Ejemplu stiʼ cani gupa fe

Ti hombre ni bisihuinni Jiobá si nga naquiiñeʼ gaca adorar

ELÍAS cayuuyaʼ nanene ziguiʼbaʼ caadxi binni cueʼ dani Carmelo. Ne maʼ siadóʼ que bihuinni dxichi nabé pobre ca binni que ne gastiʼ ni gocaʼ. Nuucabe zaqué purtiʼ maʼ chonna iza arondaʼ de cadi cayaba nisaguié ra nuucabe.

Lade ca binni que zeʼ 450 ni riguixhená stiʼ Baal ne ziguchacaʼ bi yánnicaʼ. Laacaʼ nanaláʼdxicaʼ Elías, ne nuucaʼ guuticaʼ ni riguixhená stiʼ Jiobá riʼ. Ca dxi que la? reina Jezabel maʼ biiti stale xpinni Jiobá, neca zaqué Elías biʼniʼ stale stipa para maʼ cadi gaca adorar diʼ Baal. Peru, pabiaʼ ruʼ tiempu zuni huantar Elías yaʼ. Zándaca guníʼ ique cani ruzaaquiʼ guʼxhuʼ stiʼ Baal que ti hombre si qué zanda diʼ gucaalú laacaʼ purtiʼ stálecaʼ (1 Reyes 18:3, 19, 20). Ne raqué nuucabe bedandá rey Acab, laa laaca nanalaʼdxiʼ Elías.

Neca laasibe cayúnibe ni na Jiobá la? dxi riʼ chiguizaaca xiixa ni qué huahuinni lu xquendanabánibe. Nezalú Elías chiguizaaca xiixa ni qué huayuu dxi guʼyaʼ binni, ra chiguihuinni ni jneza ne ni cadi jneza. Ximodo biʼniʼ sentirbe laga zirá gueelaʼ yaʼ. Elías la? laaca guca «binni guidxilayú casi laanu», ngue runi, laaca bidxíbibe (Santiago 5:17). Ne zanda guininu biʼniʼ sentir Elías stubi lucha nezalú guidubi guidxi ni qué runi ni na Jiobá que, nezalú ti rey ni maʼ bidxiideche Dios, ne nezalú cani riguixhená ni nuucaʼ guuticaʼ laabe (1 Reyes 18:22).

Peru zándaca guinabadiidxaluʼ lii: xi bicaa guidxi Israel gudxiideche Dios, ne xi zanda guiziidiluʼ de historia riʼ. Biblia riguu gana ca xpinni Cristu chinanda ejemplu stiʼ ca xpinni Dios ni qué nusaana de ñuni ni nabe ne «guni cre [caʼ] Dios casi bini cre cabe» (Hebreos 13:7). Yanna, guiduʼyaʼ chaahuinu ejemplu stiʼ Elías, ni riguixhená que.

Ra biluxe ti guendanagana ni guyuu maʼ xadxí

Biaʼ dxi bibani Elías, biiyaʼ ximodo bisaana ca binni de guidxi Israel de guni adorarcaʼ Jiobá. Maʼ xadxí nuu dínde ca binni guidxi que purtiʼ nuu tu na gaca adorar Jiobá Dios ne xcaadxi na gaca adorar ca dios stiʼ ca guidxi nabeza gaxha de laacaʼ. Ne ca dxi stiʼ Elías jma maʼ gudidisú guidxi que de ni cayuni.

Rey Acab bichaganáʼ Jezabel, xiiñiʼ ti rey stiʼ Sidón. Gunaa riʼ gudixhe ique gucaa binni Israel gusaana de guni adorar Jiobá ne guicá ique ca binni que guni adorarcaʼ Baal. Jezabel bicaa Acab guni adorar Baal ne bicuibe ti yuʼduʼ ne ti altar para Baal. Ne laabe nga tobi de cani primé bizuxibi xañee dios que, ne ni bíʼnibe ca jma bichiichibe Jiobá (1 Reyes 16:30-33).a

