Carta ni zeeda de Méjicu

«Ñee nadxii Jiobá laadu neca gadxé diidxaʼ rinidu la?»

MELESIO nga ti hombre ni riníʼ diidxaʼ oʼdam, riuu biaje riétebe de lu dani para chiyúbibe dxiiñaʼ ndaaniʼ guidxi. Ca biaje ca nga riebe ca guendaridagulisaa ni rapa ca testigu stiʼ Jiobá ne rinebe libru ne revista ni caníʼ de Biblia para quíʼzibe ranuu ca binni ni runibiaʼbe. Ne rinábabe laadu, ca Testigu, chigánnadu laacabe ne gusíʼdidu laacabe de Biblia.

Ca binni ni riníʼ oʼdam (laaca runibiáʼcabe laacaʼ casi tepehuano) nabézacabe ti lugar zitu stiʼ Sierra Madre Occidental, ladu guiaʼ de Méjicu. Neza binni ridagulisaa stiʼ ca testigu stiʼ Jiobá ni nuu jma gaxha de raqué riaana ni biaʼ 240 kilómetru. Ti dxi, chupa chonna de laadu guníʼ íquedu chuudu raqué.

Biyúbidu ti camioneta, caadxi yoo huiiniʼ de lari, sacu ni rásicabe ndaaniʼ, guendaró ne gasolina para chonna gubidxa. Nacándaruʼ bireʼdu de Durango biaʼ las cuatro. Yenedu xhono hora para guzadu lu ti neza yu ni cá ndaaniʼ dani. Ra biluxe neza que nga ruzulú xquidxi ca binni ni riníʼ diidxaʼ oʼdam. Nezaludu que nuu ti barranca nabé gueteʼ ne nuu sti dani.

Bisaanadu camioneta que ndaaniʼ ti «ranchu huiiniʼ» (ti guidxi huiiniʼ) ne ziuurudu a pie, nuadu guiráʼ ni zinedu. Biaʼsi chonna hora yenedu para biétedu ndaaniʼ barranca que. Raqué bicuidu ca yoo huiiniʼ de lari que ne yetópadu yaga para gúnidu guí ti cadi guidxiña maniʼ guiʼxhiʼ ladu. Para cadi guizuíʼ guí que huaxhinni la? cada chonna hora raca caber laadu gápadu ni.

Ora birá gueelaʼ sti dxi que, bizuludu gudxíbadu sti dani, peru stale biaje binítidu purtiʼ nápani stale neza huiiniʼ. Cumu tobi de laadu nanna huiiniʼ diidxaʼ tepehuano la? qué nunítidu tiempu bizulúcadu bicheechedu diidxaʼ ra nuu ca binni ni nabeza ndaaniʼ ca yoo ni zidxéladu que. Nabé bidxagayaadu ora gudxi binni laadu, ndaaniʼ guidxi Los Arenales, guidxi ra chuudu que, nuu binni na testigu stiʼ Jiobá laa ne rápacaʼ guendaridagulisaa sticaʼ raqué. Neca bicaani laadu guiníʼ íquedu pa dxandíʼ ni na ca binni que la? peru laaca biéchedu ora gúnnadu ni.

Cumu guizáʼ guzadu para yendadu Los Arenales la? biasa jma bitii ñeedu. Ndaaniʼ guidxi huiiniʼ que nuu chupa chonna si yoo de beñe ni dxiʼbaʼ cartón ique. Gastiʼ scuela nin biaaniʼ lugar que. Nabé pobre ca binni que, nabézacabe zitu de binni ne ni rócabe nga gueta de xubaʼ ne pa náparucabe xiixa. Paraverde bidxéladu Melesio. Guizáʼ biéchebe ora bíʼyabe laadu ne oraqueca biʼniʼ invitarbe laadu ralidxi huiinibe. Nahuiinigaruʼ hombre que ne nalásebe, laabe gúdxibe laadu guiráʼ dxi rinábabe Jiobá guseendaʼ ca Testigu stiʼ para gusiidicaʼ laabe ne familia stibe de Biblia ne zaqueca gusiidicaʼ xcaadxi binni nabeza raqué. Gúdxibe laadu qué gánnabe ximodo guicábibe guiráʼ ni rinabadiidxaʼ ca binni que laabe.

Ca binni ni riníʼ diidxaʼ oʼdam rúnicaʼ brujería. Riquiiñecaʼ dxita ladi bisiá ne duubiʼ stícame casi amuletu, runi adorarcaʼ stipa stiʼ ca cosa ni nuu lu Guidxilayú casi bi yooxhoʼ ne ridxíbicaʼ caadxi bruju ni nuu ndaaniʼ guidxi que ne ca bruju que riguítecaʼ laacabe. Melesio bisiene laadu lu ca biaje guyé ndaaniʼ guidxi que biziidibe Jiobá nga Dios ni dxandíʼ, ngue runi binidebe guiráʼ cosa ni runi adorarbe. Ca vecinu stibe gúdxicaʼ laabe zuuti ca dios que laabe, peru cumu qué ñácabe gastiʼ la? bidiicaʼ cuenta jma napa Jiobá poder que ca dios sticaʼ. De raqué maʼ bizulú guyé ca binni que ora ruundané Melesio binnilidxi para guiziidicaʼ de ca libru ne ca revista stiʼ ca Testigu.

