Ni rinabadiidxaʼ cani ruundaʼ

Apóstol Pablu guníʼ zalá guidubi guidxi Israel (Rom. 11:26). Ñee guniʼbe guiráʼ ca judíu nga zácacaʼ xpinni Cristu la?

Coʼ, cadi nga diʼ nga ni gucaláʼdxibe niniʼbe. Purtiʼ guiráʼ cani beeda gaca ti guidxi ni zá de Abrahán la? qué ninádicaʼ ñuni crecaʼ pa Jesús nga Mesías ni gueeda que. Ne gudiʼdiʼ si caadxi iza despué de guti Jesús la? bihuinni dxíchica cadi guiráʼ diʼ ca judíu gúcacaʼ xpinni Cristu. Neca zacá la? ca diidxaʼ ni guníʼ Pablu ra na zalá guidubi guidxi Israel que la? nápani xidé gácani. Ximodo yaʼ.

Jesús gudxi ca xaíque yuʼduʼ de dxiqué ca diidxaʼ riʼ: «Pur nga runi cayabeʼ laatu ziaaxha tu de lade ca xpinni Dios ne maʼ adxé tu guiuu xlugar tu, tobi ni zanda iquiiñe para laabe» (Mat. 21:43). Cumu guidubi guidxi Israel que bicaanacaʼ Jesús la? biyubi Jiobá sti guidxi nacubi ni gulí ne espíritu stiʼ. Pablu na laani nga «Israel stiʼ Dios» (Gál. 6:16, NM).

Lu xcaadxi textu ni zeeda lu Stiidxa Dios ni gucuá lu diidxaʼ griegu la? rusihuínnini 144,000 xpinni Cristu ni bibí ne espíritu santu nga cani nácacaʼ Israel stiʼ Dios (Rom. 8:15-17; Apo. 7:4). Laaca nuu cani cadi nácacaʼ judíu lu grupu riʼ, casi cá lu Apocalipsis 5:9, 10. Luni na guiráʼ cani nácacaʼ de Israel stiʼ Dios zeedacaʼ «de irá ladu, de irá guidxi ne de irá idioma ni riníʼ binni». Ne bibícabe para gácacabe ni ruzaaquiʼ guʼxhuʼ ne rey ti guni mandárcabe binni guidxilayú. Peru, nécapeʼ bicaanáʼ Dios guidxi Israel que la? caadxi de ca binni guidxi ca gunda bibiguétacaʼ ra nuube sti biaje, casi ca apóstol ne xcaadxi judíu ni beeda gácacaʼ xpinni Cristu dxiqué. Peru cásica xcaadxi ni bibí que la? laaca guzíʼ Dios ca judíu que ne rini stiʼ Jesucristu (1 Tim. 2:5, 6; Heb. 2:9; 1 Ped. 1:17-19).

Nécapeʼ stale de ca judíu de primé siglu que maʼ qué zuni mandárnecaʼ Cristu la? zaca ni gudixhe ique Dios que. Purtiʼ tobi de cani riguixhená stiʼ Dios cayabi laanu xi guníʼ Jiobá: «Zacá zaca stiidxaʼ ni guiree ruaa. Qué zabiguetaʼ ni ra nuaa sin gácani, sínuque zúnini ni racalaʼdxeʼ, ne dxandíʼ zácani purtiʼ para nga biseendaʼ ni» (Isa. 55:11).

Zacá beeda gaca ni gudixhe ique Dios que: iquiiñebe 144,000 binni guidxilayú para gácacaʼ rey ne guni mandárnecaʼ Xiiñibe guibáʼ. Biblia cusiene chaahuiʼ naquiiñeʼ guizaacabe; qué ziaadxaʼ nin tobi (Apo. 14:1-5).

Nga rusihuinni ora bicaa Pablu zalá guidubi guidxi Israel la? cadi caníʼdibe guiráʼ xixé ca judíu zácacaʼ xpinni Cristu, sínuque ni caniʼbe racá nga zaquiiñeʼ Dios 144,000 binni ni zeeda gaca «Israel stiʼ Dios» que para guni mandárnecaʼ Jesucristu guibáʼ. Zacá zúnibe ni gudixhe íquebe que. Guiráʼ cani nácacaʼ de grupu de Israel stiʼ Dios riʼ zalacaʼ ne zuni mandarcaʼ casi rey ne zácacaʼ ni ruzaaquiʼ guʼxhuʼ lu Reinu stiʼ Cristu ora guedandá dxi gulaʼquiʼ Jiobá gaca ni (Efe. 2:8).

[Dibuju/foto ni zeeda lu yaza 28]

Cani bibí ca zeedacaʼ «de irá ladu, de irá guidxi ne de irá idioma ni riníʼ binni»