Xii nga Reinu stiʼ Dios

XIDÉ nga jma guniʼné Jesús binni dxi bicheeche diidxaʼ yaʼ. De Reinu stiʼ Dios, ne laapebe guniʼbe zacá ni (Lucas 4:43). Ca binni ni bicaadiaga laabe zándaca binadiágacaʼ bizeetebe stale biaje de Reinu ca. Ñee biénecabe xidé ngue guniʼbe la? Biénecabe. Ñee gunabadiidxacabe laabe xii nga Reinu ca la? Coʼ. Purtiʼ libru stiʼ Mateo, Marcos, Lucas ne Juan qué ruzeeteʼ diʼ pa guyuu tu gunabadiidxaʼ de laani. Yanna, ñee gunna ca binni que xii nga Reinu stiʼ Dios la?

Ni dxandíʼ nga ndaa stiʼ Biblia ni guyuu dxiqué, ne biʼniʼ respetar ca judíu que, bizeeteni de Reinu ca. Ne bisiene chaahuini xii nga Reinu ca ne xi chigúnini. Ca dxi nabáninu riʼ zanda gánnanu jma de Reinu riʼ cásica ca judíu que ora guidúʼndanu Biblia. Guidúʼyanu gadxe cosa ni rusiidini de Reinu ca. Chonna de laacani la? maca nanna ca judíu ni bibani ca dxi stiʼ Jesús cani ne cani bibani ante de ca dxi stibe. Xhonna de laacani bisiidiʼ Jesús o ca apóstol stini lu primé siglu que, ne últimu ca la? cahuínnini lu ca dxi stinu riʼ.

◼ 1. Reinu stiʼ Dios nga ti gobiernu ni maʼ cayuni mandar ne qué ziuu dxi guiluxe. Primé diidxaʼ riguixhená zeeda lu Biblia bisiéneni zuseendaʼ Dios tuuxa para gulá ca binni ni cuzuubaʼ stiidxabe. Ne ni chigulá riʼ biree lá «ni za» de gunaa que, ne Biblia ruzeeteʼ zabeebe guiráʼ ca guendanagana ridxaagalú binni pur bichee Binidxabaʼ, Adán ne Eva (Génesis 3:15). Gudiʼdiʼ si stale iza, David gunna xiixa nabé sicarú ni chiguizaaca «ni za» de gunaa o Mesías que: laabe zácabe ti rey ni naca gadxé de xcaadxi gobiernu purtiʼ qué ziuu dxi gusaanabe de guni mandarbe (2 Samuel 7:12-14).

◼ 2. Reinu stiʼ Dios zunitilú guiráʼ xixé gobiernu nuu lu guidxilayú. Ni riguixhená láʼ Daniel biiya lu ti visión stale gobiernu ni bizulú cayuni mandar lu guidubi guidxilayú dede ca dxi stinu riʼ. Guidúʼyanu ximodo riluxe visión riʼ: «Ne dxi stiʼ ca [últimu] rey [de guidxilayú] que la? Dios ni nuu guibáʼ zucuí ti reinu ni qué ziuu dxi guinitilú. Ne reinu riʼ qué zadíʼdini lu náʼ nin sti guidxi. Zunideni ne zunduuxeni guiráʼ ca reinu riʼ, ne laani ziaanani ne qué ziuu dxi guilúxeni». Nga runi, cumu guiráʼ ca gobiernu ne ca rey ni nuu lu guidxilayú riʼ qué rúnicaʼ ni jneza, runinacaʼ binni ni qué gapa donda ne ridindesaacaʼ la? nga runi zunitilú Reinu stiʼ Dios laacaʼ. Casi na sti versículo stiʼ Daniel ca, Reinu stiʼ Dios ca nuuni guibáʼ peru qué zandaa diʼ zuni mandarni lu Guidxilayú (Daniel 2:44, 45). Reinu riʼ cadi zácasini ti gobiernu ni dxandíʼ guni mandar, sínuque laasini nga ni chichuu.a

◼ 3. Reinu stiʼ Dios ca zabeeni guendaridinde, guendahuará, guendarindaana ne guendaguti. Ndaaniʼ Biblia zeeda stale diidxaʼ riguixhená ni rusihuinni ni chiguni Reinu stiʼ Dios lu Guidxilayú riʼ. Gobiernu riʼ zuni ti cosa ni qué huayuu dxi guni ca gobiernu nuu lu guidxilayú riʼ ne qué ziuu dxi gúnicaʼ. Guníʼ ique si ndiʼ: ¡guiráʼ guiibaʼ ni ridindené binni zanitilú cani! Biblia na: «[Dios] runduuxebe guendaridinde stiʼ ca guidxi ca dede ra jma zitu de guidxilayú» (Salmo 46:9). Maʼ qué zaquiiñeʼ diʼ binni doctor nin hospital, purtiʼ maʼ qué ziuu diʼ guendahuará. «Guirutiʼ tu cueza racá zaníʼ: “huaraʼyaʼ”» (Isaías 33:24). Guirutiʼ tu zaca huará purtiʼ gastiʼ ni gó ne qué záticaʼ purtiʼ gastiʼ ni gocaʼ. «Ziuu stale biidxiʼ lu guidxilayú.» (Salmo 72:16.) Maʼ qué zagaachiʼ binni ne qué zuunaʼ pur ti gueʼtuʼ, maʼ qué ziuu diʼ baʼ nin ca lugar ra riguucabe ca gueʼtuʼ ca ti gucaachicabe laacaʼ despué, nin yuubaʼ rapa binni ora gati tuuxa. Enemigu stinu, guendaguti ca, zanitiluni. Dios ni bizáʼ guiráʼ ni nuu «dxandipeʼ zábibe guendaguti ne maʼ qué ziuuruʼ ni, ne Jiobá, Señor Ni Jma Nandxóʼ, zuchaa nisa rieeteʼ lú guiráʼ binni» (Isaías 25:8).

