Biluxe clase 124 stiʼ scuela stiʼ Galaad

Ca misioneru ca zeeda gácacaʼ casi gusú

CADA xhoopaʼ beeu raca ti guendaridagulisaa ora riluxe Scuela stiʼ Galaad stiʼ Watchtower, ne guiráʼ ca de Betel stiʼ Estados Unidos raca invitar cheʼ dxi ca. Ne 8 stiʼ marzo 2008 que guca invitar xcaadxi binni para checaʼ ra biluxe clase 124 que, ca binni ca zeedacaʼ de treinta guidxi. Biaʼsi 6,411 binni nga guyé dxi nabé risaca para cani binduuxeʼ scuela ca.

Ora bizulú guendaridagulisaa ca, Stephen Lett, ni nuu lade Grupu ni Zaniruʼ, bidii ti libana ni láʼ «Lasániruʼ ne cani zeeda gaca casi gusú stiʼ Jiobá». Lu Apocalipsis 9:1-4 na zeeda gaca grupu huiiniʼ stiʼ cani bibí, ni bibiguetaʼ biʼniʼ xhiiñaʼ Jiobá sti biaje lu 1919 que, casi ti manada gusú ni málasi bizulú cayúnicaʼ dxiiñaʼ. Gúdxicabe cani binduuxeʼ scuela ca tobi si cayuninecaʼ cani zeeda gaca casi gusú ca dxiiñaʼ, purtiʼ laacabe nácacabe de ca «xcaadxi dendxu» (Juan 10:16).

Lon Schilling, ni nuu lu Grupu ni Ruuyaʼ Modo Raca Dxiiñaʼ Betel stiʼ Estados Unidos, bidii ti libana ni láʼ «Cani maʼ bichaganáʼ ca naquiiñeʼ gacanésaacaʼ». Para gacanécabe veintiocho guendaxheelaʼ ni guyé scuela ca la? guníʼcabe de ejemplu stiʼ ti guendaxheelaʼ, Áquila ne Priscila (o Prisca), ca xpinni Cristu ca bibánicaʼ lu primé siglu que (Rom. 16:3, 4). Nabé guniʼbe naquiiñeʼ chuʼ ca guendaxheelaʼ ca tobi si ti cheni laacaʼ galán casi misioneru. Guiráʼ ra ruzeeteʼ Biblia de Áquila laaca ruzeeteʼ de xheelabe Priscila, nga rusihuinni biiyaʼ Pablu ne ca binni ridagulisaa laacabe nabé riuucabe tobi si. Ca misioneru ca laaca naquiiñeʼ gucheechecaʼ diidxaʼ guirópacaʼ, guni orarcaʼ ne gúʼndacaʼ juntu ne zaqueca naquiiñeʼ gacanésaacaʼ ora guidxaagalucaʼ guendanagana ndaaniʼ guidxi ra checaʼ (Gén. 2:18).

De racá bidii Guy Pierce, ni nuu lade Grupu ni Zaniruʼ ca, sti libana ni biree láʼ «Gácanu nachaʼhuiʼ casi Jiobá». Luni bisiénebe ora nachaʼhuiʼ ti binni la? qué zuni si stipa pur cadi guni cosa malu, sínuque zuni stipa pur guni cosa ni galán. Ne Jiobá Dios nga ni jma nachaʼhuiʼ (Zac. 9:16, 17). Nga runi, cumu nadxii Jiobá laanu la? nga rucaa laanu gannaxhiinu binni cásica rúnibe ni ne gacanenu laacaʼ. Ne ra maʼ chiguiluxe bíʼchinu Pierce que guluube gana cani cunduuxeʼ scuela que ne ca diidxaʼ riʼ: «Laatu maʼ bisihuínnitu nacháʼhuitu. Ne nánnanadu zácarutu nachaʼhuiʼ casi Dios ne cadi gusaanatu de gúnitu ni galán ratiica guseendaʼ Jiobá laatu».

Sti bíʼchinu ni bidii libana nga Michael Burnett, laabe gúcabe misioneru ne maʼ nácabe tobi de cani rusiidiʼ lu Scuela stiʼ Galaad. Libana ni bidiibe biree lá «Casi ti venda ni renda lutu». Casi milagru ni biʼniʼ Jiobá ora gulee ca israelita que de Egipto que la? cadi naquiiñeʼ diʼ nusiaandacabe ni, sínuque naquiiñeʼ ñápacabe ni casi ti venda ni renda lúcabe (Éxo. 13:16). Zaqueca nga gúdxibe cani binduuxeʼ scuela ca naquiiñeʼ guni, cadi chuʼ dxi gusiaandacaʼ ni biziidicaʼ ra Scuela stiʼ Galaad, sínuque naquiiñeʼ gápacabe cani casi ti venda ni renda lúcabe. Laaca guníʼ bíʼchinu Burnett nabé risaca nga cadi gudxiibacabe laacabe ne chinándacabe ca conseju stiʼ Biblia ora guizaacacabe xiixa ne sti xpinni Cristu o ne xcaadxi binni (Mat. 5:23, 24).