Xiñee nabé malu ngue guni adorar tuuxa Baal yaʼ. Purtiʼ bixhéleni binni de guni adorar Dios ni dxandíʼ. Laaca gúcani ti religión nabé nabiidiʼ ne bíʼnicaʼ stale cosa ni qué iquiiñeʼ, purtiʼ guyuu caadxi hombre ni gutané gunaa ndaaniʼ yuʼduʼ sticaʼ ne zaqueca biʼniʼ ca gunaa que. Laaca gutanécabe stale binni nezalú dios stícabe ne bizaaquicabe xiiñicabe lu gui para ca dios stícabe. Pur ngue biseendaʼ Jiobá Elías ra nuu Acab para gabi laabe qué ziaba diʼ nisaguié, ne dede ora maʼ guiniʼbe nga guibiguetaʼ guiaba nisaguié (1 Reyes 17:1). Gudiʼdiʼ caadxi iza para bibiguetaʼ Elías guyé ra nuu rey Acab, ne biaje riʼ la? para gábibe laa gutagulisaa guidxi que ne cani riguixhená stiʼ Baal lu dani Carmelo.

Peru xi zanda guizíʼdinu de ni bizaaca riʼ yaʼ. Zándacaʼ nuu binni riníʼ ique xi para gánnanu ximodo guca adorar Baal dxiqué, pa maʼ gastiʼ ca yuʼduʼ ra biʼniʼ adorárcabe dios riʼ ne maʼ gastiʼ ca altar biquiiñecabe que. Peru, ni bizaaca riʼ cadi ti historia si ni (Romanos 15:4). Diidxaʼ baal ca riniʼni «xpixuaanaʼ», ne Jiobá gunabaʼ xquidxi nibicaʼ laabe ñácabe xpixuaanacaʼ (Isaías 54:5). Cadi dxandíʼ ca dxi diʼ laaca napa binni stale cosa ni zeeda gaca casi xpixuaanaʼ lugar de Dios Ni Jma Nandxóʼ la? Zacá ni, binni qué runi adorar diʼ Jiobá, sínuque ruyúbicaʼ sti cosa gaca xpixuaanacaʼ, casi bueltu, guireenducaʼ, chizacaʼ ne chúʼnecaʼ ni cadi xheelacaʼ o gúnicaʼ xcaadxi cosa ni nuu yanna ni napa binni casi dios (Mateo 6:24; Romanos 6:16). Ca dxi stinu riʼ laaca rihuinni modo biʼniʼ adorar binni Baal, peru historia ni rusihuinni pa Jiobá o Baal nga Dios ni dxandíʼ ca zacaneni laanu guidúʼyanu tu nga naquiiñeʼ guni adorarnu.

Qué guidxélacabe tupeʼ nga gúnicabe ni na

Dani Carmelo que nabé nasoo ni, ne de luni que zanda guʼyaʼ binni guidxi Israel, ne gaxha de laani nuu nisadóʼ Roʼbaʼ (Mediterráneo) ne valle torrencial stiʼ Cisón, ne ladu guiaʼ de laani nuu ca dani stiʼ Líbano.b Peru laga ziree gubidxa dxi nabé risaca riʼ la? zihuinni nabé nabidxi nuu ca layú nuu gaxha de dani que, nécapeʼ dxi bidii Jiobá ca layú que ca xiiñiʼ Abrahán nabé nagáʼ guyuuni. Peru yanna la? maʼ nácani ti layú ra ruzaaquiʼ gubidxa pur guendahuati stiʼ xquidxi Dios. Ora guyuu ca binni que lu dani Carmelo que la? Bidxiña Elías ra nuu guidxi que ne gudxi laacabe: «Dede padxí nga qué guidxélatu tupeʼ nga gúnitu ni na pue. Pa Jiobá nga Dios ni dxandíʼ la? lachinanda laabe; peru pa Baal nácani la? lachinanda laa» (1 Reyes 18:21).

