Neca nuu xhiiñanu rúninu ni na Dios ne guendanayecheʼ

JIOBÁ racalaʼdxiʼ guibani ca xpinni nayecheʼ (Sal. 100:2). Peru stale biaje nabé nápanu dxiiñaʼ ni gúninu. Zándaca ante chúʼnisanu gúpanu stale tiempu para bíninu stale cosa. Peru yanna, cásica rúninu dxiiñaʼ zaqueca ribeenu tiempu para gúninu cani canabaʼ Dios laanu ne pur nga runi sentirnu maʼ bidxáganu. Zándaca dede guni sentirnu mal purtiʼ qué ganda gúninu guiráʼ cani. Ximodo zanda gúninu xhiiñanu ne xhiiñaʼ Jiobá sin gusaana de chuʼnu nayecheʼ yaʼ (Neh. 8:10).

Cumu nabé nagana nabáninu ca dxi riʼ ne nuu stale cosa ni zanda cuee xtiémpunu la? naquiiñeʼ quixhe chaahuinu guiráʼ ni chigúninu. Nga runi apóstol Pablu bidii conseju riʼ: «Laguuya chaahui ximodo sa tu, cadi casi cani qué riene, sínuque casi cani nuu xpiaaniʼ. Laguni ni iree ndu laga zanda, purti nabé cayuni binni ni cadi jneza ca dxi riʼ» (Efe. 5:15, 16).

¡Nabé galán conseju ca! Nga runi, galán guiníʼ íquenu xi zanda quixhe íquenu gúninu para guidúʼndanu Stiidxaʼ Dios, guidúʼndanenu binnilídxinu, chigucheechenu diidxaʼ, gúninu xhiiñanu ne gúninu xcaadxi cosa.

Zándaca rietenaláʼdxiluʼ pabiáʼ nayecheʼ guyuuluʼ dxi bidiiluʼ lii Dios ne guyuunísaluʼ. Xiñee guyuuluʼ nayecheʼ yaʼ. Pur guiráʼ ni biziidiluʼ de Jiobá ne cani naguixhe íquebe gúnibe. Zándaca gudiʼdiʼ stale beeu de cayuundaluʼ Stiidxaʼ Dios para beeda guiéneluʼ cani cusiidiʼ Biblia. Peru galán ni bíʼniluʼ que, purtiʼ gucané guiráʼ ni biziidiluʼ que lii guchaaluʼ xquendanabániluʼ ne chuʼluʼ nayecheʼ.

Peru zanda gusaana de chuʼnu nayecheʼ pa qué guidúʼndanu Stiidxaʼ Dios. Nga runi, pa nabé nuu xhiiñaluʼ dede qué gápaluʼ tiempu para gúʼndaluʼ ne guiene chaahuiluʼ Biblia, gudixhe chaahuiʼ tiempu stiluʼ. Pa cueeluʼ chupa chonna minutu guiráʼ dxi para gúʼndaluʼ ne guiníʼ íqueluʼ de cani bíʼndaluʼ la? ziuuluʼ gaxha de Jiobá ne ziuuluʼ jma nayecheʼ.

Stale xpinni Dios ribeecaʼ tiempu de xcaadxi cosa para gúnicaʼ cani jma naquiiñeʼ gaca. Yanna lii yaʼ. Guníʼ ique: «Pabiáʼ tiempu riquiiñeʼ para guundaʼ xiixa revista o periódicu, guuyaʼ televisión, gucaadiaʼgaʼ xiixa saa o guneʼ xiixa ni jma riuuladxeʼ yaʼ». Neca galán gúniluʼ ca cosa ca, cadi guicá íqueluʼ gúniluʼ puru si laacani (1 Tim. 4:8). Pa gúʼyaluʼ nabé cunítiluʼ tiempu lu ca cosa ca la? biyubi ximodo quixhe chaahuiluʼ tiempu stiluʼ sti biaje.

Adam, ti binnigola ni nuu ndaaniʼ ti neza binni ridagulisaa ni napa chonna xiiñiʼ, bisiene xi runi para ganda guni guiráʼ ca dxiiñaʼ stiʼ: «Ruyubeʼ guneʼ cani jma si caquiiñeʼ. Ora maʼ caziiladxeʼ, qué runeʼ xiixa ni cuee stale tiempu stinneʼ, ne qué gapaʼ stale cosa ni gucaa naa guniteʼ tiempu para guni tender laacaʼ. Riuuladxeʼ modo nabaneʼ. Ni racaladxeʼ nga cadi gaca nagana para naa guneʼ guiráʼ ni caquiiñeʼ guneʼ».

