Gastiʼ zabeendú Binidxabaʼ ne modo runi mandar
«Qué zabeendú binni malu ni galán.» (ECL. 8:13)
1. Xiñee nabé galán gánnanu maʼ cadi candaa zaca juzgar ca binni malu.
ZEDANDÁ dxi gaca juzgar ca binni malu ne laacaʼ naquiiñeʼ quíxecaʼ pur cani bíʼnicaʼ (Pro. 5:22; Ecl. 8:12, 13). ¡Aque galán gánnanu nga xa, jmaruʼ si para ca binni ni riuulaʼdxiʼ guni ni jneza ne huayuni huantar stale cosa ni cadi jneza ni cayuni stale binni malu laacaʼ! Binidxabaʼ nga ni jma qué iquiiñeʼ ni napa xidé cuídxicabe cuenta, purtiʼ laa nga bixhoze guiráʼ ca cosa malu (Juan 8:44).
2. Xiñee naquiiñeʼ tiidiʼ tiempu para gaca chaahuiʼ guendanagana ni bizulú Edén que.
2 Binidxabaʼ nabé bidxiibaʼ laca laa, ngue runi bicaabe Adán ne Eva, cani guleza ndaaniʼ jardín ni guyuu Edén que, cadi gudiicaʼ lugar guni mandar Dios laacaʼ. Guirópacaʼ guyuucaʼ ladu stibe dxi bicaalube derechu ni napa Jiobá de guni mandar ne zaqué beeda gácacaʼ binni ruchee (Rom. 5:12-14). Neca nanna Dios xi zabeendúcabe pur ni gudixhe íquecabe gúnicabe que ne pur qué ninácabe nuzuubacabe stiidxabe, bidiibe lugar gudii binni ne guiráʼ ca ángel stibe cuenta xi zabeendú cani bichee que. Ngue runi bidiibe lugar tiidiʼ tiempu para gaca chaahuiʼ guendanagana que ne gusihuínnibe cadi jneza ni gudixhe ique cani qué nuzuubaʼ diidxaʼ que.
3. Ximodo naquiiñeʼ guidúʼyanu «cani runi mandar ndaani» xquídxinu.
3 Dxi maʼ qué niná binni guidxilayú ñuni mandar Jiobá laacaʼ la? gupa xidé gudíxhecaʼ laca laacaʼ modo gaca mandarcaʼ. Lu carta ni bicaa Pablu ra nuu ca xpinni Cristu de Roma bizeeteʼ laacabe nga «cani runi mandar ndaani» xquídxinu. Ne tobi de laacabe nga césar Nerón ni biʼniʼ mandar lu Imperiu stiʼ Roma lu iza 54 dede 68. Apóstol Pablu guníʼ «Dios nga gudixhe cani nuu para guni mandar Iaanu» (biindaʼ Romanos 13:1, 2). Xii nga nuube guiniʼbe yaʼ. Ñee nuu Pablu guiníʼ jma galán gudiʼnu lugar guni mandar binni guidxilayú laanu que Jiobá la? Coʼ. Ni caniʼbe raríʼ nga gudixhe Dios guni mandar binni guidxilayú laanu, ne laga cudiibe lugar gúnicaʼ ni la? ca xpinni Cristu naquiiñeʼ guzuubacaʼ stiidxacabe.
Ti neza ni qué zacané binni cueendú ni galán
4. Xiñee rininu intiica ni guni ca gobiernu ca qué zareeni laacaʼ jneza.
4 Peru guiráʼ ni cucaa Binidxabaʼ ca gobiernu políticu ni nuu lu Guidxilayú riʼ gúnicaʼ qué zareeni laacaʼ jneza. Xiñee yaʼ. Tobi de ca razón ca nga purtiʼ runi mandarcaʼ casi na íquecaʼ ne cadi casi riníʼ ique Jiobá. Dxandíʼ, Jiobá si nga nuu xpiaaniʼ, nga runi laasibe nánnabe ximódopeʼ nga naquiiñeʼ gaca mandar binni (Jer. 8:9; Rom. 16:27). Gadxepeʼ Dios de binni guidxilayú. Xiñee yaʼ. Purtiʼ binni guidxilayú napa xidé guchee stale biaje para guni ni jneza, peru Dios nanna xi caquiiñeʼ guni para guiree ca cosa ca laa jneza. Nga runi, guiráʼ gobiernu ni qué guyubi guni ni nabe qué zuni mandar jneza. Cumu puru si ni cadi jneza nga cá ique Binidxabaʼ guni la? nga runi zanda guininu intiica gobiernu ni quíxhebe lu guidxilayú riʼ qué zuni ni jneza.
