Cani ruundaʼ revista riʼ racaláʼdxicaʼ gánnacaʼ
Ñee riné Dios ca baʼduhuiiniʼ ca guibáʼ para gúnibe laacaʼ ángel la?
Ora gati ti baʼduhuiiniʼ, ca xhamigu familia stibe nuu tiru rábicaʼ laacabe: «Caquiiñeʼ Dios sti ángel huiiniʼ guibáʼ», ne riníʼcabe zacá para quixhedxícabe ladxidoʼcaʼ. Peru, ñee raʼbuʼ jneza nga ni riníʼcabe la?
Pa ñaca nuuti Dios ti baʼduhuiiniʼ cada biaje niquiiñeʼ ti ángel la? nusihuinni nga naguidxi ladxidoʼbe ne malu laabe. Peru cadi nga diʼ nga ni rusiidiʼ Biblia de Jiobá Dios (Job 34:10). Ni rusiidiʼ Biblia nga nácabe ti Dios ni nabé nadxii binni (1 Juan 4:8). Ti binni ni nachaʼhuiʼ qué ziuu dxi gaxha xiiñiʼ sti binni para si gusiroobaʼ familia stiʼ. Yanna, ñee zuni Jiobá nga pa nácabe ti Dios nachaʼhuiʼ la? Qué ziuu dxi gúnibe nga purtiʼ guizáʼ nadxiibe binni.
Peru guníʼ ique ndiʼ: ñee caquiiñeʼ Dios jma ángel guibáʼ la? Biblia na jnézapeʼ nga guiráʼ ni biʼniʼ Dios (Deuteronomio 32:4). Nga runi, biaʼsi nga ca millón de ángel ni bizaʼbe guibáʼ (Daniel 7:10). Cumu nácabe ti Dios ni jma Nandxóʼ la? qué nusiaadxabe nin ti ángel. Yanna, xiñee riníʼ Biblia maʼ gulí Jiobá caadxi binni para gácacaʼ espíritu gátisicaʼ, ne chuʼcaʼ lu Reinu ni nuu guibáʼ yaʼ. Dxandíʼ rusiidiʼ Biblia zacá, peru cadi caniʼni naca ca binni riʼ baʼduhuiiniʼ ora gáticaʼ (Apocalipsis 5:9, 10).
Sti razón para guininu qué zuni Dios zacá nga purtiʼ cadi nga diʼ nga ni gudixhe íquebe para ca baʼduhuiiniʼ ca. Ndaaniʼ jardín ni guyuu Edén que gudxi Dios Adán ne Eva: «Lagapa xiiñitu ne lagaca stale ne laguchá guidxilayú riʼ ne laguni dxiiñaʼ luni» (Génesis 1:28). Dios bizáʼ binni para ganda gapa xiiñiʼ ti gaca ni gudixhe íquebe de guidxá Guidxilayú riʼ de binni ni ruzuubaʼ diidxaʼ. Qué ñuu dxi niníʼ íquebe guutibe ca baʼduhuiiniʼ ca para gúnibe laacaʼ ángel guibáʼ. Biblia na zeeda gaca xiiñiʼ binni casi ti herencia o casi xiixa ni rusigaʼdeʼ Jiobá cani rapa xiiñiʼ (Salmo 127:3). Yanna, ñee zaxha Jiobá xiixa cosa risaca ni bisigáʼdebe binni pa nadxiibe laacaʼ la? Qué ziuu dxi gúnibe nga.
Nabé triste riuu binni ne riuubaʼ ladxidóʼ ora málasi gati ti xiiñiʼ. Yanna, ñee zanda cueza ca binni riʼ guidxiña dxi gúʼyacaʼ laabe sti biaje la? Biblia caníʼ zusibani Dios millón de binni ndaaniʼ ti paraísu lu Guidxilayú riʼ. Bixuiʼlú pabiáʼ ziecheʼ bixhózecabe ne jñaacabe ora guiásacabe, gúʼyacaʼ maʼ nazaacacabe ne guidaagucabe ca binnilídxicabe (Juan 5:28, 29). Casi maʼ bidúʼyanu, Dios nga gudixhe guiniisi ca baʼduhuiiniʼ ca, guibánicaʼ nayecheʼ ne gunibiaʼcaʼ laabe. Nga runi, ca baʼduhuiiniʼ ni maʼ guti ca, cadi nacadícabe ángel guibáʼ, sínuque zandisaʼ Dios laacabe para guibánicabe ndaaniʼ Guidxilayú riʼ ora maʼ gácani ti paraísu. Ora maʼ gaca nga qué ziuu dxi gusaana cani nahuiiniʼ ne cani huaniisi de guni adorarcaʼ Jiobá Dios, purtiʼ zápabe laacaʼ.