Cadi dxandíʼ nga maʼ guleendunu ni galán pur cani gudixhe íquenu gúninu lu xquendanabáninu la? Ora guiníʼ íquenu nga, zacaneni laanu chuʼnu nayecheʼ ne guiníʼ íquenu de ca cosa ni zacané laanu. Zacá rusihuinni ejemplu stiʼ Mariusz ni, laa laaca naca binnigola ndaaniʼ ti neza binni ridagulisaa ne napa chonna xiiñiʼ. Laabe guniʼbe: «Dede dxi bizuluáʼ biindaʼ Biblia guníʼ iqueʼ zanda guneʼ guiráʼ dxiiñaʼ stinneʼ jneza. Dxandíʼ, nuu tiru ridxaagaluáʼ guendanagana, ne stale biaje Jiobá si nanna cani. Peru cumu laa racané naa la? qué rusaana de guiníʼ iqueʼ zaree guiráʼ cani guneʼ jneza».

Casi rusihuinni ejemplu stiʼ Mariusz, cadi purtiʼ nuunu nayecheʼ qué zápanu guendanagana, peru racaneni laanu chuʼnu galán ne gudxíʼlunu cani. Lu Biblia zeeda ca diidxaʼ riʼ: «Para binni ni nuu triste guiráʼ dxi feu ni para laa; peru binni nuu nayecheʼ qué rusaana de guni saa» (Pro. 15:15). Ne pa guiníʼ íquenu pabiáʼ nadxii Dios laanu, jma zannaxhiinu laabe ne jma ziuʼnu nayecheʼ (Mat. 22:37).

Ora riguixhe ique ca familia ca gúnicaʼ ni na Jiobá primé lu xquendanabánicaʼ jma riuucaʼ nayecheʼ. Pa cada tobi de laacabe chinándacabe ca conseju ni zeeda lu Biblia, qué zapapécabe guendanagana, ziuucabe tobi si ne zabánicabe galán. Nga zacané laacabe cadi chuʼdíndecabe ralídxicabe ne ziuucabe tobi si (Sal. 133:1).

Laaca galán guni ca familia ca xhiiñaʼ Dios juntu. Mariusz guníʼ: «Para naa jma risaca tiempu ni chuaaniáʼ binnilidxeʼ», ne laaca guniʼbe: «Nabé racané xheelaʼ naa. Rúnidu stipa pur chigucheechedu diidxaʼ juntu ne ora ganda la? rinebe naa para chigusiadu ndaaniʼ estadiu ra rápadu ca guendaridagulisaa stidu ne ora chigudieeʼ libana ndaaniʼ xcaadxi neza binni ridagulisaa. Riuaaʼ nayecheʼ purtiʼ racanebe naa».

Dxandíʼ, Stiidxaʼ Dios canabaʼ ca xpinni Cristu gudiicaʼ ni caquiiñeʼ binnilídxicaʼ (1 Tim. 5:8). Peru pa xhiiñanu nabé ribee tiempu stinu ne rusidxágani laanu la? zándaca maʼ qué ziuʼnu nayecheʼ ra gúninu xhiiñaʼ Dios. Pa guizaacanu zacá, caquiiñeʼ guinábanu Jiobá gacané laanu (Sal. 55:22). Nuu tu laa ruuyaʼ caquiiñeʼ guchaa de dxiiñaʼ ti ganda guni xhiiñaʼ Reinu primé lu xquendanabani. Nin ti xpinni Cristu cadi naquiiñeʼ gusaana de guni xhiiñaʼ Dios, ti dxiiñaʼ ni nabé risaca, purtiʼ si napa ti dxiiñaʼ ra runi ganar stale ne ni ribee tiempu stiʼ ne rusidxaga laa (Pro. 22:3).

Pa nápaluʼ ti dxiiñaʼ ni nabé ribee xtiémpuluʼ la? zanda gucaaluʼ xi cabeenduluʼ ne xi cunítiluʼ pur laani, ne pa cudiicabe lii ti dxiiñaʼ laaca naquiiñeʼ gúniluʼ zacaca. Neca galán nga gapa binni ti dxiiñaʼ ni riuulaʼdxiʼ ne ra guiaxa galán, naquiiñeʼ guʼyaʼ pa náparuʼ tiempu para gusiidiʼ binnilidxi de Dios. Guníʼ ique chaahuiʼ guiráʼ ni maʼ bizéʼtenu ca ne gudixhe ique gúniluʼ xiixa ni gusihuinni riuuláʼdxiluʼ chuʼluʼ gaxha de Jiobá.

