Ni rinabadiidxaʼ cani ruundaʼ

Xi rusiidiʼ ca diidxaʼ ni zeeda lu Proverbios 24:27 laanu.

Libru stiʼ Proverbios cudii conseju riʼ ca hombrehuiiniʼ: «Biʼniʼ dxiiñaʼ fuera de ndaaniʼ lídxiluʼ ne gudixhe ique modo gúniluʼ dxiiñaʼ lu layú stiluʼ. Oracaruʼ naquiiñeʼ gucuiluʼ lídxiluʼ». Xi riníʼ ca diidxaʼ ni zeeda lu versículo riʼ yaʼ. Ni riniʼni nga naquiiñeʼ ganna chaahuiʼ ti hombrehuiiniʼ xi guiráʼ naquiiñeʼ guni ti hombre ni maʼ napa familia ne ante guichaganabe naquiiñeʼ chuʼbe listu para gúnibe cani.

Ni huasiene xquidxi Dios de versículo riʼ nga cadi naquiiñeʼ si gudii ni naca xaíque ndaaniʼ ti yoo ni guibaniné binnilidxi, sínuque laaca naquiiñeʼ guizaalaʼdxiʼ pur gucuí lidxi, nga riníʼ naquiiñeʼ gacanebe binnilídxibe lu ni caquiiñecaʼ ne gacanebe laacaʼ guiziidicaʼ de Dios. Nécapeʼ nga nga ni cayabi Biblia cani naca xaíque ndaaniʼ ti yoo guni la? ruluíʼ si gadxé nga ni cayeeteʼ lu versículo riʼ. Xiñee caninu zacá yaʼ. Guidúʼyanu chupa razón.

Primé razón ca nga, purtiʼ lu hebreu diidxaʼ «gucuiluʼ lídxiluʼ» ca zándaca guiniʼni gucuipeʼ binni ti yoo, ne laaca riniʼni guichaganáʼ binni ne gapa xiiñiʼ. Peru proverbio riʼ cadi caníʼdini gacané ti hombre binnilidxi ni maʼ napa, sínuque caniʼni de tuuxa ni cá ique guichaganáʼ ne gapa xiiñiʼ.

Guiropa razón ca nga, purtiʼ lu versículo ca cusiénepeʼ xii nga ni naquiiñeʼ guni binni primé. Casi ñaca niníʼ versículo ca: «Primeru biʼniʼ ndiʼ la? ne despué gúniluʼ stobi riʼ». Rihuinni dxíchica cadi caníʼ diʼ proverbio ca jma risaca nga guyubi binni gudii ni guibaniné binnilidxi ne despué gacané laacabe guiziidicabe de Dios.

Dxiqué la? pa ti hombre racalaʼdxiʼ gucuí lidxi, o gapa binnilidxi la? naquiiñeʼ guiníʼ ique pa maʼ nuu listu para gapaʼ xheelaʼ ne ca xiiñiʼ ne gudii ni iquiiñecabe. Ante guichaganabe naquiiñeʼ gúnibe dxiiñaʼ lu ca layú stibe. Nga runi rutiixhi ti Biblia ca diidxaʼ stiʼ Proverbios ca sicaríʼ: «Ante gucuiluʼ lídxiluʼ, biiyaʼ gápaluʼ xiixa lu layú stiluʼ ne gudixhe chaahuiʼ xhiiñaluʼ» (La Palabra de Dios para Todos). Ñee dede yanna naquiiñeʼ chinándanu conseju riʼ la?

Dede yanna pue. Ti hombre ni racalaʼdxiʼ guichaganáʼ la? naquiiñeʼ chuʼbe listu dede ante guichaganabe. Laga nazaacabe, naquiiñeʼ gúnibe dxiiñaʼ. Ne naquiiñeʼ gápabe binnilídxibe lu guiráʼ cosa, purtiʼ Biblia na ni maʼ bichaganáʼ ca naquiiñeʼ gudii ni iquiiñeʼ binnilidxi, guʼyaʼ ximodo cayuni sentírcabe ne gacané laacabe chúʼcabe gaxha de Dios, ne pa qué gúnibe ni la? zeeda gácabe jma nadxabaʼ que tobi ni qué runi cré (1 Tim. 5:8). Nga runi, ti hombrehuiiniʼ ni maʼ racalaʼdxiʼ guichaganáʼ naquiiñeʼ guiníʼ ique: «Ñee maʼ zanda gudieeʼ ni iquiiñeʼ binnilidxeʼ la? Ñee maʼ nuaaʼ listu para gacaniáʼ binnilidxeʼ guni adorar Dios, casi xaíque ndaaniʼ ti familia la? Ñee zanda guundaniáʼ binnilidxeʼ Biblia ne cadi gusaanaʼ de guneʼ ni la?». Biblia rusiene chaahuiʼ cani maʼ bizéʼtenu ca nga cani jma risaca guni ti hombre ni maʼ bichaganáʼ (Deu. 6:6-8; Efe. 6:4).

Pur cani maʼ bidúʼndanu ca, guiráʼ hombre ni racalaʼdxiʼ guichaganáʼ naquiiñeʼ guiníʼ ique chaahuiʼ conseju ni zeeda lu Proverbios 24:27. Peru ti gunaa laaca naquiiñeʼ guiníʼ ique pa zanda guni ni naquiiñeʼ guni tobi ni maʼ bichaganáʼ ne gapaʼ ca xiiñiʼ. Zaqueca pa tuuxa guendaxheelaʼ rapa gana gapa xiiñiʼ la? naquiiñeʼ guiníʼ íquecabe pa maʼ nuucabe listu para gusiniisicabe xiiñicabe (Luc. 14:28). Pa chinanda binni ni na Dios lu cani maʼ guninu ca la? zacaneni laacaʼ para cadi gápacaʼ stale guendanagana ne zacaneni laacaʼ guibaninecaʼ binnilídxicaʼ nayecheʼ.

[Ni caníʼ yaza 12]

Xi naquiiñeʼ guiníʼ ique ti hombrehuiiniʼ ni maʼ napa gana guichaganáʼ