Xii nga gucalaʼdxiʼ Elías niníʼ ora gudxi laacabe qué guidxélacabe tupeʼ nga gúnicabe ni na yaʼ. Ca binni que caʼruʼ diʼ gudiicaʼ cuenta caquiiñeʼ cuicaʼ tu guni adorarcaʼ, Jiobá la? o Baal. Laacabe guníʼ íquecabe zanda guni adorárcabe Baal ne laaca guinábacabe ndaayaʼ stiʼ Jiobá Dios. Zándaca guníʼ íquecabe zaguu Baal ndaayaʼ ca cosecha ne ca maniʼ stícabe, ne Jiobá Dios stiʼ stale binni nanda guiibaʼ zacané laacabe ora tindenécabe sti guidxi (1 Samuel 17:45). Peru biaandaʼ laacabe ti cosa nabé risaca, ti cosa ni riaandaʼ stale binni dede nagasi: Jiobá qué riuulaʼdxiʼ diʼ guni adorárcabe sti dios ora maʼ cayuni adorárcabe laa. Dios canabaʼ guni adorárcabe laa si, ne naquiiñeʼ gúninu ni. Laabe cadi qué riuuláʼdxisibe guni adorar binni laabe ne laaca guni adorar xcaadxi dios, sínuque ridxiichibe ora guni binni zacá (Éxodo 20:5).

Ca israelita qué gánnadicaʼ tupeʼ nga gúnicaʼ ni na, casi ora ñacalaʼdxiʼ tuuxa nizá lu chupa neza. Ca dxi stinu riʼ, stale binni zacaca rúnicaʼ, purtiʼ runi adorarcaʼ stale «baal» ne zacá rusaanacaʼ de guni adorarcaʼ Dios. Ca diidxaʼ gudxi Elías ca israelita que para niguixhe íquecaʼ tupeʼ ñuni adorarcaʼ la? naquiiñeʼ gacaneni laanu guiníʼ íquenu xii nga jma cusisácanu lu xquendanabáninu ne guidúʼyanu ximodo cayuni adorarnu Jiobá.

Chiguihuinni tuu nga Dios ni dxandíʼ

Yanna, Elías gunabaʼ gaca xiixa ni qué iganna diʼ. Cani ruzaaquiʼ guʼxhuʼ stiʼ Baal napa xidé gúnicaʼ ti altar ne gúticaʼ ti maniʼ ne guiníʼnecaʼ dios sticaʼ para gucaa guini. Elías zaqueca zuni. Xi para yaʼ. Laca laabe guniʼbe: «Dios ni dxandíʼ ni guicabi ne gui nga nga Dios ni dxandíʼ». Peru Elías nanna dxichi tuu nga Dios ni dxandíʼ ne cumu runi crebe zaqué ni la? pur ngue gunábabe cani ruzaaquiʼ guʼxhuʼ stiʼ Baal gucaa rídxicaʼ Dios sticaʼ primé. Ne dede bidiibe lugar laacaʼ cuicaʼ yuze ni chigudiicaʼ Baal ne guni orarcaʼ dios primé (1 Reyes 18:24, 25).c

Laanu la? maʼ qué ridúʼyadinu milagru. Peru cumu Jiobá caʼruʼ guchaa la? zanda guni crenu laabe cásica biʼniʼ Elías. Casi ora chuʼ tuuxa guiníʼ cadi jneza modo na Biblia la? cadi naquiiñeʼ diʼ guidxíbinu ora guiníʼcabe ni riníʼ íquecabe. Naquiiñeʼ gúninu casi biʼniʼ Elías que, gusaananu ca cosa ca lu naʼ Dios. Ximodo zanda gúninu nga yaʼ. Ra gudiʼnu lugar gabi Stiidxaʼ Dios laanu xi gúninu, purtiʼ laani gucuani «para gabi ni laanu paraa cuchéʼ nu», ne cadi laaca laadinu nga gúninu ni (2 Timoteo 3:16).

Cani riguixhená stiʼ Baal que gudíxhecaʼ maniʼ que lu altar ne bizulú cucaa rídxicaʼ dios sticaʼ sicaríʼ:«¡Baal, bicabi laadu!» ne zaqué gudiʼdiʼ chupa chonna hora. «Peru guirutiʼ tu nicabi laacabe», na Biblia. Biaʼ galaa dxi bizulú Elías cayuni burla laacabe ne gudxi laacabe zándaca nuu xhiiñaʼ Baal para guicabi laacabe, o zándaca zeʼ ti guriá guiʼxhiʼ o nisiaasibe ne caquiiñeʼ chigucuaanicabe laabe. Na Elías rabi ca xhenemigu que «lagucaa ridxi biaʼ gándatiʼ». Rihuinni dxíchica biiyaʼ Elías cadi dxandíʼ diʼ nga dios ni cayuni adorárcabe, ne racaláʼdxibe guʼyaʼ xquidxi Dios zaqué ni (1 Reyes 18:26, 27).

