1 Zanda guni creluʼ cani cá lu Biblia

«Irá Xquiʼchi Dios, Espíritu Santu uníʼ xi icá, ne nuu ni para usiidi ni laanu ne para ulidxe ni laanu ne para gabi ni laanu paraa cuchéʼ nu.» (2 Timoteo 3:16)

XIÑEE RACA NAGANA PARA BINNI GUNI CRÉ NI. Purtiʼ stale binni riníʼ laaca hombre nga bicaa Biblia. Nuu tu na bisiaadxacabe xiixa lu ca historia zeeda luni, ne xcaadxi ruzeeteʼ huaxiéʼ riquiiñeʼ ca conseju stini ca dxi stinu riʼ.

XI ZACANÉ LII GUNI CRELUʼ NI CÁ LU BIBLIA. Stale de cani riníʼ cadi dxandíʼ ni cá lu Biblia o qué riquiiñeʼ ca conseju stini yanna la? caʼruʼ guʼndaʼ chaahuicabe de laani, sínuque riníʼcabe ni runadiágacabe de sti binni. Peru Biblia na: «Tuuxa ni nahuati runi cré intiica gábicabe laa, peru ti binni nuu xpiaaniʼ la? riníʼ ique ante guni xiixa» (Proverbios 14:15).

Cadi galán diʼ nga guni crenu intiica ni gábicabe laanu, jma galán chinándanu ejemplu stiʼ ca binni de Berea, guidxi riʼ guyuuni ladu guiaʼ ra nuu Grecia yanna. Ca xpinni Cristu ni guleza guidxi ca lu primé siglu que, qué ñuni crecaʼ intiica ni gudxi binni laacaʼ. Laacaʼ «bicaa diaga ca stiidxa Dios ne stale gana ne irá dxi ma cuyubi ca lu Xquiʼchi Dios pa jneza ni caziidi ca» (Hechos 17:11). Ñee cadi galán gúninu zacaca la? Chiguidúʼyanu chupa razón ni nuu para guni crenu Dios nga guníʼ guicá Biblia. Galán guʼndaʼ chaahuiluʼ cani.

Dxandíʼ guca ca historia zeeda lu Biblia. Maʼ stale iza de riníʼ caadxi binni cadi dxandíʼ bibani ca binni ni ruzeeteʼ Biblia ne cadi dxandíʼ guyuu ca lugar ni rieeteʼ luni. Peru nuu stale razón ni rusihuinni cadi dxandíʼ ni riníʼ ca binni ca, ne racanécani laanu guni crenu guca cani ruzeeteʼ Biblia.

Guzéʼtenu chupa ejemplu. Dxiqué guyuu caadxi hombre ni nanna stale de historia ni guniʼcaʼ cadi dxandíʼ diʼ bibani ti rey de Asiria láʼ Sargón, ni ruzeeteʼ Isaías 20:1. Peru despué de 1840 bidxela caadxi arqueólogo ra guca palaciu stibe ne bizulú guleecaʼ guiráʼ yú nuchii ni. Yanna riʼ maʼ stale binni nanna Sargón nga tobi de ca rey ni guyuu Asiria.

Laaca guyuu xcaadxi binni ni guníʼ cadi dxandíʼ bibani Poncio Pilatu, gobernador stiʼ Roma ni biʼniʼ mandar gati Jesús (Mateo 27:1, 22-24). Peru lu iza 1961 bidxélacabe ti guié ndaaniʼ guidxi Cesarea ni nuu Israel, lu guié que cá labe ne xi puestu gúpabe.

Sicaríʼ na ti revista de ca historia zeeda lu Biblia: «Ca arqueólogo ca maʼ bisihuínnicaʼ dxandíʼ guca guiráʼ cani ruzeeteʼ Biblia ni gucuá lu diidxaʼ hebreu ne lu griegu. Laacabe maʼ guníʼcabe dxandíʼ bibani bixhozegola ca israelita, dxandíʼ bireecaʼ de Egipto, riníʼcabe de tiempu biʼniʼ mandar David ne cani za de laa ne de tiempu bibani Jesús ne cani biʼniʼ» (U.S.News & World Report 25 stiʼ octubre 1999). Peru para guni crenu ni cá lu Biblia cadi caquiiñeʼ diʼ guidxela ca arqueólogo ca xiixa ni guluíʼ zacá ni. Yanna, pa nánnanu Dios nga guníʼ guicá libru ca, ñee cadi raʼbuʼ biaʼsi nga ca historia cá luni la?

Racané ca conseju stiʼ Biblia binni lu guiráʼ ni guni. Guzéʼtenu ti ejemplu: stale iza ante ganna binni de ca microbio ca ne ximodo rindísacani guendahuará luguiáʼ binni, lu Biblia maca cá caadxi conseju ni biquiiñeʼ para chuʼ binni nayá ne dede yanna riquiiñeruʼ cani (Levítico 11:32-40; Deuteronomio 23:12, 13). Ne laaca racaneni stale familia para chuʼ nayecheʼ (Efesios 5:28–6:4). Ne cani runi ni na ca conseju stiʼ Biblia jma jneza rúnicaʼ dxiiñaʼ, ne pa laacaʼ nga patrón la? jma riénecaʼ binni (Efesios 4:28; 6:5-9). Nuu binni maʼ bidii cuenta nabani jma nazaaca dede dxi bizulú cayuni ni na Biblia (Proverbios 14:30; Efesios 4:31, 32; Colosenses 3:8-10). Racá ridúʼyanu dxandíʼ racané ca conseju stiʼ Biblia binni. Ñee cadi raʼbuʼ biaʼsi nga ca conseju ni cudii Dios laanu lu Biblia la?

XI RIBEENDÚ BINNI. Biblia rusiaaniʼ «xpiaaniʼ binni ni qué ganna» ne ruluiʼni laa ximodo guibani (Salmo 19:7). Laasini nga libru ni zanda gacané laanu gunibiáʼ chaahuinu Dios, nga nga sti cosa ni zacané laanu iguidxi fe stinu.

Pa riuuláʼdxiluʼ gánnaluʼ jma de laani la? biiyaʼ capítulo 2 stiʼ libru Xipeʼ ndiʼ cusiidiʼ Biblia,a ra na «Biblia ca zeedani de Dios».

[Cani cá ñee yaza]