5, 6. Xi bicaa Binidxabaʼ gudxii deche Jiobá casi rihuinni lu cani huayuni binni.
5 Laanu nánnanu nin ti binni nuu xpiaaniʼ qué zaná guni xiixa dxiiñaʼ pa qué zabeendú ni galán. Peru pa guicá íquebe gúnibe ni la? zedandá ora zudiibe cuenta cadi jneza ni bíʼnibe que. Ne zacapeʼ nga huayuni binni: stale biaje huadiicaʼ cuenta qué ribeenducaʼ gastiʼ ora gucaalucaʼ Dios ni jma nandxóʼ (biindaʼ Proverbios 21:30). Ne ngapeʼ nga ni biʼniʼ Binidxabaʼ. Cumu guníʼ íquebe jma risácabe que Jiobá la? bidxii déchebe laa. Laca laabe gudixhe íquebe gúnibe ni cadi jneza, ne gastiʼ zanda gúnibe para cadi guinitilube.
6 Gayuaa iza despué de bicaalú Binidxabaʼ Jiobá, gucuá caadxi diidxaʼ ni guníʼ ti hombre biʼniʼ mandar Babilonia ni bisihuinni runi cré laca laa, cásica biʼniʼ Binidxabaʼ que. Laabe guniʼbe: «Zaguibáʼ guibáʼ. Zaguaaʼ trono stinneʼ luguiáʼ de ra nuu ca beleguí stiʼ Dios, ne zabiéʼ lu dani ra ridagulisaa [binni], ca lugar ra jma zitu ni nuu ladu guiaʼ. Zaguibáʼ luguiáʼ de ra nuu ca lugar jma nasoo stiʼ ca za ca; zeeda gacaʼ casi ni Nuu Jma Luguiáʼ» (Isa. 14:13-15). Gastiʼ nibeendú hombre que ne ni gucuá ique guni ne guiráʼ cani biʼniʼ mandar ndaaniʼ guidxi que binitilucaʼ. Zacaca nga mayaca guizaaca Binidxabaʼ ne guiráʼ ca binni ni cayuni ni nabe.
Xiñee bidii Dios lugar guni mandar Binidxabaʼ
7, 8. Ra bidii Jiobá lugar guni mandar binni guidxilayú pur ti tiempu, xi ndaayaʼ huayedaneni.
7 Nuu tu laa rinabadiidxaʼ xiñee qué nucueeza Jiobá de ñuu binni ladu stiʼ Binidxabaʼ ne xiñee qué nucueezabe de nuyúbicaʼ sti modo ñaca mandarcaʼ ni qué zacané laacaʼ cueenducaʼ ni jneza. Dxandíʼ, laabe nácabe ti Dios ni jma nandxóʼ ne ñanda nuyúbibe modo para cadi ñuni binni zaqué (Éxo. 6:3). Peru qué ñúnibe ni, purtiʼ guníʼ ique chaahuibe xi guiráʼ zabeendube despué pa qué guni chaahuibe guendanagana ni guyuu ora bicaalúcabe laabe ndaaniʼ jardín que. Despué zahuinni naca Jiobá ti Rey nachaʼhuiʼ ne ni nadxii binni ne guiráʼ binni ni guzuubaʼ stiidxabe zabeenducaʼ ni galán pur ni gudixhe íquebe gúnibe que.