Ora binadiaga cani riguixhená stiʼ Baal que ni guníʼ Elías que la? nabé gucadiiticaʼ ne bizulucaʼ «bicaacaʼ ridxi biaʼ gúndatiʼ ne bichuugucaʼ ládicaʼ ne puñal ne lanza casi maca biaacabe gúnicabe dede guzecabe rini». Qué niquiiñeʼ diʼ ni bíʼnicabe que, purtiʼ «guirutiʼ tu nicabi ne guirutiʼ tu nucaadiaga laacabe» (1 Reyes 18:28, 29). Zaqué bihuinni gastiʼ nin ti Baal, sínuque Binidxabaʼ biquiiñeʼ ni para guxheleʼ binni de Jiobá. Zacaca ca dxi stinu riʼ, pa gápanu xiixa cosa ni gaca dios stinu lugar de Jiobá la? zacananu (Salmo 25:3; 115:4-8).

Bihuinni tuu nga Dios ni dxandíʼ

Biaʼ ziyaaziʼ gubidxa maʼ chiguni Elías ni bíʼnicabe que. Primeru biʼniʼ chaahuibe ti altar para Jiobá ni biʼniʼ feu ca xhenemigu Dios. Biquiiñebe doce guié, zándaca para guietenalaʼdxiʼ guidxi Israel naquiiñeruʼ chinándacaʼ ley gucuaa ca doce tribu que. Oraqueruʼ gucuaa Elías gudixhe chaahuiʼ maniʼ ni chigudiibe Jiobá que, ne bigádxebe ni, ne zándaca nisa que yecaabe ni ndaaniʼ nisadóʼ Mediterráneo. Ne bíʼnibe ti zanja guidubi guriáʼ altar que ne bichá típabe ni de nisa. Ne cásica biʼniʼ cani riguixhená stiʼ Baal que, bizulube biʼniʼ orarbe Jiobá ne gúdxibe laa guiráʼ ni cayuni sentirbe. Bíʼnibe zaqué purtiʼ dxandíʼ runi crebe Jiobá (1 Reyes 18:30-35).

Despué la? biʼniʼ Elías ti oración Jiobá ra guniʼbe xii nga jma risaca para laabe. Ni guniʼbe primé ne nabe jma risaca para laabe nga ganna binni Jiobá si nga tobi lucha Dios stiʼ guidxi Israel ne cadi Baal diʼ. Guiropa cosa guníʼ Elías nga ganna binni laabe nga siervu stiʼ Jiobá, ne Dios si nga naquiiñeʼ gusisácacabe. Ne maʼ para guilúxebe oración ca guniʼbe nuube xizaa pur guidxi que, ne nabe racaláʼdxibe gudxiguetaʼ Jiobá ca binni que ra nuu ti guni adorarcaʼ Dios (1 Reyes 18:36, 37). Elías gucaná purtiʼ ca binni que bisihuínnicaʼ huaxiéʼ fe nápacaʼ, neca zaqué laabe nadxiirube laacaʼ. Xi nuu xa de ca oración stinu yaʼ. Ñee laaca rusihuínnicani nadxiinu Dios ne qué rudxíʼbanu laaca laanu ne rianu ca binni ni caquiiñeʼ chuʼ tu gacané laacaʼ la?

Ante guni Elías oración que, zándaca guni ique ca binni que laaca qué zuni Jiobá gastiʼ cásica qué ñanda ñuni Baal que gastiʼ. Peru qué nudii diʼ tiempu laacabe de niníʼ íquecabe zacá purtiʼ historia ca na: «Óraque, bisaba Jiobá gui ne bizaaquini maniʼ que ne yaga, guié, ne yú, ne bicuiidxini nisa daʼ ndaaniʼ zanja» que (1 Reyes 18:38). ¡Aque guendaridxagayaa modo bicabi Jiobá xa! Xi biʼniʼ ca binni guidxi que yaʼ.