Pa gúʼyaluʼ qué ganda guiniisiluʼ lu stiidxaʼ Dios pur dxiiñaʼ ni nápaluʼ yanna la? cadi guiníʼ íqueluʼ maʼ qué zanda guʼnuʼ gastiʼ. Stale xpinni Cristu huachaacaʼ modo nabánicaʼ para gúnicaʼ jma lu xhiiñaʼ Jiobá. Ti hombre Testigu de Polonia guníʼ: «Gupaʼ ti dxiiñaʼ ni bicaa naa guireeʼ de viaje ne pur ngue qué ñapaʼ tiempu para ñuneʼ xhiiñaʼ Dios nin para binnilidxeʼ. Ngue runi bisaanaʼ de guneniáʼ empresa que dxiiñaʼ». Yanna nápabe ti dxiiñaʼ ni qué ribeepeʼ xtiémpube ne ni qué rusidxágapeʼ laabe.

Riuʼnu nayecheʼ ora racanenu xcaadxi binni

Jesús guníʼ: «Jma nayeche ni rudii que ni ricaa» (Hech. 20:35). Nuu stale modo zanda gusihuinni ca xpinni Cristu dxandíʼ ni na ca diidxaʼ ca. Nuu tiru zanda gusiéchenu tuuxa binni ora guxidxinenu laa, ora gudíʼnanu o gábinu laa xiixa diidxaʼ ni gusihuinni cudiʼnu xquíxepeʼ laa pur xiixa dxiiñaʼ biʼniʼ ndaaniʼ xquidxi Dios. Laaca ziuʼnu nayecheʼ pa gúninu zacá.

Apóstol Pablu bidii conseju riʼ ca xpinni Cristu: «Lagacané cani cadxibi, ne cani caʼru uzuhuaa chaahui» (1 Tes. 5:14). Pa nuu tuuxa triste o qué guidxela xi guni zándaca guiníʼ ique qué zanda gudxiilú ca guendanagana stiʼ. Ximodo zanda gacanenu laacabe yaʼ. Pa gúʼyaluʼ ti xpinni Cristu maʼ huaxiéʼ napa gana guni ni na Jiobá la? guluu gana laabe. Pa gúniluʼ zacá laaca zaguuni gana lii. Dxandíʼ, nuu stale guendanagana ni qué ziuu dxi guni chaahuiʼ nin tobi de laanu. Ni zanda gúninu nga gusihuínninu dxandipeʼ riénenu xpinni Cristu ca. Bisietenalaʼdxiʼ laabe pa guni crebe zacané Jiobá laabe sin guinabaʼ laabe xiixa la? qué ziuube triste (Sal. 27:10; Isa. 59:1).

Laaca zanda guni invitarnu laabe chigucheechenebe laanu diidxaʼ. Dxi biseendaʼ Jesús ca 70 discípulo stiʼ chigucheecaʼ diidxaʼ biseendabe laacaʼ chupa chupa (Luc. 10:1). Zaqué gunda gucanésaacabe ne guluusaacabe gana laacabe. Cadi dxandíʼ ngaca nga ribeendunu ora chigucheechenu diidxaʼ ne sti xpinni Cristu ni maʼ huaxiéʼ napa gana guni ni na Jiobá la?

Nánnanu ridxaagalunu stale guendanagana lu xquendanábaninu. Neca zacá, Pablu cayabi laanu xi naquiiñeʼ gúninu: «Laguieche irá dxi purti xpinni Señor laatu. Ne sti tiru rabe laatu, laguiecheʼ» (Fili. 4:4). Cumu nadxiiluʼ Jiobá, ruzuubaluʼ stiidxabe ne qué rusaanaʼ de gúniluʼ xhiiñabe ne stale gana la? nuuluʼ nayecheʼ purtiʼ cayúniluʼ ni jneza. Ne ni jma risaca nga racanebe laanu para ganda gudxíʼlunu ca guendanagana stinu (Rom. 2:6, 7).

Fe stinu racané laanu gánnanu mayaca guedané Dios guidxilayú cubi ni guníʼ gudii laanu. ¡Zabáninu nayecheʼ ne zacaanu stale ndaayaʼ! (Sal. 37:34.) Nga runi, cadi gusaana de chuʼnu nayecheʼ. Cadi gusiáʼndanu guiráʼ ndaayaʼ stiʼ Dios dede ne cani cudiibe laanu yanna riʼ. Pa gúninu zacá zanda gúninu ni na Jiobá ne guendanayecheʼ (Sal. 100:2).

[Diagrama ni zeeda lu yaza 8]

Naquiiñeʼ quixhe chaahuinu tiempu stinu para cadi gusaana de chuʼnu nayecheʼ

NI RÚNINU ORA RIZIILÁʼDXINU

BINNILÍDXINU NE RALÍDXINU

DXIIÑAʼ

CA GUENDARIDAGULISAA

GUIDÚʼNDANU STIIDXAʼ DIOS

GUCHEECHENU DIIDXAʼ

[Dibuju/foto ni zeeda lu yaza 10]

Ñee zanda gacaneluʼ ca xpinni Cristu ni maʼ huaxiéʼ napa gana guni ni na Jiobá la?