyaluʼ pa dxandíʼ riuuláʼdxicabe gúnicabe ni.
11. Bizeeteʼ caadxi ejemplu ra rihuinni ximodo zanda iquiiñenu guiráʼ ni riníʼ Jiobá para gánnanu xi gúninu.
11 Cani riníʼ Jiobá ca laaca zeeda gaca casi ti biaaniʼ para ñeenu ora rápanu gana gúninu xcaadxi cosa. Guzéʼtenu ti ejemplu. Guníʼ ique de ti xpinni Cristu ni qué gapa dxiiñaʼ ne málasi nudiicabe laabe ti dxiiñaʼ ni dxandíʼ caquiiñebe. Peru pa guicaabe dxiiñaʼ ca la? zunítibe stale tiempu ne maʼ qué zanda chebe stale de ca guendaridagulisaa ni rápanu, ne laaca maʼ qué zudii tiempu laabe gúnibe guiráʼ ni rinabaʼ Dios para guni adorárcabe laa jneza (Salmo 37:25). Sti xpinni Cristu zándaca nabé riuulaʼdxiʼ guʼyaʼ película o xiixa ni ridiʼdiʼ lu tele ni cadi jneza guʼyaʼ casi na Stiidxaʼ Dios (Efesios 4:17-19). O zándaca nuu tu nabé ridxiichi purtiʼ nisi maʼ cayuuyaʼ paraa cuchee ca biʼchiʼ o ca bizaʼnaʼ (Colosenses 3:13). Lu guiráʼ cani maʼ bizéʼtenu ca naquiiñeʼ gudiʼnu lugar gaca Stiidxaʼ Dios ti biaaniʼ para ñeenu ti gánnanu xi gúninu. Pa chinándanu guiráʼ ca conseju ni rusiidiʼ Biblia la? zanda gudxíʼlunu intiica guendanagana gápanu, purtiʼ Stiidxaʼ Dios nuu «para usiidi ni laanu ne para ulidxe ni laanu ne para gabi ni laanu paraa cuchéʼ nu ne para acané ni laanu ibani nu casi na Dios» (2 Timoteo 3:16).
«Ti biaaniʼ para neza rizayaʼ»
12. Ximodo nga zeeda gaca guiráʼ ni riníʼ Jiobá ti biaaniʼ para neza canazanu.
12 Salmo 119:105 laaca ruzeeteʼ zeeda gaca guiráʼ ni riníʼ Jiobá ti biaaniʼ ni iquiiñenu neza ra canazanu. Laanu nánnanu xi chiguizaaca, cadi nuudinu lu gueelacahui, purtiʼ Biblia cusiene laanu xiñee nuu stale guendanagana yanna riʼ ne laaca cayábini laanu ximodo guilúxecani. Laaca nánnanu maʼ nabáninu lu ca últimu dxi stiʼ guiráʼ binni malu (2 Timoteo 3:1-5). Cumu maʼ nánnanu xi chiguizaaca la? riquiiñeʼ gucaa nga laanu guiníʼ íquenu modo nabáninu yanna. Apóstol Pedru bicaa: «Yáquexa ma nanna tu ximodo chi initilú irá ni la? lauyubi udii tu idubi xpida tu Dios para guni tu ni na, laga cabeza tu dxi stiʼ» (2 Pedro 3:11, 12).
13. Xi riquiiñeʼ guiníʼ íquenu ne gúninu purtiʼ nánnanu mayaca guinitilú guiráʼ ca cosa malu nuu yanna riʼ.
13 Guiráʼ modo riníʼ íquenu ne modo nabáninu riquiiñeʼ gusihuínnicani dxandíʼ nánnanu «canitilú guidxilayú ne irá ni nuu ndaani ni» (1 Juan 2:17). Ca conseju zeeda lu Biblia zanda gacanécani laanu para guiníʼ íquenu ne guendabiaaniʼ ni racaláʼdxinu gúninu. Cásixa ora guníʼ Jesús ca diidxaʼ riʼ: «Peru nirudó laguyubi [Reinu stiʼ Dios] ne sa tu modo na, ne óraque zudii laatu cani riuu tu xizaa pur laa» (Mateo 6:33). Nabé riéchenu ora ridúʼyanu stale hombrehuiiniʼ ne dxaapahuiiniʼ ni rusihuínnicaʼ dxandíʼ runi crecaʼ ca diidxaʼ ni guníʼ Jesús ca purtiʼ riguixhe íquecaʼ gácacaʼ precursor. Xcaadxi Testigu maʼ yebiʼcaʼ sti guidxi ra jma caquiiñeʼ tu gucheeche stiidxaʼ Reinu ne nuu tiru dede guidúbipeʼ ti familia runi zacá.
14. Xi biʼniʼ ti familia de Testigu para gucheechecaʼ diidxaʼ jma.
14 Guiníʼ íquenu xi biʼniʼ ti familia de tapa binni. Laacabe nápacabe lídxicabe Estados Unidos, peru yebíʼcabe República Dominicana para gacanécabe ti guidxi stini ra nabeza 50,000 binni. Nécapeʼ biaʼ ti gayuaa treinta si ni rucheeche diidxaʼ napa neza binni ridagulisaa ni nuu raqué la? 12 stiʼ abril 2006 que guyé 1,300 binni ra bietenaláʼdxicabe guendaguti stiʼ Cristu. Lugar que maʼ nuuni listu para guidxela binni ni caquiiñeʼ guiziidiʼ de Dios, purtiʼ gaayuʼ beeuruʼ de nuu familia que raqué mápeca cayuundanécabe treinta binni de Biblia (Juan 4:35). Bixhózecabe guníʼ: «Ndaaniʼ neza binni ridagulisaa riʼ maʼ beeda treinta ni rucheeche diidxaʼ para gacané. Gande de laacaʼ beedacaʼ de Estados Unidos, ne xcaadxi beeda de Bahamas, Canadá, España, Italia ne Nueva Zelanda. Guizáʼ nápacabe gana gucheechecabe diidxaʼ ne nabé maʼ bicaacacabe guendanayecheʼ stícabe cani rucheeche diidxaʼ ni nuu raríʼ».