Mark Noumair, sti bíʼchinu ni maʼ xadxí de rusiidiʼ lu Scuela stiʼ Galaad, bidii ti libana ni biree lá «Xi zieeteʼ lu canción stitu yaʼ». Dxiqué cada guni ganárcabe lu ti guendaridinde la? ribeecabe ti canción ni guiechenécabe. Lu tobi de ca canción ca rieeteʼ qué niná tribu stiʼ Rubén, Dan ne Aser nitíndecaʼ; peru caguuni naróʼ stiʼ tribu stiʼ Zabulón purtiʼ qué nidxíbicaʼ ñáticaʼ (Jue. 5:16-18). Laaca zanda guininu cani runibiáʼ laanu ruundacaʼ caadxi canción sicarú stinu. Ora gúninu stale stipa pur gúninu xhiiñaʼ Dios ne guzúʼbanu stiidxaʼ cani zaniruʼ ndaaniʼ xquídxibe la? qué zusiéchesinu Jiobá, sínuque laaca zaguíxhenu ti ejemplu galán nezalú ca bíʼchinu ne ca bizánanu ni rucaadiaga canción stinu ra cayeeteʼ cani huayúninu ne rucaani laacaʼ gúnicaʼ zaqueca.

Cumu laaca naquiiñeʼ gucheechecabe diidxaʼ laga nuucabe lu clase ca la? nga runi biaʼ 3,000 hora bíʼnicabe. Bíʼchinu Sam Roberson, ni ruuyaʼ modo naquiiñeʼ gaca dxiiñaʼ ndaaniʼ ca Oficina para ca Scuela ni nuu Patterson, bidii sti libana ni láʼ «Gudiʼnu lugar gacané espíritu santu laanu». Gunábabe cani biziidiʼ ca guiniʼcaʼ ne guluiʼcaʼ ximodo guyeni laacaʼ ora bicheechecaʼ diidxaʼ. Despué bíʼchinu Patrick LaFranca, ni nuu lu Grupu ni Ruuyaʼ Modo Raca Dxiiñaʼ Betel stiʼ Estados Unidos, gunabadiidxabe chupa chonna de cani maca biluxe Scuela stiʼ Galaad, ni cucheechecaʼ diidxaʼ ndaaniʼ xcaadxi guidxi, ximodo huayeni laacaʼ. Cani caluxe scuela ca bidiicaʼ xquíxepeʼ laacabe pur ca conseju stícabe.

Ne libana ni biluxené guendaridagulisaa ca biree lá «Laguietenalaʼdxiʼ, guiráʼ ca cosa ni ruuyatu ca zidiidisicani», bíʼchinu Anthony Morris, ni nuu lade Grupu ni Zaniruʼ, bidii ni. Biblia cayabi laanu cadi gusaananu de guiníʼ íquenu ca ndaayaʼ ni chigudii Jiobá laanu despué ne cadi guireʼnu gana pur ca guendanagana ni gápanu purtiʼ ziguidiʼdisicani (2 Cor. 4:16-18). Nuu de laanu pobre laa, cadi jneza ni cayúnicabe laa, cuquiichinácabe laa, huará ne nuu dede mayaca gati, peru pa cadi gusiaandanu tobi ziguidiʼdiʼ si ca nga la? zabézanu ni chigudii Jiobá laanu ne jma zusisácanu gúninu ni nabe.

Biluxe gucuaasicabe diploma stícabe laga dxíʼbacabe lu plataforma que guníʼ bíʼchinu Lett caadxi diidxaʼ para laacabe maʼ para guiluxe guendaridagulisaa que. Gudxi laacabe qué chuʼ dxi guireecabe gana ne guníʼ: «Cumu nuuné Jiobá laanu la? qué zuchéʼnenu laa». Laaca gúdxibe cani cheʼ de misioneru ca gácacaʼ casi gusú, sin guidxágacaʼ, ne gucheechecaʼ diidxaʼ ne gana, cadi guixélecaʼ de Jiobá ne guzuubacaʼ diidxaʼ.

[Cuadru ni zeeda lu yaza 30]

RA CAYEETEʼ XCAADXI DE LAACABE

Zeedacabe de 7 guidxi roʼ

Zécabe 16 guidxi roʼ

Biaʼsi 56 guirácabe

Nápacabe biaʼ 33.8 iza

Nápacabe biaʼ 18.2 iza de nuucabe ndaaniʼ xquidxi Dios

Nápacabe biaʼ 13.8 iza de rúnicabe xhiiñaʼ Dios guidubi dxi

[Dibuju/foto ni zeeda lu yaza 31]

Clase 124 stiʼ Scuela stiʼ Galaad stiʼ Watchtower

Cani zuhuaa delante nga cani cá lá primé, de racá maʼ zeeda cani nuu neza déchecabe, ne ladu bigaʼ ruzulú lácabe ne rilúxecani ladu derechu.

1) Nicholson, T.; Main, H.; Senge, Y.; Snape, L.; Vanegas, C.; Pou, L. 2) Santana, S.; Oh, K.; Lemaitre, C.; Williams, N.; Alexander, L. 3) Woods, B.; Stainton, L.; Huntley, E.; Álvarez, G.; Cruz, J.; Bennett, J. 4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. 5) Lemaitre, W.; Harris, A.; Wells, C.; Rodgers, S.; Durrant, M.; Senge, J. 6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. 7) Zuroski, M.; Rodgers, G.; Diemmi, D.; Nicholson, L.; Álvarez, C.; Snape, J. 8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. 9) Cruz, P.; Degandt, B.; Williams, D.; Wells, S.; Alexander, D.; May, M.

[Dibuju/foto ni zeeda lu yaza 32]

Scuela stiʼ Galaad ca nuuni ra nuu ca scuela stiʼ Watchtower