Lagudii xquíxepeʼ Jiobá ne xcaadxi binni

Biblia nabé rucaa ca xpinni Dios gudiicaʼ xquíxepeʼ laabe ne binni. Salmo 92:1 na: «Nabé galán nga gudiʼnu xquíxepeʼ Jiobá». Pablu laaca guníʼ naquiiñeʼ gudiʼnu xquíxepeʼ Dios (Col. 3:15).

Nápanu stale razón para gudiʼnu xquíxepeʼ Dios ne xcaadxi binni. Robert Emmons, ti maestru ni rusiidiʼ ndaaniʼ Universidad de California ndaaniʼ guidxi Davis, guníʼ sicaríʼ: «Pur guiráʼ ni huayuundacabe huayuuyacabe ca binni ni rudii xquíxepeʼ pur ni runi xcaadxi binni pur laacaʼ la? nabé racané nga laacaʼ guidxagalucaʼ ca guendanagana rápacaʼ ne jmaruʼ si ora riuucaʼ triste, laaca racané nga laacabe gánnacabe dxandíʼ risácacabe».

Ne revista Time na: «Cani rudii xquíxepeʼ binni la? [...] jma ruyúbicaʼ gacanecaʼ, ne riníʼ íquecaʼ zareendú ni gúnicaʼ, qué riuupecaʼ xizaa ne jma huaxiéʼ riuucaʼ triste que stale binni».

Peru Biblia maca guníʼ lu ca últimu dxi riʼ «zuyubi binni para laa si» ne nin qué zudiicaʼ xquíxepeʼ guirutiʼ (2 Tim. 3:1-5). Xi zanda guni ca xpinni Cristu ti cadi gácacaʼ zacá yaʼ. Dios peʼ cayabi laanu: «Naa, Jiobá, nacaʼ Dios stiluʼ, Ni cusiidiʼ lii para cueenduluʼ ni galán para lii, Ni cayabi lii xi neza naquiiñeʼ saluʼ» (Isa. 48:17). Ora guzúʼbanu stiidxaʼ Dios la? qué racanadinu casi racaná ca binni ni ruyubi puru para laasi. Ne nánnanu ruuyaʼ Jiobá stipa rúninu ne zaguu ndaayaʼ laanu (Heb. 6:10). Ne pur guiráʼ ni ricaanu ca la? naquiiñeʼ gudiʼnu «xquíxepeʼ Jiobá» (Sal. 107:8).