Xii nga fe
STALE tu riníʼ napa binni fe nga ora guni cré intiica ni gábicabe laa neca gastiʼ ni gusihuinni pa dxandíʼ ni. Casi H. L. Mencken, ti periodista de Estados Unidos ni nabé runibiáʼ binni, guníʼ fe ca nga «guni cré binni zaca xiixa ni nagana neca gastiʼ razón para laani».
Peru Biblia cadi caníʼ diʼ fe ca nga guni cré binni intiica cosa sin razón. Hebreos 11:1 na ora nápanu fe «qué zagúʼ xa ique nu de ni cabeza nu udii [Dios] laanu, ne neca caʼru ihuinni irá ni, peru casi ñaca ma caduʼya nu ni yanna, purti runi cre nu laabe».
Para guiene chaahuinu xipeʼ nga fe la? galán guidúʼyanu ca guendarinabadiidxaʼ zeeda raríʼ:
• Ximodo nga maʼ gadxé fe ni ruzeeteʼ Biblia ne ni runi cré si binni sin ti razón.
• Xiñee naquiiñeʼ gápanu fe ni rieeteʼ lu Biblia.
• Ximodo zanda iguidxi fe stinu.
«Qué zagúʼ xa ique nu de ni cabeza nu» ne de ni «ma caduʼya nu»
Dxi gucuá ca diidxaʼ ni cá lu Hebreos 11:1 ra na «qué zagúʼ xa ique nu de ni cabeza nu» ca nabé biquiiñeʼ binni cani dxiqué. Biquiiñecabe diidxaʼ riʼ ora gúnicabe ti guiʼchiʼ stiʼ tuuxa ni maʼ guzíʼ xiixa para gánnacabe maʼ laabe nga stibe ni. Nga runi, na ti libru ñanda nicá ra ruzulú Hebreos 11:1 ca sicaríʼ: «Fe ca nga casi ti guiʼchiʼ ra na maʼ guzíʼ binni xiixa ni cabeza guicaa».
Quíxhenu ti ejemplu para ganda guiénenu ni. Guníʼ ique guziʼluʼ xiixa ndaaniʼ ti tienda ne cabézaluʼ chisaanacabe ni raliʼdxuʼ. Cumu bidiicabe lii ti factura pur ni guziʼluʼ ca la? nannuʼ o napuʼ «fe» zisaanacabe ni. Peru, pa gueeda gunítiluʼ recibu bidiicabe lii ca maʼ qué zanda gusihuínniluʼ pa stiluʼ ni zisaanacabe ca ne qué zanda guinábaluʼ ni laacabe. Fe ca zeeda gácani casi ti factura o ti guiʼchiʼ ra na maʼ guzíʼ binni xiixa. Pa nápanu fe Dios la? zanda cuézanu gudiibe laanu guiráʼ ni maʼ guniʼbe. Peru pa gusaananu de gápanu fe Dios la? maʼ qué zanda cuézanu guicaanu xiixa ni gudiibe laanu (Santiago 1:5-8).
Lu Hebreos 11:1 laaca cayeeteʼ ca diidxaʼ riʼ: «Ma caduʼya nu ni». Lu ca diidxaʼ ra gucuá ni primé ca cayabi laanu caquiiñeʼ guihuinni pa dxandíʼ nga ni cadúʼyanu neca ruluíʼ cadi zaqué ni. Quíxhenu ti ejemplu: cumu ridúʼyanu paneza nga riree Gubidxa ne paneza nga riaaziʼ ni la? ruluíʼ laani nga rudiini bieque Guidxilayú. Peru ca astrónomo ne cani rusiidiʼ de matemática maʼ bisihuínnicaʼ Guidxilayú riʼ nga rudii bieque Gubidxa ca purtiʼ Gubidxa ca nga nuu galaa de ca planeta ca. Ora maʼ biénenu zacá ni maʼ runi crenu Guidxilayú ca nga rudii bieque Gubidxa ca neca ruluíʼ cadi zacá ni. Yanna, ñee jneza nga guni crenu zacá ni la? Jneza pue. Runi crenu o nápanu fe zacá ni purtiʼ maʼ bidúʼyanu dxandíʼ ni, ne maʼ qué zuni crenu sti cosa neca ruluíʼ cadi zaqué ni.
Xiñee risaca gápanu fe
Casi maʼ bidúʼyanu ca, para gápanu fe ni na Biblia ca la? naquiiñeʼ chuʼ xiixa ni gusihuinni dxandíʼ ni runi crenu, purtiʼ dede racaneni guchaʼnu ni runi crenu pa caquiiñeʼ gúninu ni. Ne caquiiñeʼ gápanu fe ca pur ni guníʼ apóstol Pablu riʼ: «Qué zanda guni binni ni riulaʼdxi Dios pa qué runi cre. Purti para idxiña cabe laabe la? napa cabe xidé guni cre cabe nuu be ne rulabi be cani uyubi laabe» (Hebreos 11:6).
Peru zándaca chuʼ xiixa ni gucueeza lii de gápaluʼ ti fe naguidxi. Lu xcaadxi tema zeeda raríʼ zaziidiluʼ de tapa cosa ni zacané lii para iguidxi fe stiluʼ.