Guiráʼ ca binni que bicaacaʼ ridxi ne nacaʼ: «¡Jiobá nga Dios ni dxandíʼ! ¡Jiobá nga Dios ni dxandíʼ!» (1 Reyes 18:39). Oraqueruʼ biiyaʼ guidxi que tuu nga Dios ni dxandíʼ. Peru nin ne zaqué cadi cusihuínnicabe nápacabe fe, purtiʼ cadi guiníʼsicabe Jiobá nga Dios ni dxandíʼ pur biiyacabe biaba gui de guibáʼ maca bihuinni nápacabe fe. Ngue runi, gunaba Elías ca binni que gusihuínnicaʼ fe sticaʼ ra gúnicaʼ ni na Ley stiʼ Jiobá, purtiʼ ngue nga naquiiñeʼ ñúnicabe maʼ napa iza. Ne Ley stiʼ Jiobá que na naquiiñeʼ gati cani cadi dxandíʼ riguixhená ne cani runi adorar bidóʼ (Deuteronomio 13:5-9). Cani ruzaaquiʼ guʼxhuʼ stiʼ Baal que nabé gucananaláʼdxicaʼ Jiobá ne gucaláʼdxicaʼ nucueezaca, ni naguixhe ique Jiobá guni. Yanna, ñee zia Jiobá laacabe ne zutiidilaʼdxiʼ donda stícabe pa laacabe que liica ñácabe ca baʼduhuiiniʼ ni bicaa guícabe para Baal que la? Peru, ñee biácabe ca baʼduhuiiniʼ ni bicaaguícabe para Baal que la? (Proverbios 21:13; Jeremías 19:5.) Ne ni biʼniʼ ca hombre riʼ cadi caquiiñeʼ chuʼ tu guiá laacaʼ. Ngue runi, Elías biʼniʼ mandar gáticabe, ne guidxi que bizuubaʼ stiidxabe (1 Reyes 18:40).

Ca dxi nabáninu riʼ, stale binni riníʼ cadi jneza diʼ modo biluxe relatu riʼ lu dani Carmelo que. Riuucabe xizaa cadi málasi historia diʼ gucaani binni guni casi bíʼnicabe. Nabé triste guininu ni, peru nuu stale religión runi cásica bíʼnicabe. Peru ni bíʼnisi Elías nga gucanebe binni guni adorar Jiobá jneza ne biʼniʼ mandársibe gati cani cayuni guendaquéiquiiñeʼ. Peru, cani dxandíʼ xpinni Cristu la? nánnacaʼ qué zanda diʼ iquiiñecaʼ guiibaʼ para gucaalucaʼ ca xhenemigu Jiobá cásica biʼniʼ Elías. Dxi beeda Jesús lu Guidxilayú la? guniʼbe ximodo naquiiñeʼ guni ca xpínnibe ora gúdxibe Pedru: «Guluu espada stiuʼ jlugar, purti irá ni cuʼ ná espada la? zati né espada» (Mateo 26:52). Qué zandaa diʼ zaquiiñeʼ Jiobá Jesucristu para guuti guiráʼ ca xhenemigu.

Ni dxandíʼ xpinni Cristu naquiiñeʼ gusihuinni pur modo nabani napa fe Dios (Juan 3:16). Ne para gúnibe nga la? naquiiñeʼ chinándabe ejemplu stiʼ Elías, tobi ni qué nusaana Jiobá. Laabe biʼniʼ adorarbe Jiobá si ne gúdxibe binni guni casi cayúnibe. Laaca qué nidxíbidibe binni, ne bisihuínnibe nezalucaʼ ximodo biquiiñeʼ Binidxabaʼ ti religión para guxheleʼ binni de guni adorar Jiobá. Elías biʼniʼ cré zacané Jiobá laa para gusihuinni laabe nga Dios ni naquiiñeʼ gaca adorar ne qué niníʼ ique diʼ laa si zanda gúnini. Rihuinni dxíchica bicaalú Elías ca binni que ti gusihuínnibe Jiobá si nga naquiiñeʼ gaca adorar. Nga runi, ¡galán gápanu fe cásica Elías!

[Cani cá ñee yaza]

[Ni caníʼ yaza 20]

Pa gápanu xiixa cosa ni gaca dios stinu lugar de Jiobá la? zacananu

[Dibuju/foto ni zeeda lu yaza 21]

«¡Jiobá nga Dios ni dxandíʼ!»