Cayuni invitardu lii ca guendaridagulisaa stidu

ÑEE huayuu dxi huaníʼ íqueluʼ xi raca ndaaniʼ ca Yoo stiʼ Reinu ra rié ca testigu stiʼ Jiobá la? Ñee nánnaluʼ zanda cheʼ tutiica binni ca guendaridagulisaa ni rápadu guiráʼ semana la? Ziuuláʼdxidu cheluʼ ca guendaridagulisaa stidu.

Zándaca ante cheluʼ guiníʼ íqueluʼ xiñee ridagulisaadu, xi rúnidu raqué ne xi huaníʼ caadxi binni ni cadi Testigu ni huayé.

«Bicasaa guidxi ca»

Dede dxiqué huadagulisaa stale binni para guni adorarcaʼ Dios ne guiziidicaʼ de laabe. Ma raca biaʼ chonna mil gaayuʼ gayuaa iza bidii Dios mandatu riʼ guidxi Israel: «Bicasaa guidxi ca, ca hombre ne ca gunaa ne cani nahuiiniʼ ne binni de sti ladu ni nuu ralídxiluʼ, ti gucaadiágacabe ne guiziidicabe, purtiʼ nápacabe xidé guiziidicabe guidxíbicabe Jiobá, Dios stitu, ne naquiiñeʼ gúnicabe guiráʼ ni na ley riʼ» (Deuteronomio 31:12). Guiráʼ israelita, nahuiiniʼ ne huaniisi biziidicaʼ guni adorarcaʼ ne guzuubacaʼ stiidxaʼ Jiobá Dios ra bidagulisaacaʼ.

Biaʼ ti mil gaayuʼ gayuaa iza despué, dxi maʼ guyuu religión stiʼ ca xpinni Cristu nabé bisaca para laacabe guidagulisaacabe. Apóstol Pablu bicaa sicaríʼ: «Ne naquiiñe ucáʼ ique nu acané saa nu para ganaxhii nu jma, ne guni nu ni nachaʼhuiʼ. Ne cadi guni nu casi cani rusaana de che cultu, sínuque cada tobi acané stobi para indisa ique, ne jma rusi yanna purti caduʼya nu ma zeda dxiña dxi gueeda Jesucristu Señor stícanu» (Hebreos 10:24, 25). Cadi dxandíʼ jma rannaxhii binni familia stiʼ ora ribee tiempu para chuʼné laacabe la? Ngaca nga rizaaca ca xpinni Dios ora ridagulisaacaʼ para guni adorarcaʼ laabe.

Cásica guca dxiqué, ca testigu stiʼ Jiobá ridagulisaacaʼ chupa biaje lu ti semana ndaaniʼ Yoo stiʼ Reinu, ne ngueca nga ni riziidicabe lu guidubi naca Guidxilayú. Ca guendaridagulisaa riʼ racanécani laanu guiénenu ca conseju ni zeeda lu Biblia, gúninu ni na cani ne gusisácanu cani. Peru maca nexheʼ xi guizíʼdinu lu cada tobi de laacani. Ante guzulú ca guendaridagulisaa ca ne ora maʼ biluxe cani la? riuu tiempu para guiníʼ binni xiixa ni uguu gana laacaʼ ne zacá racanésaacaʼ laacaʼ (Romanos 1:12). Yanna, ximodo raca cada tobi de ca guendaridagulisaa ca yaʼ.

Libana ni cusiidiʼ cani cá lu Biblia

Guendaridagulisaa ni runi ca testigu stiʼ Jiobá ra jma rié binni nga ni raca sábadu o domingu, racá ridiʼdiʼ ti libana para gucaadiaga guiráʼ cani cheʼ. Jesús laaca bidii libana para gucaadiaga binni dxiqué, tobi ni jma runibiáʼ binni nga ni bidiibe lu ti dani (Mateo 5:1; 7:28, 29). Apóstol Pablu laaca bidii tobi ni Atenas (Hechos 17:22-34). Ngaca nga ni raca lu guendaridagulisaa riʼ, ridiʼdiʼ ti libana para gucaadiaga guiráʼ binni cheʼ, ca binni ni deruʼ zecaʼ primé biaje laaca ziuuláʼdxicaʼ ni.