8 Pa ñaca qué nudii Adán ne Eva lugar nuxheleʼ Binidxabaʼ laacaʼ de Dios, qué ñapa binni guidxilayú stale yuubaʼ. Peru casi maʼ bizéʼtenu ca, pur bidii Jiobá lugar guni mandar binni guidxilayú ti tiempu si huayedaneni ndaayaʼ. Xiñee rininu zacá yaʼ. Purtiʼ stale binni maʼ bidii cuenta jma galán nga gucaadiágacaʼ Dios ne guni crecaʼ zacanebe laacaʼ. Lu ca gayuaa iza ni maʼ gudiʼdiʼ ca, huayubi binni stale modo guni mandar laca laa, peru nin tobi de laacani qué huayacané binni. Ne nga huayacané ca xpinni Dios guni crecaʼ de guidubi ladxidoʼcaʼ gobiernu si stiʼ Jiobá nga ni nanna guni mandar. Dxandíʼ, ra cudii Dios lugar guni mandar Binidxabaʼ, guiráʼ binni cayapa guendanagana dede ne ca xpinni Dios. Peru ca hombre ne ca gunaa ni cadi cusaana de guni ni na Dios laaca huabeenducaʼ ni galán.
Ra bicaalúcabe Jiobá gucaneni gusisácacabe laabe
9, 10. Xi riníʼ ique binni ora gúʼyacaʼ modo cayuni mandar Binidxabaʼ.
9 Neca bidii Jiobá lugar guni mandar binni laca laa, guirutiʼ zanda guiníʼ cadi jneza modo runi mandarbe. Xiñee yaʼ. Purtiʼ cahuinni dxichi cadi cabeendú binni ni galán ra cayuni mandarcaʼ laca laacaʼ casi bicaa Jeremías (biindaʼ Jeremías 10:23). Ne dede dxi bidxii deche Binidxabaʼ Jiobá, bisihuinni Jiobá naca ti Dios nachaʼhui ne runi ni jneza. Xiñee rininu zacá yaʼ.
10 Qué raca nagana para binni gudii cuenta naca Jiobá ti Dios nachaʼhui. Xiñee yaʼ. Purtiʼ cudii binni cuenta nuu stale guendaquéiquiiñeʼ lu guidxilayú riʼ pur modo cayuni mandar Binidxabaʼ. Peru guiráʼ binni ni nadxii Jiobá cusisácacaʼ laabe. Qué ridxagayaanu gánnanu ruzulú binni guni ni na Jiobá ora gúʼyacaʼ modo cayuni mandar Binidxabaʼ. Ne laaca racaneni laacaʼ gánnacaʼ jneza nga ni biʼniʼ Jiobá ra qué nunitilú Binidxabaʼ dxi bicaalú laabe que, ti gudii binni cuenta tupeʼ nga napa derechu de guni mandar. Para ganda guiénenu ni bizéʼtenu ca la? guidúʼyanu caadxi guenda sicarú napa Jiobá, ne ximodo jma cusihuínnibe cani dede dxi bizulú Binidxabaʼ cayuni mandar lu guidxilayú riʼ.
11. Ximodo maʼ bisihuinni Jiobá nadxii laanu.
11 Nadxiibe binni. Casi na Biblia, de «Dios nga reeda enda ranaxhii» (1 Juan 4:8). Ne rihuinni dxichi nápabe guenda ca ra bizaʼbe binni guidxilayú. Ne zaqueca pur bidiibe laacaʼ ti cuerpu ni guyáʼ sicarú ne guluube laacaʼ ndaaniʼ ti jardín sicarú ni napa guiráʼ ni caquiiñecabe para guibánicabe nayecheʼ (Gén. 1:29-31; 2:8, 9; Sal. 139:14-16). Peru dxi beeda chuu guendaquéiquiiñeʼ lu guidxilayú riʼ, gudixhe Jiobá xcaadxi modo para gusihuinni nadxii binni. Ximodo bíʼnibe ni yaʼ. Tobi de laacani nga ora bizeeteʼ apóstol Juan ca diidxaʼ guníʼ Jesús riʼ: «Nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Ñee rábiluʼ nuu sti modo jma galán nusihuinni Dios nadxii binni que guseendaʼ Xiiñiʼ para gulá ca binni ruchee la? (Juan 15:13.) ¡Guizáʼ sicarú modo bisihuinni Dios nadxii binni, neca gucaná ora biʼniʼ ni! Nga runi, naquiiñeʼ gúninu stipa pur gusihuínninu guenda stiʼ Dios riʼ guiráʼ dxi, cásica biʼniʼ Jesús ni (Juan 17:25, 26).