◼ 4. Dios peʼ nga gulí ni gaca Rey stiʼ Reinu ca. Cadi Mesías ca nga guníʼ gaca Rey, ne cadi binni guidxilayú diʼ gulí laabe, sínuque Jiobá peʼ nga gulí laabe. Zacá ni purtiʼ ca título Mesías ne Cristu ca riniʼni ni «Bibí». Nga runi, Jiobá nga gulí Jesús para guicaa dxiiñaʼ nabé risaca ca. Ne Dios peʼ gudxi laabe ca diidxaʼ riʼ: «¡Biiyaʼ! ¡Siervu stinneʼ, ni cayapa dxiicheʼ! ¡Ni gulieʼ, ni racalaʼdxiʼ alma stinneʼ! Maʼ guluaaʼ espíritu stinneʼ luguiabe. Zúnibe ni jneza ndaaniʼ ca guidxi ca» (Isaías 42:1; Mateo 12:17, 18). Turuʼ nga jma nanna tuu nga naquiiñeʼ guni mandar laanu pa cadi Dios yaʼ.

◼ 5. Rey stiʼ Reinu stiʼ Dios ca maʼ bisihuinni nezalú binni guidxilayú zanda guni dxiiñaʼ ca. Jesús de guidxi Nazaret ca nga guca Mesías ni maca bieeteʼ gueeda que. Laabe beedabe de ti familia ni maca gulí Dios (Génesis 22:18; 1 Crónicas 17:11; Mateo 1:1). Dxi guyuube lu Guidxilayú la? stale de ca diidxaʼ riguixhená ni gucuá de laabe gayuaa iza ante gueedabe guca cani luguiabe. Ne dede guibáʼ Dios guníʼ laabe nga Mesías que. Ximodo guca nga yaʼ. Dios peʼ guníʼ dede guibáʼ xiiñiʼ laabe, ne ca ángel laaca guniʼcaʼ laabe nga Mesías ni bieeteʼ gueeda que. Jesús biʼniʼ milagru pur poder stiʼ Dios, ne stale biaje biiyaʼ binni ca milagru ni bíʼnibe que.b Stale biaje bisihuinni Jesús ximodo chiguni mandar. Cadi purtiʼ gúpabe poder nga gucanebe binni, sínuque biale de laabe gúnibe ni (Mateo 8:1-3). Bidiibe ni caquiiñeʼ binni, biabe binni, gúcabe nadxibalú ne qué nudxiibabe laca laabe. Guiráʼ ni bíʼnibe dxi guyuube lu Guidxilayú zeedani lu Biblia ne zanda guʼndaʼ binni de laani.

◼ 6. 144,000 binni chiguni mandarné Jesús lu Reinu stiʼ Dios. Jesús guníʼ ziuu caadxi binni zuni mandarné laa guibáʼ, ne lade ca binni riʼ nuu ca apóstol stibe. Gulee labe grupu de binni riʼ «grupu huiiniʼ de dendxuʼ» (Lucas 12:32). Qué nindaa de ngue gúdxicabe apóstol Juan 144,000 xpinni Dios nga zeeda gaca grupu huiiniʼ de dendxuʼ ca. Laacabe gucuaacabe ti dxiiñaʼ nabé risaca, chigácacabe rey ne ni ruzaaquiʼ guʼxhuʼ ne zuni mandarnécabe Cristu (Apocalipsis 5:9, 10; 14:1, 3).

◼ 7. Reinu stiʼ Dios maʼ cayuni mandar guibáʼ ne maʼ nuu listu para guni mandar lu guidubi naca Guidxilayú. Últimu cosa riʼ nga tobi de cani jma ridxagayaanu. Stale de ni cá lu Biblia rusihuinni maʼ naca Jesús Rey guibáʼ. Maʼ cayuni mandarbe racá ca dxi stinu riʼ, ne qué zandaa diʼ zuni mandarbe lu Guidxilayú ne zúnibe guiráʼ ni bizabiruaa cani riguixhená de laabe casi maʼ bizéʼtenu ca. Peru ximodo nánnanu maʼ cayuni mandar Reinu stiʼ Dios yaʼ. Ne padxí guzulú guni mandarbe lu Guidxilayú yaʼ.

[Cani cá ñee yaza]