15. Xi ndaayaʼ huacaaluʼ pur cayúniluʼ xhiiñaʼ Reinu primeru lu guendanabani stiluʼ.
15 Dxandíʼ, cadi guiráʼ diʼ nga zanda cheʼ sti guidxi ra caquiiñeʼ jma binni ni gucheeche stiidxaʼ Reinu. Peru cani zanda gúnini, o cani zanda guchaa modo runi dxiiñaʼ para gúnini la? zacaacaʼ stale ndaayaʼ. Ne ratiica nuuluʼ, riquiiñeʼ chuʼluʼ nayecheʼ pur cayúniluʼ ni na Jiobá ne guiráʼ stipa stiluʼ. Pa quixhe íqueluʼ gúniluʼ xhiiñaʼ Reinu ca primeru la? Jiobá maʼ guníʼ zudii stale ndaayaʼ stiʼ lii dede qué ziuu dxi guiráʼ cani (Malaquías 3:10).
Ricaanu ndaayaʼ ora gúninu ni rusiidiʼ Jiobá laanu
16. Xi ndaayaʼ ricaanu ora rúninu guiráʼ ni rabi Dios laanu.
16 Casi maʼ bidúʼyanu, nuu chupa modo racané cani riníʼ Jiobá laanu. Primeru la? laacani nga ti biaaniʼ para ñeenu, purtiʼ racanécani laanu sanu jneza ne rusiaanicani xpiaaninu ora chitixhe íquenu gúninu xiixa. Guiropa la? Stiidxaʼ Dios rusiaaniʼ neza ziuunu, zacá randa ridúʼyanuni nayaʼniʼ dxindxi. Ora gúninu ca nga la? racanécani laanu para gúninu ni guníʼ apóstol Pedru riʼ: «Nga runi lacuu xpiaani tu ne laguni ni dxandí risaca. Laquixhe idubi xquenda biaani tu lu ni cabeza tu udii Dios laatu dxi gueeda Jesucristu» (1 Pedro 1:13).
17. Ximodo racané guiráʼ ni ridúʼndanu lu Biblia para ganda gúninu guiráʼ ni na Jiobá.
17 Nanna dxíchinu Jiobá nga rusiidiʼ laanu para sanu jneza. Yanna guníʼ ique, ñee zuneʼ ni cayabi Dios naa la? Para ganda guiéneluʼ guiráʼ ni riniʼbe la? gudixhe ique gúʼndaluʼ Biblia guiráʼ dxi. Guníʼ ique cani gúʼndaluʼ, biʼniʼ stipa para gánnaluʼ ximodo riuulaʼdxiʼ Jiobá gúniluʼ guiráʼ ni quixhe íqueluʼ ne guníʼ ique ximódoruʼ zanda gúniluʼ ni na ca conseju ni zeeda lu Biblia (1 Timoteo 4:15). De racá la? biquiiñeʼ cani maʼ biziidiluʼ lu Stiidxaʼ Dios ora chitixhe íqueluʼ gúniluʼ xiixa (Romanos 12:1).
18. Xi ndaayaʼ ricaanu ora rudiʼnu lugar gabi Stiidxaʼ Dios laanu xi gúninu.
18 Pa gudiʼnu lugar gacané guiráʼ ca conseju ni rusiidiʼ Stiidxaʼ Dios laanu ne gábicani laanu xi naquiiñeʼ gúninu la? guiráʼ ni quixhe íquenu gúninu zaree cani laanu jneza. Dxandíʼ zuni crenu riguu Stiidxaʼ Jiobá «xpiaaniʼ binni ni qué ganna» (Salmo 19:7). Ne ora rúninu guiráʼ ni rusiidiʼ Biblia lu guendanabani stinu la? rápanu ti guendabiaaniʼ nayá ne riuʼnu nayecheʼ purtiʼ nánnanu riuulaʼdxiʼ Jiobá ni cayúninu (1 Timoteo 1:18, 19). Ne últimu, pa gudiʼnu lugar gacané guiráʼ ni riníʼ Dios laanu guiráʼ dxi la? laabe zudiibe laanu ti ndaayaʼ jma naroʼbaʼ que xcaadxi: guendanabani ni qué ziuu dxi guiluxe (Juan 17:3).
Rietenalaʼdxuʼ la?
• Xiñee risaca nga gudiʼnu lugar gabi Jiobá laanu modo naquiiñeʼ sanu.
• Ximodo nga zeeda gaca guiráʼ ni riníʼ Jiobá ti biaaniʼ para ñeenu.
• Ximodo nga zeeda gaca guiráʼ ni riníʼ Jiobá ti biaaniʼ para neza canazanu.
• Xiñee riquiiñeʼ guidúʼndanu Biblia para ganda gúninu guiráʼ ni na Jiobá.
[Dibuju/foto ni zeeda lu yaza 18]
Pora nga maʼ cadi jneza guidxaaganu tuuxa ni qué runibiáʼ Dios
[Dibuju/foto ni zeeda lu yaza 19]
Ñee rusihuínninu pur modo nabáninu dxandíʼ cayúninu primeru xhiiñaʼ Reinu stiʼ Dios la?
[Ca dibuju/foto ni zeeda lu yaza 20]
Ca binni si ni biʼniʼ ni na Jiobá nga cani guca xhamigu Jesús