Careeche diidxaʼ dede lu ca dani jma nasoo ni láʼ los Andes
GUNIʼ ique néxhedu ndaaniʼ ti yoo huiiniʼ ni cadi nexheʼ pisu ndaaniʼ. Dieciochodu ne cayunadiágadu ximodo cayaba dxacha nisaguié laga nuudu ndaaniʼ ca bolsa ra rásidu dede cayaca diitidu de nanda. Pur guiráʼ nga guníʼ íquedu deruʼ primé laadu ngue cani guyuu ndaaniʼ yoo huiiniʼ que.
Yanna, xiñee yendadu raqué yaʼ. Purtiʼ racaláʼdxidu gucheechedu ca diidxaʼ nacubi ne galán ni biʼniʼ mandar Jesús guireeche lu «idubi naca guidxilayú» (Hech. 1:8; Mat. 24:14). Ngue runi, yegucheechedu diidxaʼ lu ca dani nabé nasoo ni láʼ los Andes de guidxi Bolivia.
Nagana para yendadu raqué
Primeca ni guca nagana para laadu nga chindadu raqué, purtiʼ bidiʼdu cuenta qué gapa diʼ ca carru ni rié ca lugar zitu, casi ra chuudu que, ti hora para guireecaʼ. Ne ora beeda carru que la? bidúʼyanu jma nahuiiniʼ ni que biaʼ ni guníʼ íquedu, ngue runi nuu tu qué nibí. Peru guiradu yendadu raqué.
Ni gudixhe íquedu nga gucheechedu diidxaʼ ndaaniʼ ca guidxi huiiniʼ ni nuu ra jma nasoo lu ca dani que. Nga runi, ra maʼ qué ñanda ñuu carru que la? gúpadu xidé bicaadéchedu guiráʼ ni zinedu que, bínidu ti fila ne zaqué gudxíbadu ca dani nasoo que.
Neca ruluíʼ nahuiiniʼ ca guidxi que la? zitu zitu nuu ca yoo que, ngue runi xadxí guzadu para yegánnadu cada guidxi huiiniʼ. Neca xadxí guzadu la? bidxélarudu yoo ladu maʼ ziuudu que. Stale biaje binítidu ndaaniʼ ca neza huiiniʼ ni nuu lu ca dani que.
«Xiñee qué huayeedatu pue»
Ti gunaa nabé bidxagayaa laadu purtiʼ guizáʼ zitu guzadu, ne pur ngue bidiibe lugar gúnidu ni guidéʼnedu ralídxibe dede bidiibe laadu yaga para ugáʼguinedu ni. Ora gunna ti hombre cusiidiʼ Biblia ximódopeʼ nga nuu ca gueʼtuʼ ca la? guníʼ: «Xiñee qué huayeedatu pue». Nabé guyuulaʼdxiʼ hombre que guiziidiruʼ jma, ngue runi ora bireʼdu de raqué yenebe laadu ne zinabadiidxarube laadu neza ziuudu que. Ne sti hombre ni qué liica huayunadiaga de ca testigu stiʼ Jiobá, nabé guyuulaʼdxiʼ ca revista ne libru ni zinedu. Bidiibe xquíxepeʼ laadu pur yegánnadu laabe ne bidiibe laadu llave stiʼ ti yoo huiiniʼ para chigásidu ndaaniʼ.
Ti huaxhinni nabé nacahuidóʼ qué nudiʼdu cuenta gudíxhedu bolsa ra rásidu que ra dxaʼ stale birí yaaseʼ ni nabé naroʼbaʼ. Qué nindaa bizulú biquiichiʼ ca birí que laadu. Peru cumu nabé maʼ bidxágadu la? qué liica niniibidu ora cuquiichicame laadu, gupa ratu maʼ qué nulábicame laadu.
Casi gátadu layú que la? nabé riuubaʼ déchedu ne xcustiadu, peru ridiʼdiʼ yuubaʼ que chaahuiʼ chaahuiʼ ora jma maʼ ziyaaziʼ gueelaʼ. Peru riaandaʼ guiráʼ yuubaʼ que laadu ora guidúʼyadu pabiáʼ sicarú rihuinni modo riaba ca za que lade ca dani que ne ora guidúʼyadu modo nexheʼ hielu lu xcaadxi dani ngola nuu raqué. Ne ni runadiágasidu raqué nga nisa stiʼ ti guiiguʼ huiiniʼ ne ridxi stiʼ ca maniʼ huiiniʼ que ora maʼ cayuundacaʼ.
Despué de gázedu ndaaniʼ guiiguʼ huiiniʼ nuu raqué ridúʼndadu ti textu, rideʼdu ne de racá maʼ ricadu ca dani que para chigánnadu xcaadxi guidxi ni nuu zitu de ra nuudu que. Cadi gucuásidu lu ca dani que, purtiʼ raqué binibiaʼdu ti gunaa ni maʼ huaniisigá. Gunaa riʼ biinaʼ ora gunna Jiobá nga láʼ Dios ne zeedani lu Biblia. Nabé biéchebe purtiʼ yanna maʼ zanda guiniʼbe lá Dios lu ca oración gúnibe.