12. Xi ejemplu nápanu ni rusihuinni nandxóʼ Jiobá.
12 Nandxoʼbe. «Dios ni [jma] nandxóʼ» si nga zanda gudii laanu guendanabani (Apo. 11:17; Sal. 36:9). Peru xi rizaaca ora gátinu yaʼ. Xi rizaaca ne guiráʼ ni rietenaláʼdxinu, modo laanu ni bichaa ra ziniisinu pur cani gudixhe íquenu, pur cani bíninu ne pur guiráʼ ni bizaacanu lu xquendanabáninu yaʼ. Jiobá zanda gapa chaahuiʼ guiráʼ cani ndaaniʼ ique ti ora guedandá dxi gusibánibe laanu, guindísabe laanu cásica nácanu ante (Juan 5:28, 29). Neca qué niguixhe ique Dios ñati binni dxi bizaʼbe laacaʼ, guendaguti ca racané gusihuínnibe pabiáʼ nandxoʼbe ora guindísabe binni de lade gueʼtuʼ. Rihuinni dxíchica nandxoʼbe.
13. Ra guti Jesús, ximodo bisihuinni Jiobá runi ni jneza.
13 Rúnibe ni jneza. Jiobá qué rusiguii ne qué runi ni cadi jneza (Deu. 32:4; Tito 1:2). Qué rusaana de guiniʼbe ni dxandíʼ ne gúnibe ni jneza, neca nuu tiru ruluíʼ qué zabeendube ni galán pur ni gúnibe (Rom. 8:32). ¡Nanna pabiáʼ biuubaʼ ladxidoʼbe ora bíʼyabe Xiiñibe ni nabé nadxiibe biiti binni laa lu ti yaga casi ti binni ni guníʼ mal de Dios yaʼ! Peru xiñee bidiibe lugar biiticabe Xiiñibe zaqué yaʼ. Purtiʼ nadxiibe binni guidxilayú ne racaláʼdxibe gusihuínnibe rúnibe ni jneza (biindaʼ Romanos 5:18-21). Qué zadxélanu sti binni ni runi ni jneza casi Jiobá, purtiʼ biale de ndaaniʼ ladxidoʼbe gulabe binni ni qué runi ni jneza.
14, 15. Ximodo maʼ bisihuinni Jiobá nabé nuu xpiaaniʼ ne qué ridxiichi nagueenda.
14 Nuu xpiaanibe. Dxi bichee Adán ne Eva, gudíxheca Jiobá xi guni ti gaca chaahuiʼ guiráʼ guendanagana guyuu pur bicaalúcabe laabe (Gén. 3:15). Rihuinni nabé nuu xpiaanibe purtiʼ oraqueca gudíxhebe xi gúnibe ne chaahuidugá biluiʼbe ca xpínnibe xi cá íquebe gúnibe (Rom. 11:33). Laabe nánnabe ximodo zanda gaca chaahuiʼ guiráʼ ca cosa ca. Ndaaniʼ ti guidxilayú ra nuu stale binni ni riuuné ni cadi xheelaʼ, ra nuu guendaridinde, ra nuu binni ni qué riene, ra guirutiʼ ruzuubaʼ diidxaʼ, ra nuu stale binni malu, ra nuu tu ruyubi si ni guidxaaga ne ra nuu stale binni ni riníʼ ti cosa ne gadxé ni runi, Jiobá huasihuinni stale biaje nabé nuu xpiaaniʼ. Discípulo Santiagu guníʼ: «Ni ma bisiene Dios laa la? ma qué lica zucaa ique ni nadxabaʼ, qué zuyubi diidxaʼ, ne qué zucaa lú, sínuque zaca nadóʼ ne ziuu razón. Ziá binni ne zuni stale enda nachaʼhui de idubi ladxidó, ne cadi para udxiiba binni laa» (Sant. 3:17).