Ruzulú guendaridagulisaa ca ne ti diidxaʼ riuundaʼ ni zeeda lu libru Canten alabanzas a Jehová.a Cani chuulaʼdxiʼ la? zanda guzuhuaacaʼ ne gúʼndacaʼ. Despué raca ti oración, óraca maʼ ridiʼdiʼ ti libana ni cusiene cani cá lu Biblia, ne rindaani treinta minutu (biiyaʼ cuadru ra na «Caadxi libana ni rusiidiʼ binni guibani galán»). Ni rudii libana ca rábibe binni guyubi ca textu guiniʼbe ca lu Biblia ne chinándacaʼ laabe ra cayuundabe ni. Zanda chineluʼ Biblia stiluʼ o guinabuʼ ti Testigu gudii lii tobi ante guzulú guendaridagulisaa ca.

Ra riuundaʼ revista Torre stiʼ ni rapa

Guiluxe si libana ca maʼ riuundaʼ ti tema zeeda lu revista Torre stiʼ ni rapa, ra rinabadiidxacabe binni para guicabi ne rindaani ti hora. Guiráʼ ca tema ni riuundaʼ ca cusiénecani ti cosa zeeda lu Biblia. Cani rié guendaridagulisaa riʼ rinándacaʼ ejemplu stiʼ ca judíu ni guyuu Berea, dxi bibani apóstol Pablu. Ca binni que «bicaa diaga ca stiidxa Dios ne stale gana ne irá dxi ma cuyubi ca lu Xquiʼchi Dios pa jneza ni caziidi ca» (Hechos 17:11).

Guendaridagulisaa riʼ ruzuluni ne ti diidxaʼ riuundaʼ, ne riquiiñeʼ revista ni chiguiuundaʼ, ra reeda ti tema para cada semana. Zanda guinábaluʼ tobi de laani ti Testigu. Ndiʼ nga caadxi de ca tema ni biuundaʼ cadi xadxipeʼ: «Lagusiidiʼ xiiñitu ne guendarannaxhii», «Neca uchee né cabe laatu, cadi uquixe tu ni laacabe» ne «Mayaca guiree guiráʼ yuubaʼ». Neca rinabadiidxaʼ ni cudii libana ca, binni nga guicabi pa gacalaʼdxiʼ. Stale de cani ricabi maʼ biindacaʼ tema ca dede ante ne ca textu zeeda luni, ti zacá gánnacaʼ xi guicábicaʼ. Riluxe guendaridagulisaa riʼ ne ti diidxaʼ riuundaʼ ne raca ti oración (Mateo 26:30; Efesios 5:19).

Guendaridagulisaa ra Riuundaʼ Biblia

Ca testigu stiʼ Jiobá laaca ridagulisaacaʼ ti biaje lu ti semana ndaaniʼ Yoo stiʼ Reinu. Dxi ca raca chonna guendaridagulisaa ne rindaa cani ti hora ne cuarenta y cinco minutu. Primé ca láʼ Guendaridagulisaa ra Riuundaʼ Biblia ne rácani veinticinco minutu. Laani racaneni cani cheʼ gánnacaʼ xi cusiidiʼ Biblia, rucaani laaca guchaacaʼ modo riníʼ íquecaʼ ne ni rúnicaʼ, para gusihuínnicaʼ dxandíʼ nácacaʼ xpinni Cristu (2 Timoteo 3:16, 17). Laaca rinabadiidxacabe ora maʼ cayácani, cásica raca ora riuundaʼ revista Torre stiʼ ni rapa, ne zanda guicabi cani gacalaʼdxiʼ. Jma nga riquiiñeʼ ti libru o ti folletu ni biʼniʼ ca testigu stiʼ Jiobá.

Zándaca guiniʼluʼ xiñee riquiiñedu xcaadxi libru ne cadi Biblia si lu ca guendaridagulisaa stidu. Peru, ca xpinni Dios ni bibani dxiqué laaca cadi Stiidxaʼ Dios si biindacaʼ. Biblia na biindacabe ne bisiénecabe ley stiʼ Dios, ne gudíxhecabe ejemplu para guiene binni ni cayunadiaga (Nehemías 8:8). Nga runi, lu chupa chonna iza ni maʼ gudiʼdiʼ ca maʼ bidúʼndadu caadxi libru ni cusiene cani zeeda lu Isaías, Daniel ne Apocalipsis, nabé huayacanécani laadu guiénedu jma cani cá lu Biblia.