Ti señor ni maʼ nagola gudxi laadu dxandipeʼ bietenalaʼdxiʼ Dios laa ne bizulú biindaʼ ti canción ra na biseendaʼ ca ángel ca laadu. Sti señor, ni nabé huará ne qué randa riree, gudxi laadu qué huayuu sti binni de guidxi que chiganna laa. Bidxagayaabe biúpadu dede La Paz para yegánnadu laabe. Sti hombre laaca bidxagayaa ora biiyaʼ riganna ca testigu stiʼ Jiobá binni dede ralidxi purtiʼ xcaadxi religión rucaasicaʼ campana para cuídxicaʼ binni ra yuʼduʼ sticaʼ.
Cumu nin ti lugar de raqué gastiʼ biaaniʼ la? ca binni que rigátacaʼ ora maʼ zixhinni ne riásacaʼ ora maʼ zirá gueelaʼ. Nga runi ruzuludu rucheechedu diidxaʼ siadóʼ biaʼ a las seis ti guidxéladu laacabe. Pa chuudu maʼ huadxí huiiniʼ la? stale de ca binni que maʼ ziguni dxiiñaʼ lu layú stiʼ. Caadxi de cani maʼ cayuni dxiiñaʼ lu layú stiʼ nuu tiru ruzuhuaadxicaʼ ti ratu para gucaadiágacaʼ laadu, laga canidu que randa riziilaʼdxiʼ ca yuze que. Stale de ca binni ni ridxéladu ra yoo la? riguíxhecaʼ guidiladi dendxuʼ sticaʼ para cuidu ne rucasaacaʼ binnilídxicaʼ para gucaadiaga laadu. Chupa chonna de cani runi dxiiñaʼ lu layú que rudiicaʼ laadu bolsa xubaʼ pur ca revista ne libru ni rusaananedu laacaʼ.
«Qué nusiaandatu naa»
Dxandíʼ, para gánnaruʼ binni jma de Biblia la? naquiiñeʼ chigánnanu laacaʼ stale biaje. Stale binni gunábacaʼ laadu guibiguétadu para gusíʼdirudu laacaʼ. Nga runi, maʼ stale biaje guyuudu ca guidxi huiiniʼ ni nuu Bolivia.
Lu stobi de ca biaje guyuudu que nabé biecheʼ ti gunaa ora biiyaʼ laadu dede guníʼ: «Laatu zeeda gácatu casi xiiñeʼ. Qué nusiaandatu naa». Ne sti hombre bidii xquíxepeʼ laadu pur dxiiñaʼ cayúnidu que ne gúdxibe laadu zanda guiaanadu ralídxibe ora chuudu sti biaje. Neca nabé naroʼbaʼ nga ca stipa bínidu para guyuudu lugar que chupa chonna biaje la? biéchedu ora gúnnadu de ti gunaa ni guninedu laa lu tobi de ca biaje guyuudu primé que, purtiʼ maʼ rucheechebe diidxaʼ ndaaniʼ guidxi ra yendézabe despué.
Últimu dxi nuudu raqué birá petróleo stiʼ horno huiiniʼ zinedu, ne maʼ huaxiéʼ guendaró stidu. Yetópadu yaga para ugáʼguinedu xcaadxi guendaró nápadu que. De raqué guzadu para bibiguétadu, purtiʼ nabé zitu de ra nuudu que para de ra nuu guidxi ra chiguicaadu carru ti chibiʼdu. Biaʼsi ora yendadu raqué la? mápeca bicahui.
Ni bizaacadu dxi bibiguétadu
Ora bibiguétadu ralídxidu que la? bixiñeʼ carru ra ziúpadu que. De raqué gudxíbadu atrá de sti carru ra zeeda jma binni.
Gunda guninedu ca binni que de Stiidxaʼ Dios purtiʼ gunabadiidxacaʼ laadu xi canayúnidu raqué. Neca qué riniʼpeʼ ca binni que la? guníʼnecaʼ laadu ne nabé nachaʼhuiʼ gúcacaʼ ne laadu.
Gaʼ hora bindaa para yendadu ralídxidu, nabé cayacanándadu ora guyuʼduʼ ne guizáʼ maʼ gudxe xhábadu. Peru cadi pur gana si guiráʼ ni gudídidu que, purtiʼ neza ziúpadu guninedu ti gunaa ni nabeza ndaaniʼ ti guidxi gaxha de raqué ne biaanadu guidúʼndanedu laa Stiidxaʼ Dios.
Nabé bisaca para laadu ngue yegucheechedu diidxaʼ ra nuu ca binni ni nabeza ca guidxi zitu que. Gunda bicheechedu diidxaʼ tapa guidxi ne stáleruʼ guidxi huiiniʼ. Ngue bisietenalaʼdxiʼ laadu ca diidxaʼ ni zeeda lu Isaías 52:7: «Guizáʼ sicarú nga ñee binni ni canazá lu ca dani ca ora ziné diidxaʼ nacubi ne galán, ni canagucheeche guendariuudxi, ni né diidxaʼ nacubi ne galán stiʼ xiixa ni jma sicarú, ni canagucheeche diidxaʼ ni rulá binni» (Rom. 10:15).
[Dibuju/foto ni zeeda lu yaza 17]
Ra maʼ nuudu listu para chigucheechedu diidxaʼ