15 Qué ridxiichibe nagueenda. Qué ñuu dxi nihuinni qué ridxiichi Jiobá pa ñaca qué ñalené binni donda ne qué nucheecaʼ. Jiobá huayuni huantar guiráʼ guendaquéiquiiñeʼ huayuni binni biaʼ dxi huabani lu Guidxilayú riʼ, nga runi zanda guininu laasibe nga binni ni rusihuinni qué ridxiichi nagueenda. Pur nga naquiiñeʼ gudii ca xpinni Cristu xquíxepeʼ laabe, ne casi guníʼ Pedru: «Laguietenalaʼdxi cabeza Señor stinu sin [guidxiichi] purti racalaʼdxi ilá binni» (2 Ped. 3:9, 15).
16. Xiñee riéchenu ora guidúʼyanu rilaselaʼdxiʼ Jiobá laanu.
16 Rilaseláʼdxibe binni. Guiranu nácanu binni ruchee, nga runi rucheʼnu stale biaje (Sant. 3:2; 1 Juan 1:8, 9). ¡Guizáʼ riuʼnu nayecheʼ ora gánnanu nuu Jiobá para gutiidilaʼdxiʼ donda stinu! (Isa. 55:7.) Neca dede dxi gúlenu maca nácanu binni ruchee, riuʼnu nayecheʼ purtiʼ rutiidiláʼdxibe stóndanu (Sal. 51:5, 9, 17). Ora guilaselaʼdxiʼ Jiobá laanu, rucaa nga laanu gannaxhiinu laabe ne guilaseláʼdxinu sti binni (biindaʼ Colosenses 3:13).
Xiñee nuu stale guendaquéiquiiñeʼ lu guidxilayú riʼ
17, 18. Xi cusihuinni qué huabeendú ca binni ni cayuni ni na Binidxabaʼ ni galán.
17 Biaʼ dxi huabani binni, maʼ bihuinni cadi jneza modo cayuni mandar binni lu guidxilayú ni nuu lu naʼ Binidxabaʼ. Laabe nga bicaabe Adán ne Eva chuuláʼdxicaʼ guni mandar binni guidxilayú laacaʼ que Dios. De raqué nga gudíxhecabe stale modo guni mandárcabe laca laacabe, peru guiráʼ ni huayúnicabe qué huaree cani jneza. Guiráʼ yuubaʼ ne guendananá ni huadxaagalú binni ni nuu lu guidubi naca Guidxilayú, cusihuínnicani maʼ cadi candaa zusaana binni de guni mandar.
18 Ni runi Binidxabaʼ para guni binni ni naʼ nga rucaabe laacaʼ guiníʼ íquecaʼ guyúbicaʼ puru para laasicaʼ ne cadi guizaaláʼdxicaʼ xcaadxi binni. Peru qué zuyúbinu para laasinu, purtiʼ nadxiinu binni ne zacá nga runi mandar Jiobá ca xpinni. Qué huayanda gacané Binidxabaʼ ca xpinni gatadxí ladxidoʼcaʼ, chuʼcaʼ nayecheʼ ne guibánicaʼ sin guidxíbicaʼ. Nga rusihuinni jma galán runi mandar Jiobá. Xi ridúʼyanu yanna riʼ para guininu jma galán runi mandarbe yaʼ. Zadúʼyanu nga lu sti tema ca.
Xi rusiidiʼ ca textu ni zeeda raríʼ laanu de ca binni ni runi mandar.
• Proverbios 21:30
• Jeremías 10:23
[Ca dibuju/foto ni zeeda lu yaza 25]
Qué huayuu dxi gacané modo cayuni mandar Binidxabaʼ binni guidxilayú
[Ra gucuaacabe dibuju o foto]
U.S. Army photo
[Ra gucuaacabe dibuju o foto]
Foto stiʼ OMS, ni gulee P. Almasy
[Dibuju/foto ni zeeda lu yaza 26]
Zusihuinni Jiobá pabiáʼ nandxóʼ ra guindisaʼ binni de lade gueʼtuʼ
[Dibuju/foto ni zeeda lu yaza 27]
Bisihuinni Jiobá nabé nadxii binni ne runi ni jneza ra bidii lugar gati Xiiñiʼ