Scuela stiʼ cani Rucheeche Diidxaʼ

Ora maʼ biluxe Guendaridagulisaa ra Riuundaʼ Biblia ca ruzulú Scuela stiʼ cani Rucheeche Diidxaʼ, rácani treinta minutu ne racaneni ca xpinni Cristu gánnacaʼ gusiidicaʼ jneza (2 Timoteo 4:2). Ñee huanabadiidxaʼ xiiñiluʼ o ti xhamíguluʼ lii xiixa de Dios o de Biblia ni qué ñanda nicábiluʼ la? Lu Scuela riʼ riziidiʼ binni iquiiñeʼ Biblia para guicabi intiica ni guinabadiidxacabe laa. Ne zacá zanda guininu cásica guníʼ Isaías ni riguixhená que: «Jiobá, Señor ni jma Nandxóʼ maʼ bisiidiʼ naa xi guiniéʼ para gusiecheʼ ladxidóʼ cani maʼ bidxaga» (Isaías 50:4).

Scuela stiʼ cani Rucheeche Diidxaʼ ca ruzulú ni ne ti libana ni zeeda lu chupa chonna capítulo stiʼ Biblia, cani rié ca maʼ biindacaʼ ni semana ca. De racá rinabaʼ ni cudii libana ca laacabe gusiénecabe xiixa de ni biindacabe ni jma guyuuláʼdxicabe. Óraca maʼ ridiʼdiʼ cani cá lá lu Scuela ca.

Cani cá lá lu Scuela ca ridíʼdicaʼ lu plataforma para gúʼndacaʼ ti ndaa de lu Biblia o para guluiʼcaʼ ximodo nusiénecaʼ xiixa tema stiʼ Biblia tuuxa binni. Ora maʼ gudiʼdiʼ cada tobi de ca libana ca, ni cutiidiʼ Scuela ca riquiiñeʼ libru Benefíciese de la Escuela del Ministerio Teocrático para gábibe laacaʼ xiñee galán modo gudíʼdicaʼ libana sticaʼ. Despué, ora maʼ bilúxeni zabinebe cada tobi de laacaʼ para gudiibe xiixa conseju ti zacá ganda gúnicaʼ ni jma jneza.

Scuela riʼ cadi racanésini cani rutiidiʼ libana, sínuque laaca racaneni guiráʼ cani cucaadiaga ti guiziidicaʼ gúʼndacaʼ, guicábicaʼ ne gánnacaʼ gusiidicaʼ. Guiluxe si Scuela stiʼ cani Rucheeche Diidxaʼ ca, ruzulú Guendaridagulisaa stiʼ Dxiiñaʼ Stinu ne ti diidxaʼ riuundaʼ ni biree lu ti textu stiʼ Biblia.

Guendaridagulisaa stiʼ Dxiiñaʼ Stinu

Maʼ para guiluxe ni, raca Guendaridagulisaa stiʼ Dxiiñaʼ Stinu. Raríʼ ridiʼdiʼ libana, ridiʼdiʼ ca xpinni Cristu para guluiʼcaʼ ximodo gusaanacaʼ revista ne ricabi cani cucaadiaga, sicaríʼ nga raca para guluíʼcabe ximodo zanda gusiidiʼ binni ni cá lu Stiidxaʼ Dios. Zacaca biʼniʼ Jesús ne ca discípulo stiʼ, ante guseendabe laacaʼ chigucheechecaʼ diidxaʼ gúdxibe laacaʼ ximodo gúnicaʼ ni (Lucas 10:1-16). Ni biziidicabe riʼ gucaneni laacabe cueendúcabe stale cosa galán, ne despué gúdxicabe ni Jesús (Lucas 10:17). Biblia na laaca gúdxicabe ni bizaacabe que xcaadxi discípulo (Hechos 4:23; 15:4).

Modo nexheʼ gaca guendaridagulisaa de treinta y cinco minutu riʼ zeedani lu ti guiʼchiʼ ni láʼ Xhiiñaʼ Reinu ni Rúninu. Cadi xadxipeʼ de biuundaʼ ca tema riʼ: «Ca familia ni runi adorar Jiobá», «Xiñee qué rusaananu de chigánnanu binni» ne «Gúninu casi biʼniʼ Cristu ora gucheechenu diidxaʼ». Guendaridagulisaa riʼ rilúxeni ne ti diidxaʼ riuundaʼ ne ti oración ni runi ti xpinni Cristu.