Melesio gudxi laacabe ni naquiiñeʼ gúnicabe primé nga guzaaquicabe guiráʼ bidóʼ stícabe ne ca amuletu nápacabe. Stale de laacabe maʼ qué nidxíbicabe ne maʼ qué ñuni crécabe ca cosa ni zeeda de ca espíritu malu. Qué nindaa de ngue jma de ochenta binni rié ora ruundanebe ca binnilídxibe. Guizáʼ bidxagayaadu pur ni gúnnadu que, ngue runi, gudixhe íquedu gaca ti guendaridagulisaa huadxí queca. Ne pur ngue gudxiʼbaʼ caadxi binni maniʼ sticaʼ para chitídxicaʼ ca binni ni ridagulisaa ralidxi Melesio que xi chigaca. Neca galaa semana guca guendaridagulisaa que ne huaxiéʼ tiempu gúpacabe para gábicabe binni chigaca ni la? peru guyé veinticinco binni, nuu de laacaʼ guzacaʼ ne xcaadxi guyé deche burru.

Biquiiñedu Melesio para gábidu ca binni ni nuu raqué guinabadiidxacaʼ laadu ni qué riénecaʼ de lu Biblia. Ca binni que gunabadiidxacaʼ laadu: «Ñee nadxii Jiobá laadu neca rinidu sti diidxaʼ la?», «Ñee rucaadiágabe laadu ora runi orardu laabe lu stiidxadu la?» ne «Ñee zietenaláʼdxibe de laadu ora gueeda Armagedón neca nabézadu zitu de guidxi la?». Guizáʼ galán biʼniʼ sentirdu ora biquiiñedu Biblia para bisiénedu laacabe nadxii Jiobá ca binni ni nayá ladxidóʼ, neca zitu nabézacaʼ o gadxé diidxaʼ riniʼcaʼ. Ora biluxe bisiénedu laacabe cani gunabadiidxacabe que, gunábacabe laadu guséʼndadu tuuxa ni gusiidiʼ laacabe jma.

Biluxe si guendaridagulisaa que gudóʼnedu ca binni ni nacubi guca xhamígudu que guendaró stidu. Qué nindaa de ngue bixhinni, ne cumu nasoo lugar que la? guizáʼ nananda raqué, ngue runi dede biéchedu ora gúdxicabe laadu pa ziaanadu ndaaniʼ ti cuartu ni deruʼ cucuícabe ne gunidu ziaanadu raqué. Sti dxi que yenécabe laadu ra bisaanadu camioneta stidu, peru bichuugunécabe laadu neza. Nabé maʼ bidxágadu ora bibiguétadu Durango, peru guizáʼ nayecheʼ biʼniʼ sentirdu.

Ti ndaayaʼ nga binibiaʼdu ca binni ni riníʼ sti diidxaʼ. Neca qué gápacabe libru ne revista ni caníʼ de Biblia lu stiidxacabe la? nabé riuuláʼdxicabe gunibiáʼcabe ne guni adorárcabe Dios ni dxandíʼ. Dede dxi que, maʼ guyé xi xhoopaʼ Testigu raqué. Guionnaʼ semana guyuucabe raqué, biindanécabe cuarenta y cinco tepehuano ni napa gana guni ni na Jiobá. Yanna, guirácabe maʼ riécabe ca guendaridagulisaa ca.

Ante guiluxe carta riʼ, racaladxeʼ guzeeteʼ sti cosa ni bizaaca. Ndaaniʼ guidxi Los Arenales, guyuu ti tienda si ne bitoo gueza, peru yanna maʼ qué rutoocabe ni. Xiñee yaʼ. ¡Purtiʼ maʼ stale tu ruundaʼ Biblia ne maʼ guirútipeʼ riguʼbaʼ gueza! Ne stale de ca binni ni nabézasicaʼ sin guichaganacaʼ, maʼ bichaganacaʼ yanna.

[Dibuju/foto ni zeeda lu yaza 25]

Melesio, xheelabe, guidapaʼ xiiñidxaapabe ne suégrabe

[Ca dibuju/foto ni zeeda lu yaza 26]

Ra cayuundanécabe binni Biblia ne ti guendaridagulisaa ni guca Los Arenales

[Paraa gucuaacabe dibuju o foto ni zeeda lu yaza 26]

Servicio Postal Mexicano, Correos de México