Xi huaníʼ caadxi binni ni huayé

Cani nuu raqué rúnicaʼ stipa pur guidxagalucaʼ binni galán. Casi Andrew, laabe binadiágabe stale cosa feu de ca testigu stiʼ Jiobá. Peru ra guyebe primé guendaridagulisaa riʼ guizáʼ guyuuláʼdxibe modo bidxagalúcabe laabe. Laabe guniʼbe: «Guizáʼ guyuuladxeʼ chuaa raqué, bidxagayaa modo nachaʼhuiʼ ca binni que, ne guirácabe nuucabe gánnacabe tu naa». Ti baʼdudxaapaʼ de Canadá, láʼ Ashel, laaca bizaaca zacaca, nabe: «Guendaridagulisaa ca nabé sicarú ni. Nagueendaca bieneʼ modo raca ni».

Guidúʼyanu xi bizaaca José, ti hombre ni nabeza Brasil. Hombre riʼ runibiáʼ binni laa casi tuuxa ni nabé nagueenda ridxiichi, peru neca zaqué biʼniʼ invitárcabe laabe para chebe ti guendaridagulisaa ndaaniʼ Yoo stiʼ Reinu. Laabe guniʼbe: «Neca nanna guiráʼ cani nuu ndaaniʼ Yoo que tu naa, peru gúcacaʼ nachaʼhuiʼ ne naa». Ti japonés láʼ Atsushi, na sicaríʼ: «Primé biaje guyaa ti guendaridagulisaa stiʼ ca testigu stiʼ Jiobá la? gadxé si guca ni para naa. Peru bidiéʼ cuenta binni casi laanu laacabe ne racaláʼdxicabe chuaa galán ládecabe».

Ziuuláʼdxidu cheluʼ

Casi maʼ bidiiluʼ cuenta ne ni guníʼ ca binni riʼ, zabeenduluʼ ni galán pa cheluʼ ca guendaridagulisaa riʼ ndaaniʼ Yoo stiʼ Reinu. Raríʼ zaziidiluʼ ximodo nga Jiobá Dios, ne laabe zusiidibe lii stale cosa ni zacané lii (Isaías 48:17).

Lu ca guendaridagulisaa stiʼ ca testigu stiʼ Jiobá riʼ zanda cheʼ tutiica binni ne qué riaxa diʼ. Ñuulaʼdxuʼ nigannuʼ laadu ti dxi la? Ziéchedu stale gúʼyaduʼ lii ndaaniʼ Yoo stiʼ Reinu riʼ.

[Cani cá ñee yaza]

[Cuadru ni zeeda lu yaza 21]

Caadxi libana ni rusiidiʼ binni guibani galán

Nuu jma de ti gayuaa setenta libana ni cusiidiʼ ni cá lu Biblia. Ndiʼ nga caadxi de laacani:

◼ Ñee zanda guni crenu ora riníʼ binni ziúpanu de ti maniʼ la?

◼ Xiñee qué riuulaʼdxiʼ Dios chuʼné binni tuuxa ni cadi xheelaʼ ne xi riníʼ íquebe de guendaxheelaʼ

◼ Zunitilú Dios ca binni ni cunitilú Guidxilayú

◼ Ximodo gudxíʼlunu ca guendanagana ni rápanu

◼ Ñee sicaríʼ nga na Dios guibáninu la?

[Dibuju/foto ni zeeda lu yaza 21]

Libana ni cusiidiʼ cani cá lu Biblia

[Dibuju/foto ni zeeda lu yaza 21]

Ra riuundaʼ revista Torre stiʼ ni rapa

[Dibuju/foto ni zeeda lu yaza 22]

Guendaridagulisaa ra Riuundaʼ Biblia

[Dibuju/foto ni zeeda lu yaza 22]

Scuela stiʼ cani Rucheeche Diidxaʼ

[Dibuju/foto ni zeeda lu yaza 23]

Guendaridagulisaa stiʼ Dxiiñaʼ Stinu